Utshovসর্গ 46
46.1
হতান্ মন্ত্রিসুতান্ বুদ্ধ্বা বানরেণ মহাত্মনা ।
রাবণঃ সংবৃতাকারশ্চকার মতিমুত্তমাম্ ।। ৫.৪৬.১।।।।
46.2
স বিরূপাক্ষয়ূপাক্ষৌ দুর্ধরং চৈব রাক্ষসম্ ।
প্রঘসং ভারকর্ণং চ পঞ্চ সেনাগ্রনায়কান্ ।। ৫.৪৬.২।।।।
46.3
সন্দিদেশ দশগ্রীবো বীরান্নয়বিশারদান্ ।
হনুমদ্গ্রহণব্যগ্রান্ বায়ুবেগসমান্ যুধি ।। ৫.৪৬.৩।।।।
46.4
যাত সেনাগ্রগাঃ সর্বে মহাবলপরিগ্রহাঃ ।
সবাজিরথমাতঙ্গাঃ স কপিঃ শাস্যতামিতি ।। ৫.৪৬.৪।।।।
46.5
যত্তৈশ্চ খলু ভাব্যং স্যাত্তমাসাদ্য বনালয়ম্ ।
কর্ম চাপি সমাধেয়ং দেশকালবিরোধিনম্ ।। ৫.৪৬.৫।।।।
46.6
ন হ্যহং তং কপিং মন্যে কর্মণা প্রতিতর্কয়ন্ ।
সর্বথা তন্মহদ্ভূতং মহাবলপরিগ্রহম্ ।ভবেদিন্দ্রেণ বা সৃষ্টমস্মদর্থং তপোবলাৎ ।। ৫.৪৬.৬।।।।
46.7
সনাগয়ক্ষগন্ধর্বা দেবাসুরমহর্ষয়ঃ ।
যুষ্মাভিঃ সহিতৈঃ সর্বৈর্ময়া সহ বিনির্জিতাঃ ।। ৫.৪৬.৭।।।।
46.8
তৈরবশ্যং বিধাতব্যং ব্যলীকং কিংচিদেব নঃ ।
তদেব নাত্র সন্দেহঃ প্রসহ্য পরিগৃহ্যতাম্ ।। ৫.৪৬.৮।।।।
46.9
নাবমান্যো ভবদ্ভিশ্চ হরির্ধীরপরাক্রমঃ ।
দৃষ্টা হি হরয়ঃ পূর্বং ময়া বিপুলবিক্রমাঃ ।। ৫.৪৬.৯।।।।
46.10
বালী চ সহসুগ্রীবো জাম্ববাংশ্চ মহাবলঃ ।
নীলঃ সেনাপতিশ্চৈব যে চান্যে দ্বিবিদাদয়ঃ ।। ৫.৪৬.১০।।।।
46.11
নৈবং তেষাং গতির্ভীমা ন তেজো ন পরাক্রমঃ ।
ন মতির্ন বলোত্সাহৌ ন রূপপরিকল্পনম্ ।। ৫.৪৬.১১।।।।
46.12
মহত্সত্ত্বমিদং জ্ঞেয়ং কপিরূপং ব্যবস্থিতম্ ।
প্রয়ত্নং মহদাস্থায় ক্রিয়তামস্য নিগ্রহঃ ।। ৫.৪৬.১২।।।।
46.13
কামং লোকাস্ত্রয়ঃ সেন্দ্রাঃ সসুরাসুরমানবাঃ ।
ভবতামগ্রতঃ স্থাতুং ন পর্যাপ্তা রণাজিরে ।। ৫.৪৬.১৩।।।।
46.14
তথাপি তু নয়জ্ঞেন জয়মাকাঙ্ক্ষতা রণে ।
আত্মা রক্ষ্যঃ প্রয়ত্নেন যুদ্ধসিদ্ধির্হি চঞ্চলা ।। ৫.৪৬.১৪।।।।
46.15
তে স্বামিবচনং সর্বে প্রতিগৃহ্য মহৌজসঃ ।
সমুত্পেতুর্মহাবেগা হুতাশসমতেজসঃ ।। ৫.৪৬.১৫।।।।
46.16
রথৈর্মত্তৈশ্চ মাতঙ্গৈর্বাজিভিশ্চ মহাজবৈঃ ।
শ্স্ত্রৈশ্চ বিবিধৈস্তীক্ষ্ণৈঃ সর্বৈশ্চোপচিতা বলৈঃ ।। ৫.৪৬.১৬।।।।
46.17
ততস্তং দদৃশুর্বীরা দীপ্যমানং মহাকপিম্ ।
রশ্মিমন্তমিবোদ্যন্তং স্বতেজোরশ্মিমালিনম্ ।। ৫.৪৬.১৭।।।।
46.18
তোরণস্থং মহোত্সাহং মহাসত্ত্বং মহাবলম্ ।
মহামতিং মহাবেগং মহাকায়ং মহাবলম্ ।। ৫.৪৬.১৮।।।।
46.19
তং সমীক্ষ্যৈব তে সর্বে দিক্ষু সর্বাস্ববস্থিতাঃ ।
তৈস্তৈঃ প্রহরণৈর্ভীমৈরভিপেতুস্ততস্ততঃ ।। ৫.৪৬.১৯।।।।
46.20
তস্য পঞ্চায়সাস্তীক্ষ্ণাঃ শিতাঃ পীতমুখাঃ শরাঃ ।
