Utshovসর্গ 5
5.1
সন্দিশ্য রামং নৃপতিঃ শ্বোভাবিন্যভিষেচনে ।
পুরোহিতং সমাহূয় বসিষ্ঠমিদমব্রবীৎ ॥২-৫-১॥
5.2
গচ্ছোপবাসং কাকুত্থ্সং কারয়াদ্য তপোধন ।
শ্রীয়শোরাজ্যলাভায় বধ্বা সহ যতব্রতম্ ॥২-৫-২॥
5.3
তথেতি চ স রাজানমুক্ত্বা বেদবিদাং বরঃ ।
স্বয়ং বসিষ্ঠো ভগবান্ যয়ৌ রামনিবেশনম্ ॥২-৫-৩॥
5.4
উপবাসয়িতুং রামং মন্ত্রবন্মন্ত্রকোবিদঃ ।
ব্রাহ্মং রথবরং যুক্তমাস্থায় সুদৃধব্রতঃ ॥২-৫-৪॥
5.5
স রামভবনং প্রপ্য পাণ্ডুরাভ্রঘনপ্রভম্ ।
তিস্রঃ কক্ষ্যা র্থেনৈব বিবেশ মুনিসত্তমঃ ॥২-৫-৫॥
5.6
তমাগতমৃষিং রামস্ত্বরন্নিব সসংভ্রমঃ ।
মানয়িষ্যন্ স মানার্হং নিশ্চক্রাম নিবেশনাৎ ॥২-৫-৬॥
5.7
অভ্যেত্য ত্বরমাণশ্চ রথাভ্যাশং মনীষিণঃ ।
ততোঽবতারয়ামাস পরিগৃহ্য রথাত্স্বয়ম্ ॥২-৫-৭॥
5.8
সচৈনং প্রশ্রিতং দৃষ্ট্বা সং ভাষ্যাভিপ্রসাদ্য চ ।
প্রিয়ার্হং হর্ষয়ন্ রামমিত্যুবাচ পুরোহিতঃ ॥২-৫-৮॥
5.9
প্রসন্নস্তে পিতা রাম যৌবরাজ্যমবাপ্স্যসি ।
উপবাসং ভবানদ্য করোতু সহ সীতয়া ॥২-৫-৯॥
5.10
প্রাতস্ত্বামভিষেক্তা হি যৌবরাজ্যে নরাধিপঃ ।
পিতা দশরথঃ প্রীত্যা যয়াতিং নহুষো যথা ॥২-৫-১০॥
5.11
ইত্যুক্ত্বা স তদা রাম মুপবাসং যতব্রতম্ ।
মন্ত্রবৎ কারয়ামাস বৈদেহ্যা সহিতং মুনিঃ ॥২-৫-১১॥
5.12
ততো যথাবদ্রামেণ স রাজ্ঞো গুরুরর্চিতঃ ।
অভ্যনুজ্ঞাপ্য কাকুত্থ্সং যয়ৌ রামনিবেশনাৎ ॥২-৫-১২॥
5.13
সুহৃদ্ভিস্তত্র রামোঽপি সহাসীনঃ প্রিয়ংবদৈঃ ।
সভাজিতো বিবেশাথ তাননুজ্ঞাপ্য সর্বশঃ ॥২-৫-১৩॥
5.14
হৃষ্টনারীনরয়ুতং রামবেশ্ম তদা ববৌ ।
যথা মত্তদ্বিজগণং প্রপুল্লনলিনং সরঃ ॥২-৫-১৪॥
5.15
স রাজভবনপ্রখ্যাত্তস্মাদ্রামনিবেশনাৎ ।
নির্গত্য দদৃশে মার্গং বসিষ্ঠো জনসংবৃতম্ ॥২-৫-১৫॥
5.16
বৃন্দবৃন্দৈরয়োধ্যায়াং রাজমার্গাঃ সমন্ততঃ ।
বভূবুরভিসংবাধাঃ কুতূহলজনৈর্বৃতাঃ ॥২-৫-১৬॥
5.17
জনবৃন্দোর্মিসংঘর্ষহর্ষস্বনবতস্তদা ।
বভূব রাজমার্গস্য সাগরস্যেব নিস্বনঃ ॥২-৫-১৭॥
5.18
সিক্তসংমৃষ্টরথ্যা হি তদহর্বনমালিনী ।
আসীদয়োধ্যা নগরী সমুচ্ছ্রিতগৃহধ্বজা ॥২-৫-১৮॥
5.19
তদা হ্যয়োধ্যানিলয়ঃ সস্ত্রীবালাবলো জনঃ ।
রামাভিষেকমাকাঞ্ক্ষন্নাকাণ্ক্ষদুদয়ং রবেঃ ॥২-৫-১৯॥
5.20
প্রজালঙ্কারভূতং চ জনস্যানন্দবর্ধনম্ ।
উত্সুকোঽভূজ্জনো দ্রষ্টুং তময়োধ্যামহোত্সবম্ ॥২-৫-২০॥
5.21
এবং তং জনসংবাধং রাজমার্গং পুরোহিতঃ ।
ব্যূহন্নিব জনৌঘং তং শনৈরাজকুলং যয়ৌ ॥২-৫-২১॥
5.22
সিতাভ্রশিখরপ্রখ্যং প্রাসাদমধিরুহ্য সঃ ।
সমীয়ায় নরেন্দ্রেণ শক্রেণেব বৃহস্পতিঃ ॥২-৫-২২॥
5.23
তমাগতমভিপ্রেক্ষ্য হিত্বা রাজাসনং নৃপঃ ।
পপ্রচ্ছ স চ তস্মৈ তত্কৃতমিত্যভ্যবেদয়ৎ ॥২-৫-২৩॥
5.24
তেন চৈব তদা তুল্যং সহাসীনাঃ সভাসদঃ ।
আসনেভ্যঃ সমুত্তস্থুঃ পূজয়ন্তঃ পুরোহিতম্ ॥২-৫-২৪॥
5.25
গুরুণা ত্বভ্যনুজ্ঞাতো মনিজৌঘং বিসৃজ্য তম্ ।
বিবেশান্তঃপুরং রাজা সিংহো গিরিগুহামিব ॥২-৫-২৫॥
5.26
তমগ্র্যবেষ্প্রমদাজনাকুলং ।
মহেন্দ্রবেশ্মপ্রতিমং নিবেশনম্ ।বিদীপয়ংশ্চারু বিবেশ পার্থিবঃ ।শশীব তারাগণসংকুলং নভঃ ॥২-৫-২৬॥