Utshovসর্গ 57
57.1
সচন্দ্রকুমুদং রম্যং সার্ককারণ্ডবং শুভম্ ।
তিষ্যশ্রবণকাদম্বমভ্রশৈবালশাদ্বলম্ ।। 5.57.1 ।।।।
57.2
পুলর্বসুমহামীনং লোহিতাঙ্গমহাগ্রহম্ ।
ঐরাবতমহাদ্বীপং স্বাতীহংসবিলোলিতম্ ।। 5.57.2 ।।।।
57.3
বাতসঙ্ঘাতজাতোর্মিচন্দ্রাংশুশিশিরাম্বুমৎ ।
ভুজঙ্গয়ক্ষগন্ধর্বপ্রবুদ্ধকমলোত্পলম্ ।। 5.57.3 ।।।।
57.4
হনুমান্ মারুতগতির্মহানৌরিব সাগরম্ ।
অপারমপরিশ্রান্তঃ পুপ্লুবে গগনার্ণবম্ ।। 5.57.4 ।।।।
57.5
গ্রসমান ইবাকাশং তারাধিপমিবোল্লিখন্ ।
হরন্নিব সনক্ষত্রং গগনং সার্কমণ্ডলম্ ।। 5.57.5 ।।।।
57.6
মারুতস্যাত্মজঃ শ্রীমান্ কপির্ব্যোমচরো মহান্ ।
হনুমান্ মেঘজালানি বিকর্ষন্নিব গচ্ছতি ।। 5.57.6 ।।।।
57.7
পাণ্ডরারুণবর্ণানি নীলমাঞ্জিষ্ঠকানি চ ।
হরিতারুণবর্ণানি মহাভ্রাণি চকাশিরে ।। 5.57.7 ।।।।
57.8
প্রবিশন্নভ্রজালানি নিষ্পতংশ্চ পুনঃ পুনঃ ।
প্রচ্ছন্নশ্চ প্রকাশশ্চ চন্দ্রমা ইব লক্ষ্যতে ।। 5.57.8 ।।।।
57.9
বিবিধাভ্রঘনাপন্নগোচরো ধবলাম্বরঃ ।
দৃশ্যাদৃশ্যতনুর্বীরস্তদা চন্দ্রায়তে ঽম্বরে ।। 5.57.9 ।।।।
57.10
তার্ক্ষ্যায়মাণো গগনে বভাসে বায়ুনন্দনঃ ।
দারয়ন্ মেঘবৃন্দানি নিষ্পতংশ্চ পুনঃ পুনঃ ।। 5.57.10 ।।।।
57.11
নদন্নাদেন মহতা মেঘস্বনমহাস্বনঃ ।
প্রবরান্ রাক্ষসান্ হত্বা নাম বিশ্রাব্য চাত্মনঃ ।। 5.57.11 ।।।।
57.12
আকুলাং নগরীং কৃত্বা ব্যথয়িত্বা চ রাবণম্ ।
অর্দয়িত্বা বলং ঘোরং বৈদেহীমভিবাদ্য চ ।। 5.57.12 ।।।।
57.13
আজগাম মহাতেজাঃ পুনর্মধ্যেন সাগরম্ ।
। 5.57.13 ।।।।
57.14
পর্বতেন্দ্রং সুনাভং চ সমুপস্পৃশ্য বীর্যবান্ ।
জ্যামুক্ত ইব নারাচো মহাবেগো ঽভ্যুপাগতঃ ।। 5.57.14 ।।।।
57.15
স কিংচিদনুসংপ্রাপ্তঃ সমালোক্য মহাগিরিম্ ।
মহেন্দ্রমেঘসঙ্কাশং ননাদ হরিপুঙ্গবঃ ।। 5.57.15 ।।।।
57.16
স পূরয়ামাস কপির্দিশো দশ সমন্ততঃ ।
নদন্নাদেন মহতা মেঘস্বনমহাস্বনঃ ।। 5.57.16 ।।।।
57.17
স তং দেশমনুপ্রাপ্তঃ সুহৃদ্দর্শনলালসঃ ।
ননাদ হরিশাদ্রূলো লাঙ্গূলং চাপ্যকম্পয়ৎ ।। 5.57.17 ।।।।
57.18
তস্য নানদ্যমানস্য সুপর্ণচরিতে পথি ।
ফলতীবাস্য ঘোষেণ গগনং সার্কমণ্ডলম্ ।। 5.57.18 ।।।।
