Utshovসর্গ 42
42.1
ততঃ পক্ষিনিনাদেন বৃক্ষভঙ্গস্বনেন চ ।
বভূবুস্ত্রাসসংভ্রান্তাঃ সর্বে লঙ্কানিবাসিনঃ ।। ৫.৪২.১।।।।
42.2
বিদ্রুতাশ্চ ভয়ত্রস্তা বিনেদুর্মৃগপক্ষিণঃ ।
রক্ষসাং চ নিমিত্তানি ক্রূরাণি প্রতিপেদিরে ।। ৫.৪২.২।।।।
42.3
ততো গতায়াং নিদ্রায়াং রাক্ষস্যো বিকৃতাননাঃ ।
তদ্বনং দদৃশুর্ভগ্নং তং চ বীরং মহাকপিম্ ।। ৫.৪২.৩।।।।
42.4
স তা দৃষ্ট্বা মহাবাহূর্মহাসত্ত্বো মহাবলঃ ।
চকার সুমহদ্রূপং রাক্ষসীনাং ভয়াবহম্ ।। ৫.৪২.৪।।।।
42.5
ততস্তং গিরিসঙ্কাশমতিকায়ং মহাবলম্ ।
রাক্ষস্যো বানরং দৃষ্ট্বা পপ্রচ্ছুর্জনকাত্মজাম্ ।। ৫.৪২.৫।।।।
42.6
কো ঽয়ং কস্য কুতো বা ঽয়ং কিংনিমিত্তমিহাগতঃ ।
কথং ত্বয়া সহানেন সংবাদঃ কৃত ইত্যুত ।। ৫.৪২.৬।।।।
42.7
আচক্ষ্ব নো বিশালাক্ষি মা ভূত্তে সুভগে ভয়ম্ ।
সংবাদমসিতাপাঙ্গে ত্বয়া কিং কৃতবানয়ম্ ।। ৫.৪২.৭।।।।
42.8
অথাব্রবীত্তদা সাধ্বী সীতা সর্বাঙ্গসুন্দরী ।
রক্ষসাং ভীমরূপাণাং বিজ্ঞানে মম কা গতিঃ ।। ৫.৪২.৮।।।।
42.9
যূয়মেবাভিজানীত যো ঽয়ং যদ্বা করিষ্যতি ।
অহিরেব হ্যহেঃ পাদান্ বিজানাতি ন সংশয়ঃ ।। ৫.৪২.৯।।।।
42.10
অহমপ্যস্য ভীতা ঽস্মি নৈনং জানামি কোন্বয়ম্ ।
বেদ্মি রাক্ষসমেবৈনং কামরূপিণমাগতম্ ।। ৫.৪২.১০।।।।
42.11
বৈদেহ্যা বচনং শ্রুত্বা রাক্ষস্যো বিদ্রুতা দিশঃ ।
স্থিতাঃ কাশ্চিদ্গতাঃ কাশ্চিদ্রাবণায় নিবেদিতুম্ ।। ৫.৪২.১১।।।।
42.12
রাবণস্য সমীপে তু রাক্ষস্যো বিকৃতাননাঃ ।
বিরূপং বানরং ভীমমাখ্যাতুমুপচক্রমুঃ ।। ৫.৪২.১২।।।।
42.13
অশোকবনিকামধ্যে রাজন্ ভীমবপুঃ কপিঃ ।
সীতয়া কৃতসংবাদস্তদিষ্ঠত্যমিতবিক্রমঃ ।। ৫.৪২.১৩।।।।
42.14
ন চ তং জানকী সীতা হরিং হরিণলোচনা ।
অস্মাভির্বহুধা পৃষ্টা নিবেদয়িতুমিচ্ছিতি ।। ৫.৪২.১৪।।।।
42.15
বাসবস্য ভবেদ্দূতো দূতো বৈশ্রবণস্য বা ।
