Sarga 29

29.1

तथागतां तां व्यथितामनिन्दितां व्यपेतहर्षां परिदीनमानसाम् ।
शुभां निमित्तानि शुभानि भेजिरे नरं श्रिया जुष्टमिवोपजीविनः ।। ५.२९.१।।।।

Tathagatam tam vyathitamaninditam vyapetaharsham paridinamanasam
Shubham nimittani shubhani bhejire naram shriya jushtamivopajivinah

तस्याः शुभं वाममरालपक्ष्मराजीवृतं कृष्णविशालशुक्लम् ।
प्रास्पन्दतैकं नयनं सुकेश्यामीनाहतं पद्ममिवाभिताम्रम् ।। ५.२९.२।।।।

Tasyah shubham vamamaralapakshmarajivritam krishnavishalashuklam
Praspandataikam nayanam sukeshyaminahatam padmamivabhitamram

भुजश्च चार्वञ्चितपीनवृत्तः परार्ध्यकालागरुचन्दनार्हः ।
अनुत्तमेनाध्युषितः प्रियेण चिरेण वामः समवेपताशु ।। ५.२९.३।।।।

Bhujashcha charvanchitapinavrittah parardhyakalagaruchandanarhah
Anuttamenadhyushitah priyena chirena vamah samavepatashu

गजेन्द्रहस्तप्रतिमश्च पीनस्तयोर्द्वयोः संहतयोः सुजातः ।
प्रस्पन्दमानः पुनरूरुरस्या रामं पुरस्तात् स्थितमाचचक्षे ।। ५.२९.४।।।।

Gajendrahastapratimashcha pinastayordvayoh sanhatayoh sujatah
Praspandamanah punarururasya ramam purastat sthitamachachakshe

शुभं पुनर्हेमसमानवर्णमीषद्रजोध्वस्तमिवामलाक्ष्याः ।
वासः स्थितायाः शिखराग्रदत्याः किंचित् परिस्रंसत चारुगात्र्याः ।। ५.२९.५।।।।

Shubham punarhemasamanavarnamishadrajodhvastamivamalakshyah
Vasah sthitayah shikharagradatyah kinchit parisransata charugatryah

एतैर्निमित्तैरपरैश्च सुभ्रूः संबोधिता प्रागपि साधु सिद्धैः ।
वातातपक्लान्तमिव प्रनष्टं वर्षेण बीजं प्रतिसंजहर्ष ।। ५.२९.६।।।।

Etairnimittairaparaishcha subhruh sambodhita pragapi sadhu siddhaih
Vatatapaklantamiva pranashtam varshena bijam pratisanjaharsha

तस्याः पुनर्बिम्बफलाधरोष्ठं स्वक्षिभ्रु केशान्तमरालपक्ष्म ।
वक्त्रं बभासे सितशुक्लदंष्ट्रं राहोर्मुखाच्चन्द्र इव प्रमुक्तः ।। ५.२९.७।।।।

Tasyah punarbimbaphaladharoshtham svakshibhru keshantamaralapakshma
Vaktram babhase sitashukladanshtram rahormukhachchandra iva pramuktah

सा वीतशोका व्यपनीततन्द्री शान्तज्वरा हर्षविवृद्धसत्त्वा ।
अशोभतार्या वदनेन शुक्ले शीतांशुना रात्रिरिवोदितेन ।। ५.२९.८।।

Sa vitashoka vyapanitatandri shantajvara harshavivriddhasattva
Ashobhatarya vadanena shukle shitanshuna ratririvoditena