UtshovSarga 35
35.1
तां तु रामकथां श्रुत्वा वैदेही वानरार्षभात् ।
उवाच वचनं सान्त्वमिदं मधुरया गिरा ।। ५.३५.१।।।।
Tam tu ramakatham shrutva vaidehi vanararshabhat
Uvacha vachanam santvamidam madhuraya gira
35.2
क्व ते रामेण संसर्गः कथं जानासि लक्ष्मणम् ।
वानराणां नराणां च कथमासीत् समागमः ।। ५.३५.२।।।।
Kva te ramena sansargah katham janasi lakshmanam
Vanaranam naranam cha kathamasit samagamah
35.3
यानि रामस्य लिङ्गानि लक्ष्मणस्य च वानर ।
तानि भूयः समाचक्ष्व न मां शोकः समाविशेत् ।। ५.३५.३।।।।
Yani ramasya lingani lakshmanasya cha vanara
Tani bhuyah samachakshva na mam shokah samavishet
35.4
कीदृशं तस्य संस्थानं रूपं रामस्य कीदृशम् ।
कथमूरू कथं बाहू लक्ष्मणस्य च शंस मे ।। ५.३५.४।।।।
Kidrisham tasya sansthanam rupam ramasya kidrisham
Kathamuru katham bahu lakshmanasya cha shansa me
35.5
एवमुक्तस्तु वैदेह्या हनुमान् मारुतात्मजः ।
ततो रामं यथात्त्वमाख्यातुमुपचक्रमे ।। ५.३५.५।।।।
Evamuktastu vaidehya hanuman marutatmajah
Tato ramam yathattvamakhyatumupachakrame
35.6
जानन्ती बत दिष्ट्या मां वैदेहि परिपृच्छसि ।
भर्तुः कमलपत्राक्षि संस्थानं लक्ष्मणस्य च ।। ५.३५.६।।।।
Jananti bata dishtya mam vaidehi pariprichchhasi
Bhartuh kamalapatrakshi sansthanam lakshmanasya cha
35.7
यानि रामस्य चिह्नानि लक्ष्मणस्य च यानि वै ।
लक्षितानि विशालाक्षि वदतः शृणु तानि मे ।। ५.३५.७।।।।
Yani ramasya chihnani lakshmanasya cha yani vai
Lakshitani vishalakshi vadatah shrinu tani me
35.8
रामः कमलपत्राक्षः सर्वसत्त्वमनोहरः ।
रूपदाक्षिण्यसम्पन्नः प्रसूतो जनकात्मजे ।। ५.३५.८।।।।
Ramah kamalapatrakshah sarvasattvamanoharah
Rupadakshinyasampannah prasuto janakatmaje
35.9
तेजसा ऽ ऽदित्यसङ्काशः क्षमया पृथिवीसमः ।
बृहस्पतिसमो बुद्ध्या यशसा वासवोपमः ।। ५.३५.९।।।।
Tejasa dityasankashah kshamaya prithivisamah
Brihaspatisamo buddhya yashasa vasavopamah
35.10
रक्षिता जीवलोकस्य स्वरजनस्याभिरक्षिता ।
रक्षिता स्वस्य वृत्तस्य धर्मस्य च परन्तपः ।। ५.३५.१०।।।।
Rakshita jivalokasya svarajanasyabhirakshita
Rakshita svasya vrittasya dharmasya cha parantapah
35.11
रामो भामिनि लोकस्य चातुर्वर्ण्यस्य रक्षिता ।
मर्यादानां च लोकस्य कर्ता कारयिता च सः ।। ५.३५.११।।।।
Ramo bhamini lokasya chaturvarnyasya rakshita
Maryadanam cha lokasya karta karayita cha sah
35.12
अर्चिष्मानर्चितो ऽत्यर्थं ब्रह्मचर्यव्रते स्थितः ।
साधूनामुपकारज्ञः प्रचारज्ञश्च कर्मणाम् ।। ५.३५.१२।।।।
Archishmanarchito tyartham brahmacharyavrate sthitah
Sadhunamupakaragyah pracharagyashcha karmanam
35.13
राजविद्याविनीतश्च ब्राह्मणानामुपासिता ।
श्रुतवान् शीलसम्पन्नो विनीतश्च परन्तपः ।। ५.३५.१३।।।।
Rajavidyavinitashcha brahmananamupasita
