Utshovসর্গ 35
35.1
তাং তু রামকথাং শ্রুত্বা বৈদেহী বানরার্ষভাৎ ।
উবাচ বচনং সান্ত্বমিদং মধুরয়া গিরা ।। ৫.৩৫.১।।।।
35.2
ক্ব তে রামেণ সংসর্গঃ কথং জানাসি লক্ষ্মণম্ ।
বানরাণাং নরাণাং চ কথমাসীৎ সমাগমঃ ।। ৫.৩৫.২।।।।
35.3
যানি রামস্য লিঙ্গানি লক্ষ্মণস্য চ বানর ।
তানি ভূয়ঃ সমাচক্ষ্ব ন মাং শোকঃ সমাবিশেৎ ।। ৫.৩৫.৩।।।।
35.4
কীদৃশং তস্য সংস্থানং রূপং রামস্য কীদৃশম্ ।
কথমূরূ কথং বাহূ লক্ষ্মণস্য চ শংস মে ।। ৫.৩৫.৪।।।।
35.5
এবমুক্তস্তু বৈদেহ্যা হনুমান্ মারুতাত্মজঃ ।
ততো রামং যথাত্ত্বমাখ্যাতুমুপচক্রমে ।। ৫.৩৫.৫।।।।
35.6
জানন্তী বত দিষ্ট্যা মাং বৈদেহি পরিপৃচ্ছসি ।
ভর্তুঃ কমলপত্রাক্ষি সংস্থানং লক্ষ্মণস্য চ ।। ৫.৩৫.৬।।।।
35.7
যানি রামস্য চিহ্নানি লক্ষ্মণস্য চ যানি বৈ ।
লক্ষিতানি বিশালাক্ষি বদতঃ শৃণু তানি মে ।। ৫.৩৫.৭।।।।
35.8
রামঃ কমলপত্রাক্ষঃ সর্বসত্ত্বমনোহরঃ ।
রূপদাক্ষিণ্যসম্পন্নঃ প্রসূতো জনকাত্মজে ।। ৫.৩৫.৮।।।।
35.9
তেজসা ঽ ঽদিত্যসঙ্কাশঃ ক্ষময়া পৃথিবীসমঃ ।
বৃহস্পতিসমো বুদ্ধ্যা যশসা বাসবোপমঃ ।। ৫.৩৫.৯।।।।
35.10
রক্ষিতা জীবলোকস্য স্বরজনস্যাভিরক্ষিতা ।
রক্ষিতা স্বস্য বৃত্তস্য ধর্মস্য চ পরন্তপঃ ।। ৫.৩৫.১০।।।।
35.11
রামো ভামিনি লোকস্য চাতুর্বর্ণ্যস্য রক্ষিতা ।
মর্যাদানাং চ লোকস্য কর্তা কারয়িতা চ সঃ ।। ৫.৩৫.১১।।।।
35.12
অর্চিষ্মানর্চিতো ঽত্যর্থং ব্রহ্মচর্যব্রতে স্থিতঃ ।
সাধূনামুপকারজ্ঞঃ প্রচারজ্ঞশ্চ কর্মণাম্ ।। ৫.৩৫.১২।।।।
35.13
রাজবিদ্যাবিনীতশ্চ ব্রাহ্মণানামুপাসিতা ।
শ্রুতবান্ শীলসম্পন্নো বিনীতশ্চ পরন্তপঃ ।। ৫.৩৫.১৩।।।।
35.14
যজুর্বেদবিনীতশ্চ বেদবিদ্ভিঃ সুপূজিতঃ ।
ধনুর্বেদে চ বেদেষু বেদাঙ্গেষু চ নিষ্ঠিতঃ ।। ৫.৩৫.১৪।।।।
35.15
বিপুলাংসো মহাবাহুঃ কম্বুগ্রীবঃ শুভাননঃ ।
গূঢজত্রুঃ সুতাম্রাক্ষো রামো দেবি জনৈঃ শ্রুতঃ ।। ৫.৩৫.১৫।।।।
35.16
