UtshovSarga 61
61.1
ततो जाम्बवतो वाक्यमगृह्णन्त वनौकसः ।
अङ्गदप्रमुखा वीरा हनूमांश्च महाकपिः ।। ५.६१.१ ।।।।
Tato jambavato vakyamagrihnanta vanaukasah
Angadapramukha vira hanumanshcha mahakapih
61.2
प्रीतिमन्तस्ततः सर्वे वायुपुत्रपुरस्सराः ।
महेन्द्राद्रिं परित्यज्य पुप्लुवुः प्लवगर्षभाः ।। ५.६१.२ ।।।।
Pritimantastatah sarve vayuputrapurassarah
Mahendradrim parityajya pupluvuh plavagarshabhah
61.3
मेरुमन्दरसङ्काशा मत्ता इव महागजाः ।
छादयन्त इवाकाशं महाकाया महाबलाः ।। ५.६१.३ ।।।।
Merumandarasankasha matta iva mahagajah
Chhadayanta ivakasham mahakaya mahabalah
61.4
सभाज्यमानं भूतैस्तमात्मवन्तं महाबलम् ।
हनूमन्तं महावेगं वहन्त इव दृष्टिभिः ।। ५.६१.४ ।।।।
Sabhajyamanam bhutaistamatmavantam mahabalam
Hanumantam mahavegam vahanta iva drishtibhih
61.5
राघवे चार्थनिर्वृत्तिं कर्तुं च परमं यशः ।
समाधाय समृद्धार्थाः कर्मसिद्धिभिरुन्नताः ।। ५.६१.५ ।।।।
Raghave charthanirvrittim kartum cha paramam yashah
Samadhaya samriddharthah karmasiddhibhirunnatah
61.6
प्रियाख्यानोन्मुखाः सर्वे सर्वे युद्धाभिनन्दिनः ।
सर्वे रामप्रतीकारे निश्चितार्था मनस्विनः ।। ५.६१.६ ।।।।
Priyakhyanonmukhah sarve sarve yuddhabhinandinah
Sarve ramapratikare nishchitartha manasvinah
61.7
प्लवमानाः खमाप्लुत्य ततस्ते काननौकसः ।
नन्दनोपममासेदुर्वनं द्रुमलतायुतम् ।। ५.६१.७ ।।।।
Plavamanah khamaplutya tataste kananaukasah
Nandanopamamasedurvanam drumalatayutam
61.8
यत्तन्मधुवनं नाम सुग्रीवस्याभिरक्षितम् ।
अधृष्यं सर्वभूतानां सर्वभूतमनोहरम् ।। ५.६१.८ ।।।।
Yattanmadhuvanam nama sugrivasyabhirakshitam
Adhrishyam sarvabhutanam sarvabhutamanoharam
61.9
यद्रक्षति महावीर्यः सदा दधिमुखः कपिः ।
मातुलः कपिमुख्यस्य सुग्रीवस्य महात्मनः ।। ५.६१.९ ।।।।
Yadrakshati mahaviryah sada dadhimukhah kapih
Matulah kapimukhyasya sugrivasya mahatmanah
61.10
ते तद्वनमुपागम्य बभूवुः परमोत्कटाः ।
वानरा वानरेन्द्रस्य मनः कान्ततमं महत् ।। ५.६१.१० ।।।।
Te tadvanamupagamya babhuvuh paramotkatah
Vanara vanarendrasya manah kantatamam mahat
61.11
ततस्ते वानरा हृष्टा दृष्ट्वा मधुवनं महत् ।
कुमारमभ्ययाचन्त मधूनि मधुपिङ्गलाः ।। ५.६१.११ ।।।।
Tataste vanara hrishta drishtva madhuvanam mahat
Kumaramabhyayachanta madhuni madhupingalah
61.12
ततः कुमारस्तान् वृद्धाञ्जाम्बवत्प्रमुखान् कपीन् ।
अनुमान्य ददौ तेषां निसर्गं मधुभक्षणे ।। ५.६१.१२ ।।।।
Tatah kumarastan vriddhanjambavatpramukhan kapin
Anumanya dadau tesham nisargam madhubhakshane
61.13
अङ्गदेनानुमतास्सन्तस्ततो मुदिताः तत्प्रेरिताः प्रनृत्यन्तो ऽभवन् ।
। ५.६१.१३ ।।।।
Angadenanumatassantastato muditah tatpreritah pranrityanto bhavan
61.14
गायन्ति केचित् प्रणमन्ति केचिन्नृत्यन्ति केचित् प्रहसन्ति केचित् ।