প্রেষিতো বা ঽপি রামেণ সীতান্বেষণকাঙ্ক্ষয়া ।। ৫.৪২.১৫।।।।
42.16
তেন ত্বদ্ভুতরূপেণ যত্তত্তব মনোহরম্ ।
নানামৃগগণাকীর্ণং প্রমৃষ্টং প্রমদাবনম্ ।। ৫.৪২.১৬।।।।
42.17
ন তত্র কশ্চিদুদ্দেশো যস্তেন ন বিনাশিতঃ ।
যত্র সা জানকী সীতা স তেন ন বিনাশিতঃ ।। ৫.৪২.১৭।।।।
42.18
জানকীরক্ষণার্থং বা শ্রমাদ্বা নোপলভ্যতে ।
অথবা কঃ শ্রমস্তস্য সৈব তেনাভিরক্ষিতা ।। ৫.৪২.১৮।।।।
42.19
চারুপল্লবপুষ্পাঢ্যং যং সীতা স্বয়মাস্থিতা ।
প্রবৃদ্ধঃ শিংশুপাবৃক্ষঃ স চ তেনাভিরক্ষিতঃ ।। ৫.৪২.১৯।।।।
42.20
তস্যোগ্ররূপস্যোগ্র ত্বং দণ্ডমাজ্ঞাতুমর্হসি ।
সীতা সংভাষিতা যেন তদ্বনং চ বিনাশিতম্ ।। ৫.৪২.২০।।।।
42.21
মনঃপরিগৃহীতাং তাং তব রক্ষোগণেশ্বর ।
কঃ সীতামভিভাষেত যো ন স্যাত্ত্যক্তজীবিতঃ ।। ৫.৪২.২১।।।।
42.22
রাক্ষসীনাং বচঃ শ্রুত্বা রাবণো রাক্ষসেশ্বরঃ ।
হুতাগ্নিরিব জজ্বাল কোপসংবর্তিতেক্ষণঃ ।। ৫.৪২.২২।।।।
42.23
তস্য ক্রুদ্ধস্য নেত্রাভ্যাং প্রাপতন্নাস্রবিন্দবঃ ।
দীপ্তাভ্যামিব দীপাভ্যাং সার্চিষঃ স্নেহবিন্দবঃ ।। ৫.৪২.২৩।।।।
42.24
আত্মনঃ সদৃশাঞ্ছূরান্ কিঙ্করান্নাম রাক্ষসান্ ।
ব্যাদিদেশ মহাতেজা নিগ্রহার্থং হনূমতঃ ।। ৫.৪২.২৪।।।।
42.25
তেষামশীতিসাহস্রং কিঙ্করাণাং তরস্বিনাম্ ।
। ৫.৪২.২৫।।।।
42.26
নির্যয়ুর্ভবনাৎ তস্মাত্কূটমুদ্গরপাণয়ঃ ।
মহোদরা মহাদংষ্ট্রা ঘোররূপা মহাবলাঃ ।যুদ্ধাভিমনসঃ সর্বে হনুমদ্গ্রহণোন্মুখাঃ ।। ৫.৪২.২৬।।।।
42.27
তে কপীন্দ্রং সমাসাদ্য তোরণস্থমবস্থিতম্ ।
অভিপেতুর্মহাবেগাঃ পতঙ্গা ইব পাবকম্ ।। ৫.৪২.২৭।।।।
42.28
তে গদাভির্বিচিত্রাভিঃ পরিঘৈঃ কাঞ্চনাঙ্গদৈঃ ।
আজঘ্নুর্বানরশ্রেষ্ঠং শরৈশ্চাদিত্যসন্নিভৈঃ ।। ৫.৪২.২৮।।।।
42.29
মুদ্গরৈঃ পট্টিশৈঃ শূলৈঃ প্রাসতোমরশক্তিভিঃ ।
পরিবার্য হনূমন্তং সহসা তস্থুরগ্রতঃ ।। ৫.৪২.২৯।।।।
42.30