দুন্দুভিস্বননির্ঘোষঃ স্নিগ্ধবর্ণঃ প্রতাপবান্ ।
সমঃ সমবিভক্তাঙ্গো বর্ণং শ্যামং সমাশ্রিতঃ ।। ৫.৩৫.১৬।।।।
35.17
ত্রিস্থিরস্ত্রিপ্রলম্বশ্চ ত্রিসমস্ত্রিষু চোন্নতঃ ।
ত্রিতাম্রস্ত্রিষু চ স্নিগ্ধো গম্ভীরস্ত্রিষু নিত্যশঃ ।। ৫.৩৫.১৭।।।।
35.18
ত্রিবলীবাংস্ত্র্যবনতশ্চতুর্ব্যঙ্গস্ত্রিশীর্ষবান্ ।
চতুষ্কলশ্চতুর্লেখশ্চতুষ্কিষ্কুশ্চতুঃ সমঃ ।। ৫.৩৫.১৮।।।।
35.19
চতুর্দশসমদ্বন্দ্বশ্চতুর্দংষ্ট্রশ্চতুর্বর্গতিঃ ।
মহোষ্ঠহনুনাসশ্চ পঞ্চস্নিগ্ধো ঽষ্টবংশবান্ ।। ৫.৩৫.১৯।।।।
35.20
দশপদ্মো দশবৃহৎ ত্রিভির্ব্যাপ্তো দ্বিশুক্লবান্ ।
ষডুন্নতো নবতনুস্ত্রিভির্বাপ্নোতি রাঘবঃ ।। ৫.৩৫.২০।।।।
35.21
সত্যধর্মপরঃ শ্রীমান্ সংগ্রহানুগ্রহে রতঃ ।
দেশকালবিভাগজ্ঞঃ সর্বলোকপ্রিয়ংবদঃ ।। ৫.৩৫.২১।।।।
35.22
ভ্রাতা চ তস্য দ্বৈমাত্রঃ সৌমিত্রিরপরাজিতঃ ।
অনুরাগেণ রূপেণ গুণৈশ্চৈব তথাবিধঃ ।। ৫.৩৫.২২।।।।
35.23
তাবুভৌ নরশার্দূলৌ ত্বদ্দর্শনসমুত্সুকৌ ।
বিচিন্বন্তৌ মহীং কৃত্স্নামস্মাভিরভিসঙ্গতৌ ।। ৫.৩৫.২৩।।।।
35.24
ত্বামেব মার্গমাণৌ তৌ বিচরন্তৌ বসুন্ধরাম্ ।
দদর্শতুর্মৃগপতিং পূর্বজেনাবরোপিতম্ ।। ৫.৩৫.২৪।।।।
35.25
ঋশ্যমূকস্য পৃষ্ঠে তু বহুপাদপসঙ্কুলে ।
ভ্রাতুর্ভয়ার্তমাসীনং সুগ্রীবং প্রিয়দর্শনম্ ।। ৫.৩৫.২৫।।।।
35.26
বয়ং তু হরিরাজং তং সুগ্রীবং সত্যসঙ্গরম্ ।
পরিচর্যাস্মহে রাজ্যাৎ পূর্বজেনাবরোপিতম্ ।। ৫.৩৫.২৬।।।।
35.27
ততস্তৌ চীরবসনৌ ধনুঃপ্রবরপাণিনৌ ।
ঋশ্যমূকস্য শৈলস্য রম্যং দেশমুপাগতৌ ।। ৫.৩৫.২৭।।।।
35.28
স তৌ দৃষ্ট্বা নরব্যাঘ্রৌ ধন্বিনৌ বানরর্ষভঃ ।
অবপ্লুতো গিরেস্তস্য শিখরং ভয়মোহিতঃ ।। ৫.৩৫.২৮।।।।
35.29
ততঃ স শিখরে তস্মিন্ বানরেন্দ্রো ব্যবস্থিতঃ ।
তয়োঃ সমীপং মামেব প্রেষয়ামাস সত্বরম্ ।। ৫.৩৫.২৯।।।।
35.30
তাবহং পুরুষব্যাঘ্রৌ সুগ্রীববচনাৎ প্রভূ ।
রূপলক্ষণসম্পন্নৌ কৃতাঞ্জলিরুপস্থিতঃ ।। ৫.৩৫.৩০।।।।
