Utshovসর্গ 18
18.1
তথা বিপ্রেক্ষমাণস্য বনম্ পুষ্পিতপাদপম্ ।
বিচিন্বতশ্চ বৈদেহীম্ কিংচিচ্চেষা নিশাভবৎ ।। ৫-১৮-১।।
18.2
ষডঙ্গবেদবিদুষাম্ ক্রতুপ্রবরয়াজিনাম্ ।
শুশ্রাব ব্রহ্মঘোষান্ স বিরাত্রে ব্রহ্মরক্ষসাম্ ।। ৫-১৮-২।।
18.3
অথ মঙ্গলবাদিত্রশব্দৈঃ শ্রুতিমনোহরৈঃ ।
প্রবুধ্যত মহাবাহুর্দশগ্রীবো মহাবলঃ ।। ৫-১৮-৩।।
18.4
বিবুধ্য তু যথাকালম্ রাক্ষসেন্দ্রঃ প্রতাপবান্ ।
স্রস্তমাল্যাম্বরধরো বৈদেহীমন্বচিন্তয়াৎ ।। ৫-১৮-৪।।
18.5
ভৃশং নিয়ুক্তস্তস্যাম্ চ মদনেন মদোত্কটঃ ।
ন স তং রাক্ষসঃ কামং শশাকাত্মনি গূহিতুম্ ।। ৫-১৮-৫।।
18.6
স সর্বাভরণৈর্যুক্তো বিভচ্ছ্রিয়মনুত্তমাম্ ।
তাং নগৈর্বহুভির্জুষ্টাম্ সর্বপুষ্পফলোপগৈঃ ।। ৫-১৮-৬।।
18.7
বৃতাং পুষ্করিণীভিশ্চ নানাপুষ্পোপশোভিতাম্ ।
সদামদৈশ্চ বিহগৈর্বিচিত্রাম্ পরমাদ্ভুতাম্ ।। ৫-১৮-৭।।
18.8
ঈহামৃগৈশ্চ বিবিধৈর্জুষ্টাং ডৃষ্টিমনোহরৈঃ ।
বীথীঃ সংপ্রেক্ষমাণশ্চ মণিকাঞ্চনতোরণাঃ ।। ৫-১৮-৮।।
18.9
নানামৃগগণাকীর্ণাং ফলৈঃ প্রপতিতৈর্বৃতাম্ ।
অশোকবনকামেব প্রাবিশত্সংততদ্রুমাম্ ।। ৫-১৮-৯।।
18.10
অঙ্গনাশতমাত্রং তু তং ব্রজন্তমনুব্রজৎ ।
মহেন্দ্রমিব পৌলস্ত্যম্ং দেবগন্ধর্বয়োষিতঃ ।। ৫-১৮-১০।।
18.11
দীপিকাঃ কাঞ্চনীঃ কাশ্চিজ্জগৃহুস্তত্র যোষিতঃ ।
বালব্যজনহস্তাশ্চ তালবৃন্তানি চাপরাঃ ।। ৫-১৮-১১।।
18.12
কাঞ্চনৈরপি ভৃঙ্গারৈর্জহ্রুঃ সলিলমগ্রতঃ ।
মণ্ডলাগান্ ব্রুসীংশ্চাপি গৃহ্যান্যাঃ পৃষ্ঠতো যয়ুঃ ।। ৫-১৮-১২।।
18.13
কাচিদ্রত্নময়ীং স্থালীং পূর্ণাং পানস্য ব্রাজতম্ ।
দক্ষিণা দক্ষিণেনৈব তদা জগ্রাহ পাণিনা ।। ৫-১৮-১৩।।
18.14
রাজহংসপ্রতীকাশং চত্রং পূর্ণশশিপ্রভম্ ।
সৌবর্ণদণ্ডমপরা গৃহীত্বা পৃষ্ঠতো যয়ৌ ।। ৫-১৮-১৪।।
18.15
নিদ্রামদপরীতাক্ষ্যো রাবনস্যোত্তমাঃ স্ত্রিয়ঃ ।
অনুজগ্মুঃ পতিং বীরম্ ঘনম্ বিদ্যুল্লতা ইব ।। ৫-১৮-১৫।।
18.16
ব্যাবিদ্ধহারকেয়ূরাঃ সমামৃদিতবর্ণকাঃ ।
