Utshovসর্গ 30
30.1
হনুমানপি বিশ্রান্তঃ সর্বং শুশ্রাব তত্ত্বতঃ ।
সীতায়াস্ত্রিজটায়াশ্চ রাক্ষসীনাং চ তর্জনম্ ।। ৫.৩০.১।।।।
30.2
অবেক্ষমাণস্তাং দেবীং দেবতামিব নন্দনে ।
ততো বহুবিধাং চিন্তাং চিন্তয়ামাস বানরঃ ।। ৫.৩০.২।।।।
30.3
যাং কপীনাং সহস্রাণি সুবহূন্যয়ুতানি চ ।
দিক্ষু সর্বাসু মার্গন্তে সেয়মাসাদিতা ময়া ।। ৫.৩০.৩।।।।
30.4
চারেণ তু সুয়ুক্তেন শত্রোঃ শক্তিমবেক্ষতা ।
গূঢেন চরতা তাবদবেক্ষিতমিদং ময়া ।। ৫.৩০.৪।।।।
30.5
রাক্ষসানাং বিশেষশ্চ পুরী চেয়মবেক্ষিতা ।
রাক্ষসাধিপতেরস্য প্রভাবো রাবণস্য চ ।। ৫.৩০.৫।।।।
30.6
যুক্তং তস্যাপ্রমেয়স্য সর্বসত্ত্বদয়াবতঃ ।
সমাশ্বাসয়িতুং ভার্যাং পতিদর্শনকাংক্ষিণীম্ ।। ৫.৩০.৬।।।।
30.7
অহমাশ্বাসয়াম্যেনাং পূর্ণচন্দ্রনিভাননাম্ ।
অদৃষ্টদুঃখাং দুঃখার্তাং দুঃখস্যান্তমগচ্ছতীম্ ।। ৫.৩০.৭।।।।
30.8
যদ্যপ্যহমিমাং দেবীং শোকোপহতচেতনাম্ ।
অনাশ্বাস্য গমিষ্যামি দোষবদ্ গমনং ভবেৎ ।। ৫.৩০.৮।।।।
30.9
গতে হি ময়ি তত্রেয়ং রাজপুত্রী যশস্বিনী ।
পরিত্রাণমবিন্দন্তী জানকী জীবিতং ত্যজেৎ ।। ৫.৩০.৯।।।।
30.10
ময়া চ স মহাবাহুঃ পূর্ণচন্দ্রনিভাননঃ ।
সমাশ্বাসয়িতুং ন্যায্যঃ সীতাদর্শনলালসঃ ।। ৫.৩০.১০।।।।
30.11
নিশাচরীণাং প্রত্যক্ষমনর্হং চাপি ভাষণম্ ।
কথং তু খলু কর্তব্যমিদং কৃচ্ছ্রগতো হ্যহম্ ।। ৫.৩০.১১।।।।
30.12
অনেন রাত্রিশেষেণ যদি নাশ্বাস্যতে ময়া ।
সর্বথা নাস্তি সন্দেহঃ পরিত্যক্ষ্যতি জীবিতম্ ।। ৫.৩০.১২।।।।
30.13
রামশ্চ যদি পৃচ্ছেন্মাং কিং মাং সীতা ঽব্রবীদ্বচঃ ।
কিমহং দং প্রতিব্রূয়ামসম্ভাষ্য সুমধ্যমাম্ ।। ৫.৩০.১৩।।।।
30.14
সীতাসন্দেশরহিতং মামিতস্ত্বরয়া গতম্ ।
নির্দহেদপি কাকুত্স্থঃ ক্রুদ্ধস্তীব্রেণ চক্ষুষা ।। ৫.৩০.১৪।।।।
30.15
যদি চোদ্যোজয়িষ্যামি ভর্তারং রামকারণাৎ ।
ব্যর্থমাগমনং তস্য সসৈন্যস্য ভবিষ্যতি ।। ৫.৩০.১৫।।।।
