সর্গ 25

25.1

তথা তাসাং বদন্তীনাং পরুষং দারুণং বহু ।
রাক্ষসীনামসৌম্যানাং রুরোদ জনকাত্মজা ।। ৫.২৫.১।।।।

এবমুক্তা তু বৈদেহী রাক্ষসীভির্মনস্বিনী ।
উবাচ পরমত্রস্তা বাষ্পগদ্গদয়া গিরা ।। ৫.২৫.২।।।।

ন মানুষী রাক্ষসস্য ভার্যা ভবিতুমর্হতি ।
কামং খাদত মাং সর্বা ন করিষ্যামি বো বচঃ ।। ৫.২৫.৩।।।।

সা রাক্ষসীমধ্যগতা সীতা সুরসুতোপমা ।
ন শর্ম লেভে দুঃখার্তা রাবণেন চ তর্জিতা ।। ৫.২৫.৪।।।।

বেপতে স্মাধিকং সীতা বিশন্তীবাঙ্গমাত্মনঃ ।
বনে যূথপরিভ্রষ্টা মৃগী কোকৈরিবার্দিতা ।। ৫.২৫.৫।।।।

সা ত্বশোকস্য বিপুলাং শাখামালম্ব্য পুষ্পিতাম্ ।
চিন্তয়ামাস শোকেন ভর্তারং ভগ্নমানসা ।। ৫.২৫.৬।।।।

সা স্নাপয়ন্তী বিপুলৌ স্তনৌ নেত্রজলস্রবৈঃ ।
চিন্তয়ন্তী ন শোকস্য তদা ঽন্তমধিগচ্ছতি ।। ৫.২৫.৭।।।।

সা বেপমানা পতিতা প্রবাতে কদলী যথা ।
রাক্ষসীনাং ভয়ত্রস্তা বিবর্ণবদনা ঽভবৎ ।। ৫.২৫.৮।।।।

তস্যাঃ সা দীর্ঘবিপুলা বেপন্ত্যা সীতয়া তদা ।
দদৃশে কম্পিনী বেণী ব্যালীব পরিসর্পতী ।। ৫.২৫.৯।।।।

সা নিঃশ্বসন্তী দুঃখার্তা শোকোপহতচেতনা ।
আর্তা ব্যসৃজদশ্রূণি মৈথিলী বিললাপ হ ।। ৫.২৫.১০।।।।

রা রামেতি চ দূঃখার্তা হা পুনর্লক্ষ্মণেতি চ ।
হা শ্বশ্রু মম কৌসল্যে হা সুমিত্রেতি ভামিনী ।। ৫.২৫.১১।।।।

লোকপ্রবাদঃ সত্যো ঽয়ং পণ্ডিতৈঃ সমুদাহৃতঃ ।
অকালে দুর্লভো মৃত্যুঃ স্ত্রিয়া বা পুরুষস্য বা ।। ৫.২৫.১২।।।।

যত্রাহমেবং ক্রূরাভী রাক্ষসীভিরিহার্দিতা ।
জীবামি হীনা রামেণ মুহূর্তমপি দুঃখিতা ।। ৫.২৫.১৩।।।।

এষা ঽল্পপুণ্যা কৃপণা বিনশিষ্যাম্যনাথবৎ ।
সমুদ্রমধ্যে নৌঃ পূর্ণা বায়ুবেগৈরিবাহতা ।। ৫.২৫.১৪।।।।

ভর্তারং তমপশ্যন্তী রাক্ষসীবশমাগতা ।
সীদামি খলু শোকেন কূলং তোয়হতং যথা ।। ৫.২৫.১৫।।।।

তং পদ্মদলপত্রক্ষং সিংহবিক্রান্তগামিনম্ ।
ধন্যাঃ পশ্যন্তি মে নাথং কৃতজ্ঞং প্রিয়বাদিনম্ ।। ৫.২৫.১৬।।।।

সর্বথা তেন হীনায়া রামেণ বিদিতাত্মনা ।
তীক্ষ্ণং বিষমিবাস্বাদ্য দুর্লভং মম জীবিতম্ ।। ৫.২৫.১৭।।।।

কীদৃশং তু ময়া পাপং পুরা জন্মান্তরে কৃতম্ ।
যেনেদং প্রাপ্যতে দুঃখং ময়া ঘোরং সুদারুণম্ ।। ৫.২৫.১৮।।।।

জীবিতং ত্যক্তুমিচ্ছামি শোকেন মহতা বৃতা ।
রাক্ষসীভিশ্চ রক্ষ্যন্ত্যা রামো নাসাদ্যতে ময়া ।। ৫.২৫.১৯।।।।

ধিগস্তু খলু মানুষ্যং ধিগস্তু পরবশ্যতাম্ ।
ন শক্যং যৎ পরিত্যক্তুমাত্মচ্ছন্দেন জীবিতম্ ।। ৫.২৫.২০।।