সর্গ 61

61.1

ততো জাম্ববতো বাক্যমগৃহ্ণন্ত বনৌকসঃ ।
অঙ্গদপ্রমুখা বীরা হনূমাংশ্চ মহাকপিঃ ।। ৫.৬১.১ ।।।।

প্রীতিমন্তস্ততঃ সর্বে বায়ুপুত্রপুরস্সরাঃ ।
মহেন্দ্রাদ্রিং পরিত্যজ্য পুপ্লুবুঃ প্লবগর্ষভাঃ ।। ৫.৬১.২ ।।।।

মেরুমন্দরসঙ্কাশা মত্তা ইব মহাগজাঃ ।
ছাদয়ন্ত ইবাকাশং মহাকায়া মহাবলাঃ ।। ৫.৬১.৩ ।।।।

সভাজ্যমানং ভূতৈস্তমাত্মবন্তং মহাবলম্ ।
হনূমন্তং মহাবেগং বহন্ত ইব দৃষ্টিভিঃ ।। ৫.৬১.৪ ।।।।

রাঘবে চার্থনির্বৃত্তিং কর্তুং চ পরমং যশঃ ।
সমাধায় সমৃদ্ধার্থাঃ কর্মসিদ্ধিভিরুন্নতাঃ ।। ৫.৬১.৫ ।।।।

প্রিয়াখ্যানোন্মুখাঃ সর্বে সর্বে যুদ্ধাভিনন্দিনঃ ।
সর্বে রামপ্রতীকারে নিশ্চিতার্থা মনস্বিনঃ ।। ৫.৬১.৬ ।।।।

প্লবমানাঃ খমাপ্লুত্য ততস্তে কাননৌকসঃ ।
নন্দনোপমমাসেদুর্বনং দ্রুমলতায়ুতম্ ।। ৫.৬১.৭ ।।।।

যত্তন্মধুবনং নাম সুগ্রীবস্যাভিরক্ষিতম্ ।
অধৃষ্যং সর্বভূতানাং সর্বভূতমনোহরম্ ।। ৫.৬১.৮ ।।।।

যদ্রক্ষতি মহাবীর্যঃ সদা দধিমুখঃ কপিঃ ।
মাতুলঃ কপিমুখ্যস্য সুগ্রীবস্য মহাত্মনঃ ।। ৫.৬১.৯ ।।।।

তে তদ্বনমুপাগম্য বভূবুঃ পরমোত্কটাঃ ।
বানরা বানরেন্দ্রস্য মনঃ কান্ততমং মহৎ ।। ৫.৬১.১০ ।।।।

ততস্তে বানরা হৃষ্টা দৃষ্ট্বা মধুবনং মহৎ ।
কুমারমভ্যয়াচন্ত মধূনি মধুপিঙ্গলাঃ ।। ৫.৬১.১১ ।।।।

ততঃ কুমারস্তান্ বৃদ্ধাঞ্জাম্ববত্প্রমুখান্ কপীন্ ।
অনুমান্য দদৌ তেষাং নিসর্গং মধুভক্ষণে ।। ৫.৬১.১২ ।।।।

অঙ্গদেনানুমতাস্সন্তস্ততো মুদিতাঃ তত্প্রেরিতাঃ প্রনৃত্যন্তো ঽভবন্ ।
। ৫.৬১.১৩ ।।।।

গায়ন্তি কেচিৎ প্রণমন্তি কেচিন্নৃত্যন্তি কেচিৎ প্রহসন্তি কেচিৎ ।
পতন্তি কেচিদ্বিচরন্তি কেচিৎ প্লবন্তি কেচিৎ প্রলপন্তি কেচিৎ ।। ৫.৬১.১৪ ।।।।

পরস্পরং কেচিদুপাশ্রয়ন্তে পরস্পরং কেচিদুপাক্রমন্তে ।
পরস্পরং কেচিদুপব্রুবন্তে পরস্পরং কেচিদুপারমন্তে ।। ৫.৬১.১৫ ।।।।

দ্রুমাদ্ দ্রুমং কেচিদভিদ্রবন্তে ক্ষিতৌ নগাগ্রান্নিপতন্তি কেচিৎ ।
মহীতলাৎ কেচিদুদীর্ণবেগা মহাদ্রুমাগ্রাণ্যভিসম্পতন্তি ।। ৫.৬১.১৬ ।।।।

গায়ন্তমন্যঃ প্রহসন্নুপৈতি হসন্তমন্যঃ প্ররুদন্নুপৈতি ।
রুদন্তমন্যঃ প্রণুদন্নুপৈতি নুদন্তমন্যঃ প্রণদন্নুপৈতি ।। ৫.৬১.১৭ ।।।।

সমাকুলং তত্কপিসৈন্যমাসীন্মধুপ্রপানোত্কটসত্ত্বচেষ্টম্ ।
ন চাত্র কশ্চিন্ন বভূব মত্তো ন চাত্র কশ্চিন্ন বভূব তৃপ্তঃ ।। ৫.৬১.১৮ ।।।।

ততো বনং তত্পরিভক্ষ্যমাণং দ্রুমাংশ্চ বিধ্বংসিতপত্রপুষ্পান্ ।
সমীক্ষ্য কোপদৃধিবক্রনামা নিবারয়ামাস কপিঃ কপীংস্তান্ ।। ৫.৬১.১৯ ।।।।

স তৈঃ প্রবৃদ্ধৈঃ পরিভর্ত্স্যমানো বনস্য গোপ্তা হরিবীরবৃদ্ধঃ ।
চকার ভূয়ো মতিমুগ্রতেজা বনস্য রক্ষাং প্রতি বানরেভ্যঃ ।। ৫.৬১.২০ ।।।।

উবাচ কাংশ্চিৎ পরুষাণি ধৃষ্টমসক্তমন্যাংশ্চ তলৈর্জবান ।
সমেত্য কৈশ্চিৎ কলহং চকার তথৈব সাম্নোপজগাম কংশ্চিৎ ।। ৫.৬১.২১ ।।।।

স তৈর্মদাৎ সম্পরিবার্য বাক্যৈর্বলাচ্চ তেন প্রতিবার্যমাণৈঃ ।
প্রধর্ষিতস্ত্যক্তভয়ৈঃ সমেত্য প্রকৃষ্যতে চাপ্যনবেক্ষ্য দোষম্ ।। ৫.৬১.২২ ।।।।

নখৈস্তুদন্তো দশনৈর্দশন্তস্তলৈশ্চ পাদৈশ্চ সমাপয়ন্তঃ ।
মদাৎ কপিং তং কপয়ঃ সমগ্রা মহাবনং নির্বিষয়ং চ চক্রুঃ ।। ৫.৬১.২৩ ।।