Shrutavan shilasampanno vinitashcha parantapah
35.14
यजुर्वेदविनीतश्च वेदविद्भिः सुपूजितः ।
धनुर्वेदे च वेदेषु वेदाङ्गेषु च निष्ठितः ।। ५.३५.१४।।।।
Yajurvedavinitashcha vedavidbhih supujitah
Dhanurvede cha vedeshu vedangeshu cha nishthitah
35.15
विपुलांसो महाबाहुः कम्बुग्रीवः शुभाननः ।
गूढजत्रुः सुताम्राक्षो रामो देवि जनैः श्रुतः ।। ५.३५.१५।।।।
Vipulanso mahabahuh kambugrivah shubhananah
Gudhajatruh sutamraksho ramo devi janaih shrutah
35.16
दुन्दुभिस्वननिर्घोषः स्निग्धवर्णः प्रतापवान् ।
समः समविभक्ताङ्गो वर्णं श्यामं समाश्रितः ।। ५.३५.१६।।।।
Dundubhisvananirghoshah snigdhavarnah pratapavan
Samah samavibhaktango varnam shyamam samashritah
35.17
त्रिस्थिरस्त्रिप्रलम्बश्च त्रिसमस्त्रिषु चोन्नतः ।
त्रिताम्रस्त्रिषु च स्निग्धो गम्भीरस्त्रिषु नित्यशः ।। ५.३५.१७।।।।
Tristhirastripralambashcha trisamastrishu chonnatah
Tritamrastrishu cha snigdho gambhirastrishu nityashah
35.18
त्रिवलीवांस्त्र्यवनतश्चतुर्व्यङ्गस्त्रिशीर्षवान् ।
चतुष्कलश्चतुर्लेखश्चतुष्किष्कुश्चतुः समः ।। ५.३५.१८।।।।
Trivalivanstryavanatashchaturvyangastrishirshavan
Chatushkalashchaturlekhashchatushkishkushchatuh samah
35.19
चतुर्दशसमद्वन्द्वश्चतुर्दंष्ट्रश्चतुर्वर्गतिः ।
महोष्ठहनुनासश्च पञ्चस्निग्धो ऽष्टवंशवान् ।। ५.३५.१९।।।।
Chaturdashasamadvandvashchaturdanshtrashchaturvargatih
Mahoshthahanunasashcha panchasnigdho shtavanshavan
35.20
दशपद्मो दशबृहत् त्रिभिर्व्याप्तो द्विशुक्लवान् ।
षडुन्नतो नवतनुस्त्रिभिर्वाप्नोति राघवः ।। ५.३५.२०।।।।
Dashapadmo dashabrihat tribhirvyapto dvishuklavan
Shadunnato navatanustribhirvapnoti raghavah
35.21
सत्यधर्मपरः श्रीमान् संग्रहानुग्रहे रतः ।
देशकालविभागज्ञः सर्वलोकप्रियंवदः ।। ५.३५.२१।।।।
Satyadharmaparah shriman sangrahanugrahe ratah
Deshakalavibhagagyah sarvalokapriyanvadah
35.22
भ्राता च तस्य द्वैमात्रः सौमित्रिरपराजितः ।
अनुरागेण रूपेण गुणैश्चैव तथाविधः ।। ५.३५.२२।।।।
Bhrata cha tasya dvaimatrah saumitriraparajitah
Anuragena rupena gunaishchaiva tathavidhah
35.23
तावुभौ नरशार्दूलौ त्वद्दर्शनसमुत्सुकौ ।
विचिन्वन्तौ महीं कृत्स्नामस्माभिरभिसङ्गतौ ।। ५.३५.२३।।।।
Tavubhau narashardulau tvaddarshanasamutsukau
Vichinvantau mahim kritsnamasmabhirabhisangatau
35.24
त्वामेव मार्गमाणौ तौ विचरन्तौ वसुन्धराम् ।
ददर्शतुर्मृगपतिं पूर्वजेनावरोपितम् ।। ५.३५.२४।।।।
Tvameva margamanau tau vicharantau vasundharam
Dadarshaturmrigapatim purvajenavaropitam
35.25
ऋश्यमूकस्य पृष्ठे तु बहुपादपसङ्कुले ।
भ्रातुर्भयार्तमासीनं सुग्रीवं प्रियदर्शनम् ।। ५.३५.२५।।।।
Rishyamukasya prishthe tu bahupadapasankule
Bhraturbhayartamasinam sugrivam priyadarshanam
35.26
