Utshovসর্গ 118
118.1
সা ত্বেবমুক্তা বৈদেহী ত্বনসূয়া ঽনসূয়য়া ।
প্রতিপূজ্য বচো মন্দং প্রবক্তুমুপচক্রমে ॥ ২.১১৮.১॥
118.2
নৈতদাশ্চর্য্যমার্যায়া যন্মাং ত্বমনুভাষসে ।
বিদিতং তু মমাপ্যেতদ্যথা নার্য্যাঃ পতির্গুরুঃ ॥ ২.১১৮.২॥
118.3
যদ্যপ্যেষ ভবেদ্ভর্তা মমার্যে বৃত্তবর্জিতঃ ।
অদ্বৈধমুপচর্তব্যস্তথাপ্যেষ ময়া ভবেৎ ॥ ২.১১৮.৩॥
118.4
কিং পুনর্যো গুণঃ শ্লাঘ্যঃ সানুক্রোশো জিতেন্দ্রিয়ঃ ।
স্থিরানুরাগো ধর্মাত্মা মাতৃবত্পিতৃবত্প্রিয়ঃ ॥ ২.১১৮.৪॥
118.5
যাং বৃত্তিং বর্ত্ততে রামঃ কৌসল্যায়াং মহাবলঃ ।
তামেব নৃপনারীণামন্যাসামপি বর্ত্ততে ॥ ২.১১৮.৫॥
118.6
সকৃদ্দৃষ্টাস্বপি স্ত্রীষু নৃপেণ নৃপবত্সলঃ ।
মাতৃবদ্বর্ত্ততে বীরো মানমুত্সৃজ্য ধর্মবিৎ ॥ ২.১১৮.৬॥
118.7
আগচ্ছন্ত্যাশ্চ বিজনং বনমেবং ভয়াবহম্ ।
সমাহিতং মে শ্বশ্র্বা চ হৃদয়ে তদ্ধৃতং মহৎ ॥ ২.১১৮.৭॥
118.8
পাণিপ্রদানকালে চ যত্পুরা ত্বগ্নিসন্নিধৌ ।
অনুশিষ্টা জনন্যা ঽস্মি বাক্যং তদপি মে ধৃতম্ ॥ ২.১১৮.৮॥
118.9
নবীকৃতং চ তত্সর্বং বাক্যৈস্তে ধর্মচারিণি ।
পতিশুশ্রূষণান্নার্য্যাস্তপো নান্যদ্বিধীয়তে ॥ ২.১১৮.৯॥
118.10
সাবিত্রী পতিশুশ্রূষাং কৃত্বা স্বর্গে মহীয়তে ।
তথাবৃত্তিশ্চ যাতা ত্বং পতিশুশ্রূষয়া দিবম্ ॥ ২.১১৮.১০॥
118.11
বরিষ্ঠা সর্বনারীণামেষা চ দিবি দেবতা ।
রোহিণী ন বিনা চন্দ্রং মুহূর্ত্তমপি দৃশ্যতে ॥ ২.১১৮.১১॥
118.12
এবংবিধাশ্চ প্রবরাঃ স্ত্রিয়ো ভর্তৃদৃঢব্রতাঃ ।
দেবলোকে মহীয়ন্তে পুণ্যেন স্বেন কর্মণা ॥ ২.১১৮.১২॥
118.13
ততো ঽনসূয়া সংহৃষ্টা শ্রুত্বোক্তং সীতয়া বচঃ ।
শিরস্যাঘ্রায় চোবাচ মৈথিলীং হর্ষয়ন্ত্যুত ॥ ২.১১৮.১৩॥
118.14
নিয়মৈর্বিবিধৈরাপ্তং তপো হি মহদস্তি মে ।
তত্সংশ্রিত্য বলং সীতে ছন্দয়ে ত্বাং শুচিস্মিতে ॥ ২.১১৮.১৪॥
118.15
উপপন্নং মনোজ্ঞং চ বচনং তব মৈথিলি ।
প্রীতা চাস্ম্যুচিতং কিং তে করবাণি ব্রবীহি মে ॥ ২.১১৮.১৫॥
118.16
তস্যাস্তদ্বচনং শ্রুত্বা বিস্মিতা মন্দবিস্ময়া ।
কৃতমিত্যব্রবীত্সীতা তপোবলসমন্বিতাম্ ॥ ২.১১৮.১৬॥
118.17
সা ত্বেবমুক্তা ধর্মজ্ঞা তয়া প্রীততরা ঽভবৎ ।
সফলং চ প্রহর্ষং তে হন্ত সীতে করোম্যহম্ ॥ ২.১১৮.১৭॥
118.18
ইদং দিব্যং বরং মাল্যং বস্ত্রমাভরণানি চ ।
অঙ্গরাগং চ বৈদেহি মহার্হং চানুলেপনম্ ॥ ২.১১৮.১৮॥