57.19
যে তু তত্রোত্তরে তীরে সমুদ্রস্য মহাবলাঃ ।
পূর্বং সংবিষ্ঠিতাঃ শূরা বায়ুপুত্রদিদৃক্ষবঃ ।। 5.57.19 ।।।।
57.20
মহতো বায়ুনুন্নস্য তোয়দস্যেব গর্জিতম্ ।
শুশ্রুবুস্তে তদা ঘোষমূরুবেগং হনূমতঃ ।। 5.57.20 ।।।।
57.21
তে দীনমনসঃ সর্বে শুশ্রুবুঃ কাননৌকসঃ ।
বানরেন্দ্রস্য নির্ঘোষং পর্জন্যনিনদোপমম্ ।। 5.57.21 ।।।।
57.22
নিশম্য নদতো নাদং বানরাস্তে সমন্ততঃ ।
বভূবুরুত্সুকাঃ সর্বে সুহৃদ্দর্শনকাঙ্ক্ষিণঃ ।। 5.57.22 ।।।।
57.23
জাম্ববান্ স হরিশ্রেষ্ঠঃ প্রীতিসংহৃষ্টমানসঃ ।
উপামন্ত্র্য হরীন্ সর্বানিদং বচনমব্রবীৎ ।। 5.57.23 ।।।।
57.24
সর্বথা কৃতকার্যো ঽসৌ হনূমান্নাত্র সংশয়ঃ ।
ন হ্যস্যাকৃতকার্যস্য নাদ এবংবিধো ভবেৎ ।। 5.57.24 ।।।।
57.25
তস্য বাহূরুবেগং চ নিনাদং চ মহাত্মনঃ ।
নিশম্য হরয়ো হৃষ্টাঃ সমুত্পেতুস্ততস্ততঃ ।। 5.57.25 ।।।।
57.26
তে নগাগ্রান্নগাগ্রাণি শিখরাচ্ছিখরাণি চ ।
প্রহৃষ্টাঃ সমপদ্যন্ত হনূমন্তং দিদৃক্ষবঃ ।। 5.57.26 ।।।।
57.27
তে প্রীতাঃ পাদপাগ্রেষু গৃহ্য শাখাঃ সুবিষ্ঠিতাঃ ।
বাসাংসীব প্রশাখাশ্চ সমাবিধ্যন্ত বানরাঃ ।। 5.57.27 ।।।।
57.28
গিরিগহ্বরসংলীনো যথা গর্জতি মারুতঃ ।
এবং জগর্জ বলবান্ হনূমান্ মারুতাত্মজঃ ।। 5.57.28 ।।।।
57.29
তমভ্রঘনসঙ্কাশমাপতন্তং মহাকপিম্ ।
দৃষ্ট্বা তে বানরাঃ সর্বে তস্থুঃ প্রাঞ্জলয়স্তদা ।। 5.57.29 ।।।।
57.30
ততস্তু বেগবাংস্তস্য গিরের্গিরিনিভঃ কপিঃ ।
নিপপাত মহেন্দ্রস্য শিখরে পাদপাকুলে ।। 5.57.30 ।।।।
57.31
হর্ষেণাপূর্যমাণো ঽসৌ রম্যে পর্বতনির্ঝরে ।
ছিন্নপক্ষ ইবাকাশাৎ পপাত ধরণীধরঃ ।। 5.57.31 ।।।।
57.32
ততস্তে প্রীতমনসঃ সর্বে বানরপুঙ্গবাঃ ।
হনূমন্তং মহাত্মানং পরিবার্যোপতস্থিরে ।পরিবার্য চ তে সর্বে পরাং প্রীতিমুপাগতাঃ ।। 5.57.32 ।।।।
57.33
প্রহৃষ্টবদনাঃ সর্বে তমরোগমুপাগতম্ ।
উপায়নানি চাদায় মূলানি চ ফলানি চ ।প্রত্যর্চয়ন্ হরিশ্রেষ্ঠং হরয়ো মারুতাত্মজম্ ।। 5.57.33 ।।।।
57.34
হনুমাংস্তু গুরূন্ বৃদ্ধান্ জাম্ববত্প্রমুখাংস্তদা ।
কুমারমঙ্গদং চৈব সো ঽবন্দত মহাকপিঃ ।। 5.57.34 ।।।।
57.35
স তাভ্যাং পূজিতঃ পূজ্যঃ কপিভিশ্চ প্রসাদিতঃ ।
