সর্গ 51

51.1

ইতি উক্ত্বা হনুমান্ তত্র পুনঃ কৃষ্ণ অজিন অংবরাম্ ।
অব্রবীৎ তাম্ মহাভাগাম্ তাপসীম্ ধর্ম চারিণীম্ ॥৪-৫১-১॥

ইদম্ প্রবিষ্টাঃ সহসা বিলম্ তিমির সংবৃতম্ ।
ক্ষুৎ পিপাসা পরিশ্রাংতাঃ পরিখিন্নাঃ চ সর্বশঃ ॥৪-৫১-২॥

মহৎ ধরণ্যা বিবরম্ প্রবিষ্টাঃ স্ম পিপাসিতাঃ ।
ইমাম্ তু এবম্ বিধান্ ভাবান্ বিবিধান্ অদ্ভুত উপমান্ ॥৪-৫১-৩॥

দৃষ্ট্বা বয়ম্ প্রব্যথিতাঃ সংভ্রাংতা নষ্ট চেতসঃ ।
কস্য এতে কাংচনা বৃক্ষাঃ তরুণ আদিত্য সন্নিভাঃ ॥৪-৫১-৪॥

শুচীনি অভ্যবহার্যাণি মূলানি চ ফলানি চ ।
কাংচনানি বিমানানি রাজতানি গৃহাণি চ ॥৪-৫১-৫॥

তপনীয় গব অক্ষাণি মণি জাল আবৃতানি চ ।
পুষ্পিতাঃ ফালবন্তঃ চ পুণ্যাঃ সুরভি গন্ধয়ঃ ॥৪-৫১-৬॥

ইমে জাংবূনদময়াঃ পাদপাঃ কস্য তেজসা ।
কাংচনানি চ পদ্মানি জাতানি বিমলে জলে ॥৪-৫১-৭॥

কথম্ মত্স্যাঃ চ সৌবর্ণা দৃশ্যন্তে সহ কচ্ছপৈঃ ।
আত্মানঃ অনুভাবাৎ বা কস্য বৈ এতৎ তপো বলম্ ॥৪-৫১-৮॥

অজানতাম্ নঃ সর্বেষাম্ সর্বম্ আখ্যাতুম্ অর্হসি ।
এবম্ উক্তা হনুমতা তাপসী ধর্ম চারিণী ॥৪-৫১-৯॥

প্রতি উবাচ হনূমংতম্ সর্ব ভূত হিতে রতা ।
ময়ো নাম মহাতেজা মায়াবী দানবর্ষভঃ ॥৪-৫১-১০॥

তেন ইদম্ নির্মিতম্ সর্বম্ মায়য়া কাংচনম্ বনম্ ।
পুরা দানব মুখ্যানাম্ বিশ্বকর্মা বভূব হ ॥৪-৫১-১১॥

যেন ইদম্ কাংচনম্ দিব্যম্ নির্মিতম্ ভবন উত্তমম্ ।
স তু বর্ষ সহস্রাণি তপঃ তপ্ত্বা মহৎ বনে ॥৪-৫১-১২॥

পিতামহাৎ বরম্ লেভে সর্বম্ ঔশসনম্ ধনম্ ।
বিধায় সর্বম্ বলবান্ সর্ব কাম ঈশ্বরঃ তদা ॥৪-৫১-১৩॥

উবাস সুখিতঃ কালম্ কংচিৎ অস্মিন্ মহাবনে ।
তম্ অপ্সরসি হেমায়াম্ সক্তম্ দানব পুংগবম্ ॥৪-৫১-১৪॥

বিক্রম্য এব অশনিম্ গৃহ্য জঘান ঈশঃ পুরংদরঃ ।
ইদম্ চ ব্রহ্মণা দত্তম্ হেমায়ৈ বনম্ উত্তমম্ ॥৪-৫১-১৫॥

শাশ্বতঃ কাম ভোগঃ চ গৃহম্ চ ইদম্ হিরণ্ময়ম্ ।
দুহিতা মেরুসাবর্ণেঃ অহম্ তস্যাঃ স্বয়ংপ্রভা ॥৪-৫১-১৬॥

ইদম্ রক্ষামি ভবনম্ হেমায়া বানরোত্তম ।
মম প্রিয় সখী হেমা নৃত্ত গীত বিশারদা ॥৪-৫১-১৭॥

তয়া দত্ত বরা চ অস্মি রক্ষামি ভবনম্ মহান্ ।
কিম্ কার্যম্ কস্য বা হেতোঃ কাংতারাণি প্রপদ্যথ ॥৪-৫১-১৮॥

কথম্ চ ইদম্ বনম্ দুর্গম্ যুষ্মাভিঃ উপলক্ষিতম্ ।
শুচীনি অভ্যবহার্যাণি মূলানি চ ফলানি চ ।ভুক্ত্বা পীত্বা চ পানীয়ম্ সর্বম্ মে বক্তুম্ অর্হথ ॥৪-৫১-১৯॥