वयं तु हरिराजं तं सुग्रीवं सत्यसङ्गरम् ।
परिचर्यास्महे राज्यात् पूर्वजेनावरोपितम् ।। ५.३५.२६।।।।
Vayam tu harirajam tam sugrivam satyasangaram
Paricharyasmahe rajyat purvajenavaropitam
35.27
ततस्तौ चीरवसनौ धनुःप्रवरपाणिनौ ।
ऋश्यमूकस्य शैलस्य रम्यं देशमुपागतौ ।। ५.३५.२७।।।।
Tatastau chiravasanau dhanuhpravarapaninau
Rishyamukasya shailasya ramyam deshamupagatau
35.28
स तौ दृष्ट्वा नरव्याघ्रौ धन्विनौ वानरर्षभः ।
अवप्लुतो गिरेस्तस्य शिखरं भयमोहितः ।। ५.३५.२८।।।।
Sa tau drishtva naravyaghrau dhanvinau vanararshabhah
Avapluto girestasya shikharam bhayamohitah
35.29
ततः स शिखरे तस्मिन् वानरेन्द्रो व्यवस्थितः ।
तयोः समीपं मामेव प्रेषयामास सत्वरम् ।। ५.३५.२९।।।।
Tatah sa shikhare tasmin vanarendro vyavasthitah
Tayoh samipam mameva preshayamasa satvaram
35.30
तावहं पुरुषव्याघ्रौ सुग्रीववचनात् प्रभू ।
रूपलक्षणसम्पन्नौ कृताञ्जलिरुपस्थितः ।। ५.३५.३०।।।।
Tavaham purushavyaghrau sugrivavachanat prabhu
Rupalakshanasampannau kritanjalirupasthitah
35.31
तौ परिज्ञाततत्त्वार्थौ मया प्रीतिसमन्वितौ ।
पृष्ठमारोप्य तं देशं प्रापितौ पुरुषर्षभौः ।। ५.३५.३१।।।।
Tau parigyatatattvarthau maya pritisamanvitau
Prishthamaropya tam desham prapitau purusharshabhauh
35.32
निवेदितौ च तत्त्वेन सुग्रीवाय महात्मने ।
तयोरन्योन्यसंलापाद्भृशं प्रीतिरजायत ।। ५.३५.३२।।।।
Niveditau cha tattvena sugrivaya mahatmane
Tayoranyonyasanlapadbhrisham pritirajayata
35.33
ततस्तौ प्रीतिसम्पन्नौ हरीश्वरनरेश्वरौ ।
परस्परकृताश्वासौ कथया पूर्ववृत्तया ।। ५.३५.३३।।।।
Tatastau pritisampannau harishvaranareshvarau
Parasparakritashvasau kathaya purvavrittaya
35.34
ततः स सान्त्वयामास सुग्रीवं लक्ष्मणाग्रजः ।
स्त्रीहेतोर्वालिना भ्रात्रा निरस्तमुरुतेजसा ।। ५.३५.३४।।।।
Tatah sa santvayamasa sugrivam lakshmanagrajah
Strihetorvalina bhratra nirastamurutejasa
35.35
ततस्त्वन्नाशजं शोकं रामस्याक्लिष्टकर्मणः ।
लक्ष्मणो वानरेन्द्राय सुग्रीवाय न्यवेदयत् ।। ५.३५.३५।।।।
Tatastvannashajam shokam ramasyaklishtakarmanah
Lakshmano vanarendraya sugrivaya nyavedayat
35.36
स श्रुत्वा वानरेन्द्रस्तु लक्ष्मणेनेरितं वचः ।
तदा ऽ ऽसीन्निष्प्रभो ऽत्यर्थं ग्रहग्रस्त इवांशुमान् ।। ५.३५.३६।।।।
Sa shrutva vanarendrastu lakshmaneneritam vachah
Tada sinnishprabho tyartham grahagrasta ivanshuman
35.37
ततस्त्वद्गात्रशोभीनि रक्षसा ह्रियमाणया ।
यान्याभरणजालानि पातितानि महीतले ।।। ५.३५.३७।।।।
Tatastvadgatrashobhini rakshasa hriyamanaya
Yanyabharanajalani patitani mahitale
35.38
तानि सर्वाणि रामाय आनीय हरियूथपाः ।
संहृष्टा दर्शयामासुर्गतिं तु न विदुस्तव ।। ५.३५.३८।।।।
Tani sarvani ramaya aniya hariyuthapah
Sanhrishta darshayamasurgatim tu na vidustava
