Utshovসর্গ 62
62.1
তানুবাচ হরিশ্রেষ্ঠো হনুমান্ বানরর্ষভঃ ।
অব্যগ্রমনসো যূয়ং মধু সেবত বানরাঃ ।অহমাবারয়িষ্যামি যুষ্মাকং পরিপন্থিনঃ ।। ৫.৬২.১ ।।।।
62.2
শ্রুত্বা হনুমতো বাক্যং হরীণাং প্রবরো ঽঙ্গদঃ ।
প্রত্যুবাচ প্রসন্নাত্মা পিবন্তু হরয়ো মধু ।। ৫.৬২.২ ।।।।
62.3
অবশ্যং কৃতকার্যস্য বাক্যং হনুমতো ময়া ।
অকার্যমপি কর্তব্যং কিমঙ্গ পুনরীদৃশম্ ।। ৫.৬২.৩ ।।।।
62.4
অঙ্গদস্য মুখাচ্ছ্রুত্বা বচনং বানরর্ষভাঃ ।
সাধু সাধ্বিতি সংহৃষ্টা বানরাঃ প্রত্যপূজয়ন্ ।। ৫.৬২.৪ ।।।।
62.5
পূজয়িত্বা ঽঙ্গদং সর্বে বানরা বানরর্ষভম্ ।
জগ্মুর্মধুবনং যত্র নদীবেগা ইব দ্রুতম্ ।। ৫.৬২.৫ ।।।।
62.6
তে প্রবিষ্টা মধুবনং পালানাক্রম্য বীর্যতঃ ।
। ৫.৬২.৬ ।।।।
62.7
অতিসর্গাচ্চ পটবো দৃষ্ট্বা শ্রুত্বা চ মৈথিলীম্ ।
পপুঃ সর্বে মধু তদা রসবৎ ফলমাদদুঃ ।। ৫.৬২.৭ ।।।।
62.8
উত্পত্য চ ততঃ সর্বে বনপালান্ সমাগতান্ ।
তাডয়ন্তি স্ম শতশঃ সক্তান্ মধুবনে তদা ।। ৫.৬২.৮ ।।।।
62.9
মধূনি দ্রোণমাত্রাণি বাহুভিঃ পরিগৃহ্য তে ।
পিবন্তি সহিতাঃ সর্বে নিঘ্নন্তি স্ম তথা ঽপরে ।। ৫.৬২.৯ ।।।।
62.10
কেচিত্পীত্বা ঽপবিধ্যন্তি মধূনি মধুপিঙ্গলাঃ ।
মধূচ্ছিষ্টেন কেচিচ্চ জঘ্নুরন্যোন্যমুত্কটাঃ ।। ৫.৬২.১০ ।।।।
62.11
অপরে বৃক্ষমূলে তু শাখাং গৃহ্য ব্যবস্থিতাঃ ।
অত্যর্থং চ মদগ্লানাঃ পর্ণান্যাস্তীর্য শেরতে ।। ৫.৬২.১১ ।।।।
62.12
উন্মত্তভূতাঃ প্লবগা মধুমত্তাশ্চ হৃষ্টবৎ ।
ক্ষিপন্তি চ তদা ঽন্যোন্যং স্খলন্তি চ তথা ঽপরে ।। ৫.৬২.১২ ।।।।
62.13
কেচিৎ ক্ষ্বেলাং প্রকুর্বন্তি কেচিৎ কূজন্তি হৃষ্টবৎ ।
হরয়ো মধুনা মত্তাঃ কেচিৎ সুপ্তা মহীতলে ।। ৫.৬২.১৩ ।।।।
62.14
কৃত্বা কেচিদ্ধসন্ত্যন্যে কেচিৎ কুর্বন্তি চেতরৎ ।
কৃত্বা কেচিদ্বদন্ত্যন্যে কেচিদ্বুদ্ধ্যন্তি চেতরৎ ।। ৫.৬২.১৪ ।।।।
62.15
যে ঽপ্যত্র মধুপালাঃ স্যুঃ প্রেষ্যা দধিমুখস্য তু ।
তে ঽপি তৈর্বানরৈর্ভীমৈঃ প্রতিষিদ্ধা দিশো গতাঃ ।। ৫.৬২.১৫ ।।।।
62.16
জানুভিস্তু প্রকৃষ্টাশ্চ দেবমার্গং প্রদর্শিতাঃ ।
অব্রুবন্ পরমোদ্বিগ্না গত্বা দধিমুখং বচঃ ।। ৫.৬২.১৬ ।।।।
62.17
হনূমতা দত্তবরৈর্হতং মধুবনং বলাৎ ।
বয়ং চ জানুভিঃ কৃষ্টা দেবমার্গং চ দর্শিতাঃ ।। ৫.৬২.১৭ ।।।।
62.18
ততো দধিমুখঃ ক্রুদ্ধো বনপস্তত্র বানরঃ ।
হতং মধুবনং শ্রুত্বা সান্ত্বয়ামাস তান্ হরীন্ ।। ৫.৬২.১৮ ।।।।
62.19
ইহাগচ্ছত গচ্ছামো বানরান্ বলদর্পিতান্ ।
বলেন বারয়িষ্যামো মধু ভক্ষয়তো বয়ম্ ।। ৫.৬২.১৯ ।।।।
62.20
শ্রুত্বা দধিমুখস্যেদং বচনং বানরর্ষভাঃ ।