শিরস্যুত্পলপত্রাভা দুর্ধরেণ নিপাতিতাঃ ।। ৫.৪৬.২০।।।।
46.21
স তৈঃ পঞ্চভিরাবিদ্ধঃ শরৈঃ শিরসি বানরঃ ।
উত্পপাত নদন্ ব্যোম্নি দিশো দশ বিনাদয়ন্ ।। ৫.৪৬.২১।।।।
46.22
ততস্তু দুর্ধরো বীরঃ সরথঃ সজ্যকার্মুকঃ ।
কিরন্ শরশতৈস্তীক্ষ্ণৈরভিপেদে মহাবলঃ ।। ৫.৪৬.২২।।।।
46.23
স কপির্বারয়ামাস তং ব্যোম্নি শরবর্ষিণম্ ।
বৃষ্টিমন্তং পয়োদান্তে পয়োদমিব মারুতঃ ।। ৫.৪৬.২৩।।।।
46.24
অর্দ্যমানস্ততস্তেন দুর্ধরেণানিলাত্মজঃ ।
চকার কদনং ভূয়ো ব্যবর্ধত চ বেগবান্ ।। ৫.৪৬.২৪।।।।
46.25
স দূরং সহসোত্পত্য দুর্ধরস্য রথে হরিঃ ।
নিপপাত মহবেগো বিদ্যুদ্রাশির্গিরাবিব ।। ৫.৪৬.২৫।।।।
46.26
ততঃ স মথিতাষ্টাশ্বং রথং ভগ্নাক্ষকূবরম্ ।
বিহায় ন্যপতদ্ভূমৌ দুর্ধরস্ত্যক্তজীবিতঃ ।। ৫.৪৬.২৬।।।।
46.27
তং বিরূপাক্ষয়ূপাক্ষৌ দৃষ্ট্বা নিপতিতং ভুবি ।
সঞ্জাতরোষৌ দুর্ধর্ষাবুত্পেততুররিন্দমৌ ।। ৫.৪৬.২৭।।।।
46.28
স তাভ্যাং সহসোত্পত্য বিষ্ঠিতো বিমলে ঽম্বরে ।
মুদ্গরাভ্যাং মহাবাহুর্বক্ষস্যভিহতঃ কপিঃ ।। ৫.৪৬.২৮।।।।
46.29
তয়োর্বেগবতোর্বেগং বিনিহত্য মহাবলঃ ।
নিপপাত পুনর্ভূমৌ সুপর্ণসমবিক্রমঃ ।। ৫.৪৬.২৯।।।।
46.30
স সালবৃক্ষমাসাদ্য তমুত্পাট্য চ বানরঃ ।
তাবুভৌ রাক্ষসৌ বীরৌ জঘান পবনাত্মজঃ ।। ৫.৪৬.৩০।।।।
46.31
ততস্তাংস্ত্রীন্ হতান্ জ্ঞাত্বা বানরেণ তরস্বিনা ।
অভিপেদে মহাবেগঃ প্রসহ্য প্রঘসো হরিম্ ।। ৫.৪৬.৩১।।।।
46.32
ভাসকর্ণশ্চ সংক্রুদ্ধঃ শূলমাদায় বীর্যবান্ ।
একতঃ কপিশার্দূলং যশস্বিনমবস্থিতম্ ।। ৫.৪৬.৩২।।।।
46.33
পট্টিশেন শিতাগ্রেণ প্রঘসঃ প্রত্যয়োধয়ৎ ।
ভাসকর্ণশ্চ শূলেন রাক্ষসঃ কপিসত্তমম্ ।। ৫.৪৬.৩৩।।।।
46.34
স তাভ্যাং বিক্ষতৈর্গাত্রৈরসৃগ্দিগ্ধতনূরুহঃ ।
অভবদ্বানরঃ ক্রুদ্ধো বালসূর্যসমপ্রভঃ ।। ৫.৪৬.৩৪।।।।
46.35
সমুত্পাট্য গিরেঃ শৃঙ্গং সমৃগব্যালপাদপম্ ।
জঘান হনুমান্ বীরো রাক্ষসৌ কপিকুঞ্জরঃ ।। ৫.৪৬.৩৫।।।।
46.36
ততস্তেষ্ববসন্নেষু সেনাপতিষু পঞ্চসু ।
বলং তদবশেষং চ নাশয়াস বানরঃ ।। ৫.৪৬.৩৬।।।।
46.37
অশ্বৈরশ্বান্ গজৈর্নাগান্ যোধৈর্যোধান্ রথৈ রথান্ ।
স কপির্নাশয়ামাস সহস্রাক্ষ ইবাসুরান্ ।। ৫.৪৬.৩৭।।।।
46.38
হতৈর্নাগৈশ্চ তুরগৈর্ভগ্নাক্ষৈশ্চ মহারথৈঃ ।
হতৈশ্চ রাক্ষসৈর্ভূমী রুদ্ধমার্গা সমন্ততঃ ।। ৫.৪৬.৩৮।।।।
46.39
ততঃ কপিস্তান্ ধ্বজিনীপতীন্ রণে নিহত্য বীরান্ সবলান্ সবাহনান্ ।
সমীক্ষ্য বীরঃ পরিগৃহ্য তোরণং কৃতক্ষণঃ কাল ইব প্রজাক্ষয়ে ।। ৫.৪৬.৩৯।।