Utshovসর্গ 24
24.1
প্রসক্তাশ্রুমুখীত্যেবং ব্রুবন্তী জনকাত্মজা ।
অধোমুখমুখী বালা বিলপ্তুমুপচক্রমে ।। ৫.২৪.১।।।।
24.2
উন্মত্তেব প্রমত্তেব ভ্রান্তচিত্তেব শোচতী ।
উপাবৃত্তা কিশোরীব বিবেষ্টন্তী মহীতলে ।। ৫.২৪.২।।।।
24.3
রাঘবস্যাপ্রমত্তস্য রক্ষসা কামরূপিণা ।
রাবণেন প্রমথ্যাহমানীতা ক্রোশতী বলাৎ ।। ৫.২৪.৩।।।।
24.4
রাক্ষসী বশমাপন্না ভর্ত্যমানা সুদারুণম্ ।
চিন্তয়ন্তী সুদুঃখার্তা নাহং জীবিতুমুত্সহে ।। ৫.২৪.৪।।।।
24.5
ন হি মে জীবিতেনার্থো নৈবার্থৈর্ন চ ভূষণৈঃ ।
বসন্ত্যা রাক্ষসী মধ্যে বিনা রামং মহারথম্ ।। ৫.২৪.৫।।।।
24.6
ধিঙ্মামনার্যামসতীং যাহং তেন বিনা কৃতা ।
মুহূর্তমপি রক্ষামি জীবিতং পাপজীবিতা ।। ৫.২৪.৬।।।।
24.7
কা চ মে জীবিতে শ্রদ্ধা সুখে বা তং প্রিয়ং বিনা ।
ভর্তারং সাগরান্তায়া বসুধায়াঃ প্রিয়ং বদম্ ।। ৫.২৪.৭।।।।
24.8
ভিদ্যতাং ভক্ষ্যতাং বাপি শরীরং বিসৃজাম্যহম্ ।
ন চাপ্যহং চিরং দুঃখং সহেয়ং প্রিয়বর্জিতা ।। ৫.২৪.৮।।।।
24.9
চরণেনাপি সব্যেন ন স্পৃশেয়ং নিশাচরম্ ।
রাবণং কিং পুনরহং কাময়েয়ং বিগর্হিতম্ ।। ৫.২৪.৯।।।।
24.10
প্রত্যাখ্যাতং ন জানাতি নাত্মানং নাত্মনঃ কুলম্ ।
যো নৃশংস স্বভাবেন মাং প্রার্থয়িতুমিচ্ছতি ।। ৫.২৪.১০।।।।
24.11
ছিন্না ভিন্না বিভক্তা বা দীপ্তে বাগ্নৌ প্রদীপিতা ।
রাবণং নোপতিষ্ঠেয়ং কিং প্রলাপেন বশ্ চিরম্ ।। ৫.২৪.১১।।।।
24.12
খ্যাতঃ প্রাজ্ঞঃ কৃতজ্ঞশ্চ সানুক্রোশশ্চ রাঘবঃ ।
সদ্বৃত্তো নিরনুক্রোশঃ শঙ্কে মদ্ভাগ্যসঙ্ক্ষয়াৎ ।। ৫.২৪.১২।।।।
24.13
রাক্ষসানাং জনস্থানে সহস্রাণি চতুর্দশ ।
যেনৈকেন নিরস্তানি স মাং কিং নাভিপদ্যতে ।। ৫.২৪.১৩।।।।
24.14
নিরুদ্ধা রাবণেনাহমল্পবীর্যেণ রক্ষসা ।
সমর্থঃ খলু মে ভর্তা রাবণং হন্তুমাহবে ।। ৫.২৪.১৪।।।।
24.15
বিরাধো দণ্ডকারণ্যে যেন রাক্ষসপুঙ্গবঃ ।
রণে রামেণ নিহতঃ স মাং কিং নাভিপদ্যতে ।। ৫.২৪.১৫।।।।
24.16
কামং মধ্যে সমুদ্রস্য লঙ্কেয়ং দুষ্প্রধর্ষণা ।
ন তু রাঘববাণানাং গতিরোধী হ বিদ্যতে ।। ৫.২৪.১৬।।।।
24.17
কিং নু তত্কারণং যেন রামো দৃঢপরাক্রমঃ ।
