Utshovসর্গ 48
48.1
ততঃ স রক্ষোধিপতির্মহাত্মা হনূমতা ঽক্ষে নিহতে কুমারে ।
মনঃ সমাধায় তদেন্দ্রকল্পং সমাদিদেশেন্দ্রজিতং সরোষম্ ।। ৫.৪৮.১।।।।
48.2
ত্বমস্ত্রবিচ্ছস্ত্রবিদাং বরিষ্ঠঃ সুরাসুরাণামপি শোকদাতা ।
সুরেষু সেন্দ্রেষু চ দৃষ্টকর্মা পিতামহারাধনঽঞ্চিতাস্ত্রঃ ।। ৫.৪৮.২।।।।
48.3
তবাস্ত্রবলমাসাদ্য নাসুরা ন মরুদ্গণাঃ ।
ন শেকুঃ সমরে স্থাতুং সুরেশ্বরসমাশ্রিতাঃ ।। ৫.৪৮.৩।।।।
48.4
ন কশ্চিৎ ত্রিষু লোকেষু সংয়ুগে নগতশ্রমঃ ।
ভুজবীর্যাভিগুপ্তশ্চ তপসা চাভিরক্ষিতঃ ।দেশকালবিভাগজ্ঞস্ত্বমেব মতিসত্তমঃ ।। ৫.৪৮.৪।।।।
48.5
ন তে ঽস্ত্যশক্যং সমরেষু কর্মণা ন তে ঽস্ত্যকার্যং মতিপূর্বমন্ত্রণে ।
ন সো ঽস্তি কশ্চিৎ ত্রিষু সংগ্রহেষু বৈ ন বেদ যস্তে ঽস্ত্রবলং বলং চ তে ।। ৫.৪৮.৫।।।।
48.6
মমানুরূপং তপসো বলং চ তে পরাক্রমশ্চাস্ত্রবলং চ সংয়ুগে ।
ন ত্বাং সমাসাদ্য রণাবমর্দে মনঃ শ্রমং গচ্ছতি নিশ্চিতার্থম্ ।। ৫.৪৮.৬।।।।
48.7
নিহতাঃ কিঙ্করাঃ সর্বে জম্বুমালী চ রাক্ষসঃ ।
অমাত্যপুত্রা বীরাশ্চ পঞ্চ সেনাগ্রয়ায়িনঃ ।। ৫.৪৮.৭।।।।
48.8
বলানি সুসমৃদ্ধানি সাশ্বনাগরথানি চ ।
সহোদরস্তে দয়িতঃ কুমারো ঽক্ষশ্চ সূদিতঃ ।। ৫.৪৮.৮।।।।
48.9
ন হি তেষ্বেব মে সারো যস্ত্বয্যরিনিষূদন ।
। ৫.৪৮.৯।।।।
48.10
ইদং হি দৃষ্ট্বা মতিমন্মহদ্বলং কপেঃ প্রভাবং চ পরাক্রমং চ ।
ত্বমাত্মনশ্চাপি সমীক্ষ্য সারং কুরুষ্ব বেগং স্ববলানুরূপম্ ।। ৫.৪৮.১০।।।।
48.11
বলাবমর্দস্ত্বয়ি সন্নিকৃষ্টে যথা গতে শাম্যতি শান্তশত্রৌ ।
তথা সমীক্ষ্যাত্মবলং পরং চ সমারভস্বাস্ত্রবিদাং বরিষ্ঠ ।। ৫.৪৮.১১।।।।
48.12
ন বীর সেনা গণশোচ্যবন্তি ন বজ্রমাদায় বিশালসারম্ ।
ন মারুতস্যাস্য গতেঃ প্রমাণং ন চাগ্নিকল্পঃ করণেন হন্তুম্ ।। ৫.৪৮.১২।।।।
48.13
