Sukta 96

96.1

24 daivodasih pratardanah, pavamanah somah, trishtup

प्र से॑ना॒नीः शूरो॒ अग्रे॒ रथा॑नां ग॒व्यन्ने॑ति॒ हर्ष॑ते अस्य॒ सेना॑ ।
भ॒द्रान्कृ॒ण्वन्नि॑न्द्रह॒वान्त्सखि॑भ्य॒ आ सोमो॒ वस्त्रा॑ रभ॒सानि॑ दत्ते ॥१॥

Pra senanih shuro agre rathanam gavyanneti harshate asya sena
Bhadrankrinvannindrahavantsakhibhya a somo vastra rabhasani datte

96.2

सम॑स्य॒ हरिं॒ हर॑यो मृजन्त्यश्वह॒यैरनि॑शितं॒ नमो॑भिः ।
आ ति॑ष्ठति॒ रथ॒मिन्द्र॑स्य॒ सखा॑ वि॒द्वाँ ए॑ना सुम॒तिं या॒त्यच्छ॑ ॥२॥

Samasya harim harayo mrijantyashvahayairanishitam namobhih
A tishthati rathamindrasya sakha vidvam ena sumatim yatyachchha

96.3

स नो॑ देव दे॒वता॑ते पवस्व म॒हे सो॑म॒ प्सर॑स इन्द्र॒पान॑ः ।
कृ॒ण्वन्न॒पो व॒र्षय॒न्द्यामु॒तेमामु॒रोरा नो॑ वरिवस्या पुना॒नः ॥३॥

Sa no deva devatate pavasva mahe soma psarasa indrapanah
Krinvannapo varshayandyamutemamurora no varivasya punanah

96.4

अजी॑त॒येऽह॑तये पवस्व स्व॒स्तये॑ स॒र्वता॑तये बृह॒ते ।
तदु॑शन्ति॒ विश्व॑ इ॒मे सखा॑य॒स्तद॒हं व॑श्मि पवमान सोम ॥४॥

Ajitayehataye pavasva svastaye sarvatataye brihate
Tadushanti vishva ime sakhayastadaham vashmi pavamana soma

96.5

सोम॑ः पवते जनि॒ता म॑ती॒नां ज॑नि॒ता दि॒वो ज॑नि॒ता पृ॑थि॒व्याः ।
ज॒नि॒ताग्नेर्ज॑नि॒ता सूर्य॑स्य जनि॒तेन्द्र॑स्य जनि॒तोत विष्णो॑ः ॥५॥

Somah pavate janita matinam janita divo janita prithivyah
Janitagnerjanita suryasya janitendrasya janitota vishnoh

96.6

ब्र॒ह्मा दे॒वानां॑ पद॒वीः क॑वी॒नामृषि॒र्विप्रा॑णां महि॒षो मृ॒गाणा॑म् ।
श्ये॒नो गृध्रा॑णां॒ स्वधि॑ति॒र्वना॑नां॒ सोम॑ः प॒वित्र॒मत्ये॑ति॒ रेभ॑न् ॥६॥

Brahma devanam padavih kavinamrishirvipranam mahisho mriganam
Shyeno gridhranam svadhitirvananam somah pavitramatyeti rebhan

96.7

प्रावी॑विपद्वा॒च ऊ॒र्मिं न सिन्धु॒र्गिर॒ः सोम॒ः पव॑मानो मनी॒षाः ।
अ॒न्तः पश्य॑न्वृ॒जने॒माव॑रा॒ण्या ति॑ष्ठति वृष॒भो गोषु॑ जा॒नन् ॥७॥

Pravivipadvacha urmim na sindhurgirah somah pavamano manishah
Antah pashyanvrijanemavaranya tishthati vrishabho goshu janan

96.8

स म॑त्स॒रः पृ॒त्सु व॒न्वन्नवा॑तः स॒हस्र॑रेता अ॒भि वाज॑मर्ष ।
इन्द्रा॑येन्दो॒ पव॑मानो मनी॒ष्यं१शोरू॒र्मिमी॑रय॒ गा इ॑ष॒ण्यन् ॥८॥

Sa matsarah pritsu vanvannavatah sahasrareta abhi vajamarsha
Indrayendo pavamano manishyan1shorurmimiraya ga ishanyan