30.16
অন্তরং ত্বহমাসাদ্য রাক্ষসীনামিহ স্থিতঃ ।
শনৈরাশ্বাসয়িষ্যামি সন্তাপবহুলামিমাম্ ।। ৫.৩০.১৬।।।।
30.17
অহং ত্বতি তনুশ্চৈব বানরশ্চ বিশেষতঃ ।
বাচং চোদাহরিষ্যামি মানুষীমিহ সংস্কৃতাম্ ।। ৫.৩০.১৭।।।।
30.18
যদি বাচং প্রদাস্যামি দ্বিজাতিরিব সংস্কৃতাম্ ।
রাবণং মন্যমানা মাং সীতা ভীতা ভবিষ্যতি ।বানরস্য বিশেষেণ কথং স্যাদভিভাষণম্ ।। ৫.৩০.১৮।।।।
30.19
অবশ্যমেব বক্তব্যং মানুষং বাক্যমর্থবৎ ।
ময়া সান্ত্বয়িতুং শক্যা নান্যথেয়মনিন্দিতা ।। ৫.৩০.১৯।।।।
30.20
সেয়মালোক্য মে রূপং জানকী ভাষিতং তথা ।
রক্ষোভিস্ত্রাসিতা পূর্বং ভূয়স্ত্রাসং গমিষ্যতি ।। ৫.৩০.২০।।।।
30.21
ততো জাতপরিত্রাসা শব্দং কুর্যান্মনস্বিনী ।
জানমানা বিশালাক্ষী রাবণং কামরূপিণম্ ।। ৫.৩০.২১।।।।
30.22
সীতয়া চ কৃতে শব্দে সহসা রাক্ষসীগণঃ ।
নানাপ্রহরণো ঘোরঃ সমেয়াদন্তকোপমঃ ।। ৫.৩০.২২।।।।
30.23
ততো মাং সংপরিক্ষিপ্য সর্বতো বিকৃতাননাঃ ।
বধে চ গ্রহণে চৈব কুর্যুর্যত্নং যথাবলম্ ।। ৫.৩০.২৩।।।।
30.24
গৃহ্য শাখাঃ প্রশাখাশ্চ স্কন্ধাংশ্চোত্তমশাখিনাম্ ।
দৃষ্ট্বা বিপরিধাবন্তং ভবেয়ুর্ভয়শঙ্কিতাঃ ।। ৫.৩০.২৪।।।।
30.25
মম রূপং চ সম্প্রেক্ষ্য বনে বিচরতো মহৎ ।
রাক্ষস্যো ভয়বিত্রস্তা ভবেয়ুর্বিকৃতাননাঃ ।। ৫.৩০.২৫।।।।
30.26
ততঃ কুর্যুঃ সমাহ্বানং রাক্ষস্যো রক্ষসামপি ।
রাক্ষসেন্দ্রনিয়ুক্তানাং রাক্ষসেন্দ্রনিবেশনে ।। ৫.৩০.২৬।।।।
30.27
তে শূলশক্তিনিস্ত্রিংশবিবিধায়ুধপাণয়ঃ ।
আপতেয়ুর্বিমর্দে ঽস্মিন্ বেগেনোদ্বিগ্নকারিণঃ ।। ৫.৩০.২৭।।।।
30.28
সংরুদ্ধস্তৈস্তু পরিতো বিধমন্ রক্ষসাং বলম্ ।
শক্নুয়াং ন তু সংপ্রাপ্তুং পরং পারং মহোদধেঃ ।। ৫.৩০.২৮।।।।
30.29
মাং বা গৃহ্ণীয়ুরাপ্লুত্য বহবঃ শীঘ্রকারিণঃ ।
স্যাদিয়ং চাগৃহীতার্থা মম চ গ্রহণং ভবেৎ ।। ৫.৩০.২৯।।।।
30.30
হিংসাভিরুচয়ো হিংস্যুরিমাং বা জনকাত্মজাম্ ।
