সর্গ 119

119.1

অনসূয়া তু ধর্মজ্ঞা শ্রুত্বা তাং মহতীং কথাম্ ।
পর্য্যষ্বজত বাহুভ্যাং শিরস্যাঘ্রায় মৈথিলীম্ ॥ ২.১১৯.১॥

ব্যক্তাক্ষরপদং চিত্রং ভাষিতং মধুরং ত্বয়া ।
যথা স্বয়ম্বরং বৃত্তং তত্সর্বং হি শ্রুতং ময়া ।রমে ঽহং কথয়া তে তু দৃঢং মধুরভাষিণি ॥ ২.১১৯.২॥

রবিরস্তং গতঃ শ্রীমানুপোহ্য রজনীং শিবাম্ ।
দিবসং প্রতিকীর্ণানামাহারার্থং পতত্িত্রণাম্ ।সন্ধ্যাকালে নিলীনানাং নিদ্রার্থং শ্রূয়তে ধ্বনিঃ ॥ ২.১১৯.৩॥

এতে চাপ্যভিষেকার্দ্রা মুনয়ঃ কলশোদ্যতাঃ ।
সহিতা উপবর্তন্তে সলিলাপ্লুতবল্কলাঃ ॥ ২.১১৯.৪॥

ঋষীণামগ্নিহোত্রেষু হুতেষু বিধিপূর্বকম্ ।
কপোতাঙ্গারুণো ধূমো দৃশ্যতে পবনোদ্ধতঃ ॥ ২.১১৯.৫॥

অল্পপর্ণাহি তরবো ঘনীভূতাঃ সমন্ততঃ ।
বিপ্রকৃষ্টেপি দেশে ঽস্মিন্ন প্রকাশন্তি বৈ দিশঃ ॥ ২.১১৯.৬॥

রজনীচরসত্ত্বানি প্রচরন্তি সমন্ততঃ ।
তপোবনমৃগা হ্যেতে বেদিতীর্থেষু শেরতে ॥ ২.১১৯.৭॥

সম্প্রবৃদ্ধা নিশা সীতে নক্ষত্রসমলঙ্কৃতা ।
জোত্স্নাপ্রাবরণশ্চন্দ্রো দৃশ্যতে ঽভ্যুদিতো ঽম্বরে ॥ ২.১১৯.৮॥

গম্যতামনুজানামি রামস্যানুচরী ভব ।
কথয়ন্ত্যা হি মধুরং ত্বয়াহং পরিতোষিতা ॥ ২.১১৯.৯॥

অলঙ্কুরু চ তাবত্ত্বং প্রত্যক্ষং মম মৈথিলি ।
প্রীতিং জনয় মে বত্সে দিব্যালঙ্কারশোভিতা ॥ ২.১১৯.১০॥

সা তথা সমলংকৃত্য সীতা সুরসুতোপমা ।
প্রণম্য শিরসা তস্যৈ রামং ত্বভিমুখী যয়ৌ ॥ ২.১১৯.১১॥

তথা তু ভূষিতাং সীতাং দদর্শ বদতাং বরঃ ।
রাঘবঃ প্রীতিদানেন তপস্বিন্যা জহর্ষ চ ॥ ২.১১৯.১২॥

ন্যবেদয়ত্ততঃ সর্বং সীতা রামায় মৈথিলী ।
প্রীতিদানং তপস্বিন্যা বসনাভরণস্রজম্ ॥ ২.১১৯.১৩॥

প্রহৃষ্টস্ত্বভবদ্রামো লক্ষ্মণশ্চ মহারথঃ ।
মৈথিল্যাঃ সত্ক্রিয়াং দৃষ্ট্বা মানুষেষু সুদুর্লভাম্ ॥ ২.১১৯.১৪॥

ততস্তাং শর্বরীং প্রীতঃ পুণ্যাং শশিনিভাননঃ ।
অর্চিতস্তাপসৈঃ সিদ্ধৈরুবাস রঘুনন্দনঃ ॥ ২.১১৯.১৫॥

তস্যাং রাত্র্যাং ব্যতীতায়ামভিষিচ্য হুতাগ্নিকান্ ।
আপৃচ্ছেতাং নরব্যাঘ্রৌ তাপসান্ বনগোচরান্ ॥ ২.১১৯.১৬॥

তাবূচুস্তে বনচরাস্তাপসা ধর্মচারিণঃ ।
বনস্য তস্য সঞ্চারং রাক্ষসৈঃ সমভিপ্লুতম্ ॥ ২.১১৯.১৭॥

রক্ষাংসি পুরুষাদানি নানারূপাণি রাঘব ।
বসন্ত্যস্মিন্ মহারণ্যে ব্যালাশ্চ রুধিরাশনাঃ ॥ ২.১১৯.১৮॥

উচ্ছিষ্টং বা প্রমত্তং বা তাপসং ধর্মচারিণম্ ।
অদন্ত্যস্মিন্ মহারণ্যে তান্নিবারয় রাঘব ॥ ২.১১৯.১৯॥

এষ পন্থা মহর্ষীণাং ফলান্যাহরতাং বনে ।
অনেন তু বনং দুর্গং গন্তুং রাঘব তে ক্ষমম্ ॥ ২.১১৯.২০॥

ইতীব তৈঃ প্রাঞ্জলিভিস্তপস্বিভির্দ্বিজৈঃ কৃতঃ স্বস্ত্যয়নঃ পরং তপঃ ।
বনং সভার্য্যঃ প্রবিবেশ রাঘবঃ সলক্ষ্মণঃ সূর্য্যমিবাভ্রমণ্ডলম্ ॥ ২.১১৯.২১ ॥