তমেবমর্থং প্রসমীক্ষ্য সম্যক্ স্বকর্মসাম্যাদ্ধি সমাহিতাত্মা ।
স্মরংশ্চ দিব্যং ধনুষো ঽস্ত্রবীর্যং ব্রজাক্ষতং কর্ম সমারভস্ব ।। ৫.৪৮.১৩।।।।
48.14
ন খল্বিয়ং মতিঃ শ্রেষ্ঠা যত্ত্বাং সংপ্রেষয়াম্যহম্ ।
ইয়ং চ রাজধর্মাণাং ক্ষত্রস্য চ মতির্মতা ।। ৫.৪৮.১৪।।।।
48.15
নানাশস্ত্রৈশ্চ সংগ্রামে বৈশারদ্যমরিন্দম্ ।
অবশ্যমেব বোদ্ধব্যং কাম্যশ্চ বিজয়ো রণে ।। ৫.৪৮.১৫।।।।
48.16
ততঃ পিতুস্তদ্বচনং নিশম্য প্রদক্ষিণং দক্ষসুতপ্রভাবঃ ।
চকার ভর্তারমদীনসত্ত্বো রণায় বীরঃ প্রতিপন্নবুদ্ধিঃ ।। ৫.৪৮.১৬।।।।
48.17
ততস্তৈঃ স্বগণৈরিষ্টৈরিন্দ্রজৎ প্রতিপূজিতঃ ।
যুদ্ধোদ্ধতঃ কৃতোত্সাহঃ সগ্রামং প্রত্যদ্যত ।। ৫.৪৮.১৭।।।।
48.18
শ্রীমান্ পদ্মপলাশাক্ষো রাক্ষসাধিপতেঃ সুতঃ ।
নির্জগাম মহাতেজাঃ সমুদ্র ইব পর্বসু ।। ৫.৪৮.১৮।।।।
48.19
স পক্ষিরাজোপমতুল্যবেগৈর্ব্যালৈশ্চতুর্ভিঃ সিততীক্ষ্ণদংষ্ট্রৈঃ ।
রথং সমায়ুক্তমসঙ্গবেগং সমারুরোহেন্দ্রজিদিন্দ্রকল্পঃ ।। ৫.৪৮.১৯।।।।
48.20
স রথী ধন্বিনীং শ্রেষ্ঠঃ শস্ত্রজ্ঞো ঽস্ত্রবিদাং বরঃ ।
রথেনাভিয়য়ৌ ক্ষিপ্রং হনূমান্ যত্র সো ঽভবৎ ।। ৫.৪৮.২০।।।।
48.21
স তস্য রথনির্ঘোষং জ্যাস্বনং কার্মুকস্য চ ।
নিশম্য হরিবীরো ঽসৌ সংপ্রহৃষ্টতরো ঽভবৎ ।। ৫.৪৮.২১।।।।
48.22
সুমহচ্চাপমাদায় শিতশল্যাংশ্চ সায়কান্ ।
হনুমন্তমভিপ্রেত্য জগাম রণপণ্ডিতঃ ।। ৫.৪৮.২২।।।।
48.23
তস্মিংস্ততঃ সংয়তি জাতহর্ষে রণায় নির্গচ্ছতি বাণপাণৌ ।
দিশশ্চ সর্বাঃ বভূবর্মৃগাশ্চ রৌদ্রা বহুধা বিনেদুঃ ।। ৫.৪৮.২৩।।।।
48.24
সমাগতাস্তত্র তু নাগয়ক্ষা মহর্ষয়শ্চক্রচরাশ্চ সিদ্ধাঃ ।
নভঃ সমাবৃত্য চ পক্ষিসঙ্ঘা বিনেদুরুচ্চৈঃ পরমপ্রহৃষ্টাঃ ।। ৫.৪৮.২৪।।।।
48.25
আয়ান্তং সরথং দৃষ্ট্বা তূর্ণমিন্দ্রজিতং কপিঃ ।
