UtshovSarga 21
21.1
इत्युक्त्वा मैथिलीं राजा रावणः शत्रुरावणः ।
सन्दिश्य च ततः सर्वा राक्षसीर्निर्जगाम ह ।। ५.२१.१।।।।
Ityuktva maithilim raja ravanah shatruravanah
Sandishya cha tatah sarva rakshasirnirjagama ha
21.2
निष्क्रान्ते राक्षसेन्द्रे तु पुनरन्तःपुरं गते ।
राक्षस्यो भीमरूपास्ताः सीतां समभिदुद्रुवुः ।। ५.२१.२।।।।
Nishkrante rakshasendre tu punarantahpuram gate
Rakshasyo bhimarupastah sitam samabhidudruvuh
21.3
ततः सीतामुपागम्य राक्षस्यः क्रोधमूर्छिताः ।
परं परुषया वाचा वैदेहीम् इदमब्रुवन् ।। ५.२१.३।।।।
Tatah sitamupagamya rakshasyah krodhamurchhitah
Param parushaya vacha vaidehim idamabruvan
21.4
पौलस्त्यस्य वरिष्ठस्य रावणस्य महात्मनः ।
दशग्रीवस्य भार्यात्वं सीते न बहु मन्यसे ।। ५.२१.४।।।।
Paulastyasya varishthasya ravanasya mahatmanah
Dashagrivasya bharyatvam site na bahu manyase
21.5
ततस्त्वेकजटा नाम राक्षसी वाक्यमब्रवीत् ।
आमन्त्र्य क्रोधताम्राक्षी सीतां करतलोदरीम् ।। ५.२१.५।।।।
Tatastvekajata nama rakshasi vakyamabravit
Amantrya krodhatamrakshi sitam karatalodarim
21.6
प्रजापतीनां षण्णां तु चतुर्थो यः प्रजापतिः ।
मानसो ब्रह्मणः पुत्रः पुलस्त्य इति विश्रुतः ।। ५.२१.६।।।।
Prajapatinam shannam tu chaturtho yah prajapatih
Manaso brahmanah putrah pulastya iti vishrutah
21.7
पुलस्त्यस्य तु तेजस्वी महर्षिर्मानसः सुतः ।
नाम्ना स विश्रवा नाम प्रजापतिसमप्रभः ।। ५.२१.७।।।।
Pulastyasya tu tejasvi maharshirmanasah sutah
Namna sa vishrava nama prajapatisamaprabhah
21.8
तस्य पुत्रो विशालाक्षि रावणः शत्रुरावणः ।
तस्य त्वं राक्षसेन्द्रस्य भार्या भवितुमर्हसि ।मयोक्तं चारुसर्वाङ्गि वाक्यं किं नानुमन्यसे ।। ५.२१.८।।।।
Tasya putro vishalakshi ravanah shatruravanah
Tasya tvam rakshasendrasya bharya bhavitumarhasi, mayoktam charusarvangi vakyam kim nanumanyase
21.9
ततो हरिजटा नाम राक्षसी वाक्यमब्रवीत् ।
विवृत्य नयने कोपान्मार्जारसदृशेक्षणा ।। ५.२१.९।।।।
Tato harijata nama rakshasi vakyamabravit
Vivritya nayane kopanmarjarasadrishekshana
21.10
येन देवास्त्रयस्त्रिंशद्देवराजश्च निर्जितः ।
तस्य त्वं राक्षसेन्द्रस्य भार्या भवितुमर्हसि ।। ५.२१.१०।।।।
Yena devastrayastrinshaddevarajashcha nirjitah
Tasya tvam rakshasendrasya bharya bhavitumarhasi
21.11
वीर्योत्सिक्तस्य शूरस्य सङ्ग्रामेष्वनिवर्तिनः ।
बलिनो वीर्ययुक्तस्या भार्यात्वं किं न लप्स्यसे ।। ५.२१.११।।।।
Viryotsiktasya shurasya sangrameshvanivartinah
Balino viryayuktasya bharyatvam kim na lapsyase
21.12
प्रियां बहुमतां भार्यां त्यक्त्वा राजा महाबलः ।
सर्वासां च महाभागां त्वामुपैष्यति रावणः ।। ५.२१.१२।।।।
Priyam bahumatam bharyam tyaktva raja mahabalah
Sarvasam cha mahabhagam tvamupaishyati ravanah
21.13
समृद्धं स्त्रीसहस्रेण नानारत्नोपशोभितम् ।
अन्तःपुरं समुत्सृज्य त्वामुपैष्यति रावणः ।। ५.२१.१३।।।।
Samriddham strisahasrena nanaratnopashobhitam
Antahpuram samutsrijya tvamupaishyati ravanah
21.14
असकृद्देवता युद्धे नागगन्धर्वदानवाः ।
निर्जिताः समरे येन स ते पार्श्वमुपागतः ।। ५.२१.१४।।।।
Asakriddevata yuddhe nagagandharvadanavah
Nirjitah samare yena sa te parshvamupagatah
21.15
तस्य सर्वसमृद्धस्या रावणस्य महात्मनः ।
किमर्थं राक्षसेन्द्रस्य भार्यात्वं नेच्छसेऽधमे ।। ५.२१.१५।।।।
Tasya sarvasamriddhasya ravanasya mahatmanah
Kimartham rakshasendrasya bharyatvam nechchhasedhame
21.16
यस्य सूर्यो न तपति भीतो यस्य च मारुतः ।
न वाति स्मायतापाङ्गे किं त्वं तस्य न तिष्ठसि ।। ५.२१.१६।।।।
Yasya suryo na tapati bhito yasya cha marutah
Na vati smayatapange kim tvam tasya na tishthasi
21.17
पुष्पवृष्टिं च तरवो मुमुचुर्यस्य वै भयात् ।
शैलाश्च सुभ्रु पानीयं जलदाश् च यदेच्छति ।। ५.२१.१७।।।।
Pushpavrishtim cha taravo mumuchuryasya vai bhayat
Shailashcha subhru paniyam jaladash cha yadechchhati
21.18
तस्य नैरृतराजस्य राजराजस्य भामिनि ।
किं त्वं न कुरुषे बुद्धिं भार्यार्थे रावणस्य हि ।। ५.२१.१८।।।।
Tasya nairritarajasya rajarajasya bhamini
Kim tvam na kurushe buddhim bharyarthe ravanasya hi
21.19
साधु ते तत्त्वतो देवि कथितं साधु भामिनि ।
गृहाण सुस्मिते वाक्यमन्यथा न भविष्यसि ।। ५.२१.१९।।
Sadhu te tattvato devi kathitam sadhu bhamini
Grihana susmite vakyamanyatha na bhavishyasi