Utshovসর্গ 55
55.1
লঙ্কাং সমস্তাং সন্দীপ্য লাঙ্গূলাগ্নিং মহাবলঃ ।
নির্বাপয়ামাস তদা সমুদ্রে হরিসত্তমঃ ।। 5.55.1 ।।।।
55.2
সন্দীপ্যমানাং বিধ্বস্তাং ত্রস্তরক্ষোগণাং পুরীম্ ।
অবেক্ষ্য হনুমান্ লঙ্কাং চিন্তয়ামাস বানরঃ ।। 5.55.2 ।।।।
55.3
তস্যাভূৎ সুমহাংস্ত্রাসঃ কুত্সা চাত্মন্যজায়ত ।
লঙ্কাং প্রদহতা কর্ম কিংস্বিৎ কৃতমিদং ময়া ।। 5.55.3 ।।।।
55.4
ধন্যাস্তে পুরুষশ্রেষ্ঠা যে বুদ্ধ্যা কোপমুত্থিতম্ ।
নিরুন্ধন্তি মহাত্মানো দীপ্তমগ্নিমিবাম্ভসা ।। 5.55.4 ।।।।
55.5
ক্রুদ্ধঃ পাপং ন কুর্যাৎ কঃ ক্রুদ্ধো হন্যাদ্ গুরূনপি ।
ক্রুদ্ধঃ পরুষয়া বাচা নরঃ সাধূনধিক্ষিপেৎ ।। 5.55.5 ।।।।
55.6
বাচ্যাবাচ্যং প্রকুপিতো ন বিজানাতি কর্হিচিৎ ।
নাকার্যমস্তি ক্রুদ্ধস্য নাবাচ্যং বিদ্যতে ক্বচিৎ ।। 5.55.6 ।।।।
55.7
যঃ সমুত্পতিতং ক্রোধং ক্ষময়ৈব নিরস্যতি ।
যথোরগস্ত্বচং জীর্ণাং স বৈ পুরুষ উচ্যতে ।। 5.55.7 ।।।।
55.8
ধিগস্তু মাং সুদুর্বুদ্ধিং নির্লজ্জং পাপকৃত্তমম্ ।
অচিন্তয়িত্বা তাং সীতামগ্নিদং স্বামিঘাতকম্ ।। 5.55.8 ।।।।
55.9
যদি দগ্ধা ত্বিয়ং লঙ্কা নূনমার্যাপি জানকী ।
দগ্ধা তেন ময়া ভর্তুর্হতং কার্যমজানতা ।। 5.55.9 ।।।।
55.10
যদর্থময়মারম্ভস্তত্কার্যমবসাদিতম্ ।
ময়া হি দহতা লঙ্কাং ন সীতা পরিরক্ষিতা ।। 5.55.10 ।।।।
55.11
ঈষত্কার্যমিদং কার্যং কৃতমাসীন্ন সংশয়ঃ ।
তস্য ক্রোধাভিভূতেন ময়া মূলক্ষয়ঃ কৃতঃ ।। 5.55.11 ।।।।
55.12
বিনষ্টা জানকী নূনং ন হ্যদগ্ধঃ প্রদৃশ্যতে ।
লঙ্কায়াং কশ্চিদুদ্দেশঃ সর্বা ভস্মীকৃতা পুরী ।। 5.55.12 ।।।।
55.13
যদি তদ্বিহতং কার্যং মম প্রজ্ঞাবিপর্যয়াৎ ।
ইহৈব প্রাণসংন্যাসো মমাপি হ্যদ্য রোচতে ।। 5.55.13 ।।।।
55.14
কিমগ্নৌ নিপতাম্যদ্য অহোস্বিদ্বডবামুখে ।
শরীরমাহো সত্ত্বানাং দদ্মি সাগরবাসিনাম্ ।। 5.55.14 ।।।।
55.15
কথং হি জীবতা শক্যো ময়া দ্রষ্টুং হরীশ্বরঃ ।
তৌ বা পুরুষশার্দূলৌ কার্যসর্বস্বঘাতিনা ।। 5.55.15 ।।।।
55.16
ময়া খলু তদেবেদং রোষদোষাৎ প্রদর্শিতম্ ।
প্রথিতং ত্রিষু লোকেষু কপিত্বমনবস্থিতম্ ।। 5.55.16 ।।।।
55.17
ধিগস্তু রাজসং ভাবমনীশমনবস্থিতম্ ।
ঈশ্বরেণাপি যদ্রাগান্ময়া সীতা ন রক্ষিতা ।। 5.55.17 ।।।।
55.18
বিনষ্টায়াং তু সীতায়াং তাবুভৌ বিনশিষ্যতঃ ।
