Sukta 97

97.1

(58) 1-3 maitravarunirvasishthah, 4-6 vasishtha indrapramatih, 7-9 vasishtho vrishaganah, 10 -12 vasishtho manyu :, 13-15 vasishtha upamanyuh, 16-18 vasishtho vyaghrapad, 19 -21 vasishthah shaktih, 22-24 vasishthah karnashrud, 25 -27 vasishtho mrilikah, 28-30 vasishtho vasukrah, 31-44 parasharah shaktyah, 45-58 kutsa angirasah, pavamanah somah, trishtup

अ॒स्य प्रे॒षा हे॒मना॑ पू॒यमा॑नो दे॒वो दे॒वेभि॒ः सम॑पृक्त॒ रस॑म् ।
सु॒तः प॒वित्रं॒ पर्ये॑ति॒ रेभ॑न्मि॒तेव॒ सद्म॑ पशु॒मान्ति॒ होता॑ ॥१॥

Asya presha hemana puyamano devo devebhih samaprikta rasam
Sutah pavitram paryeti rebhanmiteva sadma pashumanti hota

97.2

भ॒द्रा वस्त्रा॑ सम॒न्या॒३ वसा॑नो म॒हान्क॒विर्नि॒वच॑नानि॒ शंस॑न् ।
आ व॑च्यस्व च॒म्वो॑ः पू॒यमा॑नो विचक्ष॒णो जागृ॑विर्दे॒ववी॑तौ ॥२॥

Bhadra vastra samanya3 vasano mahankavirnivachanani shansan
A vachyasva chamvoh puyamano vichakshano jagrivirdevavitau

97.3

समु॑ प्रि॒यो मृ॑ज्यते॒ सानो॒ अव्ये॑ य॒शस्त॑रो य॒शसां॒ क्षैतो॑ अ॒स्मे ।
अ॒भि स्व॑र॒ धन्वा॑ पू॒यमा॑नो यू॒यं पा॑त स्व॒स्तिभि॒ः सदा॑ नः ॥३॥

Samu priyo mrijyate sano avye yashastaro yashasam kshaito asme
Abhi svara dhanva puyamano yuyam pata svastibhih sada nah

97.4

प्र गा॑यता॒भ्य॑र्चाम दे॒वान्त्सोमं॑ हिनोत मह॒ते धना॑य ।
स्वा॒दुः प॑वाते॒ अति॒ वार॒मव्य॒मा सी॑दाति क॒लशं॑ देव॒युर्न॑ः ॥४॥

Pra gayatabhyarchama devantsomam hinota mahate dhanaya
Svaduh pavate ati varamavyama sidati kalasham devayurnah

97.5

इन्दु॑र्दे॒वाना॒मुप॑ स॒ख्यमा॒यन्त्स॒हस्र॑धारः पवते॒ मदा॑य ।
नृभि॒ः स्तवा॑नो॒ अनु॒ धाम॒ पूर्व॒मग॒न्निन्द्रं॑ मह॒ते सौभ॑गाय ॥५॥

Indurdevanamupa sakhyamayantsahasradharah pavate madaya
Nribhih stavano anu dhama purvamagannindram mahate saubhagaya

97.6

स्तो॒त्रे रा॒ये हरि॑रर्षा पुना॒न इन्द्रं॒ मदो॑ गच्छतु ते॒ भरा॑य ।
दे॒वैर्या॑हि स॒रथं॒ राधो॒ अच्छा॑ यू॒यं पा॑त स्व॒स्तिभि॒ः सदा॑ नः ॥६॥

Stotre raye harirarsha punana indram mado gachchhatu te bharaya
Devairyahi saratham radho achchha yuyam pata svastibhih sada nah

97.7

प्र काव्य॑मु॒शने॑व ब्रुवा॒णो दे॒वो दे॒वानां॒ जनि॑मा विवक्ति ।
महि॑व्रत॒ः शुचि॑बन्धुः पाव॒कः प॒दा व॑रा॒हो अ॒भ्ये॑ति॒ रेभ॑न् ॥७॥