35.31
তৌ পরিজ্ঞাততত্ত্বার্থৌ ময়া প্রীতিসমন্বিতৌ ।
পৃষ্ঠমারোপ্য তং দেশং প্রাপিতৌ পুরুষর্ষভৌঃ ।। ৫.৩৫.৩১।।।।
35.32
নিবেদিতৌ চ তত্ত্বেন সুগ্রীবায় মহাত্মনে ।
তয়োরন্যোন্যসংলাপাদ্ভৃশং প্রীতিরজায়ত ।। ৫.৩৫.৩২।।।।
35.33
ততস্তৌ প্রীতিসম্পন্নৌ হরীশ্বরনরেশ্বরৌ ।
পরস্পরকৃতাশ্বাসৌ কথয়া পূর্ববৃত্তয়া ।। ৫.৩৫.৩৩।।।।
35.34
ততঃ স সান্ত্বয়ামাস সুগ্রীবং লক্ষ্মণাগ্রজঃ ।
স্ত্রীহেতোর্বালিনা ভ্রাত্রা নিরস্তমুরুতেজসা ।। ৫.৩৫.৩৪।।।।
35.35
ততস্ত্বন্নাশজং শোকং রামস্যাক্লিষ্টকর্মণঃ ।
লক্ষ্মণো বানরেন্দ্রায় সুগ্রীবায় ন্যবেদয়ৎ ।। ৫.৩৫.৩৫।।।।
35.36
স শ্রুত্বা বানরেন্দ্রস্তু লক্ষ্মণেনেরিতং বচঃ ।
তদা ঽ ঽসীন্নিষ্প্রভো ঽত্যর্থং গ্রহগ্রস্ত ইবাংশুমান্ ।। ৫.৩৫.৩৬।।।।
35.37
ততস্ত্বদ্গাত্রশোভীনি রক্ষসা হ্রিয়মাণয়া ।
যান্যাভরণজালানি পাতিতানি মহীতলে ।।। ৫.৩৫.৩৭।।।।
35.38
তানি সর্বাণি রামায় আনীয় হরিয়ূথপাঃ ।
সংহৃষ্টা দর্শয়ামাসুর্গতিং তু ন বিদুস্তব ।। ৫.৩৫.৩৮।।।।
35.39
তানি রামায় দত্তানি ময়ৈবোপহৃতানি চ ।
স্বনবন্ত্যবকীর্ণানি তস্মিন্ বিগতচেতসি ।। ৫.৩৫.৩৯।।।।
35.40
তান্যঙ্কে দর্শনীয়ানি কৃত্বা বহুবিধং তব ।
তেন দেবপ্রকাশেন দেবেন পরিদেবিতম্ ।। ৫.৩৫.৪০।।।।
35.41
পশ্যতস্তানি রুদতস্তাম্যতশ্চ পুনঃ পুনঃ।
প্রাদীপয়ন্ দাশরথেস্তানি শোকহুতাশনম্ ।। ৫.৩৫.৪১।।।।
35.42
শয়িতং চ চিরং তেন দুঃকার্তেন মহাত্মনা ।
ময়াপি বিবিধৈর্বাক্যৈঃ কৃচ্ছ্রাদুত্থিপিতঃ পুনঃ ।। ৫.৩৫.৪২।।।।
35.43
তানি দৃষ্ট্বা মহাবাহুর্দর্শয়িত্বা মুহুর্মুহুঃ ।
রাঘবঃ সহসৌমিত্রিঃ সুগ্রীবে সংন্যবেদয়ৎ ।। ৫.৩৫.৪৩।।।।
35.44
স তবাদর্শনাদার্যে রাঘবঃ পরিতপ্যতে ।
মহতা জ্বলতা নিত্যমগ্নিনেবাগ্নিপর্বতঃ ।। ৫.৩৫.৪৪।।।।
35.45
ত্বত্কৃতে তমনিদ্রা চ শোকশ্চিন্তা চ রাঘবম্ ।