118.19
ময়া দত্তমিদং সীতে তব গাত্রাণি শোভয়েৎ ।
অনুরূপমসংক্লিষ্টং নিত্যমেব ভবিষ্যতি ॥ ২.১১৮.১৯॥
118.20
অঙ্গরাগেণ দিব্যেন লিপ্তাঙ্গী জনকাত্মজে ।
শোভয়িষ্যসি ভর্ত্তারং যথা শ্রীবিষ্ণুমব্যয়ম্ ॥ ২.১১৮.২০॥
118.21
সা বস্ত্রমঙ্গরাগং চ ভূষণানি স্রজস্তথা ।
মৈথিলী প্রতিজগ্রাহ প্রীতিদানমনুত্তমম্ ॥ ২.১১৮.২১॥
118.22
প্রতিগৃহ্য চ তৎ সীতা প্রীতিদানং যশস্বিনী ।
শ্লিষ্টাঞ্জলিপুটা তত্র সমুপাস্ত তপোধনাম্ ॥ ২.১১৮.২২॥
118.23
তথা সীতাসুপাসীনামনসূয়া দৃঢব্রতা ।
বচনং প্রষ্টুমারেভে কাঞ্চিৎ প্রিয়কথামনু ॥ ২.১১৮.২৩॥
118.24
স্বয়ংবরে কিল প্রাপ্তা ত্বমনেন যশস্বিনা ।
রাঘবেণেতি মে সীতে কথা শ্রুতিমুপাগতা ॥ ২.১১৮.২৪॥
118.25
তাং কথাং শ্রোতুমিচ্ছামি বিস্তরেণ চ মৈথিলি ।
যথানুভূতং কার্ত্স্ন্যেন তন্মে ত্বং বক্তুমর্হসি ॥ ২.১১৮.২৫॥
118.26
এবমুক্তা তু সা সীতা তাং ততো ধর্মচারিণীম্ ।
শ্রূয়তামিতি চোক্ত্বা বৈ কথয়ামাস তাং কথাম্ ॥ ২.১১৮.২৬॥
118.27
মিথিলাধিপতির্বীরো জনকো নাম ধর্মবিৎ ।
ক্ষত্ত্রধর্মে হ্যভিরতো ন্যায়তঃ শাস্তি মেদিনীম্ ॥ ২.১১৮.২৭॥
118.28
তস্য লাঙ্গলহস্তস্য কর্ষতঃ ক্ষেত্রমণ্ডলম্ ।
অহং কিলোত্থিতা ভিত্ত্বা জগতীং নৃপতেঃ সুতা ॥ ২.১১৮.২৮॥
118.29
স মাং দৃষ্ট্বা নরপতির্মুষ্টিবিক্ষেপতত্পরঃ ।
পাংসুকুণ্ঠিতসর্বাঙ্গীং জনকো বিস্মিতো ঽভবৎ ॥ ২.১১৮.২৯॥
118.30
অনপত্যেন চ স্নেহাদঙ্কমারোপ্য চ স্বয়ম্ ।
মমেয়ং তনয়েত্যুক্ত্বা স্নেহো ময়ি নিপাতিতঃ ॥ ২.১১৮.৩০॥
118.31
অন্তরিক্ষে চ বাগুক্তা প্রতি মা ঽমানুষী কিল ।
এবমেতন্নরপতে ধর্মেণ তনয়া তব ॥ ২.১১৮.৩১॥
118.32
ততঃ প্রহৃষ্টো ধর্মাত্মা পিতা মে মিথিলাধিপঃ ।
অবাপ্তো বিপুলামৃদ্ধিং মামবাপ্য নরাধিপঃ ॥ ২.১১৮.৩২॥
118.33
দত্তা চাস্মীষ্টবদ্দেব্যৈ জ্যেষ্ঠায়ৈ পুণ্যকর্মণা ।
তয়া সম্ভাবিতা চাস্মি স্নিগ্ধয়া মাতৃসৌহৃদাৎ ॥ ২.১১৮.৩৩॥
118.34
পতিসংয়োগসুলভং বয়ো দৃষ্ট্বা তু মে পিতা ।
চিন্তামভ্যগমদ্দীনো বিত্তনাশাদিবাধনঃ ॥ ২.১১৮.৩৪॥
118.35
সদৃশাচ্চাপকৃষ্টাচ্চ লোকে কন্যাপিতা জনাৎ ।
প্রধর্ষণমবাপ্নোতি শক্রেণাপি সমো ভুবি ॥ ২.১১৮.৩৫॥
118.36
তাং ধর্ষণামদূরস্থাং দৃষ্ট্বা চাত্মনি পার্থিবঃ ।
চিন্তার্ণবগতঃ পারং নাসসাদাপ্লবো যথা ॥ ২.১১৮.৩৬॥
