Utshovসর্গ 19
19.1
তস্য তদ্বচনং শ্রুত্বা সীতা রৌদ্রস্য রক্ষসঃ ।
আর্তা দীনস্বরা দীনং প্রত্যুবাচ শনৈর্বচঃ ।। ৫.১৯.১।।।।
19.2
দুঃখার্তা রুদতী সীতা বেপমানা তপস্বিনী ।
চিন্তয়ন্তী বরারোহা পতিমেব পতিব্রতা ।। ৫.১৯.২।।।।
19.3
তৃণমন্তরতঃ কৃত্বা প্রত্যুবাচ শুচিস্মিতা ।
নিবর্তয় মনো মত্তঃ স্বজনে ক্রিয়তাং মনঃ ।। ৫.১৯.৩।।।।
19.4
ন মাং প্রার্থয়িতুং যুক্তস্ত্বং সিদ্ধিমিব পাপকৃৎ ।
অকার্যং ন ময়া কার্যমেকপত্ন্যা বিগর্হিতম্ ।কুলং সম্প্রাপ্তয়া পুণ্যং কুলে মহতি জাতয়া ।।৫.১৯.৪।।।।
19.5
এবমুক্ত্বা তু বৈদেহী রাবণং তং যশস্বিনী ।
রাক্ষসং পৃষ্ঠতঃ কৃত্বা ভূয়ো বচনমব্রবীৎ ।। ৫.১৯.৫।।।।
19.6
নাহমৌপয়িকী ভার্যা পরভার্যা সতী তব ।
সাধু ধর্মমবেক্ষস্ব সাধু সাধুব্রতং চর ।। ৫.১৯.৬।।।।
19.7
যথা তব তথান্যেষাং রক্ষ্যা দারা নিশাচর ।
আত্মানমুপমাং কৃত্বা স্বেষু দারেষু রম্যতাম্ ।। ৫.১৯.৭।।।।
19.8
অতুষ্টং স্বেষু দারেষু চপলং চলিতেন্দ্রিয়ম্ ।
নয়ন্তি নিকৃতিপ্রজ্ঞাং পরদারাঃ পরাভবম্ ।। ৫.১৯.৮।।।।
19.9
ইহ সন্তো ন বা সন্তি সতো বা নানুবর্তসে ।
বচো মিথ্যা প্রণীতাত্মা পথ্যমুক্তং বিচক্ষণৈঃ ।। ৫.১৯.৯।।।।
19.10
অকৃতাত্মানমাসাদ্য রাজানমনয়ে রতম্ ।
সমৃদ্ধানি বিনশ্যন্তি রাষ্ট্রাণি নগরাণি চ ।। ৫.১৯.১০।।।।
19.11
তথেয়ং ত্বাং সমাসাদ্য লঙ্কা রত্নৌঘ সঙ্কুলা ।
অপরাধাত্তবৈকস্য নচিরাদ্বিনশিষ্যতি ।। ৫.১৯.১১।।।।
19.12
স্বকৃতৈর্হন্যমানস্য রাবণাদীর্ঘদর্শিনঃ ।
অভিনন্দন্তি ভূতানি বিনাশে পাপকর্মণঃ ।। ৫.১৯.১২।।।।
19.13
এবং ত্বাং পাপকর্মাণং বক্ষ্যন্তি নিকৃতা জনাঃ ।
দিষ্ট্যৈতদ্ব্যসনং প্রাপ্তো রৌদ্র ইত্যেব হর্ষিতাঃ ।। ৫.১৯.১৩।।।।
19.14
শক্যা লোভয়িতুং নাহমৈশ্বর্যেণ ধনেন বা ।
অনন্যা রাঘবেণাহং ভাস্করেণ প্রভা যথা ।। ৫.১৯.১৪।।।।
19.15
উপধায় ভুজং তস্য লোকনাথস্য সত্কৃতম্ ।
