সর্গ 29

29.1

তথাগতাং তাং ব্যথিতামনিন্দিতাং ব্যপেতহর্ষাং পরিদীনমানসাম্ ।
শুভাং নিমিত্তানি শুভানি ভেজিরে নরং শ্রিয়া জুষ্টমিবোপজীবিনঃ ।। ৫.২৯.১।।।।

তস্যাঃ শুভং বামমরালপক্ষ্মরাজীবৃতং কৃষ্ণবিশালশুক্লম্ ।
প্রাস্পন্দতৈকং নয়নং সুকেশ্যামীনাহতং পদ্মমিবাভিতাম্রম্ ।। ৫.২৯.২।।।।

ভুজশ্চ চার্বঞ্চিতপীনবৃত্তঃ পরার্ধ্যকালাগরুচন্দনার্হঃ ।
অনুত্তমেনাধ্যুষিতঃ প্রিয়েণ চিরেণ বামঃ সমবেপতাশু ।। ৫.২৯.৩।।।।

গজেন্দ্রহস্তপ্রতিমশ্চ পীনস্তয়োর্দ্বয়োঃ সংহতয়োঃ সুজাতঃ ।
প্রস্পন্দমানঃ পুনরূরুরস্যা রামং পুরস্তাৎ স্থিতমাচচক্ষে ।। ৫.২৯.৪।।।।

শুভং পুনর্হেমসমানবর্ণমীষদ্রজোধ্বস্তমিবামলাক্ষ্যাঃ ।
বাসঃ স্থিতায়াঃ শিখরাগ্রদত্যাঃ কিংচিৎ পরিস্রংসত চারুগাত্র্যাঃ ।। ৫.২৯.৫।।।।

এতৈর্নিমিত্তৈরপরৈশ্চ সুভ্রূঃ সংবোধিতা প্রাগপি সাধু সিদ্ধৈঃ ।
বাতাতপক্লান্তমিব প্রনষ্টং বর্ষেণ বীজং প্রতিসংজহর্ষ ।। ৫.২৯.৬।।।।

তস্যাঃ পুনর্বিম্বফলাধরোষ্ঠং স্বক্ষিভ্রু কেশান্তমরালপক্ষ্ম ।
বক্ত্রং বভাসে সিতশুক্লদংষ্ট্রং রাহোর্মুখাচ্চন্দ্র ইব প্রমুক্তঃ ।। ৫.২৯.৭।।।।

সা বীতশোকা ব্যপনীততন্দ্রী শান্তজ্বরা হর্ষবিবৃদ্ধসত্ত্বা ।
অশোভতার্যা বদনেন শুক্লে শীতাংশুনা রাত্রিরিবোদিতেন ।। ৫.২৯.৮।।