96.9

परि॑ प्रि॒यः क॒लशे॑ दे॒ववा॑त॒ इन्द्रा॑य॒ सोमो॒ रण्यो॒ मदा॑य ।
स॒हस्र॑धारः श॒तवा॑ज॒ इन्दु॑र्वा॒जी न सप्ति॒ः सम॑ना जिगाति ॥९॥

Pari priyah kalashe devavata indraya somo ranyo madaya
Sahasradharah shatavaja indurvaji na saptih samana jigati

96.10

स पू॒र्व्यो व॑सु॒विज्जाय॑मानो मृजा॒नो अ॒प्सु दु॑दुहा॒नो अद्रौ॑ ।
अ॒भि॒श॒स्ति॒पा भुव॑नस्य॒ राजा॑ वि॒दद्गा॒तुं ब्रह्म॑णे पू॒यमा॑नः ॥१०॥

Sa purvyo vasuvijjayamano mrijano apsu duduhano adrau
Abhishastipa bhuvanasya raja vidadgatum brahmane puyamanah

96.11

त्वया॒ हि न॑ः पि॒तर॑ः सोम॒ पूर्वे॒ कर्मा॑णि च॒क्रुः प॑वमान॒ धीरा॑ः ।
व॒न्वन्नवा॑तः परि॒धीँरपो॑र्णु वी॒रेभि॒रश्वै॑र्म॒घवा॑ भवा नः ॥११॥

Tvaya hi nah pitarah soma purve karmani chakruh pavamana dhirah
Vanvannavatah paridhinrapornu virebhirashvairmaghava bhava nah

96.12

यथाप॑वथा॒ मन॑वे वयो॒धा अ॑मित्र॒हा व॑रिवो॒विद्ध॒विष्मा॑न् ।
ए॒वा प॑वस्व॒ द्रवि॑णं॒ दधा॑न॒ इन्द्रे॒ सं ति॑ष्ठ ज॒नयायु॑धानि ॥१२॥

Yathapavatha manave vayodha amitraha varivoviddhavishman
Eva pavasva dravinam dadhana indre sam tishtha janayayudhani

96.13

पव॑स्व सोम॒ मधु॑माँ ऋ॒तावा॒ऽपो वसा॑नो॒ अधि॒ सानो॒ अव्ये॑ ।
अव॒ द्रोणा॑नि घृ॒तवा॑न्ति सीद म॒दिन्त॑मो मत्स॒र इ॑न्द्र॒पान॑ः ॥१३॥

Pavasva soma madhumam ritavapo vasano adhi sano avye
Ava dronani ghritavanti sida madintamo matsara indrapanah

96.14

वृ॒ष्टिं दि॒वः श॒तधा॑रः पवस्व सहस्र॒सा वा॑ज॒युर्दे॒ववी॑तौ ।
सं सिन्धु॑भिः क॒लशे॑ वावशा॒नः समु॒स्रिया॑भिः प्रति॒रन्न॒ आयु॑ः ॥१४॥

Vrishtim divah shatadharah pavasva sahasrasa vajayurdevavitau
Sam sindhubhih kalashe vavashanah samusriyabhih pratiranna ayuh

96.15

ए॒ष स्य सोमो॑ म॒तिभि॑ः पुना॒नोऽत्यो॒ न वा॒जी तर॒तीदरा॑तीः ।
पयो॒ न दु॒ग्धमदि॑तेरिषि॒रमु॒र्वि॑व गा॒तुः सु॒यमो॒ न वोळ्हा॑ ॥१५॥

Esha sya somo matibhih punanotyo na vaji taratidaratih
Payo na dugdhamaditerishiramurviva gatuh suyamo na volha

96.16

स्वा॒यु॒धः सो॒तृभि॑ः पू॒यमा॑नो॒ऽभ्य॑र्ष॒ गुह्यं॒ चारु॒ नाम॑ ।
अ॒भि वाजं॒ सप्ति॑रिव श्रव॒स्याऽभि वा॒युम॒भि गा दे॑व सोम ॥१६॥

Svayudhah sotribhih puyamanobhyarsha guhyam charu nama
Abhi vajam saptiriva shravasyabhi vayumabhi ga deva soma