হনুমানপি তেজস্বী শ্রীমান্ পর্বতসন্নিভিঃ ।
ক্ষিতাবাবিধ্য লাংগূলং ননাদ চ মহাস্বনম্ ।। ৫.৪২.৩০।।।।
42.31
স ভূত্বা সুমহাকায়ো হনুমান্ মারুতাত্মজঃ ।
ধৃষ্টমাস্ফোটয়ামাস লঙ্কাং শব্দেন পূরয়ন্ ।। ৫.৪২.৩১।।।।
42.32
তস্যাস্ফোটিতশব্দেন মহতা সানুনাদিনা ।
পেতুর্বিহঙ্গা গগনাদুচ্চৈশ্চেদমঘোষয়ৎ ।। ৫.৪২.৩২।।।।
42.33
জয়ত্যতিবলো রামো লক্ষ্মণশ্চ মহাবলঃ ।
রাজা জয়তি সুগ্রীবো রাঘবেণাভিপালিতঃ ।। ৫.৪২.৩৩।।।।
42.34
দাসো ঽহং কোসলেন্দ্রস্য রামস্যাক্লিষ্টকর্মণঃ ।
হনুমান্ শত্রুসৈন্যানাং নিহন্তা মারুতাত্মজঃ ।। ৫.৪২.৩৪।।।।
42.35
ন রাবণসহস্রং মে যুদ্ধে প্রতিবলং ভবেৎ ।
শিলাভিস্তু প্রহরতঃ পাদপৈশ্চ সহস্রশঃ ।। ৫.৪২.৩৫।।।।
42.36
অর্দয়িত্বা পুরীং লঙ্কামভিবাদ্য চ মৈথিলীম্ ।
সমৃদ্ধার্থো গমিষ্যামি মিষতাং সর্বরক্ষসাম্ ।। ৫.৪২.৩৬।।।।
42.37
তস্য সন্নাদশব্দেন তে ঽভবন্ ভয়শঙ্কিতাঃ ।
দদৃশুশ্চ হনূমন্তং সন্ধ্যামেঘমিবোন্নতম্ ।। ৫.৪২.৩৭।।।।
42.38
স্বামিসন্দেশনিশ্শঙ্কাস্ততস্তে রাক্ষসাঃ কপিম্ ।
চিত্রৈঃ প্রহরণৈর্ভীমৈরভিপেতুস্ততস্ততঃ ।। ৫.৪২.৩৮।।।।
42.39
স তৈঃ পরিবৃতঃ শূরৈঃ সর্বতঃ স মহাবলঃ ।
আসসাদায়সং ভীমং পরিঘং তোরণাশ্রিতম্।স তং পরিঘমাদয় জঘান রজনীচরান্ ।। ৫.৪২.৩৯।।।।
42.40
স পন্নগমিবাদায় স্ফুরন্তং বিনতাসুতঃ ।
বিচচারাম্বরে বীরঃ পরিগৃহ্য চ মারুতিঃ ।। ৫.৪২.৪০।।।।
42.41
স হত্বা রাক্ষসান্ বীরান্ কিঙ্করান্ মারুতাত্মজঃ ।
যুদ্ধাকাঙ্ক্ষী পুনর্বীরস্তোরণং সমুপাশ্রিতঃ ।। ৫.৪২.৪১।।।।
42.42
ততস্তস্মাদ্ভয়ান্মুক্তাঃ কতিচিত্তত্র রাক্ষসাঃ ।
নিহতান্ কিঙ্করান্ সর্বান্ রাবণায় ন্যবেদয়ন্ ।। ৫.৪২.৪২।।।।
42.43
স রাক্ষসানাং নিহতং মহদ্বলং নিশম্য রাজা পরিবৃত্তলোচনঃ ।
সমাদিদেশাপ্রতিমং পরাক্রমে প্রহস্ত পুত্রং সমরে সুদুর্জয়ম্ ।। ৫.৪২.৪৩।।