Utshovসর্গ 52
52.1
তস্য তদ্বচনং শ্রুত্বা বানরস্য মহাত্মনঃ ।
আজ্ঞাপয়দ্বধং তস্য রাবণঃ ক্রোধমূর্চ্ছিতঃ ।। ৫.৫২.১।।।।
52.2
বধে তস্য সমাজ্ঞপ্তে রাবণেন দুরাত্মনা ।
নিবেদিতবতো দৌত্যং নানুমেনে বিভীষণঃ ।। ৫.৫২.২।।।।
52.3
তং রক্ষোধিপতিং ক্রুদ্ধং তচ্চ কার্যমুপস্থিতম্ ।
বিদিত্বা চিন্তয়ামাস কার্যং কার্যবিধৌ স্থিতঃ ।। ৫.৫২.৩।।।।
52.4
নিশ্চিতার্থস্ততঃ সাম্না ঽ ঽপূজ্য শত্রুজিদগ্রজম্ ।
উবাচ হিতমত্যর্থং বাক্যং বাক্যবিশারদঃ ।। ৫.৫২.৪।।।।
52.5
ক্ষমস্ব রোষং ত্যজ রাক্ষসেন্দ্র প্রসীদ মদ্বাক্যমিদং শৃণুষ্ব ।
বধং ন কুর্বন্তি পরাবরজ্ঞা দূতস্য সন্তো বসুধাধিপেন্দ্রাঃ ।। ৫.৫২.৫।।।।
52.6
রাজধর্মবিরুদ্ধং চ লোকবৃত্তেশ্চ গর্হিতম্ ।
তব চাসদৃশং বীর কপেরস্য প্রমাপণম্ ।। ৫.৫২.৬।।।।
52.7
ধর্মজ্ঞশ্চ কৃতজ্ঞশ্চ রাজধর্মবিশারদঃ ।
পরাবরজ্ঞো ভূতানাং ত্বমেব পরমার্থবিৎ ।। ৫.৫২.৭।।।।
52.8
গৃহ্যন্তে যদি রোষেণ ত্বাদৃশো ঽপি বিপশ্চিতঃ ।
ততঃ শাস্ত্রধর্মবিপশ্চিত্ত্বং শ্রম এব হি কেবলম্ ।। ৫.৫২.৮।।।।
52.9
তস্মাৎ প্রসীদ শত্রুঘ্ন রাক্ষসেন্দ্র দুরাসদ ।
যুক্তায়ুক্তং বিনিশ্চিত্য দূতদণ্ডে বিধীয়তাম্ ।। ৫.৫২.৯।।।।
52.10
বিভীষণবচঃ শ্রুত্বা রাবণো রাক্ষসেশ্বরঃ ।
রোষেণ মহতাবিষ্টো বাক্যমুত্তরমব্রবীৎ ।। ৫.৫২.১০।।।।
52.11
ন পাপানাং বধে পাপং বিদ্যতে শত্রুসূদন ।
তস্মাদেনং বধিষ্যামি বানরং পাপচারিণম্ ।। ৫.৫২.১১।।।।
52.12
অধর্মমূলং বহুরোষয়ুক্তমনার্যজুষ্টং বচনং নিশম্য ।
উবাচ বাক্যং পরমার্থতত্ত্বং বিভীষণো বুদ্ধিমতাং বরিষ্ঠঃ ।। ৫.৫২.১২।।।।
52.13
প্রসীদ লঙ্কেশ্বর রাক্ষসেন্দ্র ধর্মার্থয়ুক্তং বচনং শৃণুষ্ব ।
দূতা ন বধ্যাঃ সময়েষু রাজন্ সর্বেষু সর্বত্র বদন্তি সন্তঃ ।। ৫.৫২.১৩।।।।
52.14
অসংশয়ং শত্রুরয়ং প্রবৃদ্ধঃ কৃতং হ্যনেনাপ্রিয়মপ্রমেয়ম্ ।