দৃষ্টা সীতেতি বিক্রান্তঃ সংক্ষেপেণ ন্যবেদয়ৎ ।। 5.57.35 ।।।।
57.36
নিষসাদ চ হস্তেন গৃহীত্বা বালিনঃ সুতম্ ।
রমণীয়ে বনোদ্দেশে মহেন্দ্রস্য গিরেস্তদা ।। 5.57.36 ।।।।
57.37
হনুমানব্রবীদ্ধৃষ্টস্তদা তান্ বানরর্ষভান্ ।
। 5.57.37 ।।।।
57.38
অশোকবনিকাসংস্থা দৃষ্টা সা জনকাত্মজা ।
রক্ষ্যমাণা সুঘোরাভী রাক্ষসীভিরনিন্দিতা ।। 5.57.38 ।।।।
57.39
একবেণীধরা বালা রামদর্শনলালসা ।
উপবাসপরিশ্রান্তা জটিলা মলিনা কৃশা ।। 5.57.39 ।।।।
57.40
ততো দৃষ্টেতি বচনং মহার্থমমৃতোপমম্ ।
নিশম্য মারুতেঃ সর্বে মুদিতা বানরা ভবন্ ।। 5.57.40 ।।।।
57.41
ক্ষ্বেলন্ত্যন্যে নদন্ত্যন্যে গর্জন্ত্যন্যে মহাবলাঃ ।
চক্রুঃ কিলিকিলামন্যে প্রতিগর্জন্তি চাপরে ।। 5.57.41 ।।।।
57.42
কেচিদুচ্ছ্রিতলাঙ্গূলাঃ প্রহৃষ্টাঃ কপিকুঞ্জরাঃ ।
অঞ্চিতা যতদীর্ঘাণি লাংগূলানি প্রবিব্যধুঃ ।। 5.57.42 ।।।।
57.43
অপরে চ হনূমন্তং বানরা বারণোপমম্ ।
আপ্লুত্য গিরিশৃঙ্গেভ্যঃ সংস্পৃশন্তি স্ম হর্ষিতাঃ ।। 5.57.43 ।।।।
57.44
উক্তবাক্যং হনূমন্তমঙ্গদস্তমথাব্রবীৎ ।
সর্বেষাং হরিবীরাণাং মধ্যে বচনমুত্তমম্ ।। 5.57.44 ।।।।
57.45
সত্ত্বে বীর্যে ন তে কশ্চিৎ সমো বানর বিদ্যতে ।
যদবপ্লুত্য বিস্তীর্ণং সাগরং পুনরাগতঃ ।। 5.57.45 ।।।।
57.46
অহো স্বামিনি তে ভক্তিরহো বীর্যমহো ধৃতিঃ ।
দিষ্ট্যা দৃষ্টা ত্বয়া দেবী রামপত্নী যশস্বিনী ।। 5.57.46 ।।।।
57.47
দিষ্ট্যা ত্যক্ষ্যতি কাকুত্স্থঃ শোকং সীতাবিয়োগজম্ ।
ততো ঽঙ্গদং হনূমন্তং জাম্ববন্তং চ বানরাঃ ।। 5.57.47 ।।।।
57.48
পরিবার্য প্রমুদিতা ভেজিরে বিপুলাঃ শিলাঃ ।
শ্রোতুকামাঃ সমুদ্রস্য লঙ্ঘনং বানরোত্তমাঃ ।। 5.57.48 ।।।।
57.49
দর্শনং চাপি লঙ্কায়াঃ সীতায়া রাবণস্য চ ।
তস্থুঃ প্রাঞ্জলয়ঃ সর্বে হনুমদ্বদনোন্মুখাঃ ।। 5.57.49 ।।।।
57.50
তস্থৌ তত্রাঙ্গদঃ শ্রীমান্ বানরৈর্বহুভির্বৃতঃ ।
উপাস্যমানো বিবুধৈর্দিবি দেবপতির্যথা ।। 5.57.50 ।।।।
57.51
হনূমতা কীর্তিমতা যশস্বিনা তথা ঽঙ্গদেনাঙ্গদবদ্ধবাহুনা ।
মুদা তদাধ্যাসিতমুন্নতং মহন্মহীধরাগ্রং জ্বলিতং শ্রিয়া ঽভবৎ ।। 5.57.51 ।।