তাপয়ন্তি মহাত্মানমগ্ন্যাগারমিবাগ্নয়ঃ ।। ৫.৩৫.৪৫।।।।
35.46
তবাদর্শনশোকেন রাঘবঃ প্রবিচাল্যতে ।
মহতা ভূমিকম্পনে মহানিব শিলোচ্চয়ঃ ।। ৫.৩৫.৪৬।।।।
35.47
কাননানি সুরম্যাণি নদীঃ প্রস্রবণানি চ ।
চরন্ন রতিমাপ্নোতি ত্বামপশ্যন্নৃপাত্মজে ।। ৫.৩৫.৪৭।।।।
35.48
স ত্বাং মনুজশার্দূলঃ ক্ষিপ্রং প্রাপ্স্যতি রাঘবঃ ।
সমিত্রবান্ধবং হত্বা রাবণং জনকাত্মজে ।। ৫.৩৫.৪৮।।।।
35.49
সহিতৌ রামসুগ্রীবাবুভাবকুরুতাং তদা ।
সময়ং বালিনং হন্তুং তব চান্বেষণং তথা ।। ৫.৩৫.৪৯।।।।
35.50
ততস্তাভ্যাং কুমারাভ্যাং বীরাভ্যাং স হরীশ্বরঃ ।
কিষ্কিন্ধাং সমুপাগম্য বালী যুদ্ধে নিপাতিতঃ ।। ৫.৩৫.৫০।।।।
35.51
ততো নিহত্য তরসা রামো বালিনমাহবে ।
সর্বর্ক্ষহরিসঙ্ঘানাং সুগ্রীবমকরোৎ পতিম্ ।। ৫.৩৫.৫১।।।।
35.52
রামসুগ্রীবয়োরৈক্যং দেব্যেবং সমজায়ত ।
হনুমমন্তং চ মাং বিদ্ধি তয়োর্দূতমিহাগতম্ ।। ৫.৩৫.৫২।।।।
35.53
স্বরাজ্যং প্রাপ্য সুগ্রীবঃ সমানীয় হরীশ্বরান্ ।
ত্বদর্থং প্রেষয়ামাস দিশো দশ মহাবলান্ ।। ৫.৩৫.৫৩।।।।
35.54
আদিষ্টা বানরেন্দ্রেণ সুগ্রীবেণ মহৌজসা ।
অদ্রিরাজপ্রতীকাশাঃ সর্বতঃ প্রস্থিতা মহীম্ ।। ৫.৩৫.৫৪।।।।
35.55
ততস্তে মার্গমাণা বৈ সুগ্রীববচনাতুরাঃ ।
চরন্তি বসুধাং কৃত্স্নাং বয়মন্যে চ বানরাঃ ।। ৫.৩৫.৫৫।।।।
35.56
অঙ্গদো নাম লক্ষ্মীবান্ বালিসূনুর্মহাবলঃ ।
প্রস্থিতঃ কাপিশার্দূলস্ত্রিভাগবলসংবৃতঃ ।। ৫.৩৫.৫৬।।।।
35.57
তেষাং নো বিপ্রনষ্টানাং বিন্ধ্যে পর্বতসত্তমে ।
ভৃশং শোকপরীতানামহোরাত্রগণা গতাঃ ।। ৫.৩৫.৫৭।।।।
35.58
তে বয়ং কার্যনৈরাশ্যাৎ কালশ্যাতিক্রমেণ চ ।
ভয়াচ্চ কপিরাজস্য প্রাণাংস্ত্যক্তুং ব্যবস্থিতাঃ ।। ৫.৩৫.৫৮।।।।
35.59
বিচিত্য বনদুর্গাণি গিরিপ্রস্রবণানি চ ।
অনাসাদ্য পদং দেব্যাঃ প্রাণাংস্ত্যক্তুং সমুদ্যতাঃ ।। ৫.৩৫.৫৯।।।।
35.60
দৃষ্ট্বা প্রায়োপবিষ্টাংশ্চ সর্বান্ বানরপুঙ্গবান্ ।
