সর্গ 21

21.1

ইত্যুক্ত্বা মৈথিলীং রাজা রাবণঃ শত্রুরাবণঃ ।
সন্দিশ্য চ ততঃ সর্বা রাক্ষসীর্নির্জগাম হ ।। ৫.২১.১।।।।

নিষ্ক্রান্তে রাক্ষসেন্দ্রে তু পুনরন্তঃপুরং গতে ।
রাক্ষস্যো ভীমরূপাস্তাঃ সীতাং সমভিদুদ্রুবুঃ ।। ৫.২১.২।।।।

ততঃ সীতামুপাগম্য রাক্ষস্যঃ ক্রোধমূর্ছিতাঃ ।
পরং পরুষয়া বাচা বৈদেহীম্ ইদমব্রুবন্ ।। ৫.২১.৩।।।।

পৌলস্ত্যস্য বরিষ্ঠস্য রাবণস্য মহাত্মনঃ ।
দশগ্রীবস্য ভার্যাত্বং সীতে ন বহু মন্যসে ।। ৫.২১.৪।।।।

ততস্ত্বেকজটা নাম রাক্ষসী বাক্যমব্রবীৎ ।
আমন্ত্র্য ক্রোধতাম্রাক্ষী সীতাং করতলোদরীম্ ।। ৫.২১.৫।।।।

প্রজাপতীনাং ষণ্ণাং তু চতুর্থো যঃ প্রজাপতিঃ ।
মানসো ব্রহ্মণঃ পুত্রঃ পুলস্ত্য ইতি বিশ্রুতঃ ।। ৫.২১.৬।।।।

পুলস্ত্যস্য তু তেজস্বী মহর্ষির্মানসঃ সুতঃ ।
নাম্না স বিশ্রবা নাম প্রজাপতিসমপ্রভঃ ।। ৫.২১.৭।।।।

তস্য পুত্রো বিশালাক্ষি রাবণঃ শত্রুরাবণঃ ।
তস্য ত্বং রাক্ষসেন্দ্রস্য ভার্যা ভবিতুমর্হসি ।ময়োক্তং চারুসর্বাঙ্গি বাক্যং কিং নানুমন্যসে ।। ৫.২১.৮।।।।

ততো হরিজটা নাম রাক্ষসী বাক্যমব্রবীৎ ।
বিবৃত্য নয়নে কোপান্মার্জারসদৃশেক্ষণা ।। ৫.২১.৯।।।।

যেন দেবাস্ত্রয়স্ত্রিংশদ্দেবরাজশ্চ নির্জিতঃ ।
তস্য ত্বং রাক্ষসেন্দ্রস্য ভার্যা ভবিতুমর্হসি ।। ৫.২১.১০।।।।

বীর্যোত্সিক্তস্য শূরস্য সঙ্গ্রামেষ্বনিবর্তিনঃ ।
বলিনো বীর্যয়ুক্তস্যা ভার্যাত্বং কিং ন লপ্স্যসে ।। ৫.২১.১১।।।।

প্রিয়াং বহুমতাং ভার্যাং ত্যক্ত্বা রাজা মহাবলঃ ।
সর্বাসাং চ মহাভাগাং ত্বামুপৈষ্যতি রাবণঃ ।। ৫.২১.১২।।।।

সমৃদ্ধং স্ত্রীসহস্রেণ নানারত্নোপশোভিতম্ ।
অন্তঃপুরং সমুত্সৃজ্য ত্বামুপৈষ্যতি রাবণঃ ।। ৫.২১.১৩।।।।

অসকৃদ্দেবতা যুদ্ধে নাগগন্ধর্বদানবাঃ ।
নির্জিতাঃ সমরে যেন স তে পার্শ্বমুপাগতঃ ।। ৫.২১.১৪।।।।

তস্য সর্বসমৃদ্ধস্যা রাবণস্য মহাত্মনঃ ।
কিমর্থং রাক্ষসেন্দ্রস্য ভার্যাত্বং নেচ্ছসেঽধমে ।। ৫.২১.১৫।।।।

যস্য সূর্যো ন তপতি ভীতো যস্য চ মারুতঃ ।
ন বাতি স্মায়তাপাঙ্গে কিং ত্বং তস্য ন তিষ্ঠসি ।। ৫.২১.১৬।।।।

পুষ্পবৃষ্টিং চ তরবো মুমুচুর্যস্য বৈ ভয়াৎ ।
শৈলাশ্চ সুভ্রু পানীয়ং জলদাশ্ চ যদেচ্ছতি ।। ৫.২১.১৭।।।।

তস্য নৈরৃতরাজস্য রাজরাজস্য ভামিনি ।
কিং ত্বং ন কুরুষে বুদ্ধিং ভার্যার্থে রাবণস্য হি ।। ৫.২১.১৮।।।।

সাধু তে তত্ত্বতো দেবি কথিতং সাধু ভামিনি ।
গৃহাণ সুস্মিতে বাক্যমন্যথা ন ভবিষ্যসি ।। ৫.২১.১৯।।