Pra kavyamushaneva bruvano devo devanam janima vivakti
Mahivratah shuchibandhuh pavakah pada varaho abhyeti rebhan

97.8

प्र हं॒सास॑स्तृ॒पलं॑ म॒न्युमच्छा॒मादस्तं॒ वृष॑गणा अयासुः ।
आ॒ङ्गू॒ष्यं१ पव॑मानं॒ सखा॑यो दु॒र्मर्षं॑ सा॒कं प्र व॑दन्ति वा॒णम् ॥८॥

Pra hansasastripalam manyumachchhamadastam vrishagana ayasuh
Angushyan1 pavamanam sakhayo durmarsham sakam pra vadanti vanam

97.9

स रं॑हत उरुगा॒यस्य॑ जू॒तिं वृथा॒ क्रीळ॑न्तं मिमते॒ न गाव॑ः ।
प॒री॒ण॒सं कृ॑णुते ति॒ग्मशृ॑ङ्गो॒ दिवा॒ हरि॒र्ददृ॑शे॒ नक्त॑मृ॒ज्रः ॥९॥

Sa ranhata urugayasya jutim vritha krilantam mimate na gavah
Parinasam krinute tigmashringo diva harirdadrishe naktamrijrah

97.10

इन्दु॑र्वा॒जी प॑वते॒ गोन्यो॑घा॒ इन्द्रे॒ सोम॒ः सह॒ इन्व॒न्मदा॑य ।
हन्ति॒ रक्षो॒ बाध॑ते॒ पर्यरा॑ती॒र्वरि॑वः कृ॒ण्वन्वृ॒जन॑स्य॒ राजा॑ ॥१०॥

Indurvaji pavate gonyogha indre somah saha invanmadaya
Hanti raksho badhate paryaratirvarivah krinvanvrijanasya raja

97.11

अध॒ धार॑या॒ मध्वा॑ पृचा॒नस्ति॒रो रोम॑ पवते॒ अद्रि॑दुग्धः ।
इन्दु॒रिन्द्र॑स्य स॒ख्यं जु॑षा॒णो दे॒वो दे॒वस्य॑ मत्स॒रो मदा॑य ॥११॥

Adha dharaya madhva prichanastiro roma pavate adridugdhah
Indurindrasya sakhyam jushano devo devasya matsaro madaya

97.12

अ॒भि प्रि॒याणि॑ पवते पुना॒नो दे॒वो दे॒वान्त्स्वेन॒ रसे॑न पृ॒ञ्चन् ।
इन्दु॒र्धर्मा॑ण्यृतु॒था वसा॑नो॒ दश॒ क्षिपो॑ अव्यत॒ सानो॒ अव्ये॑ ॥१२॥

Abhi priyani pavate punano devo devantsvena rasena princhan
Indurdharmanyritutha vasano dasha kshipo avyata sano avye

97.13

वृषा॒ शोणो॑ अभि॒कनि॑क्रद॒द्गा न॒दय॑न्नेति पृथि॒वीमु॒त द्याम् ।
इन्द्र॑स्येव व॒ग्नुरा शृ॑ण्व आ॒जौ प्र॑चे॒तय॑न्नर्षति॒ वाच॒मेमाम् ॥१३॥

Vrisha shono abhikanikradadga nadayanneti prithivimuta dyam
Indrasyeva vagnura shrinva ajau prachetayannarshati vachamemam

97.14

र॒साय्य॒ः पय॑सा॒ पिन्व॑मान ई॒रय॑न्नेषि॒ मधु॑मन्तमं॒शुम् ।
पव॑मानः संत॒निमे॑षि कृ॒ण्वन्निन्द्रा॑य सोम परिषि॒च्यमा॑नः ॥१४॥

Rasayyah payasa pinvamana irayanneshi madhumantamanshum
Pavamanah santanimeshi krinvannindraya soma parishichyamanah

97.15

ए॒वा प॑वस्व मदि॒रो मदा॑योदग्रा॒भस्य॑ न॒मय॑न्वध॒स्नैः ।
परि॒ वर्णं॒ भर॑माणो॒ रुश॑न्तं ग॒व्युर्नो॑ अर्ष॒ परि॑ सोम सि॒क्तः ॥१५॥

