Utshovসর্গ 116
116.1
প্রতিপ্রয়াতে ভরতে বসন্ রামস্তপোবনে ।
লক্ষয়ামাস সোদ্বেগমথৌত্সুক্যং তপস্বিনাম্ ॥ ২.১১৬.১॥
116.2
যে তত্র চিত্রকূটস্য পুরস্তাত্তাপসাশ্রমে ।
রামমাশ্রিত্য নিরতাস্তানলক্ষয়দুত্সুকান্ ॥ ২.১১৬.২॥
116.3
নয়নৈর্ভুকুটীভিশ্চ রামং নির্দিশ্য শঙ্কিতাঃ ।
অন্যোন্যমুপজল্পন্তঃ শনৈশ্চক্রুর্মিথঃ কথাঃ ॥ ২.১১৬.৩॥
116.4
তেষামৌত্সুক্যমালক্ষ্য রামস্ত্বাত্মনি শঙ্কিতঃ ।
কৃতাঞ্জলিরুবাচেদমৃষিং কুলপতিং ততঃ ॥ ২.১১৬.৪॥
116.5
ন কচ্চিদ্ভগবন্ কিঞ্চিত্পূর্ববৃত্তমিদং ময়ি ।
দৃশ্যতে বিকৃতং যেন বিক্রিয়ন্তে তপস্বিনঃ ॥ ২.১১৬.৫॥
116.6
প্রমাদাচ্চরিতং কচ্চিত্কিঞ্চিন্নাবরজস্য মে ।
লক্ষ্মণস্যর্ষিভির্দৃষ্টং নানুরূপমিবাত্মনঃ ॥ ২.১১৬.৬॥
116.7
কচ্চিচ্ছুশ্রূষমাণা বঃ শুশ্রূষণপরা ময়ি ।
প্র(ম)মাদাভ্যুচিতাং বৃত্তিং সীতা যুক্তং ন বর্ততে ॥ ২.১১৬.৭॥
116.8
অথর্ষির্জরয়া বৃদ্ধস্তপসা চ জরাং গতঃ ।
বেপমান ইবোবাচ রামং ভূতদয়াপরম্ ॥ ২.১১৬.৮॥
116.9
কুতঃ কল্যাণসত্ত্বায়াঃ কল্যাণাভিরতেস্তথা ।
চলনং তাত বৈদেহ্যাস্তপস্বিষু বিশেষতঃ ॥ ২.১১৬.৯॥
116.10
ত্বন্নিমিত্তমিদং তাবত্তাপসান্ প্রতি বর্ততে ।
রক্ষোভ্যস্তেন সংবিগ্নাঃ কথয়ন্তি মিথঃ কথাঃ ॥ ২.১১৬.১০॥
116.11
রাবণাবরজঃ কশ্চিৎ খরো নামেহ রাক্ষসঃ ।
উত্পাট্য তাপসান্ সর্বান্ জনস্থাননিকেতনান্ ॥ ২.১১৬.১১॥
116.12
ধৃষ্টশ্চ জিতকাশীং চ নৃশংসঃ পুরুষাদকঃ ।
অবলিপ্তশ্চ পাপশ্চ ত্বাং চ তাত ন মৃষ্যতে ॥ ২.১১৬.১২॥
116.13
ত্বং যদাপ্রভৃতি হ্যস্মিন্নাশ্রমে তাত বর্তসে ।
তদাপ্রভৃতি রক্ষাংসি বিপ্রকুর্বন্তি তাপসান্ ॥ ২.১১৬.১৩॥
116.14
দর্শয়ন্তি হি বীভত্সৈঃ ক্রূরৈর্ভীষণকৈরপি ।
নানারূপৈর্বিরূপৈশ্চ রূপৈর্বিকৃতদর্শনৈঃ ॥ ২.১১৬.১৪॥
116.15
অপ্রশস্তৈরশুচিভিঃ সম্প্রয়োজ্য চ তাপসান্ ।
প্রতিঘ্নন্ত্যপরান্ ক্ষিপ্রমনার্য্যাঃ পুরতঃ স্থিতাঃ ॥ ২.১১৬.১৫॥
116.16
তেষু তেষ্বাশ্রমস্থানেষ্ববুদ্ধমবলীয় চ ।
রমন্তে তাপসাংস্তত্র নাশয়ন্তো ঽল্পয়েতসঃ ॥ ২.১১৬.১৬॥
116.17
অপক্ষিপন্তি স্রুগ্ভাণ্ডানগ্নীন্ সিঞ্চন্তি বারিণা ।
কলশাংশ্চ প্রমৃদ্নন্তি হবনে সমুপস্থিতে ॥ ২.১১৬.১৭॥
116.18
তৈর্দুরাত্মভিরামৃষ্টানাশ্রমান্ প্রজিহাসবঃ ।
গমনায়ান্যদেশস্য চোদয়ন্ত্যৃষয়ো ঽদ্য মাম্ ॥ ২.১১৬.১৮॥
116.19
তত্পুরা রাম শারীরীমুপহিংসাং তপস্বিষু ।
দর্শয়ন্তি হি দুষ্টাস্তে ত্যক্ষ্যাম ইমমাশ্রমম্ ॥ ২.১১৬.১৯॥
116.20
বহুমূলফলং চিত্রমবিদূরাদিতো বনম্ ।
পুরাণাশ্রমমেবাহং শ্রয়িষ্যে সগণঃ পুনঃ ॥ ২.১১৬.২০॥
116.21
খরস্ত্বয্যপি চায়ুক্তং পুরা তাত প্রবর্ত্ততে ।
সহাস্মাভিরিতো গচ্ছ যদি বুদ্ধিঃ প্রবর্ত্ততে ॥ ২.১১৬.২১॥
116.22
সকলত্রস্য সন্দেহো নিত্যং যত্তস্য রাঘব ।
সমর্থস্যাপি বসতো বাসো দুঃখমিহাদ্য তে ॥ ২.১১৬.২২॥
116.23
ইত্যুক্তবন্তং রামস্তং রাজপুত্রস্তপস্বিনম্ ।
ন শশাকোত্তরৈর্বাক্যৈরবরোদ্ধুং সমুত্সুকঃ ॥ ২.১১৬.২৩॥
116.24
অভিনন্দ্য সমাপৃচ্ছ্য সমাধায় চ রাঘবম্ ।
স জগামাশ্রমং ত্যক্ত্বা কুলৈঃ কুলপতিঃ সহ ॥ ২.১১৬.২৪॥
116.25
রামঃ সংসাধ্য ত্বৃষিগণমনুগমনাদ্দেশাত্তস্মাৎ কুলপতিমভিবাদ্য ঋষিম্ ।
সম্যক্প্রীতৈস্তৈরনুমত উপদিষ্টার্থঃ পুণ্যং বাসায় স্বনিলয়মুপসম্পেদে ॥ ২.১১৬.২৫॥
116.26
আশ্রমং ত্বৃষিবিরহিতং প্রভুঃ ক্ষণমপি ন বিজহৌ স রাঘবঃ ।
রাঘবং হি সততমনুগতাস্তাপসাশ্চার্ষচরিতধৃতগুণাঃ ॥ ২.১১৬.২৬ ॥