বিননাদ মহানাদং ব্যবর্ধত চ বেগবান্ ।। ৫.৪৮.২৫।।।।
48.26
ইন্দ্রজিত্তু রথং দিব্যমাস্থিতশ্চিত্রকার্মুকঃ ।
ধনুর্বিস্ফারয়ামাস তডিদূর্জিতনিঃস্বনম্ ।। ৫.৪৮.২৬।।।।
48.27
ততঃ সমেতাবতি তীক্ষ্ণবেগৌ মহাবলৌ তৌ রণনির্বিশঙ্কৌ ।
কপিশ্চ রক্ষোধিপতেশ্চ পুত্রঃ সুরাসুরেন্দ্রাবিব বদ্ধবৈরৌ ।। ৫.৪৮.২৭।।।।
48.28
স তস্য বীরস্য মহারথস্য ধনুষ্মতঃ সংয়তি সংমতস্য ।
শরপ্রবেগং ব্যহনৎ প্রবৃদ্ধশ্চচার মার্গে পিতুরপ্রমেয়ে ।। ৫.৪৮.২৮।।।।
48.29
ততঃ শরানায়তীক্ষ্ণশল্যান্ সুপত্রিণঃ কাঞ্চনচিত্রপুঙ্খান্ ।
মুমোচ বীরঃ পরবীরহন্তা সুসন্নতান্ বজ্রনিপাতবেগান্ ।। ৫.৪৮.২৯।।।।
48.30
ততস্তু তত্স্যন্দননিঃস্বনং চ মৃদঙ্গভেরীপটহস্বনং চ ।
বিকৃষ্যমাণস্য চ কার্মুকস্য নিশম্য ঘোষং পুনরুত্পপাত ।। ৫.৪৮.৩০।।।।
48.31
শরাণামন্তরেষ্বাশু ব্যবর্তত মহাকপিঃ ।
হরিস্তস্যাভিলক্ষ্যস্য মোঘয়ঁল্লক্ষ্যসংগ্রহম্ ।। ৫.৪৮.৩১।।।।
48.32
শরাণআমগ্রতস্তস্য পুনঃ সমভিবর্তত ।
প্রসার্য হস্তৌ হনুমানুত্পপাতানিলাত্মজঃ ।। ৫.৪৮.৩২।।।।
48.33
তাবুভৌ বেগসম্পন্নৌ রণকর্মবিশারদৌ ।
সর্বভূতমনোগ্রাহি চক্রতুর্যুদ্ধমুত্তমম্ ।। ৫.৪৮.৩৩।।।।
48.34
হনূমতো বেদ ন রাক্ষসো ঽন্তরং ন মারুতিস্তস্য মহাত্মনো ঽন্তরম্ ।
পরস্পরং নির্বিষহৌ বভূবতুঃ সমেত্য তৌ দেবসমানবিক্রমৌ ।। ৫.৪৮.৩৪।।।।
48.35
ততস্তু লক্ষ্যে স বিহন্যমানে শরেষ্বমোঘেষু চ সংপতত্সু ।
জাগম চিন্তাং মহতীং মহাত্মা সমাধিসংয়োগসমাহিতাত্মা ।। ৫.৪৮.৩৫।।।।
48.36
ততো মতিং রাক্ষসরাজসূনুশ্চকার তস্মিন্ হরিবীরমুখ্যে ।
অবধ্যতাং তস্য কপেঃ সমীক্ষ্য কথং নিগচ্ছেদিতি নিগ্রহার্থম্ ।। ৫.৪৮.৩৬।।।।
48.37
ততঃ পৈতামহং বীরঃ সো ঽস্ত্রমস্ত্রবিদাং বরঃ ।
সন্দধে সুমহাতেজাস্তং হরিপ্রবরং প্রতি ।। ৫.৪৮.৩৭।।।।
48.38
অবধ্যো ঽয়মিতি জ্ঞাত্বা তমস্ত্রেণাস্ত্রতত্ত্ববিৎ ।
