Utshovসর্গ 36
36.1
ভূয় এব মহাতেজা হনুমান্ মারুতাত্মজঃ ।
অব্রবীৎ প্রশ্রিতং বাক্যং সীতাপ্রত্যয়কারণাৎ ।। ৫.৩৬.১।।।।
36.2
বানরো ঽহং মহাভাগে দূতো রামস্য ধীমতঃ ।
রামনামাঙ্কিতং চেদং পশ্য দেব্যঙ্গুলীয়কম্ ।। ৫.৩৬.২।।।।
36.3
প্রত্যয়ার্থং তবানীতং তেন দত্তং মহাত্মনা ।
সমাশ্বসিহি ভদ্রং তে ক্ষীণদুঃখফলা হ্যসি ।। ৫.৩৬.৩।।।।
36.4
গৃহীত্বা প্রেক্ষমাণা সা ভর্তুঃ করবিভূষণম্ ।
ভর্তারমিব সম্প্রাপ্তা জানকী মুদিতা ঽভবৎ ।। ৫.৩৬.৪।।।।
36.5
চারু তদ্বদনং তস্যাস্তাম্রশুক্লায়তেক্ষণম্ ।
অশোভত বিশালাক্ষ্যা রাহুমুক্ত ইবোডুরাট্ ।। ৫.৩৬.৫।।।।
36.6
ততঃ সা হ্রীমতী বালা ভর্তৃসন্দেশহর্ষিতা ।
পরিতুষ্টা প্রিয়ং কৃত্বা প্রশশংস মহাকপিম্ ।। ৫.৩৬.৬।।।।
36.7
বিক্রান্তস্ত্বং সমর্থস্ত্বং প্রাজ্ঞস্ত্বং বানরোত্তম ।
যেনেদং রাক্ষসপদং ত্বয়ৈকেন প্রধর্ষিতম্ ।। ৫.৩৬.৭।।।।
36.8
শতয়োজনবিস্তীর্ণঃ সাগরো মকরালয়ঃ ।
বিক্রমশ্লাঘনীয়েন ক্রমতা গোষ্পদীকৃতঃ ।। ৫.৩৬.৮।।।।
36.9
নহি ত্বাং প্রাকৃতং মন্যে বানরং বানরর্ষভ ।
যস্য তে নাস্তি সংত্রাসো রাবণান্নাপি সম্ভ্রমঃ ।। ৫.৩৬.৯।।।।
36.10
অর্হসে চ কপিশ্রেষ্ঠ ময়া সমভিভাষিতুম্ ।
যদ্যপি প্রেষিতস্তেন রামেণ বিদিতাত্মনা ।। ৫.৩৬.১০।।।।
36.11
প্রেষয়িষ্যতি দুর্ধষো রামো ন হ্যপরীক্ষিতম্ ।
পরাক্রমমবিজ্ঞায় মত্সকাশং বিশেষতঃ ।। ৫.৩৬.১১।।।।
36.12
দিষ্ট্যা চ কুশলী রামো ধর্মাত্মা সত্যসঙ্গরঃ ।
লক্ষ্মণশ্চ মহাতেজাঃ সুমিত্রানন্দবর্ধনঃ ।। ৫.৩৬.১২।।।।
36.13
কুশলী যদি কাকুত্স্থঃ কিন্নু সাগরমেখলাম্ ।
মহীং দহতি কোপেন যুগান্তাগ্নিরিবোত্থিতঃ ।। ৫.৩৬.১৩।।।।
36.14
অথবা শক্তিমন্তৌ তৌ সুরাণামপি নিগ্রহে ।
মমৈব তু ন দুঃখানামস্তি মন্যে বিপর্যয়ঃ ।। ৫.৩৬.১৪।।।।
36.15
কচ্চিন্ন ব্যথিতো রামঃ কচ্চিন্ন পরিতপ্যতে ।
উত্তরাণি চ কার্যাণি কুরুতে পুরুষোত্তমঃ ।। ৫.৩৬.১৫।।।।
36.16
কচ্চিন্ন দীনঃ সম্ভ্রান্তঃ কার্যেষু চ ন মুহ্যতি ।
কচ্চিৎ পুর্ষকার্যাণি কুরুতে নৃপতেঃ সুতঃ ।। ৫.৩৬.১৬।।।।
36.17
দ্বিবিধং ত্রিবিধোপায়মুপায়মপি সেবতে ।