রক্ষসাপহৃতাং ভার্যামিষ্টাং নাভ্যবপদ্যতে ।। ৫.২৪.১৭।।।।
24.18
ইহস্থাং মাং ন জানীতে শঙ্কে লক্ষ্মণপূর্বজঃ ।
জানন্নপি হি তেজস্বী ধর্ষণাং মর্ষয়িষ্যতি ।। ৫.২৪.১৮।।।।
24.19
হৃতেতি যোঽধিগত্বা মাং রাঘবায় নিবেদয়েৎ ।
গৃধ্ররাজোঽপি স রণে রাবণেন নিপাতিতঃ ।। ৫.২৪.১৯।।।।
24.20
কৃতং কর্ম মহত্তেন মাং তদাভ্যবপদ্যতা ।
তিষ্ঠতা রাবণদ্বন্দ্বে বৃদ্ধেনাপি জটায়ুষা ।। ৫.২৪.২০।।।।
24.21
যদি মামিহ জানীয়াদ্বর্তমানাং স রাঘবঃ ।
অদ্য বাণৈরভিক্রুদ্ধঃ কুর্যাল্লোকমরাক্ষসং ।। ৫.২৪.২১।।।।
24.22
বিধমেচ্চ পুরীং লঙ্কাং শোষয়েচ্চ মহোদধিম্ ।
রাবণস্য চ নীচস্য কীর্তিং নাম চ নাশয়েৎ ।।৫.২৪.২২।।।।
24.23
ততো নিহতনথানাং রাক্ষসীনাং গৃহে গৃহে ।
যথাহমেবং রুদতী তথা ভূয়ো ন সংশয়ঃ ।অন্বিষ্য রক্ষসাং লঙ্কাং কুর্যাদ্রামঃ সলক্ষ্মণঃ ।। ৫.২৪.২৩।।।।
24.24
ন হি তাভ্যাং রিপুর্দৃষ্টো মুহূতমপি জীবতি ।
চিতা ধূমাকুলপথা গৃধ্রমণ্ডলসঙ্কুলা ।অচিরেণ তু লঙ্কেয়ং শ্মশানসদৃশী ভবেৎ ।। ৫.২৪.২৪।।।।
24.25
অচিরেণৈব কালেন প্রাপ্স্যাম্যেব মনোরথম্ ।
দুষ্প্রস্থানোঽয়মাখ্যাতি সর্বেষাং বো বিপর্যয়ঃ ।। ৫.২৪.২৫।।।।
24.26
যাদৃশানি তু দৃশ্যন্তে লঙ্কায়ামশুভানি তু ।
অচিরেণৈব কালেন ভবিষ্যতি হতপ্রভা ।। ৫.২৪.২৬।।।।
24.27
নূনং লঙ্কা হতে পাপে রাবণে রাক্ষসাধিপে ।
শোষং যাস্যতি দুর্ধর্ষা প্রমদা বিধবা যথা ।। ৫.২৪.২৭।।।।
24.28
পুষ্যোত্সবসমৃদ্ধা চ নষ্টভর্ত্রী সরাক্ষসা ।
ভবিষ্যতি পুরী লঙ্কা নষ্টভর্ত্রী যথাঙ্গনা ।। ৫.২৪.২৮।।।।
24.29
নূনং রাক্ষসকন্যানাং রুদন্তীনাং গৃহে গৃহে ।
শ্রোষ্যামি নচিরাদেব দুঃখার্তানাম্ ইহ ধ্বনিম্ ।। ৫.২৪.২৯।।।।
24.30
সান্ধকারা হতদ্যোতা হতরাক্ষসপুঙ্গবা ।
ভবিষ্যতি পুরী লঙ্কা নির্দগ্ধা রামসায়কৈঃ ।। ৫.২৪.৩০।।।।
24.31
যদি নাম স শূরো মাং রামো রক্তান্তলোচনঃ ।
জানীয়াদ্বর্তমানাং হি রাবণস্য নিবেশনে ।। ৫.২৪.৩১।।।।
24.32
অনেন তু নৃশংসেন রাবণেনাধমেন মে ।
সময়ো যস্তু নির্দিষ্টস্তস্য কালোঽয়মাগতঃ ।। ৫.২৪.৩২।।।।
24.33
অকার্যং যে ন জানন্তি নৈরৃতাঃ পাপকারিণঃ ।
অধর্মাত্তু মহোত্পাতো ভবিষ্যতি হি সাম্প্রতম্ ।। ৫.২৪.৩৩।।।।
