Utshovসর্গ 68
68.1
অথাহমুত্তরং দেব্যা পুনরুক্তঃ সসম্ভ্রমঃ ।
তব স্নেহান্নরব্যাঘ্র সৌহার্দাদনুমান্য বৈ ।। ৫.৬৮.১ ।।।।
68.2
এবং বহুবিধং বাচ্যো রামো দাশরথিস্ত্বয়া ।
যথা মামাপ্নুয়াচ্ছীঘ্রং হত্বা রাবণমাহবে ।। ৫.৬৮.২ ।।।।
68.3
যদি বা মন্যসে বীর বসৈকাহমরিন্দম ।
কস্মিংশ্চিত্সংবৃতে দেশে বিশ্রান্তঃ শ্বো গমিষ্যসি ।। ৫.৬৮.৩ ।।।।
68.4
মম চাপ্যল্পভাগ্যায়াঃ সান্নিধ্যাত্তব বীর্যবন্ ।
অস্য শোকবিপাকস্য মুহূর্তং স্যাদ্বিমোক্ষণম্ ।। ৫.৬৮.৪ ।।।।
68.5
গতে হি ত্বয়ি বিক্রান্তে পুনরাগমনায় বৈ ।
প্রাণানামপি সন্দেহো মম স্যান্নাত্র সংশয়ঃ ।। ৫.৬৮.৫ ।।।।
68.6
তবাদর্শনজঃ শোকো ভূয়ো মাং পরিতাপয়েৎ ।
দুঃখাদ্দুঃখপরাভূতাং দুর্গতাং দুঃখভাগিনীম্ ।। ৫.৬৮.৬ ।।।।
68.7
অয়ং চ বীর সন্দেহস্তিষ্ঠতীব মমাগ্রতঃ ।
সুমহাংস্ত্বত্সহায়েষু হর্যৃক্ষেষু হরীশ্বর ।। ৫.৬৮.৭ ।।।।
68.8
কথং নু খলু দুষ্পারং তরিষ্যন্তি মহোদধিম্ ।
তানি হর্যৃক্ষসৈন্যানি তৌ বা নরবরাত্মজৌ ।। ৫.৬৮.৮ ।।।।
68.9
ত্রয়াণামেব ভূতানাং সাগরস্যাস্য লঙ্ঘনে ।
শক্তিঃ স্যাদ্বৈনতেয়স্য তব বা মারুতস্য বা ।। ৫.৬৮.৯ ।।।।
68.10
তদস্মিন্ কার্যনির্যোগে বীরৈবং দুরতিক্রমে ।
কিং পশ্যসি সমাধানং ব্রূহি কার্যবিদাং বর ।। ৫.৬৮.১০ ।।।।
68.11
কামমস্য ত্বমেবৈকঃ কার্যস্য পরিসাধনে ।
পর্যাপ্তঃ পরবীরঘ্ন যশস্যস্তে বলোদয়ঃ ।। ৫.৬৮.১১ ।।৮.১০ ।।।।
68.12
বলৈঃ সমগ্রৈর্যদি মাং হত্বা রাবণমাহবে ।
বিজয়ী স্বাং পুরীং রামো নয়েত্তৎ স্যাদ্যশস্করম্ ।। ৫.৬৮.১২ ।।।।
68.13
যথা ঽহং তস্য বীরস্য বনাদুপধিনা হৃতা ।
রক্ষসা তদ্ভয়া দেব তথা নার্হতি রাঘবঃ ।। ৫.৬৮.১৩ ।।।।
68.14
বলৈস্তু সঙ্কুলাং কৃত্বা লঙ্কাং পরবলার্দনঃ ।
মাং নয়েদ্যদি কাকুত্স্থস্তত্তস্য সদৃশং ভবেৎ ।। ৫.৬৮.১৪ ।।।।
68.15
তদ্যথা তস্য বিক্রান্তমনুরূপং মহাত্মনঃ ।
ভবত্যাহবশূরস্য তথা ত্বমুপপাদয় ।। ৫.৬৮.১৫ ।।।।
