সূক্ত 97

97.1

(৫৮) ১-৩ মৈত্রাবরুণির্বসিষ্ঠঃ, ৪-৬ বাসিষ্ঠ ইন্দ্রপ্রমতিঃ,৭-৯ বাসিষ্ঠো বৃষগণঃ,১০ -১২ বাসিষ্ঠো মন্যু :, ১৩-১৫ বাসিষ্ঠ উপমন্যুঃ, ১৬-১৮ বাসিষ্ঠো ব্যাঘ্রপাদ্ , ১৯ -২১ বাসিষ্ঠঃ শক্তিঃ, ২২-২৪ বাসিষ্ঠঃ কর্ণশ্রুদ্ ,২৫ -২৭ বাসিষ্ঠো মৃলীকঃ, ২৮-৩০ বাসিষ্ঠো বসুক্রঃ, ৩১-৪৪ পরাশরঃ শাক্ত্যঃ, ৪৫-৫৮ কুত্স আঙ্গিরসঃ । পবমানঃ সোমঃ ।ত্রিষ্টুপ্ ।

অস্য প্রেষা হেমনা পূয়মানো দেবো দেবেভিঃ সমপৃক্ত রসম্ ।
সুতঃ পবিত্রং পর্যেতি রেভন্মিতেব সদ্ম পশুমান্তি হোতা ॥১॥

97.2

ভদ্রা বস্ত্রা সমন্যা৩ বসানো মহান্কবির্নিবচনানি শংসন্ ।
আ বচ্যস্ব চম্বোঃ পূয়মানো বিচক্ষণো জাগৃবির্দেববীতৌ ॥২॥

97.3

সমু প্রিয়ো মৃজ্যতে সানো অব্যে যশস্তরো যশসাং ক্ষৈতো অস্মে ।
অভি স্বর ধন্বা পূয়মানো যূয়ং পাত স্বস্তিভিঃ সদা নঃ ॥৩॥

97.4

প্র গায়তাভ্যর্চাম দেবান্ত্সোমং হিনোত মহতে ধনায় ।
স্বাদুঃ পবাতে অতি বারমব্যমা সীদাতি কলশং দেবয়ুর্নঃ ॥৪॥

97.5

ইন্দুর্দেবানামুপ সখ্যমায়ন্ত্সহস্রধারঃ পবতে মদায় ।
নৃভিঃ স্তবানো অনু ধাম পূর্বমগন্নিন্দ্রং মহতে সৌভগায় ॥৫॥

97.6

স্তোত্রে রায়ে হরিরর্ষা পুনান ইন্দ্রং মদো গচ্ছতু তে ভরায় ।
দেবৈর্যাহি সরথং রাধো অচ্ছা যূয়ং পাত স্বস্তিভিঃ সদা নঃ ॥৬॥

97.7

প্র কাব্যমুশনেব ব্রুবাণো দেবো দেবানাং জনিমা বিবক্তি ।
মহিব্রতঃ শুচিবন্ধুঃ পাবকঃ পদা বরাহো অভ্যেতি রেভন্ ॥৭॥

97.8

প্র হংসাসস্তৃপলং মন্যুমচ্ছামাদস্তং বৃষগণা অয়াসুঃ ।
আঙ্গূষ্যং১ পবমানং সখায়ো দুর্মর্ষং সাকং প্র বদন্তি বাণম্ ॥৮॥

97.9

স রংহত উরুগায়স্য জূতিং বৃথা ক্রীলন্তং মিমতে ন গাবঃ ।
পরীণসং কৃণুতে তিগ্মশৃঙ্গো দিবা হরির্দদৃশে নক্তমৃজ্রঃ ॥৯॥

97.10

ইন্দুর্বাজী পবতে গোন্যোঘা ইন্দ্রে সোমঃ সহ ইন্বন্মদায় ।
হন্তি রক্ষো বাধতে পর্যরাতীর্বরিবঃ কৃণ্বন্বৃজনস্য রাজা ॥১০॥

97.11

অধ ধারয়া মধ্বা পৃচানস্তিরো রোম পবতে অদ্রিদুগ্ধঃ ।
ইন্দুরিন্দ্রস্য সখ্যং জুষাণো দেবো দেবস্য মত্সরো মদায় ॥১১॥

97.12

অভি প্রিয়াণি পবতে পুনানো দেবো দেবান্ত্স্বেন রসেন পৃঞ্চন্ ।
ইন্দুর্ধর্মাণ্যৃতুথা বসানো দশ ক্ষিপো অব্যত সানো অব্যে ॥১২॥