কথং নামোপধাস্যামি ভুজমন্যস্য কস্য চিৎ ।। ৫.১৯.১৫।।।।
19.16
অহমৌপয়িকী ভার্যা তস্যৈব বসুধাপতেঃ ।
ব্রতস্নাতস্য বিপ্রস্য বিদ্যেব বিদিতাত্মনঃ ।। ৫.১৯.১৬।।।।
19.17
সাধু রাবণ রামেণ মাং সমানয় দুঃখিতাম্ ।
বনে বাশিতয়া সার্ধং করেণ্বেব গজাধিপম্ ।। ৫.১৯.১৭।।।।
19.18
মিত্রমৌপয়িকং কর্তুং রামঃ স্থানং পরীপ্সতা ।
বধং চানিচ্ছতা ঘোরং ত্বয়াসৌ পুরুষর্ষভঃ ।। ৫.১৯.১৮।।।।
19.19
বর্জয়েদ্বজ্রমুত্সৃষ্টং বর্জয়েদন্তকশ্ চিরম্ ।
ত্বদ্বিধং ন তু সঙ্ক্রুদ্ধো লোকনাথঃ স রাঘবঃ ।। ৫.১৯.১৯।।।।
19.20
রামস্য ধনুষঃ শব্দং শ্রোষ্যসি ত্বং মহাস্বনম্ ।
শতক্রতুবিসৃষ্টস্য নির্ঘোষমশনেরিব ।। ৫.১৯.২০।।।।
19.21
ইহ শীঘ্রং সুপর্বাণো জ্বলিতাস্যা ইবোরগাঃ ।
ইষবো নিপতিষ্যন্তি রামলক্ষ্মণলক্ষণাঃ ।। ৫.১৯.২১।।।।
19.22
রক্ষাংসি পরিনিঘ্নন্তঃ পুর্যামস্যাং সমন্ততঃ ।
অসম্পাতং করিষ্যন্তি পতন্তঃ কঙ্কবাসসঃ ।। ৫.১৯.২২।।।।
19.23
রাক্ষসেন্দ্রমহাসর্পান্স রামগরুডো মহান্ ।
উদ্ধরিষ্যতি বেগেন বৈনতেয় ইবোরগান্ ।। ৫.১৯.২৩।।।।
19.24
অপনেষ্যতি মাং ভর্তা ত্বত্তঃ শীঘ্রমরিন্দমঃ ।
অসুরেভ্যঃ শ্রিয়ং দীপ্তাং বিষ্ণুস্ত্রিভিরিব ক্রমৈঃ ।। ৫.১৯.২৪।।।।
19.25
জনস্থানে হতস্থানে নিহতে রক্ষসাং বলে ।
অশক্তেন ত্বয়া রক্ষঃ কৃতমেতদসাধু বৈ ।। ৫.১৯.২৫।।।।
19.26
আশ্রমং তু তয়োঃ শূন্যং প্রবিশ্য নরসিংহয়োঃ ।
গোচরং গতয়োর্ভ্রাত্রোরপনীতা ত্বয়াধম ।। ৫.১৯.২৬।।।।
19.27
ন হি গন্ধমুপাঘ্রায় রামলক্ষ্মণয়োস্ত্বয়া ।
শক্যং সন্দর্শনে স্থাতুং শুনা শার্দূলয়োরিব ।। ৫.১৯.২৭।।।।
19.28
তস্য তে বিগ্রহে তাভ্যাং যুগগ্রহণমস্থিরম্ ।
বৃত্রস্যেবেন্দ্রবাহুভ্যাং বাহোরেকস্য নিগ্রহঃ ।। ৫.১৯.২৮।।।।
19.29
ক্ষিপ্রং তব স নাথো মে রামঃ সৌমিত্রিণা সহ ।
তোয়মল্পমিবাদিত্যঃ প্রাণানাদাস্যতে শরৈঃ ।। ৫.১৯.২৯।।