68.16
তদর্থোপহিতং বাক্যং প্রশ্রিতং হেতুসংহিতম্ ।
নিশম্যাহং ততঃ শেষং বাক্যমুত্তরমব্রুবম্ ।। ৫.৬৮.১৬ ।।।।
68.17
দেবি হর্যৃক্ষসৈন্যানামীশ্বরঃ প্লবতাং বরঃ ।
সুগ্রীবঃ সত্ত্বসম্পন্নস্তবার্থে কৃতনিশ্চয়ঃ ।। ৫.৬৮.১৭ ।।।।
68.18
তস্য বিক্রমসম্পন্নাঃ সত্ত্ববন্তো মহাবলাঃ ।
মনস্সঙ্কল্পসম্পাতা নিদেশে হরয়ঃ স্থিতাঃ ।। ৫.৬৮.১৮ ।।।।
68.19
যেষাং নোপরি নাধস্তান্ন তির্যক্ সজ্জতে গতিঃ ।
ন চ কর্মসু সীদন্তি মহত্স্বমিততেজসঃ ।। ৫.৬৮.১৯ ।।।।
68.20
অসকৃত্তৈর্মহাভাগৈর্বানরৈর্বলদর্পিতৈঃ ।
প্রদক্ষিণীকৃতা ভূমির্বায়ুমার্গানুসারিভিঃ ।। ৫.৬৮.২০ ।।।।
68.21
মদ্বিশিষ্টাশ্চ তুল্যাশ্চ সন্তি তত্র বনৌকসঃ ।
মত্তঃ প্রত্যবরঃ কশ্চিন্নাস্তি সুগ্রীবসন্নিধৌ ।। ৫.৬৮.২১ ।।।।
68.22
অহং তাবদিহ প্রাপ্তঃ কিং পুনস্তে মহাবলাঃ ।
ন হি প্রকৃষ্টাঃ প্রেষ্যন্তে প্রেষ্যন্তে হীতরে জনাঃ ।। ৫.৬৮.২২ ।।।।
68.23
তদলং পরিতাপেন দেবি মন্যুর্ব্যপৈতু তে ।
একোত্পাতেন বৈ লঙ্কামেষ্যন্তি হরিয়ূথপাঃ ।। ৫.৬৮.২৩ ।।।।
68.24
মম পৃষ্ঠগতৌ তৌ চ চন্দ্রসূর্যাবিবোদিতৌ ।
ত্বত্সকাশং মহাভাগে নৃসিংহাবাগমিষ্যতঃ ।। ৫.৬৮.২৪ ।।।।
68.25
অরিঘ্নং সিংহসঙ্কাশং ক্ষিপ্রং দ্রক্ষ্যসি রাঘবম্ ।
লক্ষ্মণং চ ধনুষ্পাণীং লঙ্কাদ্বারমুপস্থিতম্ ।। ৫.৬৮.২৫ ।।।।
68.26
নখদংষ্ট্রায়ুধান্ বীরান্ সিংহশার্দূলবিক্রমান্ ।
বানরান্ বারণেন্দ্রাভান্ ক্ষিপ্রং দ্রক্ষ্যসি সঙ্গতান্ ।। ৫.৬৮.২৬ ।।।।
68.27
শৈলাম্বুদনিকাশানাং লঙ্কামলয়সানুষু ।
নর্দতাং কপিমুখ্যানামচিরাচ্ছ্রোষ্যসি স্বনম্ ।। ৫.৬৮.২৭ ।।।।
68.28
নিবৃত্তবনবাসং চ ত্বয়া সার্ধমরিন্দমম্ ।
অভিষিক্তময়োধ্যায়াং ক্ষিপ্রং দ্রক্ষ্যসি রাঘবম্ ।। ৫.৬৮.২৮ ।।।।
68.29
ততো ময়া বাগ্ভিরদীনভাষিণা শিবাভিরিষ্টাভিরভিপ্রসাদিতা ।
জগাম শান্তিং মম মৈথিলাত্মজা তবাপি শোকেন তদা ঽভিপীডিতা ।। ৫.৬৮.২৯ ।।