97.13

বৃষা শোণো অভিকনিক্রদদ্গা নদয়ন্নেতি পৃথিবীমুত দ্যাম্ ।
ইন্দ্রস্যেব বগ্নুরা শৃণ্ব আজৌ প্রচেতয়ন্নর্ষতি বাচমেমাম্ ॥১৩॥

97.14

রসায্যঃ পয়সা পিন্বমান ঈরয়ন্নেষি মধুমন্তমংশুম্ ।
পবমানঃ সংতনিমেষি কৃণ্বন্নিন্দ্রায় সোম পরিষিচ্যমানঃ ॥১৪॥

97.15

এবা পবস্ব মদিরো মদায়োদগ্রাভস্য নময়ন্বধস্নৈঃ ।
পরি বর্ণং ভরমাণো রুশন্তং গব্যুর্নো অর্ষ পরি সোম সিক্তঃ ॥১৫॥

97.16

জুষ্ট্বী ন ইন্দো সুপথা সুগান্যুরৌ পবস্ব বরিবাংসি কৃণ্বন্ ।
ঘনেব বিষ্বগ্দুরিতানি বিঘ্নন্নধি ষ্ণুনা ধন্ব সানো অব্যে ॥১৬॥

97.17

বৃষ্টিং নো অর্ষ দিব্যাং জিগত্নুমিলাবতীং শংগয়ীং জীরদানুম্ ।
স্তুকেব বীতা ধন্বা বিচিন্বন্বন্ধূঁরিমাঁ অবরাঁ ইন্দো বায়ূন্ ॥১৭॥

97.18

গ্রন্থিং ন বি ষ্য গ্রথিতং পুনান ঋজুং চ গাতুং বৃজিনং চ সোম ।
অত্যো ন ক্রদো হরিরা সৃজানো মর্যো দেব ধন্ব পস্ত্যাবান্ ॥১৮॥

97.19

জুষ্টো মদায় দেবতাত ইন্দো পরি ষ্ণুনা ধন্ব সানো অব্যে ।
সহস্রধারঃ সুরভিরদব্ধঃ পরি স্রব বাজসাতৌ নৃষহ্যে ॥১৯॥

97.20

অরশ্মানো যেঽরথা অয়ুক্তা অত্যাসো ন সসৃজানাস আজৌ ।
এতে শুক্রাসো ধন্বন্তি সোমা দেবাসস্তাঁ উপ যাতা পিবধ্যৈ ॥২০॥

97.21

এবা ন ইন্দো অভি দেববীতিং পরি স্রব নভো অর্ণশ্চমূষু ।
সোমো অস্মভ্যং কাম্যং বৃহন্তং রয়িং দদাতু বীরবন্তমুগ্রম্ ॥২১॥

97.22

তক্ষদ্যদী মনসো বেনতো বাগ্জ্যেষ্ঠস্য বা ধর্মণি ক্ষোরনীকে ।
আদীমায়ন্বরমা বাবশানা জুষ্টং পতিং কলশে গাব ইন্দুম্ ॥২২॥

97.23

প্র দানুদো দিব্যো দানুপিন্ব ঋতমৃতায় পবতে সুমেধাঃ ।
ধর্মা ভুবদ্বৃজন্যস্য রাজা প্র রশ্মিভির্দশভির্ভারি ভূম ॥২৩॥

97.24

পবিত্রেভিঃ পবমানো নৃচক্ষা রাজা দেবানামুত মর্ত্যানাম্ ।
দ্বিতা ভুবদ্রয়িপতী রয়ীণামৃতং ভরত্সুভৃতং চার্বিন্দুঃ ॥২৪॥

97.25

অর্বাঁ ইব শ্রবসে সাতিমচ্ছেন্দ্রস্য বায়োরভি বীতিমর্ষ ।
স নঃ সহস্রা বৃহতীরিষো দা ভবা সোম দ্রবিণোবিত্পুনানঃ ॥২৫॥

97.26

দেবাব্যো নঃ পরিষিচ্যমানাঃ ক্ষয়ং সুবীরং ধন্বন্ত সোমাঃ ।
আয়জ্যবঃ সুমতিং বিশ্ববারা হোতারো ন দিবিয়জো মন্দ্রতমাঃ ॥২৬॥

97.27

এবা দেব দেবতাতে পবস্ব মহে সোম প্সরসে দেবপানঃ ।
মহশ্চিদ্ধি ষ্মসি হিতাঃ সমর্যে কৃধি সুষ্ঠানে রোদসী পুনানঃ ॥২৭॥

