সর্গ 31

31.1

এবং বহুবিধাং চিন্তাং চিন্তয়িত্বা মহাকপিঃ ।
সংশ্রবে মধুরং বাক্যং বৈদেহ্যা ব্যাজহার হ ।। ৫.৩১.১।।।।

রাজা দশরথো নাম রথকুঞ্জরবাজিমান্ ।
পুণ্যশীলো মহাকীর্তির্ঋজুরাসীন্মহায়শাঃ ।। ৫.৩১.২।।।।

রাজর্ষীণাং গুণশ্রেষ্টস্তপসা চর্ষিভিঃ সমঃ ।
চক্রবর্তিকুলে জাতঃ পুরন্দরসমো বলে ।। ৫.৩১.৩।।।।

অহিসারতিরক্ষুদ্রৌ ঘৃণী সত্যপরাক্রমঃ ।
মুখ্যশ্চেক্ষ্বাকুবংশস্য লক্ষ্মীবাঁল্লক্ষ্মিবর্ধনঃ ।। ৫.৩১.৪।।।।

পার্থিবব্যঞ্জনৈর্যুক্তঃ পৃথুশ্রীঃ পার্থিবর্ষভঃ ।
পৃথিব্যাং চতুরন্তায়াং বিশ্রুতঃ সুখদঃ সুখী ।। ৫.৩১.৫।।।।

তস্য পুত্রঃ প্রিয়ো জ্যেষ্ঠস্তারাধিপনিভাননঃ ।
রামো নাম বিশেষজ্ঞঃ শ্রেষ্ঠঃ সর্বধনুষ্মতাম্ ।। ৫.৩১.৬।।।।

রক্ষিতা স্বস্য ধর্মস্য স্বজনস্য চ রক্ষিতা ।
রক্ষিতা জীবলোকস্য ধর্মস্য চ পরন্তপঃ ।। ৫.৩১.৭।।।।

তস্য সত্যাভিসন্ধস্য বৃদ্ধস্য বচনাৎ পিতুঃ ।
সভার্যঃ সহ চ ভ্রাত্রা বীরঃ প্রব্রাজিতো বনম্ ।। ৫.৩১.৮।।।।

তেন তত্র মহারণ্যে মৃগয়াং পরিধাবতা ।
রাক্ষসা নিহতাঃ শূরা বহবঃ কামরূপিণঃ ।। ৫.৩১.৯।।।।

জনস্থানবধং শ্রুত্বা হতৌ চ খরদূষণৌ ।
ততস্ত্বমর্ষাপহৃতা জানকী রাবণেন তু ।বঞ্জয়িত্বা বনে রামং মৃগরূপেণ মায়য়া ।। ৫.৩১.১০।।।।

স মার্গমাণস্তাং দেবীং রামঃ সীতামনিন্দিতাম্ ।
আসসাদ বনে মিত্রং সুগ্রীবং নাম বানরম্ । ।। ৫.৩১.১১।।।।

ততঃ স বালিনং হত্বা রামঃ পরপুরঞ্জয়ঃ ।
প্রায়চ্ছৎ কপিরাজ্যং তৎ সুগ্রীবায় মহাবলঃ ।। ৫.৩১.১২।।।।

সুগ্রীবেণাপি সন্দিষ্টা হরয়ঃ কামরূপিণঃ ।
দিক্ষু সর্বাসু তাং দেবীং বিচিন্বন্তি সহস্রশঃ ।। ৫.৩১.১৩।।।।

অহং সংপাতিবচনাচ্ছতয়োজনমায়তম্ ।
অস্যা হেতোর্বিশালাক্ষ্যাঃ সাগরং বেগবান্ প্লুতঃ ।। ৫.৩১.১৪।।।।

যথারূপাং যথাবর্ণাং যথালক্ষ্মীং চ নিশ্চিতাম্ ।
অশ্রৌষং রাঘবস্যাহং সেয়মাসাদিতা ময়া ।। ৫.৩১.১৫।।।।

বিররামৈব মুক্ত্বা ঽসৌ বাচং বানরপুঙ্গবঃ ।
জানকী চাপি তচ্ছৃত্বা বিস্ময়ং পরমং গতা ।। ৫.৩১.১৬।।।।

ততঃ সা বক্রকেশান্তা সুকেশী কেশসংবৃতম্ ।
উন্নম্য বদনং ভীরুঃ শিংশুপাবৃক্ষমৈক্ষত ।। ৫.৩১.১৭।।।।

নিশম্য সীতা বচনং কপেশ্চ দিশশ্চ সর্বাঃ প্রদিশশ্চ বীক্ষ্য ।
স্বয়ং প্রহর্ষং পরমং জগাম সর্বাত্মনা রামমনুস্মরন্তী ।। ৫.৩১.১৮।।।।

সা তির্যগূর্ধ্বং চ তথাপ্যধস্তান্নিরীক্ষমাণা তমচিন্ত্যবুদ্ধিম্ ।
দদর্শ পিঙ্গাধিপতেরমাত্যং বাতাত্মজং সূর্যমিবোদয়স্থম্ ।। ৫.৩১.১৯।।