বিজিগীষুঃ সুহৃৎ কচ্চিন্মিত্রেষু চ পরন্তপঃ ।। ৫.৩৬.১৭।।।।
36.18
কচ্চিন্মিত্রাণি লভতে মিত্রৈশ্চাপ্যভিগম্যতে ।
কচ্চিৎ কল্যাণমিত্রশ্চ মিত্রৈশ্চাপি পুরস্কৃতঃ ।। ৫.৩৬.১৮।।।।
36.19
কচ্চিদাশাস্তি দেবানাং প্রসাদং পার্থিবাত্মজঃ ।
কচ্চিৎ পুরুষকারং চ দৈবং চ প্রতিপদ্যতে ।। ৫.৩৬.১৯।।।।
36.20
কচ্চিন্ন বিগতস্নেহঃ প্রসাদান্ময়ি রাঘবঃ ।
কচ্চিন্মাং ব্যসনাদস্মান্মোক্ষয়িষ্যতি বানর ।। ৫.৩৬.২০।।।।
36.21
সুখানামুচিতো নিত্যমসুখানামনূচিতঃ ।
দুঃখমুত্তরমাসাদ্য কচ্চিদ্রামো ন সীদতি ।। ৫.৩৬.২১।।।।
36.22
কৌসল্যায়াস্তথা কচ্চিৎ সুমিত্রায়াস্তথৈব চ ।
অভীক্ষ্ণং শ্রুয়তে কচ্চিৎ কুশলং ভরতস্য চ ।। ৫.৩৬.২২।।।।
36.23
মন্নিমিত্তেন মানার্হঃ কচ্চিচ্ছোকেন রাঘবঃ ।
কচ্চিন্নান্যমনা রামঃ কচ্চিন্মাং তারয়িষ্যতি ।। ৫.৩৬.২৩।।।।
36.24
কচ্চিদক্ষৌহিণীং ভীমাং ভরতো ভ্রাতৃবত্সলঃ ।
ধ্বজিনীং মন্ত্রিভির্গুপ্তাং প্রেষয়িষ্যতি মত্কৃতে ।। ৫.৩৬.২৪।।।।
36.25
বানরাধিপতিঃ শ্রীমান্ সুগ্রীবঃ কচ্চিদেষ্যতি ।
মত্কৃতে হরিভির্বীরৈর্বৃতো দন্তনখায়ুধৈঃ ।। ৫.৩৬.২৫।।।।
36.26
কচ্চিচ্চ লক্ষ্মণঃ শূরঃ সুমিত্রানন্দবর্ধনঃ ।
অস্ত্রবিচ্ছরজালেন রাক্ষসান্ বিধমিষ্যতি ।। ৫.৩৬.২৬।।।।
36.27
রৌদ্রেণ কচ্চিদস্ত্রেণ জ্বলতা নিহতং রণে ।
দ্রক্ষ্যাম্যল্পেন কালেন রাবণং সসুহৃজ্জনম্ ।। ৫.৩৬.২৭।।।।
36.28
কচ্চিন্ন তদ্ধেমসমানবর্ণং তস্যাননং পদ্মসমানগন্ধি ।
ময়া বিনা শুষ্যতি শোকদীনং জলক্ষয়ে পদ্মমিবাতপেন ।। ৫.৩৬.২৮।।।।
36.29
ধর্মাপদেশাত্ত্যজতশ্চ রাজ্যং মাং চাপ্যরণ্যং নয়তঃ পদাতিম্ ।
নাসীদ্ব্যথা যস্য ন ভীর্ন শোকঃ কচ্চিচ্চ ধৈর্যং হৃদয়ে করোতি ।। ৫.৩৬.২৯।।।।
36.30
ন চাস্য মাতা ন পিতা চ নান্যঃ স্নেহাদ্বিশিষ্টো ঽস্তি ময়া সমো বা ।
তাবত্ত্বহং দূত জিজীবিষেয়ং যাবৎ প্রবৃত্তিং শ্রৃণুয়াং প্রিয়স্য ।। ৫.৩৬.৩০।।।।
36.31
ইতীব দেবী বচনং মহার্থং তং বানরেন্দ্রং মধুরার্থমুক্ত্বা ।
শ্রোতুং পুনস্তস্য বচো ঽভিরামং রামার্থয়ুক্তং বিররাম রামা ।। ৫.৩৬.৩১।।।।
36.32
