Utshovসর্গ 26
26.1
প্রসক্তাশ্রুমুখীত্যেবং ব্রুবন্তী জনকাত্মজা ।
অধোমুখমুখী বালা বিলপ্তুমুপচক্রমে ।। ৫.২৬.১।।।।
26.2
উন্মত্তেব প্রমত্তেব ভ্রান্তচিত্তেব শোচতী ।
উপাবৃত্তা কিশোরীব বিবেষ্টন্তী মহীতলে ।। ৫.২৬.২।।।।
26.3
রাঘবস্য প্রমত্তস্য রক্ষসা কামরূপিণা ।
রাবণেন প্রমথ্যাহমানীতা ক্রোশতী বলাৎ ।। ৫.২৬.৩।।।।
26.4
রাক্ষসীবশমাপন্না ভর্ত্স্যমানা সুদারুণম্ ।
চিন্তয়ন্তী সুদুঃখার্তা নাহং জীবিতুমুত্সহে ।। ৫.২৬.৪।।।।
26.5
নহি মে জীবিতৈরর্থো নৈবার্থৈর্ন চ ভূষণৈঃ ।
বসন্ত্যা রাক্ষসীমধ্যে বিনা রামং মহারথম্ ।। ৫.২৬.৫।।।।
26.6
অশ্মসারমিদং নূনমথবাপ্যজরামরম্ ।
হৃদয়ং মম যেনেদং ন দুঃখেনাবশীর্যতে ।। ৫.২৬.৬।।।।
26.7
ধিঙ্মামনার্যামসতীং যা ঽহং তেন বিনা কৃতা ।
মুহূর্তমপি রক্ষামি জীবিতং পাপজীবিতা ।। ৫.২৬.৭।।।।
26.8
কা চ মে জীবিতে শ্রদ্ধা সুখে বা তং প্রিয়ং বিনা ।
ভর্তারং সাগরান্তায়া বসুধায়াঃ প্রিয়ংবদম্ ।। ৫.২৬.৮।।।।
26.9
ভিদ্যতাং ভক্ষ্যতাং বাপি শরীরং বিসৃজাম্যহম্ ।
ন চাপ্যহং চিরং দুঃখং সহেয়ং প্রিয়বর্জিতা ।। ৫.২৬.৯।।।।
26.10
চরণেনাপি সব্যেন ন স্পৃশেয়ং নিশাচরম্ ।
রাবণং কিং পুনরহং কাময়েয়ং বিগর্হিতম্ ।। ৫.২৬.১০।।।।
26.11
প্রত্যাখ্যাতং ন জানাতি নাত্মানং নাত্মনঃ কুলম্ ।
যো নৃশংসস্বভাবেন মাং প্রার্থয়িতুমিচ্ছতি ।। ৫.২৬.১১।।।।
26.12
ছিন্না ভিন্না বিভক্তা বা দীপ্তেবাগ্নৌ প্রদীপিতা ।
রাবণং নোপতিষ্ঠেয়ং কিং প্রলাপেন বশ্চিরম্ ।। ৫.২৬.১২।।।।
26.13
খ্যাতঃ প্রাজ্ঞঃ কৃতজ্ঞশ্চ সানুক্রোশশ্চ রাঘবঃ ।
সদ্বৃত্তো নিরনুক্রোশঃ শঙ্কে মদ্ভাগ্যসংক্ষয়াৎ ।। ৫.২৬.১৩।।।।
26.14
রাক্ষসানাং সহস্রাণি জনস্থানে চতুর্দশ ।
যেনৈকেন নিরস্তানি স মাং কিং নাভিপদ্যতে ।। ৫.২৬.১৪।।।।
26.15
নিরুদ্ধা রাবণেনাহমল্পবীর্যেণ রক্ষসা ।
সমর্থঃ খলু মে ভর্তা রাবণং হন্তুমাহবে ।। ৫.২৬.১৫।।।।
26.16
বিরাধো দণ্ডকারণ্যে যেন রাক্ষসপুঙ্গবঃ ।
রণে রামেণ নিহতঃ স মাং কিং নাভিপদ্যতে ।। ৫.২৬.১৬।।।।
26.17
কামং মধ্যে সমুদ্রস্য লঙ্কেয়ং দুষ্প্রধর্ষণা ।
ন তু রাঘববাণানাং গতিরোধীহ বিদ্যতে ।। ৫.২৬.১৭।।।।
26.18