ভৃশং শোকার্ণবে মগ্নঃ পর্যদেবয়দঙ্গদঃ ।। ৫.৩৫.৬০।।।।
35.61
তবনাশং চ বৈদেহি বালিনশ্চ বধং তথা ।
প্রায়োববেশমস্মাকং মরণং চ জটায়ুষঃ ।। ৫৩.৫.৬১।।।।
35.62
তেষাং নঃ স্বামিসন্দেশান্নিরাশানাং মুমূর্ষতাম্ ।
কার্যহেতোরিবায়াতঃ শকুনির্বীর্যবান্ মহান্ ।। ৫.৩৫.৬২।।।।
35.63
গৃধ্ররাজস্য সোদর্যঃ সম্পাতির্নাম গৃধ্ররাট্ ।
শ্রুত্বা ভ্রাতৃবধং কোপাদিদং বচনমব্রবীৎ ।। ৫.৩৫.৬৩।।।।
35.64
যবীয়ান্ কেন ম ভ্রাতা হতঃ ক্ব চ নিপাতিতঃ ।
এতদাখ্যাতুমিচ্ছামি ভবদ্ভির্বানরোত্তমাঃ ।। ৫.৩৫.৬৪।।।।
35.65
অঙ্গদো ঽকথয়ত্তস্য জনস্থানেঃ মহদ্বধম্ ।
রক্ষসা ভীমরূপেণ ত্বামুদ্দিশ্য যথাতথম্ ।। ৫.৩৫.৬৫।।।।
35.66
জটায়ুষো বধং শ্রুত্বা দুঃখিতঃ সো ঽরুণাত্মজঃ ।
ত্বাং শশংস বরারোহে বসন্তীং রাবণালয়ে ।। ৫.৩৫.৬৬।।।।
35.67
তস্য তদ্বচনং শ্রুত্বা সম্পাতেঃ প্রীতিবর্ধনম্ ।
অঙ্গপ্রমুখাস্তূর্ণং ততঃ সংপ্রস্থিতা বয়ম্ ।। ৫.৩৫.৬৭।।।।
35.68
বিন্ধ্যাদুত্থায় সংপ্রাপ্তাঃ সাগরস্যান্তমুত্তরম্ ।
ত্বদ্দর্শনকৃতোত্সাহা হৃষ্টাস্তুষ্টাঃ প্লবঙ্গমাঃ ।। ৫.৩৫.৬৮।।।।
35.69
অঙ্গদপ্রমুখাঃ সর্বে বেলোপান্তমুপস্থিতাঃ ।
চিন্তাং জগ্মুঃ পুনর্ভীতাস্ত্বদ্দর্শনসমুত্সুকাঃ ।। ৫.৩৫.৬৯।।।।
35.70
তথা ঽহং হরিসৈন্যস্য সাগরং প্রেক্ষ্য সীদতঃ ।
ব্যবধূয় ভয়ং তাব্রং যোজনানাং শতং প্লুতঃ ।। ৫.৩৫.৭০।।।।
35.71
লঙ্কা চাপি ময়া রাত্রৌ প্রবিষ্টা রাক্ষসাকুলা ।
রাবণশ্চ ময়া দৃষ্টস্ত্বং চ শোকপরিপ্লুতা ।। ৫.৩৫.৭১।।।।
35.72
এতত্তে সর্বমাখ্যাতং যথাবৃত্তমনিন্দিতে ।
অভিভাষস্ব মাং দেবি দূতো দাশরথেরহম্ ।। ৫.৩৫.৭২।।।।
35.73
তং মাং রামকৃতোদ্যোগং ত্বন্নিমিত্তমিহাগতম্ ।
সুগ্রীবসচিবং দেবি বুধ্যস্ব পবনাত্মজম্ ।। ৫.৩৫.৭৩।।।।
35.74
কুশলী তব কাকুত্স্থঃ সর্বশস্ত্রভৃতাং বরঃ ।
গুরোরারাধনে যুক্তো লক্ষ্মণশ্চ সুলক্ষণঃ ।। ৫.৩৫.৭৪।।।।
35.75
তস্য বীর্যবতো দেবি ভর্তুস্তব হিতে রতঃ ।
