সর্গ 34

34.1

তম্ অপ্রতিহতম্ ক্রুদ্ধম্ প্রবিষ্টম্ পুরুষর্ষভম্ ।
সুগ্রীবো লক্ষ্মণম্ দৃষ্ট্বা বভূব ব্যথিত ইন্দ্রিয়ঃ ॥৪-৩৪-১॥

ক্রুদ্ধম্ নিঃশ্বসমানম্ তম্ প্রদীপ্তম্ ইব তেজসা ।
ভ্রাতুর্ ব্যসন সংতপ্তম্ দৃষ্ট্বা দশরথ আত্মজম্ ॥৪-৩৪-২॥

উত্পপাত হরিশ্রেষ্ঠো হিত্বা সৌবর্ণম্ আসনম্ ।
মহান্ মহেন্দ্রস্য যথা স্বলংকৃত ইব ধ্বজঃ ॥৪-৩৪-৩॥

উত্পতংতম্ অনূত্পেতূ রুমা প্রভৃতয়ঃ স্ত্রিয়ঃ ।
সুগ্রীবম্ গগনে পূর্ণম্ চংদ্রম্ তারা গণা ইব ॥৪-৩৪-৪॥

সংরক্ত নয়নঃ শ্রীমান্ সংচচার কৃতাংজলিঃ ।
বভূব অবস্থিতঃ তত্র কল্প বৃক্ষো মহান্ ইব ॥৪-৩৪-৫॥

রুমা দ্বিতীয়ম্ সুগ্রীবম্ নারী মধ্য গতম্ স্থিতম্ ।
অব্রবীৎ লক্ষ্মণঃ ক্রুদ্ধঃ স তারম্ শশিনম্ যথা ॥৪-৩৪-৬॥

সত্ত্ব অভিজন সংপন্নঃ স অনুক্রোশো জিতেন্দ্রিয়ঃ ।
কৃতজ্ঞঃ সত্য বাদী চ রাজা লোকে মহীয়তে ॥৪-৩৪-৭॥

যস্তু রাজা স্থিতো অধর্মে মিত্রাণাম্ উপকারিণাম্ ।
মিথ্যা প্রতিজ্ঞাম্ কুরুতে কো নৃশংস তরঃ ততঃ ॥৪-৩৪-৮॥

শতম্ অশ্ব অনৃতে হন্তি সহস্রম্ তু গব অনৃতে ।
আত্মানম্ স্ব জনম্ হন্তি পুরুষঃ পুরুষ অনৃতে ॥৪-৩৪-৯॥

পূর্বম্ কৃতার্থো মিত্রাণাম্ ন তৎ প্রতি করোতি যঃ ।
কৃতঘ্নঃ সর্ব ভূতানাম্ স বধ্যঃ প্লবগেশ্বর ॥৪-৩৪-১০॥

গীতো অয়ম্ ব্রহ্মণা শ্লোকঃ সর্ব লোক নমস্কৃতঃ ।
দৃষ্ট্বা কৃতঘ্নম্ ক্রুদ্ধেন তম্ নিবোধ প্লবম্গম ॥৪-৩৪-১১॥

গো ঘ্নে চ এব সুরাপে চ চৌরে ভগ্ন ব্রতে তথা ।
নিষ্কৃতির্ বিহিতা সদ্ভিঃ কৃতঘ্নে ন অস্তি নিষ্কৃতিঃ ॥৪-৩৪-১২॥

অনার্য ত্বম্ কৃতঘ্নঃ চ মিথ্যা বাদী চ বানর ।
পূর্বম্ কৃতার্থো রামস্য ন তৎ প্রতিকরোষি যৎ ॥৪-৩৪-১৩॥

ননু নাম কৃতার্থেন ত্বয়া রামস্য বানর ।
সীতায়া মার্গণে যত্নঃ কর্তব্যঃ কৃতম্ ইচ্ছতা ॥৪-৩৪-১৪॥

স ত্বম্ গ্রাম্যেষু ভোগেষু সক্তো মিথ্যা প্রতিশ্রবঃ ।
ন ত্বাম্ রামো বিজানীতে সর্পম্ মণ্ডূক রাবিণম্ ॥৪-৩৪-১৫॥

মহাভাগেন রামেণ পাপঃ করুণ বেদিনা ।
হরীণাম্ প্রাপিতো রাজ্যম্ ত্বম্ দুরাত্মা মহাত্মনা ॥৪-৩৪-১৬॥

কৃতম্ চেৎ ন অভিজানীষে রাঘবস্য মহাত্মনঃ ।
সদ্যঃ ত্বম্ নিশিতৈর্ বাণৈর্ হতো দ্রক্ষ্যসি বালিনম্ ॥৪-৩৪-১৭॥

ন চ সংকুচিতঃ পন্থা যেন বালী হতো গতঃ ।
সময়ে তিষ্ঠ সুগ্রীব মা বালি পথম্ অন্বগাঃ ॥৪-৩৪-১৮॥

ন নূনম্ ইক্ষ্বাকু বরস্য কার্মুকাত্শরান্ চ তান্ পশ্যসি বজ্র সংনিভান্ ।
ততঃ সুখম্ নাম বিষেবসে সুখীন রাম কার্যম্ মনসা অপি অবেক্ষসে ॥৪-৩৪-১৯॥