কিং তু তত্কারণং যেন রামো দৃঢপরাক্রমঃ ।
রক্ষসা ঽপহৃতাং ভার্যামিষ্টাং নাভ্যবপদ্যতে ।। ৫.২৬.১৮।।।।
26.19
ইহস্থাং মাং ন জানীতে শঙ্কে লক্ষ্মণপূর্বজঃ ।
জানন্নপি হি তেজস্বী ধর্ষণং মর্ষয়িষ্যতি ।। ৫.২৬.১৯।।।।
26.20
হৃতেতি যো ঽধিগত্বা মাং রাঘবায় নিবেদয়েৎ ।
গৃধ্ররাজো ঽপি স রণে রাবণেন নিপাতিতঃ ।। ৫.২৬.২০।।।।
26.21
কৃতং কর্ম মহত্তেন মাং তথা ঽভ্যবপদ্যতা ।
তিষ্ঠতা রাবণদ্বন্দ্বে বৃদ্ধেনাপি জটায়ুষা ।। ৫.২৬.২১।।।।
26.22
যদি মামিহ জানীয়াদ্বর্তমানাং স রাঘবঃ ।
অদ্য বাণৈরভিক্রুদ্ধঃ কুর্যাল্লোকমরাক্ষসম্ ।। ৫.২৬.২২।।।।
26.23
বিধমেচ্চ পুরীং লঙ্কাং শোষয়েচ্চ মহোদধিম্ ।
রাবণস্য চ নীচস্য কীর্তিং নাম চ নাশয়েৎ ।। ৫.২৬.২৩।।।।
26.24
ততো নিহতনাথানাং রাক্ষসীনাং গৃহে গৃহে ।
যথা ঽহমেবং রুদতী তথা ভূয়ো ন সংশয়ঃ ।। ৫.২৬.২৪।।।।
26.25
অন্বিষ্য রক্ষসাং লঙ্কাং কুর্যাদ্ রামঃ সলক্ষ্মণঃ ।
ন হি তাভ্যাং রিপুর্দৃষ্টো মুহূর্তমপি জীবতি ।। ৫.২৬.২৫।।।।
26.26
চিতাধূমাকুলপথা গৃধ্রমণ্ডলসঙ্কুলা ।
অতিরেণ তু লঙ্কেয়ং শ্মশানসদৃশী ভবেৎ ।। ৫.২৬.২৬।।।।
26.27
অচিরেণৈব কালেন প্রপ্স্যাম্যেব মনোরথম্ ।
দুষ্প্রস্থানো ঽয়মাখ্যাতি সর্বেষাং বো বিপর্যয়ম্ ।। ৫.২৬.২৭।।।।
26.28
যাদৃশানীহ দৃশ্যন্তে লঙ্কায়ামশুভানি বৈ ।
অচিরেণ তু কালেন ভবিষ্যতি হতপ্রভা ।। ৫.২৬.২৮।।।।
26.29
নূনং লঙ্কা হতে পাপে রাবণে রাক্ষসাধমে ।
শোষং যাস্যতি দুর্ধর্ষা প্রমদা বিধবা যথা ।। ৫.২৬.২৯।।।।
26.30
পুণ্যোত্সবসমুত্থা চ নষ্টভর্ত্রী সরাক্ষসী ।
ভবিষ্যতি পুরী লঙ্কা নষ্টভর্ত্রী যথা ঽঙ্গনা ।। ৫.২৬.৩০।।।।
26.31
নূনং রাক্ষসকন্যানাং রুদন্তীনাং গৃহে গৃহে ।
শ্রোষ্যামি নচিরাদেব দুঃখার্তানামিহ ধ্বনিম্ ।। ৫.২৬.৩১।।।।
26.32
সান্ধকারা হতদ্যোতা হতরাক্ষসপুঙ্গবা ।
ভবিষ্যতি পুরী লঙ্কা নির্দগ্ধা রামসায়কৈঃ ।। ৫.২৬.৩২।।।।
26.33
যদি নাম স শূরো মাং রামো রক্তান্তলোচনঃ ।
জানীয়াদ্বর্তমানাং হি রাবণস্য নিবেশনে ।। ৫.২৬.৩৩।।।।
26.34
অনেন তু নৃশংসেন রাবণেনাধমেন মে ।
সময়ো যস্তু নির্দিষ্টস্তস্য কালো ঽয়মাগতঃ ।। ৫.২৬.৩৪।।।।
26.35
অকার্যং যে ন জানন্তি নৈর্ঋতাঃ পাপকারিণঃ ।