35.39
तानि रामाय दत्तानि मयैवोपहृतानि च ।
स्वनवन्त्यवकीर्णानि तस्मिन् विगतचेतसि ।। ५.३५.३९।।।।
Tani ramaya dattani mayaivopahritani cha
Svanavantyavakirnani tasmin vigatachetasi
35.40
तान्यङ्के दर्शनीयानि कृत्वा बहुविधं तव ।
तेन देवप्रकाशेन देवेन परिदेवितम् ।। ५.३५.४०।।।।
Tanyanke darshaniyani kritva bahuvidham tava
Tena devaprakashena devena paridevitam
35.41
पश्यतस्तानि रुदतस्ताम्यतश्च पुनः पुनः।
प्रादीपयन् दाशरथेस्तानि शोकहुताशनम् ।। ५.३५.४१।।।।
Pashyatastani rudatastamyatashcha punah punah
Pradipayan dasharathestani shokahutashanam
35.42
शयितं च चिरं तेन दुःकार्तेन महात्मना ।
मयापि विविधैर्वाक्यैः कृच्छ्रादुत्थिपितः पुनः ।। ५.३५.४२।।।।
Shayitam cha chiram tena duhkartena mahatmana
Mayapi vividhairvakyaih krichchhradutthipitah punah
35.43
तानि दृष्ट्वा महाबाहुर्दर्शयित्वा मुहुर्मुहुः ।
राघवः सहसौमित्रिः सुग्रीवे संन्यवेदयत् ।। ५.३५.४३।।।।
Tani drishtva mahabahurdarshayitva muhurmuhuh
Raghavah sahasaumitrih sugrive sannyavedayat
35.44
स तवादर्शनादार्ये राघवः परितप्यते ।
महता ज्वलता नित्यमग्निनेवाग्निपर्वतः ।। ५.३५.४४।।।।
Sa tavadarshanadarye raghavah paritapyate
Mahata jvalata nityamagninevagniparvatah
35.45
त्वत्कृते तमनिद्रा च शोकश्चिन्ता च राघवम् ।
तापयन्ति महात्मानमग्न्यागारमिवाग्नयः ।। ५.३५.४५।।।।
Tvatkrite tamanidra cha shokashchinta cha raghavam
Tapayanti mahatmanamagnyagaramivagnayah
35.46
तवादर्शनशोकेन राघवः प्रविचाल्यते ।
महता भूमिकम्पने महानिव शिलोच्चयः ।। ५.३५.४६।।।।
Tavadarshanashokena raghavah pravichalyate
Mahata bhumikampane mahaniva shilochchayah
35.47
काननानि सुरम्याणि नदीः प्रस्रवणानि च ।
चरन्न रतिमाप्नोति त्वामपश्यन्नृपात्मजे ।। ५.३५.४७।।।।
Kananani suramyani nadih prasravanani cha
Charanna ratimapnoti tvamapashyannripatmaje
35.48
स त्वां मनुजशार्दूलः क्षिप्रं प्राप्स्यति राघवः ।
समित्रबान्धवं हत्वा रावणं जनकात्मजे ।। ५.३५.४८।।।।
Sa tvam manujashardulah kshipram prapsyati raghavah
Samitrabandhavam hatva ravanam janakatmaje
35.49
सहितौ रामसुग्रीवावुभावकुरुतां तदा ।
समयं वालिनं हन्तुं तव चान्वेषणं तथा ।। ५.३५.४९।।।।
Sahitau ramasugrivavubhavakurutam tada
Samayam valinam hantum tava chanveshanam tatha
35.50
ततस्ताभ्यां कुमाराभ्यां वीराभ्यां स हरीश्वरः ।
किष्किन्धां समुपागम्य वाली युद्धे निपातितः ।। ५.३५.५०।।।।
Tatastabhyam kumarabhyam virabhyam sa harishvarah
Kishkindham samupagamya vali yuddhe nipatitah
35.51
ततो निहत्य तरसा रामो वालिनमाहवे ।
सर्वर्क्षहरिसङ्घानां सुग्रीवमकरोत् पतिम् ।। ५.३५.५१।।।।
Tato nihatya tarasa ramo valinamahave
Sarvarkshaharisanghanam sugrivamakarot patim
35.52
रामसुग्रीवयोरैक्यं देव्येवं समजायत ।
