সর্গ 66

66.1

এবমুক্তো হনুমতা রামো দশরথাত্মজঃ ।
তং মণিং হৃদয়ে কৃত্বা প্ররুরোদ সলক্ষ্মণঃ ।। ৫.৬৬.১ ।।।।

তং তু দৃষ্ট্বা মণিশ্রেষ্ঠং রাঘবঃ শোককর্শিতঃ ।
নেত্রাভ্যামশ্রুপূর্ণাভ্যাং সুগ্রীবমিদমব্রবীৎ ।। ৫.৬৬.২ ।।।।

যথৈব ধেনুঃ স্রবতি স্নেহাদ্বত্সস্য বত্সলা ।
তথা মমাপি হৃদয়ং মণিরত্নস্য দর্শনাৎ ।। ৫.৬৬.৩ ।।।।

মণিরত্নমিদং দত্তং বৈদেহ্যাঃ শ্বশুরেণ মে ।
বধূকালে যথা বদ্ধমধিকং মূর্ধ্নি শোভতে ।। ৫.৬৬.৪ ।।।।

অয়ং হি জলসম্ভূতো মণিঃ সজ্জনপূজিতঃ ।
যজ্ঞে পরমতুষ্টেন দত্তঃ শক্রেণ ধীমতা ।। ৫.৬৬.৫ ।।।।

ইমং দৃষ্ট্বা মণিশ্রেষ্ঠং যথা তাতস্য দর্শনম্ ।
অদ্যাস্ম্যবগতঃ সৌম্য বৈদেহস্য তথা বিভোঃ ।। ৫.৬৬.৬ ।।।।

অয়ং হি শোভতে তস্যাঃ প্রিয়ায়া মূর্ধ্নি মে মণিঃ ।
অস্যাদ্য দর্শনেনাহং প্রাপ্তাং তামিব চিন্তয়ে ।। ৫.৬৬.৭ ।।।।

কিমাহ সীতা বৈদেহী ব্রূহি সৌম্য পুনঃ পুনঃ ।
পিপাসুমিব তোয়েন সিঞ্চন্তি বাক্যবারিণা ।। ৫.৬৬.৮ ।।।।

ইতস্তু কিং দুঃখতরং যদিমং বারিসম্ভবম্ ।
মণিং পশ্যামি সৌমিত্রে বৈদেহীমাগতং বিনা ।। ৫.৬৬.৯ ।।।।

চিরং জীবতি বৈদেহী যদি মাসং ধরিষ্যতি ।
ক্ষণং সৌম্য ন জীবেয়ং বিনা তামসিতেক্ষণাম্ ।। ৫.৬৬.১০ ।।।।

নয় মামপি তং দেশং যত্র দৃষ্টা মম প্রিয়া ।
ন তিষ্ঠেয়ং ক্ষণমপি প্রবৃত্তিমুপলভ্য চ ।। ৫.৬৬.১১ ।।।।

কথং সা মম সুশ্রোণী ভীরুভীরুঃ সতী সদা ।
ভয়াবহানাং ঘোরাণাং মধ্যে তিষ্ঠতি রক্ষসাম্ ।। ৫.৬৬.১২ ।।।।

শারদস্তিভিরোন্মুক্তো নূনং চন্দ্র ইবাম্বুদৈঃ ।
আবৃতং বদনং তস্যা ন বিরাজতি রাক্ষসৈঃ ।। ৫.৬৬.১৩ ।।।।

কিমাহ সীতা হনুংস্তত্ত্বতঃ কথয়াদ্য মে ।
এতেন খলু জীবিষ্যে ভেষজেনাতুরো যথা ।। ৫.৬৬.১৪ ।।।।

মধুরা মধুরালাপা কিমাহ মম ভামিনী ।
মদ্বিহীনা বরারোহা হনুমন্ কথয়স্ব মে ।। ৫.৬৬.১৫ ।।