UtshovSarga 45
45.1
ततस्ते राक्षसेन्द्रेण चोदिता मन्त्रिणः सुताः ।
निर्युयुर्भवनात्तस्मात् सप्त सप्तार्चिवर्चसः ।। ५.४५.१।।।।
Tataste rakshasendrena chodita mantrinah sutah
Niryuyurbhavanattasmat sapta saptarchivarchasah
45.2
महाबलपरीवारा धनुष्मन्तो महाबलाः ।
कृतास्त्रास्त्रविदां श्रेष्ठाः परस्परजयैषिणः ।। ५.४५.२।।।।
Mahabalaparivara dhanushmanto mahabalah
Kritastrastravidam shreshthah parasparajayaishinah
45.3
हेमजालपरिक्षिप्तैर्ध्वजवद्भिः पताकिभिः ।
तोयदस्वननिर्घोषैर्वाजियुक्तैर्महारथैः ।। ५.४५.३।।।।
Hemajalaparikshiptairdhvajavadbhih patakibhih
Toyadasvananirghoshairvajiyuktairmaharathaih
45.4
तप्तकाञ्चनचित्राणि चापान्यमितविक्रमाः ।
विस्फारयन्तः संहृष्टास्तडित्वन्त इवाम्बुदाः ।। ५.४५.४।।।।
Taptakanchanachitrani chapanyamitavikramah
Vispharayantah sanhrishtastaditvanta ivambudah
45.5
जनन्यस्तु ततस्तेषां विदित्वा किङ्करान् हतान् ।
बभूवुः शोकसम्भ्रान्ताः सबान्धवसुहृज्जनाः ।। ५.४५.५।।।।
Jananyastu tatastesham viditva kinkaran hatan
Babhuvuh shokasambhrantah sabandhavasuhrijjanah
45.6
ते परस्परसङ्घर्षात्तप्तकाञ्चनभूषणाः ।
अभिपेतुर्हनूमन्तं तोरणस्थमवस्थितम् ।। ५.४५.६।।।।
Te parasparasangharshattaptakanchanabhushanah
Abhipeturhanumantam toranasthamavasthitam
45.7
सृजन्तो बाणवृष्टिं ते रथगर्जितनिःस्वनाः ।
वृष्टिमन्त इवाम्भोदा विचेरुर्नैर्ऋताम्बुदाः ।। ५.४५.७।।।।
Srijanto banavrishtim te rathagarjitanihsvanah
Vrishtimanta ivambhoda vicherurnairritambudah
45.8
अवकीर्णस्ततस्ताभिर्हनुमाञ्छरवृष्टिभिः ।
अभवत् संवृताकारः शैलराडिव वृष्टिभिः ।। ५.४५.८।।।।
Avakirnastatastabhirhanumanchharavrishtibhih
Abhavat sanvritakarah shailaradiva vrishtibhih
45.9
स शरान् मोघयामास तेषामाशुचरः कपिः ।
रथवेगं च वीराणां विचरन् विमले ऽम्बरे ।। ५.४५.९।।।।
Sa sharan moghayamasa teshamashucharah kapih
Rathavegam cha viranam vicharan vimale mbare
45.10
स तैः क्रीडन् धनुष्मद्भिर्व्योम्नि वीरः प्रकाशते ।
धनुष्मद्भिर्यथा मेघैर्मारुतः प्रभुरम्बरे ।। ५.४५.१०।।।।
Sa taih kridan dhanushmadbhirvyomni virah prakashate
Dhanushmadbhiryatha meghairmarutah prabhurambare
45.11
स कृत्वा निनदं घोरं त्रासयंस्तां महाचमूम् ।
चकार हनुमान् वेगं तेषु रक्षस्सु वीर्यवान् ।। ५.४५.११।।।।
Sa kritva ninadam ghoram trasayanstam mahachamum
Chakara hanuman vegam teshu rakshassu viryavan
45.12
तलेनाभ्यहनत् कांश्चित् पादैः कांश्चित् परन्तपः ।
मुष्टिना ऽभ्यहनत् कांश्चिन्नखैः कांश्चिद् व्यदारयत् ।। ५.४५.१२।।।।
Talenabhyahanat kanshchit padaih kanshchit parantapah
Mushtina bhyahanat kanshchinnakhaih kanshchid vyadarayat
45.13
प्रममाथोरसा कांश्चिदूरुभ्यामपरान् कपिः ।
केचित्तस्य निनादेन तत्रैव पतिता भुवि ।। ५.४५.१३।।।।
Pramamathorasa kanshchidurubhyamaparan kapih
Kechittasya ninadena tatraiva patita bhuvi
45.14
ततस्तेष्ववसन्नेषु भूमौ निपतितेषु च ।
तत्सैन्यमगमत्सर्वं दिशो भयार्दितम् ।। ५.४५.१४।।।।
Tatasteshvavasanneshu bhumau nipatiteshu cha
Tatsainyamagamatsarvam disho bhayarditam
45.15
विनेदुर्विस्वरं नागा निपेतुर्भुवि वाजिनः ।
भग्ननीडध्वजच्छत्त्रैर्भूश्च कीर्णा ऽभवद्रथैः ।। ५.४५.१५।।।।
Vinedurvisvaram naga nipeturbhuvi vajinah
Bhagnanidadhvajachchhattrairbhushcha kirna bhavadrathaih
45.16
स्रवता रुधिरेणाथस्रवन्त्यो दर्शिताः पथि ।
विविधैश्च स्वरैर्लङ्का ननाद विकृतं तदा ।। ५.४५.१६।।।।
Sravata rudhirenathasravantyo darshitah pathi
Vividhaishcha svarairlanka nanada vikritam tada
45.17
स तान् प्रवृद्धान् विनिहत्य राक्षसान् महाबलश्चण्डपराक्रमः कपिः ।
युयुत्सुरन्यैः पुनरेव राक्षसैस्तमेव वीरो ऽभिजगाम तोरणम् ।। ५.४५.१७।।
Sa tan pravriddhan vinihatya rakshasan mahabalashchandaparakramah kapih
Yuyutsuranyaih punareva rakshasaistameva viro bhijagama toranam