हनुममन्तं च मां विद्धि तयोर्दूतमिहागतम् ।। ५.३५.५२।।।।
Ramasugrivayoraikyam devyevam samajayata
Hanumamantam cha mam viddhi tayordutamihagatam
35.53
स्वराज्यं प्राप्य सुग्रीवः समानीय हरीश्वरान् ।
त्वदर्थं प्रेषयामास दिशो दश महाबलान् ।। ५.३५.५३।।।।
Svarajyam prapya sugrivah samaniya harishvaran
Tvadartham preshayamasa disho dasha mahabalan
35.54
आदिष्टा वानरेन्द्रेण सुग्रीवेण महौजसा ।
अद्रिराजप्रतीकाशाः सर्वतः प्रस्थिता महीम् ।। ५.३५.५४।।।।
Adishta vanarendrena sugrivena mahaujasa
Adrirajapratikashah sarvatah prasthita mahim
35.55
ततस्ते मार्गमाणा वै सुग्रीववचनातुराः ।
चरन्ति वसुधां कृत्स्नां वयमन्ये च वानराः ।। ५.३५.५५।।।।
Tataste margamana vai sugrivavachanaturah
Charanti vasudham kritsnam vayamanye cha vanarah
35.56
अङ्गदो नाम लक्ष्मीवान् वालिसूनुर्महाबलः ।
प्रस्थितः कापिशार्दूलस्त्रिभागबलसंवृतः ।। ५.३५.५६।।।।
Angado nama lakshmivan valisunurmahabalah
Prasthitah kapishardulastribhagabalasanvritah
35.57
तेषां नो विप्रनष्टानां विन्ध्ये पर्वतसत्तमे ।
भृशं शोकपरीतानामहोरात्रगणा गताः ।। ५.३५.५७।।।।
Tesham no vipranashtanam vindhye parvatasattame
Bhrisham shokaparitanamahoratragana gatah
35.58
ते वयं कार्यनैराश्यात् कालश्यातिक्रमेण च ।
भयाच्च कपिराजस्य प्राणांस्त्यक्तुं व्यवस्थिताः ।। ५.३५.५८।।।।
Te vayam karyanairashyat kalashyatikramena cha
Bhayachcha kapirajasya prananstyaktum vyavasthitah
35.59
विचित्य वनदुर्गाणि गिरिप्रस्रवणानि च ।
अनासाद्य पदं देव्याः प्राणांस्त्यक्तुं समुद्यताः ।। ५.३५.५९।।।।
Vichitya vanadurgani giriprasravanani cha
Anasadya padam devyah prananstyaktum samudyatah
35.60
दृष्ट्वा प्रायोपविष्टांश्च सर्वान् वानरपुङ्गवान् ।
भृशं शोकार्णवे मग्नः पर्यदेवयदङ्गदः ।। ५.३५.६०।।।।
Drishtva prayopavishtanshcha sarvan vanarapungavan
Bhrisham shokarnave magnah paryadevayadangadah
35.61
तवनाशं च वैदेहि वालिनश्च वधं तथा ।
प्रायोववेशमस्माकं मरणं च जटायुषः ।। ५३.५.६१।।।।
Tavanasham cha vaidehi valinashcha vadham tatha
Prayovaveshamasmakam maranam cha jatayushah
35.62
तेषां नः स्वामिसन्देशान्निराशानां मुमूर्षताम् ।
कार्यहेतोरिवायातः शकुनिर्वीर्यवान् महान् ।। ५.३५.६२।।।।
Tesham nah svamisandeshannirashanam mumurshatam
Karyahetorivayatah shakunirviryavan mahan
35.63
गृध्रराजस्य सोदर्यः सम्पातिर्नाम गृध्रराट् ।
श्रुत्वा भ्रातृवधं कोपादिदं वचनमब्रवीत् ।। ५.३५.६३।।।।
Gridhrarajasya sodaryah sampatirnama gridhrarat
Shrutva bhratrivadham kopadidam vachanamabravit
35.64
यवीयान् केन म भ्राता हतः क्व च निपातितः ।
एतदाख्यातुमिच्छामि भवद्भिर्वानरोत्तमाः ।। ५.३५.६४।।।।
Yaviyan kena ma bhrata hatah kva cha nipatitah
Etadakhyatumichchhami bhavadbhirvanarottamah