বিপন্নং স্যাত্ততঃ কার্যং রামসুগ্রীবয়োরিদম্ ।। ৫.৩০.৩০।।।।
30.31
উদ্দেশে নষ্টমার্গে ঽস্মিন্ রাক্ষসৈঃ পরিবারিতে ।
সাগরেণ পরিক্ষিপ্তে গুপ্ত বসতি জানকী ।। ৫.৩০.৩১।।।।
30.32
বিশস্তে বা গৃহীতে বা রক্ষোভির্ময়ি সংয়ুগে ।
নান্যং পশ্যামি রামস্য সাহায্যং কার্যসাধনে ।। ৫.৩০.৩২।।।।
30.33
বিমৃশংশ্চ ন পশ্যামি যো হতে ময়ি বানরঃ ।
শতয়োজনবিস্তীর্ণং লঙ্গয়েত মহোদধিম্ ।। ৫.৩০.৩৩।।।।
30.34
কামং হন্তুং সমর্থো ঽস্মি সহস্রাণ্যপি রক্ষসাম্ ।
নতু শক্ষ্যামি সংপ্রাপ্তুং পরং পারং মহোদধেঃ ।। ৫.৩০.৩৪।।।।
30.35
অসত্যানি চ যুদ্ধানি সংশয়ো মে ন রোচতে ।
কশ্চ নিস্সংশয়ং কার্যং কুর্যাৎ প্রাজ্ঞঃ সসংশয়ম্ ।। ৫.৩০.৩৫।।।।
30.36
প্রাণত্যাগশ্চ বৈদেহ্যা ভবেদনভিভাষণে ।
এষ দোষো মহান্ হি স্যান্মম সীতাভিভাষণে ।। ৫.৩০.৩৬।।।।
30.37
ভূতাশ্চার্থা বিনশ্যন্তি দেশকালবিরোধিতাঃ ।
বিক্লবং দূতমাসাদ্য তমঃ সূর্যোদয়ে যথা ।। ৫.৩০.৩৭।।।।
30.38
অর্থানর্থান্তরে বুদ্ধির্নিশ্চিতা ঽপি ন শোভতে ।
ঘাতয়ন্তি হি কার্যাণি দূতাঃ পণ্ডিতমানিনঃ ।। ৫.৩০.৩৮।।।।
30.39
ন বিনশ্যেৎ কথং কার্যং বৈক্লব্যং ন কথং ভবেৎ ।
লঙ্ঘনং চ সমুদ্রস্য কথং নু ন বৃথা ভবেৎ ।। ৫.৩০.৩৯।।।।
30.40
কথং নু খলু বাক্যং মে শ্রুণুয়ান্নোদ্বিজেত বা ।
ইতি সংচিন্ত্য হনুমাংশ্চকার মতিমান্ মতিম্ ।। ৫.৩০.৪০।।।।
30.41
রামমক্লিষ্টকর্মাণং স্ববন্ধুমনুকীর্তয়ন্ ।
নৈনামুদ্বেজয়িষ্যামি তদ্বন্ধুগতমানসাম্ ।। ৫.৩০.৪১।।।।
30.42
ইক্ষ্বাকূণাং বরিষ্ঠস্য রামস্য বিদিতাত্মনঃ ।
শুভানি ধর্ময়ুক্তানি বচনানি সমর্পয়ন্ ।। ৫.৩০.৪২।।।।
30.43
শ্রাবয়িষ্যামি সর্বাণি মধুরাং প্রব্রুবন্ গিরম্ ।
শ্রদ্ধাস্যতি যথা হীয়ং তথা সর্বং সমাদধে ।। ৫.৩০.৪৩।।।।
30.44
ইতি স বহুবিধং মহানুভাবো জগতিপতেঃ প্রমদামবেক্ষমাণঃ ।
মধুরমবিতথং জগাদ বাক্যং দ্রুমবিটপান্তরমাস্থিতো হনূমান্ ।। ৫.৩০.৪৪।।