সূক্ত 96

96.1

২৪ দৈবোদাসিঃ প্রতর্দনঃ । পবমানঃ সোমঃ । ত্রিষ্টুপ্ ।

প্র সেনানীঃ শূরো অগ্রে রথানাং গব্যন্নেতি হর্ষতে অস্য সেনা ।
ভদ্রান্কৃণ্বন্নিন্দ্রহবান্ত্সখিভ্য আ সোমো বস্ত্রা রভসানি দত্তে ॥১॥

96.2

সমস্য হরিং হরয়ো মৃজন্ত্যশ্বহয়ৈরনিশিতং নমোভিঃ ।
আ তিষ্ঠতি রথমিন্দ্রস্য সখা বিদ্বাঁ এনা সুমতিং যাত্যচ্ছ ॥২॥

96.3

স নো দেব দেবতাতে পবস্ব মহে সোম প্সরস ইন্দ্রপানঃ ।
কৃণ্বন্নপো বর্ষয়ন্দ্যামুতেমামুরোরা নো বরিবস্যা পুনানঃ ॥৩॥

96.4

অজীতয়েঽহতয়ে পবস্ব স্বস্তয়ে সর্বতাতয়ে বৃহতে ।
তদুশন্তি বিশ্ব ইমে সখায়স্তদহং বশ্মি পবমান সোম ॥৪॥

96.5

সোমঃ পবতে জনিতা মতীনাং জনিতা দিবো জনিতা পৃথিব্যাঃ ।
জনিতাগ্নের্জনিতা সূর্যস্য জনিতেন্দ্রস্য জনিতোত বিষ্ণোঃ ॥৫॥

96.6

ব্রহ্মা দেবানাং পদবীঃ কবীনামৃষির্বিপ্রাণাং মহিষো মৃগাণাম্ ।
শ্যেনো গৃধ্রাণাং স্বধিতির্বনানাং সোমঃ পবিত্রমত্যেতি রেভন্ ॥৬॥

96.7

প্রাবীবিপদ্বাচ ঊর্মিং ন সিন্ধুর্গিরঃ সোমঃ পবমানো মনীষাঃ ।
অন্তঃ পশ্যন্বৃজনেমাবরাণ্যা তিষ্ঠতি বৃষভো গোষু জানন্ ॥৭॥

96.8

স মত্সরঃ পৃত্সু বন্বন্নবাতঃ সহস্ররেতা অভি বাজমর্ষ ।
ইন্দ্রায়েন্দো পবমানো মনীষ্যং১শোরূর্মিমীরয় গা ইষণ্যন্ ॥৮॥

96.9

পরি প্রিয়ঃ কলশে দেববাত ইন্দ্রায় সোমো রণ্যো মদায় ।
সহস্রধারঃ শতবাজ ইন্দুর্বাজী ন সপ্তিঃ সমনা জিগাতি ॥৯॥

96.10

স পূর্ব্যো বসুবিজ্জায়মানো মৃজানো অপ্সু দুদুহানো অদ্রৌ ।
অভিশস্তিপা ভুবনস্য রাজা বিদদ্গাতুং ব্রহ্মণে পূয়মানঃ ॥১০॥

96.11

ত্বয়া হি নঃ পিতরঃ সোম পূর্বে কর্মাণি চক্রুঃ পবমান ধীরাঃ ।
বন্বন্নবাতঃ পরিধীঁরপোর্ণু বীরেভিরশ্বৈর্মঘবা ভবা নঃ ॥১১॥

96.12

যথাপবথা মনবে বয়োধা অমিত্রহা বরিবোবিদ্ধবিষ্মান্ ।
এবা পবস্ব দ্রবিণং দধান ইন্দ্রে সং তিষ্ঠ জনয়ায়ুধানি ॥১২॥

96.13

পবস্ব সোম মধুমাঁ ঋতাবাঽপো বসানো অধি সানো অব্যে ।
অব দ্রোণানি ঘৃতবান্তি সীদ মদিন্তমো মত্সর ইন্দ্রপানঃ ॥১৩॥

96.14

বৃষ্টিং দিবঃ শতধারঃ পবস্ব সহস্রসা বাজয়ুর্দেববীতৌ ।
সং সিন্ধুভিঃ কলশে বাবশানঃ সমুস্রিয়াভিঃ প্রতিরন্ন আয়ুঃ ॥১৪॥

96.15

এষ স্য সোমো মতিভিঃ পুনানোঽত্যো ন বাজী তরতীদরাতীঃ ।
পয়ো ন দুগ্ধমদিতেরিষিরমুর্বিব গাতুঃ সুয়মো ন বোল্হা ॥১৫॥

96.16

স্বায়ুধঃ সোতৃভিঃ পূয়মানোঽভ্যর্ষ গুহ্যং চারু নাম ।
অভি বাজং সপ্তিরিব শ্রবস্যাঽভি বায়ুমভি গা দেব সোম ॥১৬॥

96.17

শিশুং জজ্ঞানং হর্যতং মৃজন্তি শুম্ভন্তি বহ্নিং মরুতো গণেন ।
কবির্গীর্ভিঃ কাব্যেনা কবিঃ সন্ত্সোমঃ পবিত্রমত্যেতি রেভন্ ॥১৭॥

96.18

ঋষিমনা য ঋষিকৃত্স্বর্ষাঃ সহস্রণীথঃ পদবীঃ কবীনাম্ ।
তৃতীয়ং ধাম মহিষঃ সিষাসন্ত্সোমো বিরাজমনু রাজতি ষ্টুপ্ ॥১৮॥

96.19

চমূষচ্ছ্যেনঃ শকুনো বিভৃত্বা গোবিন্দুর্দ্রপ্স আয়ুধানি বিভ্রৎ ।
অপামূর্মিং সচমানঃ সমুদ্রং তুরীয়ং ধাম মহিষো বিবক্তি ॥১৯॥

96.20

মর্যো ন শুভ্রস্তন্বং মৃজানোঽত্যো ন সৃত্বা সনয়ে ধনানাম্ ।
বৃষেব যূথা পরি কোশমর্ষন্কনিক্রদচ্চম্বো৩রা বিবেশ ॥২০॥

96.21

পবস্বেন্দো পবমানো মহোভিঃ কনিক্রদত্পরি বারাণ্যর্ষ ।
ক্রীলঞ্চম্বো৩রা বিশ পূয়মান ইন্দ্রং তে রসো মদিরো মমত্তু ॥২১॥

96.22

প্রাস্য ধারা বৃহতীরসৃগ্রন্নক্তো গোভিঃ কলশাঁ আ
বিবেশ । সাম কৃণ্বন্ত্সামন্যো বিপশ্চিত্ক্রন্দন্নেত্যভি সখ্যুর্ন জামিম্ ॥২২॥

96.23

অপঘ্নন্নেষি পবমান শত্রূন্প্রিয়াং ন জারো অভিগীত ইন্দুঃ ।
সীদন্বনেষু শকুনো ন পত্বা সোমঃ পুনানঃ কলশেষু সত্তা ॥২৩॥

96.24

আ তে রুচঃ পবমানস্য সোম যোষেব যন্তি সুদুঘাঃ সুধারাঃ ।
হরিরানীতঃ পুরুবারো অপ্স্বচিক্রদত্কলশে দেবয়ূনাম্ ॥২৪॥