তয়োর্বিনাশে সুগ্রীবঃ সবন্ধুর্বিনশিষ্যতি ।। 5.55.18 ।।।।
55.19
এতদেব বচঃ শ্রুত্বা ভরতো ভ্রাতৃবত্সলঃ ।
ধর্মাত্মা সহশত্রুঘ্নঃ কথং শক্ষ্যতি জীবিতুম্ ।। 5.55.19 ।।।।
55.20
ইক্ষ্বাকুবংশে ধর্মিষ্ঠে গতে নাশমসংশয়ম্ ।
ভবিষ্যন্তি প্রজাঃ সর্বাঃ শোকসন্তাপপীডিতাঃ ।। 5.55.20 ।।।।
55.21
তদহং ভাগ্যরহিতো লুপ্তধর্মার্থসংগ্রহঃ ।
রোষদোষপরীতাত্মা ব্যক্তং লোকবিনাশনঃ ।। 5.55.21 ।।।।
55.22
ইতি চিন্তয়স্তস্য নিমিত্তান্যুপপেদিরে ।
পূর্বমপ্যুপলব্ধানি সাক্ষাত্পুনরচিন্তয়ৎ ।। 5.55.22 ।।।।
55.23
অথবা চারুসর্বাঙ্গী রক্ষিতা স্বেন তেজসা ।
ন নশিষ্যতি কল্যাণী নাগ্নিরগ্নৌ প্রবর্ততে ।। 5.55.23 ।।।।
55.24
ন হি ধর্মাত্মনস্তস্য ভার্যামমিততেজসঃ ।
স্বাচারিত্রাভিগুপ্তাং তাং স্প্রষ্টুমর্হতি পাবকঃ ।। 5.55.24 ।।।।
55.25
নূনং রামপ্রভাবেন বৈদেহ্যাঃ সুকৃতেন চ ।
যন্মাং দহনকর্মা ঽয়ং নাদহদ্ধব্যবাহনঃ ।। 5.55.25 ।।।।
55.26
ত্রয়াণাং ভরতাদীনাং ভার্তঽণাং দেবতা চ যা ।
রামস্য চ মনঃকান্তা সা কথং বিনশিষ্যতি ।। 5.55.26 ।।।।
55.27
যদ্বা দহনকর্মা ঽয়ং সর্বত্র প্রভুরব্যয়ঃ ।
ন মে দহতি লাঙ্গূলং কথমার্যাং প্রধক্ষ্যতি ।। 5.55.27 ।।।।
55.28
পুনশ্চাচিন্তয়ত্তত্র হনুমান্ বিস্মিতস্তদা ।
হিরণ্যনাভস্য গিরের্জলমধ্যে প্রদর্শনম্ ।। 5.55.28 ।।।।
55.29
তপসা সত্যবাক্যেন অনন্যত্বাচ্চ ভর্তরি ।
অপি সা নির্দহেদগ্নিং ন তামগ্নিঃ প্রধক্ষ্যতি ।। 5.55.29 ।।।।
55.30
স তথা চিন্তয়ংস্তত্র দেব্যা ধর্মপরিগ্রহম্ ।
শুশ্রাব হনুমান্ বাক্যং চারণানাং মহাত্মনাম্ ।। 5.55.30 ।।।।
55.31
অহো খলু কৃতং কর্ম দুষ্করং হি হনূমতা ।
অগ্নিং বিসৃজতা ঽভীক্ষ্ণং ভীমং রাক্ষসবেশ্মনি ।। 5.55.31 ।।।।
55.32
প্রপলায়িতরক্ষঃ স্ত্রীবালবৃদ্ধসমাকুলা ।
জনকোলাহলাধ্মাতা ক্রন্দন্তীবাদ্রিকন্দরে ।। 5.55.32 ।।।।
55.33
দগ্ধেয়ং নগরী সর্বা সাট্টপ্রাকারতোরণা ।
জানকী ন চ দগ্ধেতি বিস্ময়ো ঽদ্ভুত এব নঃ ।। 5.55.33 ।।।।
55.34
স নিমিত্তৈশ্চ দৃষ্টার্থৈঃ কারণৈশ্চ মহাগুণৈঃ ।
ঋষিবাক্যৈশ্চ হনুমানভবৎ প্রীতভানসঃ ।। 5.55.34 ।।।।
55.35
ততঃ কপিঃ প্রাপ্তমনোরথার্থস্তামক্ষতাং রাজসুতাং বিদিত্বা ।
প্রত্যক্ষতস্তাং পুনরেব দৃষ্ট্বা প্রতিপ্রয়াণায় মতিং চকার ।। 5.55.35 ।।