পুনর্বীরা মধুবনং তেনৈব সহসা যয়ুঃ ।। ৫.৬২.২০ ।।।।
62.21
মধ্যে চৈষাং দধিমুখঃ প্রগৃহ্য তরসা তরুম্ ।
সমভ্যধাবদ্বেগেন তে চ সর্বে প্লবঙ্গমাঃ ।। ৫.৬২.২১ ।।।।
62.22
তে শিলাঃ পাদপাংশ্চাপি পর্বতাংশ্চাপি বানরাঃ ।
গৃহীত্বা ঽভ্যগমন্ ক্রুদ্ধা যত্র তে কপিকুঞ্জরাঃ ।। ৫.৬২.২২ ।।।।
62.23
তে স্বামিবচনং বীরা হৃদয়েষ্ববসজ্য তৎ ।
ত্বরয়া হ্যভ্যধাবন্ত সালতালশিলায়ুধাঃ ।। ৫.৬২.২৩ ।।।।
62.24
বৃক্ষস্থাংশ্চ তলস্থাংশ্চ বানরান্ বলদর্পিতান্ ।
অভ্যক্রামংস্ততো বীরাঃ পালাস্তত্র সহস্রশঃ ।। ৫.৬২.২৪ ।।।।
62.25
অথ দৃষ্ট্বা দধিমুখং ক্রুদ্ধং বানরপুঙ্গবাঃ ।
অভ্যধাবন্ত বেগেন হনুমত্প্রমুখাস্তদা ।। ৫.৬২.২৫ ।।।।
62.26
তং সবৃক্ষং মহাবাহুমাপতন্তং মহাবলম্ ।
আর্যকং প্রাহরত্তত্র বাহুভ্যাং কুপিতো ঽঙ্গদঃ ।। ৫.৬২.২৬ ।।।।
62.27
মদান্ধশ্চ ন বেদৈনমার্যকো ঽয়ং মমেতি সঃ ।
অথৈনং নিষ্পিপেষাশু বেগবদ্বসুধাতলে ।। ৫.৬২.২৭ ।।।।
62.28
স ভগ্নবাহূরুভুজো বিহ্বলঃ শোণিতোক্ষিতঃ ।
মুমোহ সহসা বীরো মুহূর্তং কপিকুঞ্জরঃ ।। ৫.৬২.২৮ ।।।।
62.29
স সমাশ্বস্য সহসা সংক্রুদ্ধো রাজমাতুলঃ ।
বানরান্ বারয়ামাস দণ্ডেন মধুমোহিতান্ ।। ৫.৬২.২৯ ।।।।
62.30
স কথংচিদ্বিমুক্তস্তৈর্বানরৈর্বানরর্ষভঃ ।
উবাচৈকান্তমাশ্রিত্য ভৃত্যান্ স্বান্ সমুপাগতান্ ।। ৫.৬২.৩০ ।।।।
62.31
এতে তিষ্ঠন্তু গচ্ছামো ভর্তা নো যত্র বানরঃ ।
সুগ্রীবো বিপুলগ্রীবঃ সহ রামেণ তিষ্ঠতি ।। ৫.৬২.৩১ ।।।।
62.32
সর্বং চৈবাঙ্গদে দোষং শ্রাবয়িষ্যামি পার্থিবে ।
অমর্ষী বচনং শ্রুত্বা ঘাতয়িষ্যতি বানরান্ ।। ৫.৬২.৩২ ।।।।
62.33
ইষ্টং মধুবনং হ্যেতৎ সুগ্রীবস্য মহাত্মনঃ ।
পিতৃপৈতামহং দিব্যং দেবৈরপি দুরাসদম্ ।। ৫.৬২.৩৩ ।।।।
62.34
স বানরানিমান্ সর্বান্ মধুলুব্ধান্ গতায়ুষঃ ।
ঘাতয়িষ্যতি দণ্ডেন সুগ্রীবঃ সসুহৃজ্জনান্ ।। ৫.৬২.৩৪ ।।।।
62.35
বধ্যা হ্যেতে দুরাত্মানো নৃপাজ্ঞাপরিভাবিনঃ ।
অমর্ষপ্রভবো রোষঃ সফলো নো ভবিষ্যতি ।। ৫.৬২.৩৫ ।।।।
62.36
এবমুক্ত্বা দধিমুখো বনপালান্ মহাবলঃ ।
জগাম সহসোত্পত্য বনপালৈঃ সমন্বিতঃ ।। ৫.৬২.৩৬ ।।।।
62.37
নিমেষান্তরমাত্রেণ স হি প্রাপ্তো বনালয়ঃ ।
সহস্রাংশুসুতো ধীমান্ সুগ্রীবো যত্র বানরঃ ।। ৫.৬২.৩৭ ।।।।
62.38
রামং চ লক্ষ্মণং চৈব দৃষ্ট্বা সুগ্রীবমেব চ ।
সমপ্রতিষ্ঠাং জগতীমাকাশান্নিপপাত হ ।। ৫.৬২.৩৮ ।।।।
62.39
সন্নিপত্য মহাবীর্যঃ সর্বৈস্তৈঃ পরিবারিতঃ ।
হরির্দধিমুখঃ পালৈঃ পালানাং পরমেশ্বরঃ ।। ৫.৬২.৩৯ ।।।।
62.40
স দীনবদনো ভূত্বা কৃত্বা শিরসি চাঞ্জলিম্ ।
সুগ্রীবস্য শুভৌ মূর্ধ্না চরণৌ প্রত্যপীডয়ৎ ।। ৫.৬২.৪০ ।।