24.34
নৈতে ধর্মং বিজানন্তি রাক্ষসাঃ পিশিতাশনাঃ ।
ধ্রুবং মাং প্রাতরাশার্থে রাক্ষসঃ কল্পয়িষ্যতি ।। ৫.২৪.৩৪।।।।
24.35
সাহং কথং করিষ্যামি তং বিনা প্রিয়দর্শনম্ ।
রামং রক্তান্তনয়নমপশ্যন্তী সুদুঃখিতা ।। ৫.২৪.৩৫।।।।
24.36
যদি কশ্চিত্প্রদাতা মে বিষস্যাদ্য ভবেদিহ ।
ক্ষিপ্রং বৈবস্বতং দেবং পশ্যেয়ং পতিনা বিনা ।। ৫.২৪.৩৬।।।।
24.37
নাজানাজ্জীবতীং রামঃ স মাং লক্ষ্মণপূর্বজঃ ।
জানন্তৌ তৌ ন কুর্যাতাং নোর্ব্যাং হি মম মার্গণম্ ।। ৫.২৪.৩৭।।।।
24.38
নূনং মমৈব শোকেন স বীরো লক্ষ্মণাগ্রজঃ ।
দেবলোকমিতো যাতস্ত্যক্ত্বা দেহং মহীতলে ।। ৫.২৪.৩৮।।।।
24.39
ধন্যা দেবাঃ সগন্ধর্বাঃ সিদ্ধাশ্চ পরমর্ষয়ঃ ।
মম পশ্যন্তি যে নাথং রামং রাজীবলোচনম্ ।। ৫.২৪.৩৯।।।।
24.40
অথ বা ন হি তস্যার্থে ধর্মকামস্য ধীমতঃ ।
ময়া রামস্য রাজর্ষের্ভার্যয়া পরমাত্মনঃ ।। ৫.২৪.৪০।।।।
24.41
দৃশ্যমানে ভবেত্প্রীতঃ সৌহৃদং নাস্ত্যপশ্যতঃ ।
নাশয়ন্তি কৃতঘ্রাস্তু ন রামো নাশয়িষ্যতি ।। ৫.২৪.৪১।।।।
24.42
কিং নু মে ন গুণাঃ কে চিত্কিং বা ভাগ্য ক্ষয়ো হি মে ।
যাহং সীতা বরার্হেণ হীনা রামেণ ভামিনী ।। ৫.২৪.৪২।।।।
24.43
শ্রেয়ো মে জীবিতান্মর্তুং বিহীনা যা মহাত্মনা ।
রামাদক্লিষ্টচারিত্রাচ্ছূরাচ্ছত্রুনিবর্হণাৎ ।। ৫.২৪.৪৩।।।।
24.44
অথ বা ন্যস্তশস্ত্রৌ তৌ বনে মূলফলাশনৌ ।
ভ্রাতরৌ হি নর শ্রেষ্ঠৌ চরন্তৌ বনগোচরৌ ।। ৫.২৪.৪৪।।।।
24.45
অথ বা রাক্ষসেন্দ্রেণ রাবণেন দুরাত্মনা ।
ছদ্মনা ঘাতিতৌ শূরৌ ভ্রাতরৌ রামলক্ষ্মণৌ ।। ৫.২৪.৪৫।।।।
24.46
সাহমেবঙ্গতে কালে মর্তুমিচ্ছামি সর্বথা ।
ন চ মে বিহিতো মৃত্যুরস্মিন্দুঃখেঽপি বর্ততি ।। ৫.২৪.৪৬।।।।
24.47
ধন্যাঃ খলু মহাত্মানো মুনয়ঃ সত্যসংমতাঃ ।
জিতাত্মানো মহাভাগা যেষাং ন স্তঃ প্রিয়াপ্রিয়ে ।। ৫.২৪.৪৭।।।।
24.48
প্রিয়ান্ন সম্ভবেদ্দুঃখমপ্রিয়াদধিকং ভয়ম্ ।
তাভ্যাং হি যে বিয়ুজ্যন্তে নমস্তেষাং মহাত্মনাম্ ।। ৫.২৪.৪৮।।।।
24.49
সাহং ত্যক্তা প্রিয়েণেহ রামেণ বিদিতাত্মনা ।
প্রাণাংস্ত্যক্ষ্যামি পাপস্য রাবণস্য গতা বশম্ ।। ৫.২৪.৪৯।।