35.65
अङ्गदो ऽकथयत्तस्य जनस्थानेः महद्वधम् ।
रक्षसा भीमरूपेण त्वामुद्दिश्य यथातथम् ।। ५.३५.६५।।।।
Angado kathayattasya janasthaneh mahadvadham
Rakshasa bhimarupena tvamuddishya yathatatham
35.66
जटायुषो वधं श्रुत्वा दुःखितः सो ऽरुणात्मजः ।
त्वां शशंस वरारोहे वसन्तीं रावणालये ।। ५.३५.६६।।।।
Jatayusho vadham shrutva duhkhitah so runatmajah
Tvam shashansa vararohe vasantim ravanalaye
35.67
तस्य तद्वचनं श्रुत्वा सम्पातेः प्रीतिवर्धनम् ।
अङ्गप्रमुखास्तूर्णं ततः संप्रस्थिता वयम् ।। ५.३५.६७।।।।
Tasya tadvachanam shrutva sampateh pritivardhanam
Angapramukhasturnam tatah samprasthita vayam
35.68
विन्ध्यादुत्थाय संप्राप्ताः सागरस्यान्तमुत्तरम् ।
त्वद्दर्शनकृतोत्साहा हृष्टास्तुष्टाः प्लवङ्गमाः ।। ५.३५.६८।।।।
Vindhyadutthaya sampraptah sagarasyantamuttaram
Tvaddarshanakritotsaha hrishtastushtah plavangamah
35.69
अङ्गदप्रमुखाः सर्वे वेलोपान्तमुपस्थिताः ।
चिन्तां जग्मुः पुनर्भीतास्त्वद्दर्शनसमुत्सुकाः ।। ५.३५.६९।।।।
Angadapramukhah sarve velopantamupasthitah
Chintam jagmuh punarbhitastvaddarshanasamutsukah
35.70
तथा ऽहं हरिसैन्यस्य सागरं प्रेक्ष्य सीदतः ।
व्यवधूय भयं ताव्रं योजनानां शतं प्लुतः ।। ५.३५.७०।।।।
Tatha ham harisainyasya sagaram prekshya sidatah
Vyavadhuya bhayam tavram yojananam shatam plutah
35.71
लङ्का चापि मया रात्रौ प्रविष्टा राक्षसाकुला ।
रावणश्च मया दृष्टस्त्वं च शोकपरिप्लुता ।। ५.३५.७१।।।।
Lanka chapi maya ratrau pravishta rakshasakula
Ravanashcha maya drishtastvam cha shokaparipluta
35.72
एतत्ते सर्वमाख्यातं यथावृत्तमनिन्दिते ।
अभिभाषस्व मां देवि दूतो दाशरथेरहम् ।। ५.३५.७२।।।।
Etatte sarvamakhyatam yathavrittamanindite
Abhibhashasva mam devi duto dasharatheraham
35.73
तं मां रामकृतोद्योगं त्वन्निमित्तमिहागतम् ।
सुग्रीवसचिवं देवि बुध्यस्व पवनात्मजम् ।। ५.३५.७३।।।।
Tam mam ramakritodyogam tvannimittamihagatam
Sugrivasachivam devi budhyasva pavanatmajam
35.74
कुशली तव काकुत्स्थः सर्वशस्त्रभृतां वरः ।
गुरोराराधने युक्तो लक्ष्मणश्च सुलक्षणः ।। ५.३५.७४।।।।
Kushali tava kakutsthah sarvashastrabhritam varah
Guroraradhane yukto lakshmanashcha sulakshanah
35.75
तस्य वीर्यवतो देवि भर्तुस्तव हिते रतः ।
अहमेकस्तु संप्राप्तः सुग्रीववचनादिह ।। ५.३५.७५।।।।
Tasya viryavato devi bhartustava hite ratah
Ahamekastu sampraptah sugrivavachanadiha
35.76
मयेयमसहायेन चरता कामरूपिणा ।
दक्षिणा दिगनुक्रान्ता त्वन्मार्गविचयैषिणा ।। ५.३५.७६।।।।
Mayeyamasahayena charata kamarupina
Dakshina diganukranta tvanmargavichayaishina
35.77
दिष्ट्या ऽहं हरिसैन्यानां त्वन्नाशमनुशोचताम् ।
अपनेष्यामि सन्तापं तवाभिगमशंसनात् ।। ५.३५.७७।।।।