ন দূতবধ্যাং প্রবদন্তি সন্তো দূতস্য দৃষ্টা বহবো হি দণ্ডাঃ ।। ৫.৫২.১৪।।।।
52.15
বৈরূপ্যমঙ্গেষু কশাভিঘাতো মৌণ্ড্যং(ঢ্যং) তথা লক্ষণসন্নিপাতঃ ।
এতান্ হি দূতে প্রবদন্তি দণ্ডান্ বধস্তু দূতস্য ন নঃ শ্রুতো ঽপি ।। ৫.৫২.১৫।।।।
52.16
কথং চ ধর্মার্থবিনীতবুদ্ধিঃ পরাবরপ্রত্যয়নিশ্চিতার্থঃ ।
ভবদ্বিধঃ কোপবশে হি তিষ্ঠেৎ কোপং নিয়চ্ছন্তি হি সত্ত্ববন্তঃ ।। ৫.৫২.১৬।।।।
52.17
ন ধর্মবাদে ন চ লোকবৃত্তে ন শাস্ত্রবুদ্ধিগ্রহণেষু চাপি ।
বিদ্যেত কশ্চিত্তব বীরতুল্যস্ত্বং হ্যুত্তমঃ সর্বসুরাসুরাণাম্ ।। ৫.৫২.১৭।।।।
52.18
ন চাপ্যস্য কপের্ঘাতে কঞ্চিৎ পশ্যাম্যহং গুণম্ ।
তেষ্বয়ং পাত্যতাং দণ্ডো যৈরয়ং প্রেষিতঃ কপিঃ ।। ৫.৫২.১৮।।।।
52.19
সাধুর্বা যদিবা ঽসাধুঃ পরৈরেষ সমর্পিতঃ ।
ব্রুবন্ পরার্থং পরবান্ ন দূতো বধমর্হতি ।। ৫.৫২.১৯।।।।
52.20
অপি চাস্মিন্ হতে রাজন্ নান্যং পশ্যামি খেচরম্ ।
ইহ যঃ পুনরাগচ্ছেৎ পরং পারং মহোদধেঃ ।। ৫.৫২.২০।।।।
52.21
তস্মান্নাস্য বদে যত্নঃ কার্যঃ পরপুরঞ্জয় ।
ভবান্ সেন্দ্রেষু দেবেষু যত্নমাস্তাতুমর্হতি ।। ৫.৫২.২১।।।।
52.22
অস্মিন্ বিনষ্টে নহি দূতমন্যং পশ্যামি যস্তৌ নররাজপুত্রৌ ।
যুদ্ধায় যুদ্ধপ্রিয় দুর্বিনীতাবুদ্যোজয়েদ্দীর্ঘপথাবরুদ্ধৌ ।। ৫.৫২.২২।।।।
52.23
পরাক্রমোত্সাহমনস্বিনাং চ সুরাসুরাণামপি দুর্জয়েন ।
ত্বয়া মনোনন্দন নৈর্ঋতানাং যুদ্ধায়তির্নাশয়িতুং ন যুক্তা ।। ৫.৫২.২৩।।।।
52.24
হিতাশ্চ শূরাশ্চ সমাহিতাশ্চ কুলেষু জাতাশ্চ মহাগুণেষু ।
মনস্বিনঃ শস্ত্রভৃতাং বরিষ্ঠাঃ কোট্যগ্রতস্তে সুভৃতাশ্চ যোধাঃ ।। ৫.৫২.২৪।।।।
52.25
তদেকদেশেন বলস্য তাবৎ কেচিত্তবাদেশকৃতো ঽভিয়ান্তু ।
তৌ রাজপুত্রৌ বিনিগৃহ্য মূঢৌ পরেষু তে ভাবয়িতুং প্রভাবম্ ।। ৫.৫২.২৫।।।।
52.26
নিশাচরাণামধিপো ঽনুজস্য বিভীষণস্যোত্তমবাক্যমিষ্টম্ ।
জগ্রাহ বুদ্ধ্যা সুরলোকশত্রুর্মহাবলো রাক্ষসরাজমুখ্যঃ ।। ৫.৫২.২৬।।