অহমেকস্তু সংপ্রাপ্তঃ সুগ্রীববচনাদিহ ।। ৫.৩৫.৭৫।।।।
35.76
ময়েয়মসহায়েন চরতা কামরূপিণা ।
দক্ষিণা দিগনুক্রান্তা ত্বন্মার্গবিচয়ৈষিণা ।। ৫.৩৫.৭৬।।।।
35.77
দিষ্ট্যা ঽহং হরিসৈন্যানাং ত্বন্নাশমনুশোচতাম্ ।
অপনেষ্যামি সন্তাপং তবাভিগমশংসনাৎ ।। ৫.৩৫.৭৭।।।।
35.78
দিষ্ট্যা হি মম ন ব্যর্থং দেবি সাগরলঙ্ঘনম্ ।
প্রাপ্স্যাম্যহমিদং দিষ্ট্যা ত্বদ্দর্শনকৃতং যশঃ ।। ৫.৩৫.৭৮।।।।
35.79
রাঘবশ্চ মহাবীর্যঃ ক্ষিপ্রং ত্বামভিপত্স্যতে ।
সমিত্রবান্ধবং হত্বা রাবণং রাক্ষসাধিপম্ ।। ৫.৩৫.৭৯।।।।
35.80
মাল্যবান্নাম বৈদেহি গিরীণামুত্তমো গিরিঃ ।
ততো গচ্ছতি গোকর্ণং পর্বতং কেসরী হরিঃ ।। ৫.৩৫.৮০।।।।
35.81
স চ দেবর্ষিভির্দিষ্টঃ পিতা মম মহাকপিঃ ।
তার্থে নদীপতেঃ পুণ্যে শম্বসাদনমুদ্ধরৎ ।। ৫.৩৫.৮১।।।।
35.82
তস্যাহং হরিণঃ ক্ষেত্রে জাতো বাতেন মৈথিলি ।
হনুমানিতি বিখ্যাতো লোকে স্বেনৈব কর্মণা ।। ৫.৩৫.৮২।।।।
35.83
বিশ্বাসার্থং তু বৈদেহি ভর্তুরুক্তা ময়া গুণাঃ ।
অচিরাদ্ রাঘবো দেবি ত্বামিতো নয়িতা ঽনঘে ।। ৫.৩৫.৮৩।।।।
35.84
এবং বিশ্বাসিতা সীতা হেতুভিঃ শোককর্শিতা ।
উপপন্নৈরভিজ্ঞানৈর্দূতং তমবগচ্ছতি ।। ৫.৩৫.৮৪।।।।
35.85
অতুলং চ গতা হর্ষং প্রহর্ষেণ চ জানকী ।
নেত্রাভ্যাং বক্রপক্ষ্মভ্যাং মুমোচানন্দজং জলম্ ।। ৫.৩৫.৮৫।।।।
35.86
চারু তদ্বদনং তস্যাস্তাম্রশুক্লায়তেক্ষণম্ ।
অশোভত বিশালাক্ষ্যা রাহুমুক্ত ইবোডুরাট্ ।। ৫.৩৫.৮৬।।।।
35.87
হনুমন্তং কপিং ব্যক্তং মন্যতে নান্যথেতি সা ।
অথোবাচ হনূমাংস্তামুত্তরং প্রিয়দর্শনাম্ ।। ৫.৩৫.৮৭।।।।
35.88
এতত্তে সর্বমাখ্যাতং সমাশ্বসিহি মৈথিলি ।
কিং করোমি কথং বা তে রোচতে প্রতিয়াম্যহম্ ।। ৫.৩৫.৮৮।।।।
35.89
হতে ঽসুরে সংয়তি শম্বসাদনে কপিপ্রবীরেণ মহর্ষিচোদনাৎ ।
ততো ঽস্মি বায়ুপ্রভবো হি মৈথিলি প্রভাবতস্তত্প্রতিমশ্চ বানরঃ ।। ৫.৩৫.৮৯।।