Utshovসর্গ 67
67.1
এবমুক্তস্তু হনুমান্ রাঘবেণ মহাত্মনা ।
সীতায়া ভাষিতং সর্বং ন্যবেদয়ত রাঘবে ।। ৫.৬৭.১ ।।।।
67.2
ইদমুক্তবতী দেবী জানকী পুরুষর্ষভ ।
পূর্ববৃত্তমভিজ্ঞানং চিত্রকূটে যথাতথম্ ।। ৫.৬৭.২ ।।।।
67.3
সুখসুপ্তা ত্বয়া সার্ধং জানকী পূর্বমুত্থিতা ।
বায়সঃ সহসোত্পত্য বিররাদ স্তনান্তরে ।। ৫.৬৭.৩ ।।।।
67.4
পর্যায়েণ চ সুপ্তস্ত্বং দেব্যঙ্কে ভরতাগ্রজ ।
পুনশ্চ কিল পক্ষী স দেব্যা জনয়তি ব্যথাম্ ।। ৫.৬৭.৪ ।।।।
67.5
পুনঃ পুনরুপাগম্য বিররাদ ভৃশং কিল ।
ততস্ত্বং বোধিতস্তস্যাঃ শোণিতেন সমুক্ষিতঃ ।। ৫.৬৭.৫ ।।।।
67.6
বায়সেন চ তেনৈব সততং বাধ্যমানয়া ।
বোধিতঃ কিল দেব্যা ত্বং সুখসুপ্তঃ পরন্তপ ।। ৫.৬৭.৬ ।।।।
67.7
তাং তু দৃষ্ট্বা মহাবাহো দারিতাং চ স্তনান্তরে ।
আশীবিষ ইব ক্রুদ্ধো নিঃশ্বসন্নভ্যভাষথাঃ ।। ৫.৬৭.৭ ।।।।
67.8
নখাগ্রৈঃ কেন তে ভীরু দারিতং তু স্তনান্তরম্ ।
কঃ ক্রীডতি সরোষেণ পঞ্চবক্ত্রেণ ভোগিনা ।। ৫.৬৭.৮ ।।।।
67.9
নিরীক্ষমাণঃ সহসা বায়সং সমবৈক্ষথাঃ ।
নখৈঃ সরুধিরৈস্তীক্ষ্ণৈস্তামেবাভিমুখং স্থিতম্ ।। ৫.৬৭.৯ ।।।।
67.10
সুতঃ কিল স শক্রস্য বায়সঃ পততাং বরঃ ।
ধরান্তরচরঃ শীঘ্রং পবনস্য গতৌ সমঃ ।। ৫.৬৭.১০ ।।।।
67.11
ততস্তস্মিন্ মহাবাহো কোপসংবর্তিতেক্ষণঃ ।
বায়সে ত্বং কৃথাঃ ক্রূরাং মতিং মতিমতাং বর ।। ৫.৬৭.১১ ।।।।
67.12
স দর্ভং সংস্তরাদ্ গৃহ্য ব্রহ্মাস্ত্রেণ হ্যয়োজয়ঃ ।
স দীপ্ত ইব কালাগ্নির্জজ্বালাভিমুখঃ খগম্ ।। ৫.৬৭.১২ ।।।।
67.13
ক্ষিপ্তবাংস্ত্বং প্রদীপ্তং হি দর্ভং তং বায়সং প্রতি ।
ততস্তু বায়সং দীপ্তঃ স দর্ভো ঽনুজগাম হ ।। ৫.৬৭.১৩ ।।।।
67.14
স পিত্রা চ পরিত্যক্তঃ সুরৈশ্চ সমহর্ষিভিঃ ।
ত্রিল্লোকান্ সংপরিক্রম্য ত্রাতারং নাধিগচ্ছতি ।। ৫.৬৭.১৪ ।।।।
67.15
পুনরেবাগতস্ত্রস্তস্ত্বকাশমরিন্দম ।
স তং নিপতিতং ভূমৌ শরণ্যঃ শরণাগতম্ ।। ৫.৬৭.১৫ ।।।।
67.16
বধার্হমপি কাকুত্স্থ কৃপয়া পর্যপালয়ঃ ।
। ৫.৬৭.১৬ ।।।।
67.17
মোঘমস্ত্রং ন শক্যং তু কর্তুমিত্যেব রাঘব ।
ভবাংস্তস্যাক্ষি কাকস্য হিনস্তি স্ম স দক্ষিণম্ ।। ৫.৬৭.১৭ ।।।।
67.18
রাম ত্বাং স নমস্কৃত্য রাজ্ঞে দশরথায় চ ।
বিসৃষ্টস্তু তদা কাকঃ প্রতিপেদে স্বমালয়ম্ ।। ৫.৬৭.১৮ ।।।।
67.19
এবমস্ত্রবিদাং শ্রেষ্ঠঃ সত্ত্ববাঞ্ছীলবানপি ।
কিমর্থমস্ত্রং রক্ষস্সু ন যোজয়তি রাঘবঃ ।। ৫.৬৭.১৯ ।।।।
67.20
ন নাগা নাপি গন্ধর্বা নাসুরা ন মরুদ্গণাঃ ।
