সর্গ 52

52.1

তম্ দৃষ্ট্বা পরম প্রীতো বিশ্বামিত্রো মহাবলঃ ।
প্রণতো বিনয়াৎ বীরো বসিষ্ঠম্ জপতাম্ বরম্ ॥১-৫২-১॥

স্বাগতম্ তব চ ইতি উক্তো বসিষ্ঠেন মহাত্মনা ।
আসনম্ চ অস্য ভগবান্ বসিষ্ঠো ব্যাদিদেশ হ ॥১-৫২-২॥

উপবিষ্টায় চ তদা বিশ্বামিত্রায় ধীমতে ।
যথা ন্যায়ম্ মুনি বরঃ ফল মূলম্ উপাহরৎ ॥১-৫২-৩॥

প্রতিগৃহ্য তু তাম্ পূজাম্ বসিষ্ঠাৎ রাজ সত্তমঃ ।
তপো অগ্নি হোত্র শিষ্যেষু কুশলম্ পর্যপৃচ্ছত ॥১-৫২-৪॥

বিশ্বামিত্রো মহাতেজা বনস্পতি গণে তথা ।
সর্বত্র কুশলম্ চ আহ বসিষ্ঠো রাজ সত্তমম্ ॥১-৫২-৫॥

সুখ উপবিষ্টম্ রাজানম্ বিশ্বামিত্রম্ মহাতপাঃ ।
পপ্রচ্ছ জপতাম্ শ্রেষ্ঠো বসিষ্ঠো ব্রহ্মণঃ সুতঃ ॥১-৫২-৬॥

কচ্চিৎ তে কুশলম্ রাজন্ কচ্চিৎ ধর্মেণ রংজয়ন্ ।
প্রজাঃ পালয়সে রাজন্ রাজ বৃত্তেন ধার্মিক ॥১-৫২-৭॥

কচ্চিৎ তে সুভৃতা ভৃত্যাঃ কচ্চিৎ তিষ্ঠন্তি শাসনে ।
কচ্চিৎ তে বিজিতাঃ সর্বে রিপবো রিপু সূদন ॥১-৫২-৮॥

কচ্চিৎ বলে চ কোশে চ মিত্রেষু চ পরংতপ ।
কুশলম্ তে নর ব্যাঘ্র পুত্র পৌত্রে তথা অনঘ ॥১-৫২-৯॥

সর্বত্র কুশলম্ রাজা বসিষ্ঠম্ প্রত্যুদাহরৎ ।
বিশ্বামিত্রো মহাতেজা বসিষ্ঠম্ বিনয় অন্বিতম্ ॥১-৫২-১০॥

কৃত্বা তৌ সুচিরম্ কালম্ ধর্মিষ্ঠৌ তাঃ কথাঃ তদা ।
মুদা পরময়া যুক্তৌ প্রীয়েতাম্ তৌ পরস্পরম্ ॥১-৫২-১১॥

ততো বসিষ্ঠো ভগবান্ কথা অন্তে রঘুনংদন ।
বিশ্বামিত্রম্ ইদম্ বাক্যম্ উবাচ প্রহসন্ ইব ॥১-৫২-১২॥

আতিথ্যম্ কর্তুম্ ইচ্ছামি বলস্য অস্য মহাবল ।
তব চ এব অপ্রমেয়স্য যথা অর্হম্ সংপ্রতীচ্ছ মে ॥১-৫২-১৩॥

সত্ক্রিয়াম্ তু ভবান্ এতাম্ প্রতীচ্ছতু ময়া কৃতাম্ ।
রাজন্ ত্বম্ অতিথি শ্রেষ্ঠঃ পূজনীয়ঃ প্রয়ত্নতঃ ॥১-৫২-১৪॥

এবম্ উক্তো বসিষ্ঠেন বিশ্বামিত্রো মহামতিঃ ।
কৃতম্ ইতি অব্রবীৎ রাজা পূজা বাক্যেন মে ত্বয়া ॥১-৫২-১৫॥

ফল মূলেন ভগবন্ বিদ্যতে যৎ তব আশ্রমে ।
পাদ্যেন আচমনীয়েন ভগবদ্ দর্শনেন চ ॥১-৫২-১৬॥

সর্বথা চ মহাপ্রাজ্ঞ পূজা অর্হেণ সুপূজিতঃ ।
নমস্তে অস্তু গমিষ্যামি মৈত্রেণ ঈক্ষস্ব চক্ষুষা ॥১-৫২-১৭॥

এবম্ ব্রুবন্তম্ রাজানম্ বসিষ্ঠঃ পুনঃ এব হি ।
ন্যমংত্রয়ত ধর্মাত্মা পুনঃ পুনঃ উদার ধীঃ ॥১-৫২-১৮॥

বাঢম্ ইতি এব গাধেয়ো বসিষ্ঠম্ প্রত্যুবাচ হ ।
যথা প্রিয়ম্ ভগবতঃ তথা অস্তু মুনি সত্তম ॥১-৫২-১৯॥

এবম্ উক্তঃ তথা তেন বসিষ্ঠো জপতাম্ বরঃ ।
আজুহাব ততঃ প্রীতঃ কল্মাষীম্ ধূত কল্মষঃ ॥১-৫২-২০॥

এহি এহি শবলে ক্ষিপ্রম্ শৃণু চ অপি বচো মম ।
সবলস্য অস্য রাজর্ষেঃ কর্তুম্ ব্যবসিতো অস্মি অহম্ ।ভোজনেন মহা অর্হেণ সত্কারম্ সংবিধত্স্ব মে ॥১-৫২-২১॥

যস্য যস্য যথা কামম্ ষড্ রসেষু অভিপূজিতম্ ।
তৎ সর্বম্ কাম ধুক্ দিব্যে অভিবর্ষ কৃতে মম ॥১-৫২-২২॥

রসেন অন্নেন পানেন লেহ্য চোষ্যেণ সংয়ুতম্ ।
অন্নানাম্ নিচয়ম্ সর্বম্ সৃজস্ব শবলে ত্বর ॥১-৫২-২৩॥