সর্গ 45

45.1

ততস্তে রাক্ষসেন্দ্রেণ চোদিতা মন্ত্রিণঃ সুতাঃ ।
নির্যুয়ুর্ভবনাত্তস্মাৎ সপ্ত সপ্তার্চিবর্চসঃ ।। ৫.৪৫.১।।।।

মহাবলপরীবারা ধনুষ্মন্তো মহাবলাঃ ।
কৃতাস্ত্রাস্ত্রবিদাং শ্রেষ্ঠাঃ পরস্পরজয়ৈষিণঃ ।। ৫.৪৫.২।।।।

হেমজালপরিক্ষিপ্তৈর্ধ্বজবদ্ভিঃ পতাকিভিঃ ।
তোয়দস্বননির্ঘোষৈর্বাজিয়ুক্তৈর্মহারথৈঃ ।। ৫.৪৫.৩।।।।

তপ্তকাঞ্চনচিত্রাণি চাপান্যমিতবিক্রমাঃ ।
বিস্ফারয়ন্তঃ সংহৃষ্টাস্তডিত্বন্ত ইবাম্বুদাঃ ।। ৫.৪৫.৪।।।।

জনন্যস্তু ততস্তেষাং বিদিত্বা কিঙ্করান্ হতান্ ।
বভূবুঃ শোকসম্ভ্রান্তাঃ সবান্ধবসুহৃজ্জনাঃ ।। ৫.৪৫.৫।।।।

তে পরস্পরসঙ্ঘর্ষাত্তপ্তকাঞ্চনভূষণাঃ ।
অভিপেতুর্হনূমন্তং তোরণস্থমবস্থিতম্ ।। ৫.৪৫.৬।।।।

সৃজন্তো বাণবৃষ্টিং তে রথগর্জিতনিঃস্বনাঃ ।
বৃষ্টিমন্ত ইবাম্ভোদা বিচেরুর্নৈর্ঋতাম্বুদাঃ ।। ৫.৪৫.৭।।।।

অবকীর্ণস্ততস্তাভির্হনুমাঞ্ছরবৃষ্টিভিঃ ।
অভবৎ সংবৃতাকারঃ শৈলরাডিব বৃষ্টিভিঃ ।। ৫.৪৫.৮।।।।

স শরান্ মোঘয়ামাস তেষামাশুচরঃ কপিঃ ।
রথবেগং চ বীরাণাং বিচরন্ বিমলে ঽম্বরে ।। ৫.৪৫.৯।।।।

স তৈঃ ক্রীডন্ ধনুষ্মদ্ভির্ব্যোম্নি বীরঃ প্রকাশতে ।
ধনুষ্মদ্ভির্যথা মেঘৈর্মারুতঃ প্রভুরম্বরে ।। ৫.৪৫.১০।।।।

স কৃত্বা নিনদং ঘোরং ত্রাসয়ংস্তাং মহাচমূম্ ।
চকার হনুমান্ বেগং তেষু রক্ষস্সু বীর্যবান্ ।। ৫.৪৫.১১।।।।

তলেনাভ্যহনৎ কাংশ্চিৎ পাদৈঃ কাংশ্চিৎ পরন্তপঃ ।
মুষ্টিনা ঽভ্যহনৎ কাংশ্চিন্নখৈঃ কাংশ্চিদ্ ব্যদারয়ৎ ।। ৫.৪৫.১২।।।।

প্রমমাথোরসা কাংশ্চিদূরুভ্যামপরান্ কপিঃ ।
কেচিত্তস্য নিনাদেন তত্রৈব পতিতা ভুবি ।। ৫.৪৫.১৩।।।।

ততস্তেষ্ববসন্নেষু ভূমৌ নিপতিতেষু চ ।
তত্সৈন্যমগমত্সর্বং দিশো ভয়ার্দিতম্ ।। ৫.৪৫.১৪।।।।

বিনেদুর্বিস্বরং নাগা নিপেতুর্ভুবি বাজিনঃ ।
ভগ্ননীডধ্বজচ্ছত্ত্রৈর্ভূশ্চ কীর্ণা ঽভবদ্রথৈঃ ।। ৫.৪৫.১৫।।।।

স্রবতা রুধিরেণাথস্রবন্ত্যো দর্শিতাঃ পথি ।
বিবিধৈশ্চ স্বরৈর্লঙ্কা ননাদ বিকৃতং তদা ।। ৫.৪৫.১৬।।।।

স তান্ প্রবৃদ্ধান্ বিনিহত্য রাক্ষসান্ মহাবলশ্চণ্ডপরাক্রমঃ কপিঃ ।
যুয়ুত্সুরন্যৈঃ পুনরেব রাক্ষসৈস্তমেব বীরো ঽভিজগাম তোরণম্ ।। ৫.৪৫.১৭।।