সর্গ 49

49.1

ততঃ স কর্মণা তস্য বিস্মিতো ভীমবিক্রমঃ ।
হনুমান্ রোষতাম্রাক্ষো রক্ষোধিপমবৈক্ষত ।। ৫.৪৯.১।।।।

ভ্রাজমানং মহার্হেণ কাঞ্চনেন বিরাজতা ।
মুক্তাজালাবৃতেনাথ মুকুটেন মহাদ্যুতিম্ ।। ৫.৪৯.২।।।।

বজ্রসংয়োগসংয়ুক্তৈর্মহার্হমণিবিগ্রহৈঃ ।
হৈমৈরাভরণৈশ্চিত্রৈর্মনসেব প্রকল্পিতৈঃ ।। ৫.৪৯.৩।।।।

মহার্হক্ষৌমসংবীতং রক্তচন্দনরূষিতম্ ।
স্বনুলিপ্তং বিচিত্রাভির্বিবিধাভিশ্চ ভক্তিভিঃ ।। ৫.৪৯.৪।।।।

বিবৃতৈর্দর্শনীয়ৈশ্চ রক্তাক্ষৈর্ভীমদর্শনৈঃ ।
দীপ্ততীক্ষ্ণমহাদংষ্ট্রৈঃ প্রলম্বদশনচ্ছদৈঃ ।। ৫.৪৯.৫।।।।

শিরোভির্দশভির্বীরং ভ্রাজমানং মহৌজসম্ ।
নানাব্যালসমাকীর্ণৈঃ শিখরৈরিব মন্দরম্ ।। ৫.৪৯.৬।।।।

নীলাঞ্জনচয়প্রখ্যং হারেণোরসি রাজতা ।
পূর্ণচন্দ্রাভবক্রেণ সবলাকমিবাম্বুদম্ ।। ৫.৪৯.৭।।।।

বাহুভির্বদ্ধকেয়ূরৈশ্চন্দনোত্তমরূষিতৈঃ ।
ভ্রাজমানাঙ্গদৈঃ পীনৈঃ পঞ্চশীর্ষৌরিবোরগৈঃ ।। ৫.৪৯.৮।।।।

মহতি স্ফাটিকে চিত্রে রত্নসংয়োগসংস্কৃতে ।
উত্তমাস্তরণাস্তীর্ণে সূপবিষ্টং বরাসনে ।। ৫.৪৯.৯।।।।

অলংকৃতাভিরত্যর্থং প্রমদাভিঃ সমন্ততঃ ।
বালব্যজনহস্তাভিরারাৎ সমুপসেবিতম্ ।। ৫.৪৯.১০।।।।

দুর্ধরেণ প্রহস্তেন মহাপার্শ্বেন রক্ষসা ।
মন্ত্রিভির্মন্ত্রতত্ত্বজ্ঞৈর্নিকুম্ভেন চ মন্ত্রিণা ।। ৫.৪৯.১১।।।।

সুখোপবিষ্টং রক্ষোভিশ্চতুর্ভির্বলদর্পিতৈঃ ।
কৃত্স্ন পরিবৃতং লোকং চতুর্ভিরিব সাগরৈঃ ।। ৫.৪৯.১২।।।।

সচিবৈর্মন্ত্রতত্ত্বজ্ঞৈরন্যৈশ্চ শুভবুদ্ধিভিঃ ।
অন্বাস্যমানং রক্ষোভিঃ সুরৈরিব সুরেশ্বরম্ ।। ৫.৪৯.১৩।।।।

অপশ্যদ্রাক্ষসপতিং হনুমানতিতেজসম্ ।
বিষ্ঠিতং মেরুশিখরে সতোয়মিব তোয়দম্ ।। ৫.৪৯.১৪।।।।

স তৈঃ সংপীড্যমানো ঽপি রক্ষোভির্ভীমবিক্রমৈঃ ।
বিস্ময়ং পরমং গত্বা রক্ষোধিপমবৈক্ষত ।। ৫.৪৯.১৫।।।।

ভ্রাজমানং ততো দৃষ্ট্বা হনুমান্ রাক্ষসেশ্বরম্ ।
মনসা চিন্তয়ামাস তেজসা তস্য মোহিতঃ ।। ৫.৪৯.১৬।।।।

অহো রূপমহো ধৈর্যমহো সত্ত্বমহো দ্যুতিঃ ।
অহো রাক্ষসরাজস্য সর্বলক্ষণয়ুক্ততা ।। ৫.৪৯.১৭।।।।

যদ্যধর্মো ন বলবান্ স্যাদয়ং রাক্ষসেশ্বরঃ ।
স্যাদয় সুরলোকস্য সশক্রস্যাপি রক্ষিতা ।। ৫.৪৯.১৮।।।।

অস্য ক্রূরৈর্নৃশংসৈশ্চ কর্মভির্লোককুত্সিতৈঃ ।
তেন বিভ্যতি খল্বস্মাল্লোকাঃ সামরদানবাঃ ।। ৫.৪৯.১৯।।।।

অয়ং হ্যুত্সহতে ক্রুদ্ধঃ কর্তুমেকার্ণবং জগৎ ।
ইতি চিন্তাং বহুবিধামকরোন্মতিমান্ হরিঃ ।দৃষ্ট্বা রাক্ষসরাজস্য প্রভাবমমিতৌজসঃ ।। ৫.৪৯.২০।।