Eva pavasva madiro madayodagrabhasya namayanvadhasnaih
Pari varnam bharamano rushantam gavyurno arsha pari soma siktah

97.16

जु॒ष्ट्वी न॑ इन्दो सु॒पथा॑ सु॒गान्यु॒रौ प॑वस्व॒ वरि॑वांसि कृ॒ण्वन् ।
घ॒नेव॒ विष्व॑ग्दुरि॒तानि॑ वि॒घ्नन्नधि॒ ष्णुना॑ धन्व॒ सानो॒ अव्ये॑ ॥१६॥

Jushtvi na indo supatha suganyurau pavasva varivansi krinvan
Ghaneva vishvagduritani vighnannadhi shnuna dhanva sano avye

97.17

वृ॒ष्टिं नो॑ अर्ष दि॒व्यां जि॑ग॒त्नुमिळा॑वतीं शं॒गयीं॑ जी॒रदा॑नुम् ।
स्तुके॑व वी॒ता ध॑न्वा विचि॒न्वन्बन्धूँ॑रि॒माँ अव॑राँ इन्दो वा॒यून् ॥१७॥

Vrishtim no arsha divyam jigatnumilavatim shangayim jiradanum
Stukeva vita dhanva vichinvanbandhunrimam avaram indo vayun

97.18

ग्र॒न्थिं न वि ष्य॑ ग्रथि॒तं पु॑ना॒न ऋ॒जुं च॑ गा॒तुं वृ॑जि॒नं च॑ सोम ।
अत्यो॒ न क्र॑दो॒ हरि॒रा सृ॑जा॒नो मर्यो॑ देव धन्व प॒स्त्या॑वान् ॥१८॥

Granthim na vi shya grathitam punana rijum cha gatum vrijinam cha soma
Atyo na krado harira srijano maryo deva dhanva pastyavan

97.19

जुष्टो॒ मदा॑य दे॒वता॑त इन्दो॒ परि॒ ष्णुना॑ धन्व॒ सानो॒ अव्ये॑ ।
स॒हस्र॑धारः सुर॒भिरद॑ब्ध॒ः परि॑ स्रव॒ वाज॑सातौ नृ॒षह्ये॑ ॥१९॥

Jushto madaya devatata indo pari shnuna dhanva sano avye
Sahasradharah surabhiradabdhah pari srava vajasatau nrishahye

97.20

अ॒र॒श्मानो॒ ये॑ऽर॒था अयु॑क्ता॒ अत्या॑सो॒ न स॑सृजा॒नास॑ आ॒जौ ।
ए॒ते शु॒क्रासो॑ धन्वन्ति॒ सोमा॒ देवा॑स॒स्ताँ उप॑ याता॒ पिब॑ध्यै ॥२०॥

Arashmano yeratha ayukta atyaso na sasrijanasa ajau
Ete shukraso dhanvanti soma devasastam upa yata pibadhyai

97.21

ए॒वा न॑ इन्दो अ॒भि दे॒ववी॑तिं॒ परि॑ स्रव॒ नभो॒ अर्ण॑श्च॒मूषु॑ ।
सोमो॑ अ॒स्मभ्यं॒ काम्यं॑ बृ॒हन्तं॑ र॒यिं द॑दातु वी॒रव॑न्तमु॒ग्रम् ॥२१॥

Eva na indo abhi devavitim pari srava nabho arnashchamushu
Somo asmabhyam kamyam brihantam rayim dadatu viravantamugram

97.22

तक्ष॒द्यदी॒ मन॑सो॒ वेन॑तो॒ वाग्ज्येष्ठ॑स्य वा॒ धर्म॑णि॒ क्षोरनी॑के ।
आदी॑माय॒न्वर॒मा वा॑वशा॒ना जुष्टं॒ पतिं॑ क॒लशे॒ गाव॒ इन्दु॑म् ॥२२॥

Takshadyadi manaso venato vagjyeshthasya va dharmani kshoranike
Adimayanvarama vavashana jushtam patim kalashe gava indum