ন চ সর্বে রণে শক্তা রামং প্রতিসমাসিতুম্ ।। ৫.৬৭.২০ ।।।।
67.21
তস্য বীর্যবতঃ কশ্চিদ্যদ্যস্তি ময়ি সম্ভ্রমঃ ।
ক্ষিপ্রং সুনিশিতৈর্বাণৈর্হন্যতাং যুধি রাবণঃ ।। ৫.৬৭.২১ ।।।।
67.22
ভ্রাতুরাদেশমাজ্ঞায় লক্ষ্মণো বা পরন্তপঃ ।
স কিমর্থং নরবরো ন মাং রক্ষতি রাঘবঃ ।। ৫.৬৭.২২ ।।।।
67.23
শক্তৌ তৌ পুরুষব্যাঘ্রৌ বায্বগ্নিসমতেজসৌ ।
সুরাণামপি দুর্ধর্ষৌ কিমর্থং মামুপেক্ষতঃ ।। ৫.৬৭.২৩ ।।।।
67.24
মমৈব দুষ্কৃতং কিংচিন্মহদস্তি ন সংশয়ঃ ।
সমর্থো সহিতৌ যন্মাং নাবেক্ষেতে পরন্তপৌ ।। ৫.৬৭.২৪ ।।।।
67.25
বৈদেহ্যা বচনং শ্রুত্বা করুণং সাশ্রুভাষিতম্ ।
পুনরপ্যহমার্যাং তামিদং বচনমব্রুবম্ ।। ৫.৬৭.২৫ ।।।।
67.26
ত্বচ্ছোকবিমুখো রামো দেবি সত্যেন তে শপে ।
রামে দুঃখাভিভূতে তু লক্ষ্মণঃ পরিতপ্যতে ।। ৫.৬৭.২৬ ।।।।
67.27
কথংচিদ্ভবতী দৃষ্টা ন কালঃ পরিশোচিতুম্ ।
ইম মুহূর্তং দুঃখানামন্তং দ্রক্ষ্যসি ভামিনি ।। ৫.৬৭.২৭ ।।।।
67.28
তাবুভৌ নরশার্দূলৌ রাজপুত্রাবনিন্দিতৌ ।
ত্বদ্দর্শনকৃতোত্সাহৌ লঙ্কাং ভস্মীকরিষ্যতঃ ।। ৫.৬৭.২৮ ।।।।
67.29
হত্বা চ সমরে রৌদ্র রাবণ সহবান্ধবম্ ।
রাঘবস্ত্বাং বরারোহে স্বাং পুরীং নয়তে ধ্রুবম্ ।। ৫.৬৭.২৯ ।।।।
67.30
যত্তু রামো বিজানীয়াদভিজ্ঞানমনিন্দিতে ।
প্রীতিসঞ্জননং তস্য প্রদাতুং ত্বমিহার্হসি ।। ৫.৬৭.৩০ ।।।।
67.31
সা ঽভিবীক্ষ্য দিশঃ সর্বা বেণ্যুদ্গ্রথনমুত্তমম্ ।
মুক্ত্বা বস্ত্রাদ্দদৌ মহ্যং মণিমেতং মহাবল ।। ৫.৬৭.৩১ ।।।।
67.32
প্রতিগৃহ্য মণিং দিব্যং তব হেতো রঘূদ্বহ ।
শিরসা তাং প্রণম্যার্যামহমাগমনে ত্বরে ।। ৫.৬৭.৩২ ।।।।
67.33
গমনে চ কৃতোত্সাহমবেক্ষ্য বরবর্ণিনী ।
বিবর্ধমানং চ হি মামুবাচ জনকাত্মজা ।। ৫.৬৭.৩৩ ।।।।
67.34
অশ্রুপূর্ণমুখী দীনা বাষ্পসন্দিগ্ধভাষিণী ।
মমোত্পতনসম্ভ্রান্তা শোকবেগসমাহতা ।। ৫.৬৭.৩৪ ।।।।
67.35
হনুমন্ সিংহসঙ্কাশাবুভৌ তৌ রামলক্ষ্মণৌ ।
সুগ্রীবং চ সহামাত্য সর্বান্ ব্রূয়া হ্যনাময়ম্ ।। ৫.৬৭.৩৫ ।।।।
67.36
যথা চ স মহাবাহুর্মাং তারয়তি রাঘবঃ ।
অসমাদ্দুঃখাম্বুসংরোধাত্ত্বং সমাধাতুমর্হসি ।। ৫.৬৭.৩৬ ।।।।
67.37
ইমং চ তীব্রং মম শোকবেগং রক্ষোভিরেভিঃ পরিভর্ত্সনং চ ।
ব্রূয়াস্তু রামস্য গতঃ সমীপং শিবশ্চ তে ঽধ্বা ঽস্তু হরিপ্রবীর ।। ৫.৬৭.৩৭ ।।।।
67.38
এতত্তবার্যা নৃপরাজসিংহ সীতা বচঃ প্রাহ বিষাদপূর্বম্ ।
এতচ্চ বুদ্ধ্বা গদিতং ময়া ত্বং শ্রদ্ধত্স্ব সীতাং কুশলাং সমগ্রাম্ ।। ৫.৬৭.৩৮ ।।