पतन्ति केचिद्विचरन्ति केचित् प्लवन्ति केचित् प्रलपन्ति केचित् ।। ५.६१.१४ ।।।।
Gayanti kechit pranamanti kechinnrityanti kechit prahasanti kechit
Patanti kechidvicharanti kechit plavanti kechit pralapanti kechit
61.15
परस्परं केचिदुपाश्रयन्ते परस्परं केचिदुपाक्रमन्ते ।
परस्परं केचिदुपब्रुवन्ते परस्परं केचिदुपारमन्ते ।। ५.६१.१५ ।।।।
Parasparam kechidupashrayante parasparam kechidupakramante
Parasparam kechidupabruvante parasparam kechiduparamante
61.16
द्रुमाद् द्रुमं केचिदभिद्रवन्ते क्षितौ नगाग्रान्निपतन्ति केचित् ।
महीतलात् केचिदुदीर्णवेगा महाद्रुमाग्राण्यभिसम्पतन्ति ।। ५.६१.१६ ।।।।
Drumad drumam kechidabhidravante kshitau nagagrannipatanti kechit
Mahitalat kechidudirnavega mahadrumagranyabhisampatanti
61.17
गायन्तमन्यः प्रहसन्नुपैति हसन्तमन्यः प्ररुदन्नुपैति ।
रुदन्तमन्यः प्रणुदन्नुपैति नुदन्तमन्यः प्रणदन्नुपैति ।। ५.६१.१७ ।।।।
Gayantamanyah prahasannupaiti hasantamanyah prarudannupaiti
Rudantamanyah pranudannupaiti nudantamanyah pranadannupaiti
61.18
समाकुलं तत्कपिसैन्यमासीन्मधुप्रपानोत्कटसत्त्वचेष्टम् ।
न चात्र कश्चिन्न बभूव मत्तो न चात्र कश्चिन्न बभूव तृप्तः ।। ५.६१.१८ ।।।।
Samakulam tatkapisainyamasinmadhuprapanotkatasattvacheshtam
Na chatra kashchinna babhuva matto na chatra kashchinna babhuva triptah
61.19
ततो वनं तत्परिभक्ष्यमाणं द्रुमांश्च विध्वंसितपत्रपुष्पान् ।
समीक्ष्य कोपदृधिवक्रनामा निवारयामास कपिः कपींस्तान् ।। ५.६१.१९ ।।।।
Tato vanam tatparibhakshyamanam drumanshcha vidhvansitapatrapushpan
Samikshya kopadridhivakranama nivarayamasa kapih kapinstan
61.20
स तैः प्रवृद्धैः परिभर्त्स्यमानो वनस्य गोप्ता हरिवीरवृद्धः ।
चकार भूयो मतिमुग्रतेजा वनस्य रक्षां प्रति वानरेभ्यः ।। ५.६१.२० ।।।।
Sa taih pravriddhaih paribhartsyamano vanasya gopta hariviravriddhah
Chakara bhuyo matimugrateja vanasya raksham prati vanarebhyah
61.21
उवाच कांश्चित् परुषाणि धृष्टमसक्तमन्यांश्च तलैर्जवान ।
समेत्य कैश्चित् कलहं चकार तथैव साम्नोपजगाम कंश्चित् ।। ५.६१.२१ ।।।।
Uvacha kanshchit parushani dhrishtamasaktamanyanshcha talairjavana
Sametya kaishchit kalaham chakara tathaiva samnopajagama kanshchit
61.22
स तैर्मदात् सम्परिवार्य वाक्यैर्बलाच्च तेन प्रतिवार्यमाणैः ।
प्रधर्षितस्त्यक्तभयैः समेत्य प्रकृष्यते चाप्यनवेक्ष्य दोषम् ।। ५.६१.२२ ।।।।
Sa tairmadat samparivarya vakyairbalachcha tena prativaryamanaih
Pradharshitastyaktabhayaih sametya prakrishyate chapyanavekshya dosham
61.23
नखैस्तुदन्तो दशनैर्दशन्तस्तलैश्च पादैश्च समापयन्तः ।
मदात् कपिं तं कपयः समग्रा महावनं निर्विषयं च चक्रुः ।। ५.६१.२३ ।।
Nakhaistudanto dashanairdashantastalaishcha padaishcha samapayantah
Madat kapim tam kapayah samagra mahavanam nirvishayam cha chakruh