96.17

शिशुं॑ जज्ञा॒नं ह॑र्य॒तं मृ॑जन्ति शु॒म्भन्ति॒ वह्निं॑ म॒रुतो॑ ग॒णेन॑ ।
क॒विर्गी॒र्भिः काव्ये॑ना क॒विः सन्त्सोम॑ः प॒वित्र॒मत्ये॑ति॒ रेभ॑न् ॥१७॥

Shishum jagyanam haryatam mrijanti shumbhanti vahnim maruto ganena
Kavirgirbhih kavyena kavih santsomah pavitramatyeti rebhan

96.18

ऋषि॑मना॒ य ऋ॑षि॒कृत्स्व॒र्षाः स॒हस्र॑णीथः पद॒वीः क॑वी॒नाम् ।
तृ॒तीयं॒ धाम॑ महि॒षः सिषा॑स॒न्त्सोमो॑ वि॒राज॒मनु॑ राजति॒ ष्टुप् ॥१८॥

Rishimana ya rishikritsvarshah sahasranithah padavih kavinam
Tritiyam dhama mahishah sishasantsomo virajamanu rajati shtup

96.19

च॒मू॒षच्छ्ये॒नः श॑कु॒नो वि॒भृत्वा॑ गोवि॒न्दुर्द्र॒प्स आयु॑धानि॒ बिभ्र॑त् ।
अ॒पामू॒र्मिं सच॑मानः समु॒द्रं तु॒रीयं॒ धाम॑ महि॒षो वि॑वक्ति ॥१९॥

Chamushachchhyenah shakuno vibhritva govindurdrapsa ayudhani bibhrat
Apamurmim sachamanah samudram turiyam dhama mahisho vivakti

96.20

मर्यो॒ न शु॒भ्रस्त॒न्वं॑ मृजा॒नोऽत्यो॒ न सृत्वा॑ स॒नये॒ धना॑नाम् ।
वृषे॑व यू॒था परि॒ कोश॒मर्ष॒न्कनि॑क्रदच्च॒म्वो॒३रा वि॑वेश ॥२०॥

Maryo na shubhrastanvam mrijanotyo na sritva sanaye dhananam
Vrisheva yutha pari koshamarshankanikradachchamvo3ra vivesha

96.21

पव॑स्वेन्दो॒ पव॑मानो॒ महो॑भि॒ः कनि॑क्रद॒त्परि॒ वारा॑ण्यर्ष ।
क्रीळ॑ञ्च॒म्वो॒३रा वि॑श पू॒यमा॑न॒ इन्द्रं॑ ते॒ रसो॑ मदि॒रो म॑मत्तु ॥२१॥

Pavasvendo pavamano mahobhih kanikradatpari varanyarsha
Krilanchamvo3ra visha puyamana indram te raso madiro mamattu

96.22

प्रास्य॒ धारा॑ बृह॒तीर॑सृग्रन्न॒क्तो गोभि॑ः क॒लशाँ॒ आ
वि॑वेश । साम॑ कृ॒ण्वन्त्सा॑म॒न्यो॑ विप॒श्चित्क्रन्द॑न्नेत्य॒भि सख्यु॒र्न जा॒मिम् ॥२२॥

Prasya dhara brihatirasrigrannakto gobhih kalasham a
Vivesha, sama krinvantsamanyo vipashchitkrandannetyabhi sakhyurna jamim

96.23

अ॒प॒घ्नन्ने॑षि पवमान॒ शत्रू॑न्प्रि॒यां न जा॒रो अ॒भिगी॑त॒ इन्दु॑ः ।
सीद॒न्वने॑षु शकु॒नो न पत्वा॒ सोम॑ः पुना॒नः क॒लशे॑षु॒ सत्ता॑ ॥२३॥

Apaghnanneshi pavamana shatrunpriyam na jaro abhigita induh
Sidanvaneshu shakuno na patva somah punanah kalasheshu satta

96.24

आ ते॒ रुच॒ः पव॑मानस्य सोम॒ योषे॑व यन्ति सु॒दुघा॑ः सुधा॒राः ।
हरि॒रानी॑तः पुरु॒वारो॑ अ॒प्स्वचि॑क्रदत्क॒लशे॑ देवयू॒नाम् ॥२४॥

A te ruchah pavamanasya soma yosheva yanti sudughah sudharah
Hariranitah puruvaro apsvachikradatkalashe devayunam