নিজগ্রাহ মহাবাহুর্মারুতাত্মজমিন্দ্রজিৎ ।। ৫.৪৮.৩৮।।।।
48.39
তেন বদ্ধস্ততো ঽস্ত্রেণ রাক্ষসেন স বানরঃ ।
অভবন্নির্বিচেষ্টশ্চ পপাত চ মহীতলে ।। ৫.৪৮.৩৯।।।।
48.40
ততো ঽথ বুদ্ধ্বা স তদস্ত্রবন্ধং প্রভোঃ প্রভাবাদ্ বিগতাত্মবেগঃ ।
পিতামহানুগ্রহমাত্মনশ্চ বিচিন্তয়ামাস হরিপ্রবীরঃ ।। ৫.৪৮.৪০।।।।
48.41
ততঃ স্বায়ম্ভুবৈর্মন্ত্রৈর্ব্রহ্মাস্ত্রমভিমন্ত্রিতম্ ।
হনূমাংশ্চিন্তয়ামাস বরদানং পিতামহাৎ ।। ৫.৪৮.৪১।।।।
48.42
ন মে ঽস্য বন্ধস্য চ শক্তিরস্তি বিমোক্ষণে লোকগুরোঃ প্রভাবাৎ ।
ইত্যেব মত্বা বিহিতো ঽস্ত্রবন্ধো ময়া ঽ ঽত্ময়োনেরনুবর্তিতব্যঃ ।। ৫.৪৮.৪২।।।।
48.43
স বীর্যমস্ত্রস্য কপির্বিচার্য পিতামহানুগ্রহমাত্মনশ্চ ।
বিমোক্ষশক্তিং পরিচিন্তয়িত্বা পিতামহাজ্ঞামনুবর্ততে স্ম ।। ৫.৪৮.৪৩।।।।
48.44
অস্ত্রেণাপি হি বদ্ধস্য ভয়ং মম ন জায়তে ।
পিতামহমহেন্দ্রাভ্যাং রক্ষিতস্যানিলেন চ ।। ৫.৪৮.৪৪।।।।
48.45
গ্রহণে চাপি রক্ষোভির্মহান্ মে গুণদর্শনঃ ।
রাক্ষসেন্দ্রেণ সংবাদস্তস্মাদগৃহ্ণন্তু মাং পরে ।। ৫.৪৮.৪৫।।।।
48.46
স নিশ্চিতার্থঃ পরিবীরহন্তা সমীক্ষ্যকারী বিনিবৃত্তচেষ্টঃ ।
পরৈঃ প্রসহ্যাভিগতৈর্নিগৃহ্য ননাদ তৈস্তৈঃ পরিভর্ত্স্যমানঃ ।। ৫.৪৮.৪৬।।।।
48.47
ততস্তং রাক্ষসা দৃষ্ট্বা নির্বিচেষ্টমরিন্দমম্ ।
ববন্ধুঃ শণবল্কৈশ্চ দ্রুমচীরৈশ্চ সংহতৈঃ ।। ৫.৪৮.৪৭।।।।
48.48
স রোচয়ামাস পরৈশ্চ বন্ধং প্রসহ্য বীরৈরভিনিগ্রহং চ ।
কৌতূহলান্মাং যদি রাক্ষসেন্দ্রো দ্রষ্ঠুং ব্যবস্যেদিতি নিশ্চিতার্থঃ ।। ৫.৪৮.৪৮।।।।
48.49
স বদ্ধস্তেন বল্কেন বিমুক্তো ঽস্ত্রেণ বীর্যবান্ ।
অস্ত্রবন্ধঃ স চান্যং হি ন বন্ধমনুবর্ততে ।। ৫.৪৮.৪৯।।।।
48.50
অথেন্দ্রজিত্তুদ্রুমচীরবদ্ধং বিচার্য বীরঃ কপিসত্তমং তম্ ।