118.37
অয়োনিজাং হি মাং জ্ঞাত্বা নাধ্যগচ্ছদ্বিচিন্তয়ন্ ।
সদৃশং চানুরূপং চ মহীপালঃ পতিং মম ॥ ২.১১৮.৩৭॥
118.38
তস্য বুদ্ধিরিয়ং জাতা চিন্তয়ানস্য সন্ততম্ ।
স্বয়ং বরং তনূজায়াঃ করিষ্যামীতি ধীমতঃ ॥ ২.১১৮.৩৮॥
118.39
মহায়জ্ঞে তদা তস্য বরুণেন মহাত্মনা ।
দত্তং ধনুর্বরং প্রীত্যা তূণী চাক্ষয়সায়কৌ ॥ ২.১১৮.৩৯॥
118.40
অসঞ্চাল্যং মনুষ্যৈশ্চ যত্নেনাপি চ গৌরবাৎ ।
তন্ন শক্তা নময়িতুং স্বপ্নেষ্বপি নরাধিপাঃ ॥ ২.১১৮.৪০॥
118.41
তদ্ধনুঃ প্রাপ্য মে পিত্রা ব্যাহৃতং সত্যবাদিনা ।
সমবায়ে নরেন্দ্রাণাং পূর্বমামন্ত্র্য পার্থিবান্ ॥ ২.১১৮.৪১॥
118.42
ইদং চ ধনুরুদ্যম্য সজ্যং যঃ কুরুতে নরঃ ।
তস্য মে দুহিতা ভার্যা ভবিষ্যতি ন সংশয়ঃ ॥ ২.১১৮.৪২॥
118.43
তচ্চ দৃষ্ট্বা ধনুঃ শ্রেষ্ঠং গৌরবাদ্গিরিসন্নিভম্ ।
অভিবাদ্য নৃপা জগ্মুরশক্তাস্তস্য তোলনে ॥ ২.১১৮.৪৩॥
118.44
সুদীর্ঘস্য তু কালস্য রাঘবো ঽয়ং মহাদ্যুতিঃ ।
বিশ্বামিত্রেণ সহিতো যজ্ঞং দ্রষ্টুং সমাগতঃ ।লক্ষ্মণেন সহ ভ্রাত্রা রামঃ সত্যপরাক্রমঃ ॥ ২.১১৮.৪৪॥
118.45
বিশ্বামিত্রস্তু ধর্মাত্মা মম পিত্রা সুপূজিতঃ ।
প্রোবাচ পিতরং তত্র ভ্রাতরৌ রামলক্ষ্মণৌ ॥ ২.১১৮.৪৫॥
118.46
সুতৌ দশরথস্যেমৌ ধনুর্দর্শনকাংক্ষিণৌ ।
ধনুর্দর্শয় রামায় রাজপুত্রায় দৈবিকম্ ॥ ২.১১৮.৪৬॥
118.47
ইত্যুক্তস্তেন বিপ্রেণ তদ্ধনুঃ সমুপানয়ৎ ।
নিমেষান্তরমাত্রেণ তদানম্য স বীর্য্যবান্ ॥ ২.১১৮.৪৭॥
118.48
জ্যাং সমারোপ্য ঝটিতি পূরয়ামাস বীর্যবৎ ॥ ২.১১৮.৪৮॥
118.49
তেন পূরয়তা বেগান্মধ্যে ভগ্নং দ্বিধা ধনুঃ ।
তস্য শব্দো ঽভবদ্ভীমঃ পতিতস্যাশনেরিব ॥ ২.১১৮.৪৯॥
118.50
ততো ঽহং তত্র রামায় পিত্রা সত্যাভিসন্ধিনা ।
নিশ্চিতা দাতুমুদ্যম্য জলভাজনমুত্তমম্ ॥ ২.১১৮.৫০॥
118.51
দীয়মানাং ন তু তদা প্রতিজগ্রাহ রাঘবঃ ।
অবিজ্ঞায় পিতুশ্ছন্দময়োধ্যাধিপতেঃ প্রভোঃ ॥ ২.১১৮.৫১॥
118.52
ততঃ শ্বশুরমামন্ত্র্য বৃদ্ধং দশরথং নৃপম্ ।
মম পিত্রা ত্বহং দত্তা রামায় বিদিতাত্মনে ॥ ২.১১৮.৫২॥
118.53
মম চৈবানুজা সাধ্বী ঊর্মিলা প্রিয়দর্শনা ।
ভার্য্যার্থে লক্ষ্মণস্যাপি দত্তা পিত্রা মম স্বয়ম্ ॥ ২.১১৮.৫৩॥
118.54
এবং দত্তাস্মি রামায় তদা তস্মিন্ স্বয়ম্বরে ।
অনুরক্তাস্মি ধর্মেণ পতিং বীর্যবতাং বরম্ ॥ ২.১১৮.৫৪ ॥