97.23

प्र दा॑नु॒दो दि॒व्यो दा॑नुपि॒न्व ऋ॒तमृ॒ताय॑ पवते सुमे॒धाः ।
ध॒र्मा भु॑वद्वृज॒न्य॑स्य॒ राजा॒ प्र र॒श्मिभि॑र्द॒शभि॑र्भारि॒ भूम॑ ॥२३॥

Pra danudo divyo danupinva ritamritaya pavate sumedhah
Dharma bhuvadvrijanyasya raja pra rashmibhirdashabhirbhari bhuma

97.24

प॒वित्रे॑भि॒ः पव॑मानो नृ॒चक्षा॒ राजा॑ दे॒वाना॑मु॒त मर्त्या॑नाम् ।
द्वि॒ता भु॑वद्रयि॒पती॑ रयी॒णामृ॒तं भ॑र॒त्सुभृ॑तं॒ चार्विन्दु॑ः ॥२४॥

Pavitrebhih pavamano nrichaksha raja devanamuta martyanam
Dvita bhuvadrayipati rayinamritam bharatsubhritam charvinduh

97.25

अर्वाँ॑ इव॒ श्रव॑से सा॒तिमच्छेन्द्र॑स्य वा॒योर॒भि वी॒तिम॑र्ष ।
स न॑ः स॒हस्रा॑ बृह॒तीरिषो॑ दा॒ भवा॑ सोम द्रविणो॒वित्पु॑ना॒नः ॥२५॥

Arvam iva shravase satimachchhendrasya vayorabhi vitimarsha
Sa nah sahasra brihatirisho da bhava soma dravinovitpunanah

97.26

दे॒वा॒व्यो॑ नः परिषि॒च्यमा॑ना॒ः क्षयं॑ सु॒वीरं॑ धन्वन्त॒ सोमा॑ः ।
आ॒य॒ज्यव॑ः सुम॒तिं वि॒श्ववा॑रा॒ होता॑रो॒ न दि॑वि॒यजो॑ म॒न्द्रत॑माः ॥२६॥

Devavyo nah parishichyamanah kshayam suviram dhanvanta somah
Ayajyavah sumatim vishvavara hotaro na diviyajo mandratamah

97.27

ए॒वा दे॑व दे॒वता॑ते पवस्व म॒हे सो॑म॒ प्सर॑से देव॒पान॑ः ।
म॒हश्चि॒द्धि ष्मसि॑ हि॒ताः स॑म॒र्ये कृ॒धि सु॑ष्ठा॒ने रोद॑सी पुना॒नः ॥२७॥

Eva deva devatate pavasva mahe soma psarase devapanah
Mahashchiddhi shmasi hitah samarye kridhi sushthane rodasi punanah

97.28

अश्वो॒ नो क्र॑दो॒ वृष॑भिर्युजा॒नः सिं॒हो न भी॒मो मन॑सो॒ जवी॑यान् ।
अ॒र्वा॒चीनै॑ः प॒थिभि॒र्ये रजि॑ष्ठा॒ आ प॑वस्व सौमन॒सं न॑ इन्दो ॥२८॥

Ashvo no krado vrishabhiryujanah sinho na bhimo manaso javiyan
Arvachinaih pathibhirye rajishtha a pavasva saumanasam na indo

97.29

श॒तं धारा॑ दे॒वजा॑ता असृग्रन्त्स॒हस्र॑मेनाः क॒वयो॑ मृजन्ति ।
इन्दो॑ स॒नित्रं॑ दि॒व आ प॑वस्व पुरए॒तासि॑ मह॒तो धन॑स्य ॥२९॥

Shatam dhara devajata asrigrantsahasramenah kavayo mrijanti
Indo sanitram diva a pavasva puraetasi mahato dhanasya

97.30

दि॒वो न सर्गा॑ अससृग्र॒मह्नां॒ राजा॒ न मि॒त्रं प्र मि॑नाति॒ धीर॑ः ।
पि॒तुर्न पु॒त्रः क्रतु॑भिर्यता॒न आ प॑वस्व वि॒शे अ॒स्या अजी॑तिम् ॥३०॥