সমাগলিতকেশান্তাঃ সস্বেদবদনাস্তথা ।। ৫-১৮-১৬।।
18.17
ঘোর্ণন্ত্যো মদশেষেণ নিদ্রয়া চ শুভাননাঃ ।
স্বেদক্লিষ্টাঙ্গকুসুমাঃ সুমাল্যাকুলমূর্ধজাঃ ।। ৫-১৮-১৭।।
18.18
প্রয়ান্তং নৈরৃতপতিং নার্যো মদিরলোচনাঃ ।
বহুমানাচ্চ কামাচ্চ প্রিয়া ভার্যাস্তমন্বয়ুঃ ।। ৫-১৮-১৮।।
18.19
স চ কামপরাধীনঃ পতিস্তাসাং মহাবলঃ ।
সীতাসক্তমনা মন্দো মন্দাঞ্চিতগতির্বভৌ ।। ৫-১৮-১৯।।
18.20
ততঃ কাঞ্চীনিনাদং চ নূপুরাণাম্ চ নিস্বনম্ ।
শুশ্রাব পরমস্ত্রীণাং স কপির্মারুতাত্মজঃ ।। ৫-১৮-২০।।
18.21
তং চাপ্রতিমকর্মাণমচিন্ত্যবলপৌরুষম্ ।
দ্বারদেশমনুপ্রাপ্তং দদর্শ হনুমান্ কপিঃ ।। ৫-১৮-২১।।
18.22
দীপিকাভিরনেকাভিঃ সমন্তাদবভাসিতম্ ।
গন্ধতৈলাবসিক্তাভির্দ্রিয়মাণাভিরগ্রতঃ ।। ৫-১৮-২২।।
18.23
কামদর্পমদৈর্যুক্তং জিহ্মতাম্রায়তেক্ষণম্ ।
সমক্ষমিব কন্দর্পমপবিদ্ধশরাসনম্ ।। ৫-১৮-২৩।।
18.24
মথিতামৃতফেনাভমরজোবস্ত্রমুত্তমম্ ।
সলীলমনুকর্ষন্তং বিমুক্তং সক্তমঙ্গদে ।। ৫-১৮-২৪।।
18.25
তং পত্রবিটপে লীনঃ অত্রপুষ্পঘনাবৃতহ্ ।
সমীপমিব সংক্রান্তং নিধ্যাতুমুপচক্রমে ।। ৫-১৮-২৫।।
18.26
অবেক্ষমাণস্তু ততো দদর্শ কপিকুঞ্জরঃ ।
রূপয়ৌবনসংপন্না রাবণস্য বরস্তিয়ঃ ।। ৫-১৮-২৬।।
18.27
তাভিঃ পরিবৃতো রাজা সুরূপাভির্মহায়শাঃ ।
তস্মৃগদ্বিজসম্ঘষ্টং প্রবিষ্টঃ প্রমদাবনম্ ।। ৫-১৮-২৭।।
18.28
ক্ষীবো বিচিত্রাভরণঃ শঙ্কুকর্ণো মহাবলঃ ।
তেন বিশ্রবসঃ পুত্রঃ স দৃষ্টো রাক্ষসাধিপঃ ।। ৫-১৮-২৮।।
18.29
বৃতঃ পরমনারীভিস্তারাভিরিব চন্দ্রামাঃ ।
তং দদর্শ মহাতেজাস্তেজোবন্তং মহাকপিঃ ।। ৫-১৮-২৯।।
18.30
রাবণোঽয়ম্ মহাবাহুরিতি সংচিন্ত্য বানরঃ ।
অবপ্লুতো মহাতেজা হনুমান্মারুতাত্মজঃ ।। ৫-১৮-৩০।।
18.31
স তথাপ্যুগ্রতেজাঃ সন্নির্ধূতস্তস্য তেজসা ।
পত্রগুহ্যান্তরে সক্তো হনুমান্ সংবৃতোঽভবৎ ।। ৫-১৮-৩১।।
18.32
স তামসিতকেশান্তাং সুশ্রোণীং সংহতস্তনীম্ ।
দিদৃক্ষুরসিতাপাঙ্গমুপাবর্তত রাবণঃ ।। ৫-১৮-৩২