Utshovসর্গ 99
99.1
মহোদরে তু নিহতে মহাপার্শ্বো মহাবলঃ।
সুগ্রীবেণ সমীক্ষ্যাথ ক্রোধাৎ সংরক্তলোচনঃ।অঙ্গদস্য চমূং ভীমাং ক্ষোভয়ামাস সায়কৈঃ ।। ৬.৯৯.১ ।।
99.2
স বানরাণাং মুখ্যানামুত্তমাঙ্গানি সর্বশঃ।
পাতয়ামাস কায়েভ্যঃ ফলং বৃন্তাদিবানিলঃ ।। ৬.৯৯.২ ।।
99.3
কেষাঞ্চিদিষুভির্বাহূন্ স্কন্ধাংশ্চিচ্ছেদ রাক্ষসঃ।
বানরাণাং সুসঙ্ক্রুদ্ধঃ পার্শ্বং কেষাং ব্যদারয়ৎ ।। ৬.৯৯.৩ ।।
99.4
তে ঽর্দিতা বাণবর্ষেণ মহাপার্শ্বেন বানরাঃ।
বিষাদবিমুখাঃ সর্বে বভূবুর্গতচেতসঃ ।। ৬.৯৯.৪ ।।
99.5
নিরীক্ষ্য বলমুদ্বিগ্নমঙ্গদো রাক্ষসার্দিতম্।
বেগং চক্রে মহাবাহুঃ সমুদ্র ইব পর্বণি ।। ৬.৯৯.৫ ।।
99.6
আয়সং পরিঘং গৃহ্য সূর্যরশ্মিসমপ্রভম্।
সমরে বানরশ্রেষ্ঠো মহাপার্শ্বে ন্যপাতয়ৎ ।। ৬.৯৯.৬ ।।
99.7
স তু তেন প্রহারেণ মহাপার্শ্বো বিচেতনঃ।
সসূতঃ স্যন্দনাত্তস্মাদ্বিসঞ্জ্ঞঃ প্রাপতদ্ভুবি ।। ৬.৯৯.৭ ।।
99.8
সর্ক্ষরাজস্তু তেজস্বী নীলাঞ্জনচয়োপমঃ।
নিষ্পত্য সুমহাবীর্যঃ স্বাদ্ব্যূহান্মেঘসন্নিভাৎ ।। ৬.৯৯.৮ ।।
99.9
প্রগৃহ্য গিরিশৃঙ্গাভাং ক্রুদ্ধঃ সুবিপুলাং শিলাম্।
অশ্বান্ জঘান তরসা স্যন্দনং চ বভঞ্জ তম্ ।। ৬.৯৯.৯ ।।
99.10
মুহূর্তাল্লব্ধসঞ্জ্ঞস্তু মহাপার্শ্বো মহাবলঃ।
অঙ্গদং বহুভির্বাণৈর্ভূয়স্তং প্রত্যবিধ্যত ।। ৬.৯৯.১০ ।।
99.11
জাম্ববন্তং ত্রিভির্বাণৈরাজঘান স্তনান্তরে।
ঋক্ষরাজং গবাক্ষং চ জঘান বহুভিঃ শরৈঃ ।। ৬.৯৯.১১ ।।
99.12
জাম্ববন্তং গবাক্ষং চ স দৃষ্ট্বা শরপীডিতৌ।
জগ্রাহ পরিঘং ঘোরমঙ্গদঃ ক্রোধমূর্চ্ছিতঃ ।। ৬.৯৯.১২ ।।
99.13
তস্যাঙ্গদঃ প্রকুপিতো রাক্ষসস্য তমায়সম্।
দূরস্থিতস্য পরিঘং রবিরশ্মিসমপ্রভম্ ।। ৬.৯৯.১৩ ।।
99.14
দ্বাভ্যাং ভুজাভ্যাং সঙ্গৃহ্য ভ্রাময়িত্বা চ বেগবান্।
মহাপার্শ্বস্য চিক্ষেপ বধার্থং বালিনঃ সুতঃ ।। ৬.৯৯.১৪ ।।
99.15
স তু ক্ষিপ্তো বলবতা পরিঘস্তস্য রক্ষসঃ।
ধনুশ্চ সশরং হস্তাচ্ছিরস্ত্রং চাপ্যপাতয়ৎ ।। ৬.৯৯.১৫ ।।
99.16
তং সমাসাদ্য বেগেন বালিপুত্রঃ প্রতাপবান্।
তলেনাভ্যহনৎ ক্রুদ্ধঃ কর্ণমূলে সকুণ্ডলে ।। ৬.৯৯.১৬ ।।
99.17
স তু ক্রুদ্ধো মহাবেগো মহাপার্শ্বো মহাদ্যুতিঃ।
করেণৈকেন জগ্রাহ সুমহান্তং পরশ্বধম্ ।। ৬.৯৯.১৭ ।।
99.18
তং তৈলধৌতং বিমলং শৈলসারময়ং দৃঢম্।
রাক্ষসঃ পরমক্রুদ্ধো বালিপুত্রে ন্যপাতয়ৎ ।। ৬.৯৯.১৮ ।।
99.19
তেন বামাংসফলকে ভৃশং প্রত্যবপাদিতম্।
অঙ্গদো মোক্ষয়ামাস সরোষঃ স পরশ্বধম্ ।। ৬.৯৯.১৯ ।।
99.20
স বীরো বজ্রসঙ্কাশমঙ্গদো মুষ্টিমাত্মনঃ।
সংবর্তয়ৎ সুসঙ্ক্রুদ্ধঃ পিতুস্তুল্যপরাক্রমঃ ।। ৬.৯৯.২০ ।।
99.21
রাক্ষসস্য স্তনাভ্যাশে মর্মজ্ঞো হৃদয়ং প্রতি।
ইন্দ্রাশনিসমস্পর্শং স মুষ্টিং বিন্যপাতয়ৎ ।। ৬.৯৯.২১ ।।
99.22
তেন তস্য নিপাতেন রাক্ষসস্য মহামৃধে।
পফাল হৃদয়ং চাশু স পপাত হতো ভুবি ।। ৬.৯৯.২২ ।।
99.23
তস্মিন্নিপতিতে ভূমৌ তৎ সৈন্যং সম্প্রচুক্ষুভে।
অভবচ্চ মহান্ ক্রোধঃ সমরে রাবণস্য তু ।। ৬.৯৯.২৩ ।।
99.24
বানরাণাং চ হৃষ্টানাং সিংহনাদশ্চ পুষ্কলঃ।
স্ফোটয়ন্নিব শব্দেন লঙ্কাং সাট্টালগোপুরাম্ ।। ৬.৯৯.২৪ ।।
99.25
মহেন্দ্রেণেব দেবানাং নাদঃ সমভবন্মহান্ ।
। ৬.৯৯.২৫ ।।
99.26
অথেন্দ্রশত্রুস্ত্রিদিবালয়ানাং বনৌকসাং চৈব মহাপ্রণাদম্।
শ্রুত্বা সরোষং যুধি রাক্ষসেন্দ্রঃ পুনশ্চ যুদ্ধাভিমুখো ঽবতস্থে ।। ৬.৯৯.২৬ ।।
99.27
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একোনশততমঃ সর্গঃ ।
। ৯৯ ।।