Divo na sarga asasrigramahnam raja na mitram pra minati dhirah
Piturna putrah kratubhiryatana a pavasva vishe asya ajitim

97.31

प्र ते॒ धारा॒ मधु॑मतीरसृग्र॒न्वारा॒न्यत्पू॒तो अ॒त्येष्यव्या॑न् ।
पव॑मान॒ पव॑से॒ धाम॒ गोनां॑ जज्ञा॒नः सूर्य॑मपिन्वो अ॒र्कैः ॥३१॥

Pra te dhara madhumatirasrigranvaranyatputo atyeshyavyan
Pavamana pavase dhama gonam jagyanah suryamapinvo arkaih

97.32

कनि॑क्रद॒दनु॒ पन्था॑मृ॒तस्य॑ शु॒क्रो वि भा॑स्य॒मृत॑स्य॒ धाम॑ ।
स इन्द्रा॑य पवसे मत्स॒रवा॑न्हिन्वा॒नो वाचं॑ म॒तिभि॑ः कवी॒नाम् ॥३२॥

Kanikradadanu panthamritasya shukro vi bhasyamritasya dhama
Sa indraya pavase matsaravanhinvano vacham matibhih kavinam

97.33

दि॒व्यः सु॑प॒र्णोऽव॑ चक्षि सोम॒ पिन्व॒न्धारा॒ः कर्म॑णा दे॒ववी॑तौ ।
एन्दो॑ विश क॒लशं॑ सोम॒धानं॒ क्रन्द॑न्निहि॒ सूर्य॒स्योप॑ र॒श्मिम् ॥३३॥

Divyah suparnova chakshi soma pinvandharah karmana devavitau
Endo visha kalasham somadhanam krandannihi suryasyopa rashmim

97.34

ति॒स्रो वाच॑ ईरयति॒ प्र वह्नि॑ॠ॒तस्य॑ धी॒तिं ब्रह्म॑णो मनी॒षाम् ।
गावो॑ यन्ति॒ गोप॑तिं पृ॒च्छमा॑ना॒ः सोमं॑ यन्ति म॒तयो॑ वावशा॒नाः ॥३४॥

Tisro vacha irayati pra vahniritasya dhitim brahmano manisham
Gavo yanti gopatim prichchhamanah somam yanti matayo vavashanah

97.35

सोमं॒ गावो॑ धे॒नवो॑ वावशा॒नाः सोमं॒ विप्रा॑ म॒तिभि॑ः पृ॒च्छमा॑नाः ।
सोम॑ः सु॒तः पू॑यते अ॒ज्यमा॑न॒ः सोमे॑ अ॒र्कास्त्रि॒ष्टुभ॒ः सं न॑वन्ते ॥३५॥

Somam gavo dhenavo vavashanah somam vipra matibhih prichchhamanah
Somah sutah puyate ajyamanah some arkastrishtubhah sam navante

97.36

ए॒वा न॑ः सोम परिषि॒च्यमा॑न॒ आ प॑वस्व पू॒यमा॑नः स्व॒स्ति ।
इन्द्र॒मा वि॑श बृह॒ता रवे॑ण व॒र्धया॒ वाचं॑ ज॒नया॒ पुरं॑धिम् ॥३६॥

Eva nah soma parishichyamana a pavasva puyamanah svasti
Indrama visha brihata ravena vardhaya vacham janaya purandhim

97.37

आ जागृ॑वि॒र्विप्र॑ ऋ॒ता म॑ती॒नां सोम॑ः पुना॒नो अ॑सदच्च॒मूषु॑ ।
सप॑न्ति॒ यं मि॑थु॒नासो॒ निका॑मा अध्व॒र्यवो॑ रथि॒रास॑ः सु॒हस्ता॑ः ॥३७॥

A jagrivirvipra rita matinam somah punano asadachchamushu
Sapanti yam mithunaso nikama adhvaryavo rathirasah suhastah

97.38

स पु॑ना॒न उप॒ सूरे॒ न धातोभे अ॑प्रा॒ रोद॑सी॒ वि ष आ॑वः ।
प्रि॒या चि॒द्यस्य॑ प्रिय॒सास॑ ऊ॒ती स तू धनं॑ का॒रिणे॒ न प्र यं॑सत् ॥३८॥