অধর্মাত্তু মহোত্পাতো ভবিষ্যতি হি সাম্প্রতম্ ।। ৫.২৬.৩৫।।।।
26.36
নৈতে ধর্মং বিজানন্তি রাক্ষসাঃ পিশিতাশনাঃ ।
ধ্রুবং মাং প্রাতরাশার্থে রাক্ষসঃ কল্পয়িষ্যতি ।। ৫.২৬.৩৬।।।।
26.37
সা ঽহং কথং করিষ্যামি তং বিনা প্রিয়দর্শনম্ ।
রামং রক্তান্তনয়নমপশ্যন্তী সুদুঃখিতা ।। ৫.২৬.৩৭।।।।
26.38
যদি কশ্চিৎ প্রদাতা মে বিষস্যাদ্য ভবেদিহ ।
ক্ষিপ্রং বৈবস্বতং দেব পশ্যেয়ং পতিনা বিনা ।। ৫.২৬.৩৮।।।।
26.39
নাজানাজ্জীবতীং রামঃ স মাং লক্ষ্মণপূর্বজঃ ।
জানন্তৌ তৌ ন কুর্যাতাং নোর্ব্যাং হি মম মার্গণম্ ।। ৫.২৬.৩৯।।।।
26.40
নূনং মমৈব শোকেন স বীরো লক্ষ্মণাগ্রজঃ ।
দেবলোকমিতো যাতস্ত্যক্ত্বা দেহং মহীতলে ।। ৫.২৬.৪০।।।।
26.41
ধন্যা দেবাঃ সগন্ধর্বাঃ সিদ্ধাশ্চ পরমর্ষয়ঃ ।
মম পশ্যন্তি যে নাথং রামং রাজীবলোচনম্ ।। ৫.২৬.৪১।।।।
26.42
অথবা নহি তস্যার্থো ধর্মকামস্য ধীমতঃ ।
ময়া রামস্য রাজর্ষের্ভার্যয়া পরমাত্মনঃ ।। ৫.২৬.৪২।।।।
26.43
দৃশ্যমানে ভবেৎ প্রীতিঃ সৌহৃদং নাস্ত্যপশ্যতঃ ।
নাশয়ন্তি কৃতঘ্নাস্তু ন রামো নাশয়িষ্যতি ।। ৫.২৬.৪৩।।।।
26.44
কিন্নু মে ন গুণাঃ কেচিৎ কিংবা ভাগ্যক্ষয়ো মম ।
যা ঽহং সীদামি রামেণ হীনা মুখ্যেন ভামিনী ।। ৫.২৬.৪৪।।।।
26.45
শ্রেয়ো মে জীবিতান্মর্তুং বিহীনায়া মহাত্মনঃ ।
রামাদক্লিষ্টচারিত্রাচ্ছূরাচ্ছত্রুনিবর্হণাৎ ।। ৫.২৬.৪৫।।।।
26.46
অথবা ন্যস্তশস্ত্রৌ তৌ বনে মুলফলাশিনৌ ।
ভ্রাতরৌ হি নরশ্রেষ্ঠৌ সংবৃত্তৌ বনগোচরৌ ।। ৫.২৬.৪৬।।।।
26.47
অথবা রাক্ষসেন্দ্রেণ রাবণেন দুরাত্মনা ।
ছদ্মনা সাদিতৌ শূরৌ ভ্রাতরৌ রামলক্ষ্মণৌ ।। ৫.২৬.৪৭।।।।
26.48
সা ঽহমেবং গতে কালে মর্তুমিচ্ছামি সর্বথা ।
ন চ মে বিহিতো মৃত্যুরস্মিন্ দুঃখে ঽপি বর্ততি ।। ৫.২৬.৪৮।।।।
26.49
ধন্যাঃ খলু মহাত্মানো মুনয়স্ত্যক্তকিল্বিষাঃ ।
জিতাত্মানো মহাভাগা যেষাং ন স্তঃ প্রিয়াপ্রিয়ে ।। ৫.২৬.৪৯।।।।
26.50
প্রিয়ান্ন সংভবেদ্দুঃখমপ্রিয়াদধিকং ভয়ম্ ।
তাভ্যাং হি যে বিয়ুজ্যন্তে নমস্তেষাং মহাত্মনাম্ ।। ৫.২৬.৫০।।।।
26.51
সা ঽহং ত্যক্তা প্রিয়েণেহ রামেণ বিদিতাত্মনা ।
প্রাণাংস্ত্যক্ষ্যামি পাপস্য রাবণস্য গতা বশম্ ।। ৫.২৬.৫১।।