বিমুক্তমস্ত্রেণ জগাম চিন্তাং নান্যেন বদ্ধো হ্যনুবর্ততে ঽস্ত্রম্ ।। ৫.৪৮.৫০।।।।
48.51
অহো মহৎ কর্ম কৃতং নিরর্থকং ন রাক্ষসৈর্মন্ত্রগতির্বিমৃষ্টা ।
পুনশ্চ নাস্ত্রে বিহতে ঽস্ত্রমন্যৎ প্রবর্ততে সংশয়িতাঃ স্ম সর্বে ।। ৫.৪৮.৫১।।।।
48.52
অস্ত্রেণ হনুমান্ মুক্তো নাত্মানমববুধ্যত ।
কৃষ্যমাণস্তু রক্ষোভিস্তৈশ্চ বন্ধের্নিপীডিতঃ ।। ৫.৪৮.৫২।।।।
48.53
হন্যমানস্ততঃ ক্রূরৈ রাক্ষসৈঃ কাষ্ঠমুষ্টিভিঃ ।
সমীপং রাক্ষসেন্দ্রস্য প্রকৃষ্যত স বানরঃ ।। ৫.৪৮.৫৩।।।।
48.54
অথেন্দ্রজিত্তং প্রসমীক্ষ্য মুক্তমস্ত্রেণ বদ্ধং দ্রুমচীরসূত্রৈঃ ।
ব্যদর্শয়ত্তত্র মহাবলং হরিপ্রবীরং সগণায় রাজ্ঞে ।। ৫.৪৮.৫৪।।।।
48.55
তং মত্তমিব মাতঙ্গং বদ্ধং কপিবরোত্তমম্ ।
রাক্ষসা রাক্ষসেন্দ্রায় রাবণায় ন্যবেদয়ন্ ।। ৫.৪৮.৫৫।।।।
48.56
কো ঽয়ং কস্য কুতো বা ঽত্র কিং কার্যং কো ব্যপাশ্রয়ঃ ।
ইতি রাক্ষসবীরাণাং তত্র সংজজ্ঞিরে কথাঃ ।। ৫.৪৮.৫৬।।।।
48.57
হন্যতাং দহ্যতাং বাপি ভক্ষ্যতামিতি চাপরে ।
রাক্ষসাস্তত্র সংক্রুদ্ধাঃ পরস্পরমথাব্রুবন্ ।। ৫.৪৮.৫৭।।।।
48.58
অতীত্য মার্গং সহসা মহাত্মা স তত্র রক্ষোধিপপাদমূলে ।
দদর্শ রাজ্ঞঃ পরিচারবৃদ্ধান্ গৃহং মহারত্নবিভূষিতং চ ।। ৫.৪৮.৫৮।।।।
48.59
স দদর্শ মহাতেজা রাবণঃ কপিসত্তমম্ ।
রক্ষোভির্বিকৃতাকারৈঃ কৃষ্যমাণমিতস্ততঃ ।। ৫.৪৮.৫৯।।।।
48.60
রাক্ষসাধিপতিং চাপি দদর্শ কপিসত্তমঃ ।
তেজোবলসমায়ুক্তং তপন্তমিব ভাস্করম্ ।। ৫.৪৮.৬০।।।।
48.61
স রোষসংবর্তিততাম্রদৃষ্টির্দশাননস্তং কপিমন্ববেক্ষ্য ।
অথোপবিষ্টান্ কুলশীলবৃদ্ধান্ সমাদিশত্তং প্রতি মন্ত্রিমুখ্যান্ ।। ৫.৪৮.৬১।।।।
48.62
যথাক্রমং তৈঃ স কপির্বিপৃষ্টঃ কার্যার্থমর্থস্য চ মূলমাদৌ ।
নিবেদয়ামাস হরীশ্বরস্য দূতঃ সকাশাদহমাগতো ঽস্মি ।। ৫.৪৮.৬২।।