Sa punana upa sure na dhatobhe apra rodasi vi sha avah
Priya chidyasya priyasasa uti sa tu dhanam karine na pra yansat

97.39

स व॑र्धि॒ता वर्ध॑नः पू॒यमा॑न॒ः सोमो॑ मी॒ढ्वाँ अ॒भि नो॒ ज्योति॑षावीत् ।
येना॑ न॒ः पूर्वे॑ पि॒तर॑ः पद॒ज्ञाः स्व॒र्विदो॑ अ॒भि गा अद्रि॑मु॒ष्णन् ॥३९॥

Sa vardhita vardhanah puyamanah somo midhvam abhi no jyotishavit
Yena nah purve pitarah padagyah svarvido abhi ga adrimushnan

97.40

अक्रा॑न्त्समु॒द्रः प्र॑थ॒मे विध॑र्मञ्ज॒नय॑न्प्र॒जा भुव॑नस्य॒ राजा॑ ।
वृषा॑ प॒वित्रे॒ अधि॒ सानो॒ अव्ये॑ बृ॒हत्सोमो॑ वावृधे सुवा॒न इन्दु॑ः ॥४०॥

Akrantsamudrah prathame vidharmanjanayanpraja bhuvanasya raja
Vrisha pavitre adhi sano avye brihatsomo vavridhe suvana induh

97.41

म॒हत्तत्सोमो॑ महि॒षश्च॑कारा॒ऽपां यद्गर्भोऽवृ॑णीत दे॒वान् ।
अद॑धा॒दिन्द्रे॒ पव॑मान॒ ओजोऽज॑नय॒त्सूर्ये॒ ज्योति॒रिन्दु॑ः ॥४१॥

Mahattatsomo mahishashchakarapam yadgarbhovrinita devan
Adadhadindre pavamana ojojanayatsurye jyotirinduh

97.42

मत्सि॑ वा॒युमि॒ष्टये॒ राध॑से च॒ मत्सि॑ मि॒त्रावरु॑णा पू॒यमा॑नः ।
मत्सि॒ शर्धो॒ मारु॑तं॒ मत्सि॑ दे॒वान्मत्सि॒ द्यावा॑पृथि॒वी दे॑व सोम ॥४२॥

Matsi vayumishtaye radhase cha matsi mitravaruna puyamanah
Matsi shardho marutam matsi devanmatsi dyavaprithivi deva soma

97.43

ऋ॒जुः प॑वस्व वृजि॒नस्य॑ ह॒न्ताऽपामी॑वां॒ बाध॑मानो॒ मृध॑श्च ।
अ॒भि॒श्री॒णन्पय॒ः पय॑सा॒भि गोना॒मिन्द्र॑स्य॒ त्वं तव॑ व॒यं सखा॑यः ॥४३॥

Rijuh pavasva vrijinasya hantapamivam badhamano mridhashcha
Abhishrinanpayah payasabhi gonamindrasya tvam tava vayam sakhayah

97.44

मध्व॒ः सूदं॑ पवस्व॒ वस्व॒ उत्सं॑ वी॒रं च॑ न॒ आ प॑वस्वा॒ भगं॑ च ।
स्वद॒स्वेन्द्रा॑य॒ पव॑मान इन्दो र॒यिं च॑ न॒ आ प॑वस्वा समु॒द्रात् ॥४४॥

Madhvah sudam pavasva vasva utsam viram cha na a pavasva bhagam cha
Svadasvendraya pavamana indo rayim cha na a pavasva samudrat

97.45

सोम॑ः सु॒तो धार॒यात्यो॒ न हित्वा॒ सिन्धु॒र्न नि॒म्नम॒भि वा॒ज्य॑क्षाः ।
आ योनिं॒ वन्य॑मसदत्पुना॒नः समिन्दु॒र्गोभि॑रसर॒त्सम॒द्भिः ॥४५॥

