Utshovসর্গ 40
40.1
শ্রুত্বা তু বচনং তস্য বায়ুসূনোর্মহাত্মনঃ ।
উবাচাত্মহিতং বাক্যং সীতা সুরসুতোপমা ।। ৫.৪০.১।।।।
40.2
ত্বাং দৃষ্ট্বা প্রিয়বক্তারং সংপ্রহৃষ্যামি বানর ।
অর্ধসঞ্জাতসস্যেব বৃষ্টিং প্রাপ্য বসুন্ধরা ।। ৫.৪০.২।।।।
40.3
যথা তং পুরুষব্যাঘ্রং গাত্রৈঃ শোকাভিকর্শিতৈঃ ।
সংস্পৃশেয়ং সকামা ঽহং তথা কুরু দয়াং ময়ি ।। ৫.৪০.৩।।।।
40.4
অভিজ্ঞানং চ রামস্য দদ্যা হরিগণোত্তম ।
ক্ষিপ্তামিষীকাং কাকস্য কোপাদেকাক্ষিশাতনীম্ ।। ৫.৪০.৪।।।।
40.5
মনঃশিলায়াস্তিলকো গণ্ডপার্শ্বে নিবেশিতঃ ।
ত্বয়া প্রনষ্টে তিলকে তং কিল স্মর্তুমর্হসি ।। ৫.৪০.৫।।।।
40.6
স বীর্যবান্ কথং সীতাং হৃতাং সমনুমন্যসে ।
বসন্তীং রক্ষসাং মধ্যে মহেন্দ্রবরুণোপমঃ ।। ৫.৪০.৬।।।।
40.7
এষ চূডামণির্দিব্যো ময়া সুপরিরক্ষিতঃ ।
এতং দৃষ্ট্বা প্রহৃষ্যামি ব্যসনে ত্বামিবানঘ ।। ৫.৪০.৭।।।।
40.8
এষ নির্যাতিতঃ শ্রীমান্ ময়া তে বারিসম্ভবঃ ।
অতঃ পরং ন শক্ষ্যামি জীবিতুং শোকলালসা ।। ৫.৪০.৮।।।।
40.9
অসহ্যানি ন দুঃখানি বাচশ্চ হৃদয়চ্ছিদঃ ।
রাক্ষসীনাং সুঘোরাণাং ত্বত্কৃতে মর্ষয়াম্যহম্ ।। ৫.৪০.৯।।।।
40.10
ধারয়িষ্যামি মাসং তু জীবিতং শত্রুসূদন ।
মাসাদূর্ধ্বং ন জীবিষ্যে ত্বয়া হীনা নৃপাত্মজ ।। ৫.৪০.১০।।।।
40.11
ঘোরো রাক্ষসরাজো ঽয়ং দৃষ্টিশ্চ ন সুখা ময়ি ।
ত্বাং চ শ্রুত্বা বিষজ্জনং ন জীবেয়মহং ক্ষণম্ ।। ৫.৪০.১১।।।।
40.12
বৈদেহ্যা বচনং শ্রুত্বা করুণং সাশ্রুভাষিতম্ ।
তথা ঽব্রবীন্মহাতেজা হনুমান্ মারুতাত্মজঃ ।। ৫.৪০.১২।।।।
40.13
ত্বচ্ছোকবিমুখো রামো দেবি সত্যেন তে শপে ।
রামে দুঃখাভিভূতে তু লক্ষ্মণঃ পরিতপ্যতে ।। ৫.৪০.১৩।।।।
40.14
কথংচিদ্ ভবতী দৃষ্টা ন কালঃ পরিশোচিতুম্ ।
ইমং মুহূর্তং দুঃখানামন্তং দ্রক্ষ্যামি ভামিনি ।। ৫.৪০.১৪।।।।
40.15
তাবুভৌ পুরুষব্যাঘ্রৌ রাজপুত্রাবরিন্দমৌ ।
ত্বদ্দর্শনকৃতোত্সাহৌ লঙ্কাং ভস্মীকরিষ্যতঃ ।। ৫.৪০.১৫।।।।
40.16
হত্বা তু সমরে ক্রূরং রাবণং সহবান্ধবম্ ।
রাঘবৌ ত্বাং বিশালাক্ষি স্বাং পুরীং প্রাপয়িষ্যতঃ ।। ৫.৪০.১৬।।।।
40.17
যত্তু রামো বিজানীয়াদভিজ্ঞানমনিন্দিতে ।
প্রীতিসঞ্জননং তস্য ভূয়স্ত্বং দাতুমর্হসি ।। ৫.৪০.১৭।।।।
40.18
সা ঽব্রবীদ্দত্তমেবেতি ময়া ঽভিজ্ঞানমুত্তমম্ ।
এতদেব হি রামস্য দৃষ্ট্বা মত্কেশভূষণম্ ।শ্রদ্ধেয়ং হনুমন্ বাক্যং তব বীর ভবিষ্যতি ।। ৫.৪০.১৮।।।।
40.19
স তং মণিবরং গৃহ্য শ্রীমান্ প্লবগসত্তমঃ ।
প্রণম্য শিরসা দেবীং গমনায়োপচক্রমে ।। ৫.৪০.১৯।।।।
40.20
তমুত্পাতকৃতোত্সাহমবেক্ষ্য হরিপুঙ্গবম্ ।
বর্ধমানং মহাবেগমুবাচ জনকাত্মজা ।। ৫.৪০.২০।।।।
40.21
অশ্রুপূর্ণমুখী দীনা বাষ্পগদ্গদয়া গিরা ।
। ৫.৪০.২১।।।।
40.22
হনুমন্ সিংহসঙ্কাশৌ ভ্রাতরৌ রামলক্ষ্মণৌ ।
সুগ্রীবং চ সহামাত্বং সর্বান্ ব্রূয়া হ্যনাময়ম্ ।। ৫.৪০.২২।।।।
40.23
যথা চ স মহাবাহুর্মাং তারয়তি রাঘবঃ ।
অস্মাদ্দুঃখাম্বুসংরোধাৎ ত্বং সমাধাতুমর্হসি ।। ৫.৪০.২৩।।।।
40.24
ইমং চ তীব্রং মম শোকবেগং রক্ষোভিরেভিঃ পরিভর্ত্সনং চ ।
ব্রূয়াস্তু রামস্য গতঃ সমীপং শিবশ্চ তে ঽধ্বা ঽস্তু হরিপ্রবীর ।। ৫.৪০.২৪।।।।
40.25
স রাজপুত্র্যা প্রতিবেদিতার্থঃ কপিঃ কৃতার্থঃ পরিহৃষ্টচেতাঃ ।
অল্পাবশেষং প্রসমীক্ষ্য কার্যং দিশং হ্যুদিচীং মনসা জগাম ।। ৫.৪০.২৫।।