97.28

অশ্বো নো ক্রদো বৃষভির্যুজানঃ সিংহো ন ভীমো মনসো জবীয়ান্ ।
অর্বাচীনৈঃ পথিভির্যে রজিষ্ঠা আ পবস্ব সৌমনসং ন ইন্দো ॥২৮॥

97.29

শতং ধারা দেবজাতা অসৃগ্রন্ত্সহস্রমেনাঃ কবয়ো মৃজন্তি ।
ইন্দো সনিত্রং দিব আ পবস্ব পুরএতাসি মহতো ধনস্য ॥২৯॥

97.30

দিবো ন সর্গা অসসৃগ্রমহ্নাং রাজা ন মিত্রং প্র মিনাতি ধীরঃ ।
পিতুর্ন পুত্রঃ ক্রতুভির্যতান আ পবস্ব বিশে অস্যা অজীতিম্ ॥৩০॥

97.31

প্র তে ধারা মধুমতীরসৃগ্রন্বারান্যত্পূতো অত্যেষ্যব্যান্ ।
পবমান পবসে ধাম গোনাং জজ্ঞানঃ সূর্যমপিন্বো অর্কৈঃ ॥৩১॥

97.32

কনিক্রদদনু পন্থামৃতস্য শুক্রো বি ভাস্যমৃতস্য ধাম ।
স ইন্দ্রায় পবসে মত্সরবান্হিন্বানো বাচং মতিভিঃ কবীনাম্ ॥৩২॥

97.33

দিব্যঃ সুপর্ণোঽব চক্ষি সোম পিন্বন্ধারাঃ কর্মণা দেববীতৌ ।
এন্দো বিশ কলশং সোমধানং ক্রন্দন্নিহি সূর্যস্যোপ রশ্মিম্ ॥৩৩॥

97.34

তিস্রো বাচ ঈরয়তি প্র বহ্নিৠতস্য ধীতিং ব্রহ্মণো মনীষাম্ ।
গাবো যন্তি গোপতিং পৃচ্ছমানাঃ সোমং যন্তি মতয়ো বাবশানাঃ ॥৩৪॥

97.35

সোমং গাবো ধেনবো বাবশানাঃ সোমং বিপ্রা মতিভিঃ পৃচ্ছমানাঃ ।
সোমঃ সুতঃ পূয়তে অজ্যমানঃ সোমে অর্কাস্ত্রিষ্টুভঃ সং নবন্তে ॥৩৫॥

97.36

এবা নঃ সোম পরিষিচ্যমান আ পবস্ব পূয়মানঃ স্বস্তি ।
ইন্দ্রমা বিশ বৃহতা রবেণ বর্ধয়া বাচং জনয়া পুরংধিম্ ॥৩৬॥

97.37

আ জাগৃবির্বিপ্র ঋতা মতীনাং সোমঃ পুনানো অসদচ্চমূষু ।
সপন্তি যং মিথুনাসো নিকামা অধ্বর্যবো রথিরাসঃ সুহস্তাঃ ॥৩৭॥

97.38

স পুনান উপ সূরে ন ধাতোভে অপ্রা রোদসী বি ষ আবঃ ।
প্রিয়া চিদ্যস্য প্রিয়সাস ঊতী স তূ ধনং কারিণে ন প্র যংসৎ ॥৩৮॥

97.39

স বর্ধিতা বর্ধনঃ পূয়মানঃ সোমো মীঢ্বাঁ অভি নো জ্যোতিষাবীৎ ।
যেনা নঃ পূর্বে পিতরঃ পদজ্ঞাঃ স্বর্বিদো অভি গা অদ্রিমুষ্ণন্ ॥৩৯॥

97.40

অক্রান্ত্সমুদ্রঃ প্রথমে বিধর্মঞ্জনয়ন্প্রজা ভুবনস্য রাজা ।
বৃষা পবিত্রে অধি সানো অব্যে বৃহত্সোমো বাবৃধে সুবান ইন্দুঃ ॥৪০॥

97.41

মহত্তত্সোমো মহিষশ্চকারাঽপাং যদ্গর্ভোঽবৃণীত দেবান্ ।
অদধাদিন্দ্রে পবমান ওজোঽজনয়ত্সূর্যে জ্যোতিরিন্দুঃ ॥৪১॥

97.42

মত্সি বায়ুমিষ্টয়ে রাধসে চ মত্সি মিত্রাবরুণা পূয়মানঃ ।
মত্সি শর্ধো মারুতং মত্সি দেবান্মত্সি দ্যাবাপৃথিবী দেব সোম ॥৪২॥