সীতায়া বচনং শ্রুত্বা মারুতির্ভীমবিক্রমঃ ।
শিরস্যঞ্জলিমাধায় বাক্যমুত্তরমব্রবীৎ ।। ৫.৩৬.৩২।।।।
36.33
ন ত্বামিহস্থাং জানীতে রামঃ কমললোচনে ।
তেন ত্বাং নানয়ত্যাশু শচীমিব পুরন্দরঃ ।। ৫.৩৬.৩৩।।।।
36.34
শ্রুত্বৈব তু বচো মহ্যং ক্ষিপ্রমেষ্যতি রাঘবঃ ।
চমূং প্রকর্ষন্ মহতীং হর্যৃক্ষগণসঙ্কুলাম্ ।। ৫.৩৬.৩৪।।।।
36.35
বিষ্টম্ভয়িত্বা বাণৌধৈরক্ষোভ্যং বরুণালয়ম্ ।
করিষ্যতি পুরীং লঙ্কাং কাকুত্স্থঃ শান্তরাক্ষসাম্ ।। ৫.৩৬.৩৫।।।।
36.36
তত্র যদ্যন্তরা মৃত্যুর্যদি দেবাঃ সহাসুরাঃ।
স্থাস্যন্তি পথি রামস্য স তানপি বধিষ্যতি ।। ৫.৩৬.৩৬।।।।
36.37
তবাদর্শনজেনার্যে শোকেন স পরিপ্লুতঃ ।
ন শর্ম লভতে রামঃ সিংহার্দিত ইব দ্বিপঃ ।। ৫.৩৬.৩৭।।।।
36.38
মলয়েন চ বিন্ধ্যেন মেরুণা মন্দরেণ চ ।
দর্দুরেণ চ তে দেবি শপে মূলফলেন চ ।। ৫.৩৬.৩৮।।।।
36.39
যথা সুনয়নং বল্গু বিম্বোষ্ঠং চারুকুণ্ডলম্ ।
মুখং দ্রক্ষ্যসি রামস্য পূর্ণচন্দ্রমিবোদিতম্ ।। ৫.৩৬.৩৯।।।।
36.40
ক্ষিপ্রং দ্রক্ষ্যাসি বৈদেহি রামং প্রস্রবণে গিরৌ ।
শতক্রতুমিবাসীনং নাকপৃষ্ঠস্য মূর্ধনি ।। ৫.৩৬.৪০।।।।
36.41
ন মাংসং রাঘবো ভুঙ্ক্তে ন চাপি মধু সেবতে ।
বন্যং সুবিহিতং নিত্যং ভক্তমশ্নাতি পঞ্চমম্ ।। ৫.৩৬.৪১।।।।
36.42
নৈব দংশান্ন মশকান্ ন কীটান্ন সরীসৃপান্ ।
রাঘবো ঽপনয়েদ্গাত্রাৎ ত্বদ্গতেনান্তরাত্মনা ।। ৫.৩৬.৪২।।।।
36.43
নিত্যং ধ্যানপরো রামো নিত্যং শোকপরায়ণঃ ।
নান্যচ্চিন্তয়তে কিঞ্চিৎ স তু কামবশং গতঃ ।। ৫.৩৬.৪৩।।।।
36.44
অনিদ্রঃ সততং রামঃ সুপ্তো ঽপি চ নরোত্তমঃ ।
সীতেতি মধুরাং বাণীং ব্যাহরন্ প্রতিবুদ্ধ্যতে ।। ৫.৩৬.৪৪।।।।
36.45
দৃষ্ট্বা ফলং বা পুষ্পং বা যদ্বা ঽন্যৎ সুমনোহরম্ ।
বহুশো হা প্রিয়েত্যেবং শ্বসংস্ত্বামভিভাষতে ।। ৫.৩৬.৪৫।।।।
36.46
স দেবি নিত্যং পরিতপ্যমানস্ত্বামেব সীতেত্যভিভাষমাণঃ ।
দৃঢব্রতো রাজসুতো মহাত্মা তবৈব লাভায় কৃতপ্রয়ত্নঃ ।। ৫.৩৬.৪৬।।।।
36.47
সা রামসঙ্কীর্তনবীতশোকা রামস্য শোকেন সমানশোকা ।
শরন্মুখে সাম্বুদশেষচন্দ্রা নিশেব বৈদেহসুতা বভূব ।। ৫.৩৬.৪৭।।