Dishtya ham harisainyanam tvannashamanushochatam
Apaneshyami santapam tavabhigamashansanat
35.78
दिष्ट्या हि मम न व्यर्थं देवि सागरलङ्घनम् ।
प्राप्स्याम्यहमिदं दिष्ट्या त्वद्दर्शनकृतं यशः ।। ५.३५.७८।।।।
Dishtya hi mama na vyartham devi sagaralanghanam
Prapsyamyahamidam dishtya tvaddarshanakritam yashah
35.79
राघवश्च महावीर्यः क्षिप्रं त्वामभिपत्स्यते ।
समित्रबान्धवं हत्वा रावणं राक्षसाधिपम् ।। ५.३५.७९।।।।
Raghavashcha mahaviryah kshipram tvamabhipatsyate
Samitrabandhavam hatva ravanam rakshasadhipam
35.80
माल्यवान्नाम वैदेहि गिरीणामुत्तमो गिरिः ।
ततो गच्छति गोकर्णं पर्वतं केसरी हरिः ।। ५.३५.८०।।।।
Malyavannama vaidehi girinamuttamo girih
Tato gachchhati gokarnam parvatam kesari harih
35.81
स च देवर्षिभिर्दिष्टः पिता मम महाकपिः ।
तार्थे नदीपतेः पुण्ये शम्बसादनमुद्धरत् ।। ५.३५.८१।।।।
Sa cha devarshibhirdishtah pita mama mahakapih
Tarthe nadipateh punye shambasadanamuddharat
35.82
तस्याहं हरिणः क्षेत्रे जातो वातेन मैथिलि ।
हनुमानिति विख्यातो लोके स्वेनैव कर्मणा ।। ५.३५.८२।।।।
Tasyaham harinah kshetre jato vatena maithili
Hanumaniti vikhyato loke svenaiva karmana
35.83
विश्वासार्थं तु वैदेहि भर्तुरुक्ता मया गुणाः ।
अचिराद् राघवो देवि त्वामितो नयिता ऽनघे ।। ५.३५.८३।।।।
Vishvasartham tu vaidehi bharturukta maya gunah
Achirad raghavo devi tvamito nayita naghe
35.84
एवं विश्वासिता सीता हेतुभिः शोककर्शिता ।
उपपन्नैरभिज्ञानैर्दूतं तमवगच्छति ।। ५.३५.८४।।।।
Evam vishvasita sita hetubhih shokakarshita
Upapannairabhigyanairdutam tamavagachchhati
35.85
अतुलं च गता हर्षं प्रहर्षेण च जानकी ।
नेत्राभ्यां वक्रपक्ष्मभ्यां मुमोचानन्दजं जलम् ।। ५.३५.८५।।।।
Atulam cha gata harsham praharshena cha janaki
Netrabhyam vakrapakshmabhyam mumochanandajam jalam
35.86
चारु तद्वदनं तस्यास्ताम्रशुक्लायतेक्षणम् ।
अशोभत विशालाक्ष्या राहुमुक्त इवोडुराट् ।। ५.३५.८६।।।।
Charu tadvadanam tasyastamrashuklayatekshanam
Ashobhata vishalakshya rahumukta ivodurat
35.87
हनुमन्तं कपिं व्यक्तं मन्यते नान्यथेति सा ।
अथोवाच हनूमांस्तामुत्तरं प्रियदर्शनाम् ।। ५.३५.८७।।।।
Hanumantam kapim vyaktam manyate nanyatheti sa
Athovacha hanumanstamuttaram priyadarshanam
35.88
एतत्ते सर्वमाख्यातं समाश्वसिहि मैथिलि ।
किं करोमि कथं वा ते रोचते प्रतियाम्यहम् ।। ५.३५.८८।।।।
Etatte sarvamakhyatam samashvasihi maithili
Kim karomi katham va te rochate pratiyamyaham
35.89
हते ऽसुरे संयति शम्बसादने कपिप्रवीरेण महर्षिचोदनात् ।
ततो ऽस्मि वायुप्रभवो हि मैथिलि प्रभावतस्तत्प्रतिमश्च वानरः ।। ५.३५.८९।।
Hate sure sanyati shambasadane kapipravirena maharshichodanat
Tato smi vayuprabhavo hi maithili prabhavatastatpratimashcha vanarah