97.43

ঋজুঃ পবস্ব বৃজিনস্য হন্তাঽপামীবাং বাধমানো মৃধশ্চ ।
অভিশ্রীণন্পয়ঃ পয়সাভি গোনামিন্দ্রস্য ত্বং তব বয়ং সখায়ঃ ॥৪৩॥

97.44

মধ্বঃ সূদং পবস্ব বস্ব উত্সং বীরং চ ন আ পবস্বা ভগং চ ।
স্বদস্বেন্দ্রায় পবমান ইন্দো রয়িং চ ন আ পবস্বা সমুদ্রাৎ ॥৪৪॥

97.45

সোমঃ সুতো ধারয়াত্যো ন হিত্বা সিন্ধুর্ন নিম্নমভি বাজ্যক্ষাঃ ।
আ যোনিং বন্যমসদত্পুনানঃ সমিন্দুর্গোভিরসরত্সমদ্ভিঃ ॥৪৫॥

97.46

এষ স্য তে পবত ইন্দ্র সোমশ্চমূষু ধীর উশতে তবস্বান্ ।
স্বর্চক্ষা রথিরঃ সত্যশুষ্মঃ কামো ন যো দেবয়তামসর্জি ॥৪৬॥

97.47

এষ প্রত্নেন বয়সা পুনানস্তিরো বর্পাংসি দুহিতুর্দধানঃ ।
বসানঃ শর্ম ত্রিবরূথমপ্সু হোতেব যাতি সমনেষু রেভন্ ॥৪৭॥

97.48

নূ নস্ত্বং রথিরো দেব সোম পরি স্রব চম্বোঃ পূয়মানঃ ।
অপ্সু স্বাদিষ্ঠো মধুমাঁ ঋতাবা দেবো ন যঃ সবিতা সত্যমন্মা ॥৪৮॥

97.49

অভি বায়ুং বীত্যর্ষা গৃণানো৩ঽভি মিত্রাবরুণা পূয়মানঃ ।
অভী নরং ধীজবনং রথেষ্ঠামভীন্দ্রং বৃষণং বজ্রবাহুম্ ॥৪৯॥

97.50

অভি বস্ত্রা সুবসনান্যর্ষাঽভি ধেনূঃ সুদুঘাঃ পূয়মানঃ ।
অভি চন্দ্রা ভর্তবে নো হিরণ্যাঽভ্যশ্বান্রথিনো দেব সোম ॥৫০॥

97.51

অভী নো অর্ষ দিব্যা বসূন্যভি বিশ্বা পার্থিবা পূয়মানঃ ।
অভি যেন দ্রবিণমশ্নবামাঽভ্যার্ষেয়ং জমদগ্নিবন্নঃ ॥৫১॥

97.52

অয়া পবা পবস্বৈনা বসূনি মাঁশ্চত্ব ইন্দো সরসি প্র ধন্ব ।
ব্রধ্নশ্চিদত্র বাতো ন জূতঃ পুরুমেধশ্চিত্তকবে নরং দাৎ ॥৫২॥

97.53

উত ন এনা পবয়া পবস্বাঽধি শ্রুতে শ্রবায্যস্য তীর্থে ।
ষষ্টিং সহস্রা নৈগুতো বসূনি বৃক্ষং ন পক্বং ধূনবদ্রণায় ॥৫৩॥

97.54

মহীমে অস্য বৃষনাম শূষে মাঁশ্চত্বে বা পৃশনে বা বধত্রে ।
অস্বাপয়ন্নিগুতঃ স্নেহয়চ্চাঽপামিত্রাঁ অপাচিতো অচেতঃ ॥৫৪॥

97.55

সং ত্রী পবিত্রা বিততান্যেষ্যন্বেকং ধাবসি পূয়মানঃ ।
অসি ভগো অসি দাত্রস্য দাতাঽসি মঘবা মঘবদ্ভ্য ইন্দো ॥৫৫॥

97.56

এষ বিশ্ববিত্পবতে মনীষী সোমো বিশ্বস্য ভুবনস্য রাজা ।
দ্রপ্সাঁ ঈরয়ন্বিদথেষ্বিন্দুর্বি বারমব্যং সময়াতি যাতি ॥৫৬॥

97.57

ইন্দুং রিহন্তি মহিষা অদব্ধাঃ পদে রেভন্তি কবয়ো ন গৃধ্রাঃ ।
হিন্বন্তি ধীরা দশভিঃ ক্ষিপাভিঃ সমঞ্জতে রূপমপাং রসেন ॥৫৭॥

97.58

ত্বয়া বয়ং পবমানেন সোম ভরে কৃতং বি চিনুয়াম শশ্বৎ ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥৫৮॥