Somah suto dharayatyo na hitva sindhurna nimnamabhi vajyakshah
A yonim vanyamasadatpunanah samindurgobhirasaratsamadbhih

97.46

ए॒ष स्य ते॑ पवत इन्द्र॒ सोम॑श्च॒मूषु॒ धीर॑ उश॒ते तव॑स्वान् ।
स्व॑र्चक्षा रथि॒रः स॒त्यशु॑ष्म॒ः कामो॒ न यो दे॑वय॒तामस॑र्जि ॥४६॥

Esha sya te pavata indra somashchamushu dhira ushate tavasvan
Svarchaksha rathirah satyashushmah kamo na yo devayatamasarji

97.47

ए॒ष प्र॒त्नेन॒ वय॑सा पुना॒नस्ति॒रो वर्पां॑सि दुहि॒तुर्दधा॑नः ।
वसा॑न॒ः शर्म॑ त्रि॒वरू॑थम॒प्सु होते॑व याति॒ सम॑नेषु॒ रेभ॑न् ॥४७॥

Esha pratnena vayasa punanastiro varpansi duhiturdadhanah
Vasanah sharma trivaruthamapsu hoteva yati samaneshu rebhan

97.48

नू न॒स्त्वं र॑थि॒रो दे॑व सोम॒ परि॑ स्रव च॒म्वो॑ः पू॒यमा॑नः ।
अ॒प्सु स्वादि॑ष्ठो॒ मधु॑माँ ऋ॒तावा॑ दे॒वो न यः स॑वि॒ता स॒त्यम॑न्मा ॥४८॥

Nu nastvam rathiro deva soma pari srava chamvoh puyamanah
Apsu svadishtho madhumam ritava devo na yah savita satyamanma

97.49

अ॒भि वा॒युं वी॒त्य॑र्षा गृणा॒नो॒३ऽभि मि॒त्रावरु॑णा पू॒यमा॑नः ।
अ॒भी नरं॑ धी॒जव॑नं रथे॒ष्ठाम॒भीन्द्रं॒ वृष॑णं॒ वज्र॑बाहुम् ॥४९॥

Abhi vayum vityarsha grinano3bhi mitravaruna puyamanah
Abhi naram dhijavanam ratheshthamabhindram vrishanam vajrabahum

97.50

अ॒भि वस्त्रा॑ सुवस॒नान्य॑र्षा॒ऽभि धे॒नूः सु॒दुघा॑ः पू॒यमा॑नः ।
अ॒भि च॒न्द्रा भर्त॑वे नो॒ हिर॑ण्या॒ऽभ्यश्वा॑न्र॒थिनो॑ देव सोम ॥५०॥

Abhi vastra suvasananyarshabhi dhenuh sudughah puyamanah
Abhi chandra bhartave no hiranyabhyashvanrathino deva soma

97.51

अ॒भी नो॑ अर्ष दि॒व्या वसू॑न्य॒भि विश्वा॒ पार्थि॑वा पू॒यमा॑नः ।
अ॒भि येन॒ द्रवि॑णम॒श्नवा॑मा॒ऽभ्या॑र्षे॒यं ज॑मदग्नि॒वन्न॑ः ॥५१॥

Abhi no arsha divya vasunyabhi vishva parthiva puyamanah
Abhi yena dravinamashnavamabhyarsheyam jamadagnivannah

97.52

अ॒या प॒वा प॑वस्वै॒ना वसू॑नि माँश्च॒त्व इ॑न्दो॒ सर॑सि॒ प्र ध॑न्व ।
ब्र॒ध्नश्चि॒दत्र॒ वातो॒ न जू॒तः पु॑रु॒मेध॑श्चि॒त्तक॑वे॒ नरं॑ दात् ॥५२॥

Aya pava pavasvaina vasuni manshchatva indo sarasi pra dhanva
Bradhnashchidatra vato na jutah purumedhashchittakave naram dat

97.53

उ॒त न॑ ए॒ना प॑व॒या प॑व॒स्वाऽधि॑ श्रु॒ते श्र॒वाय्य॑स्य ती॒र्थे ।
ष॒ष्टिं स॒हस्रा॑ नैगु॒तो वसू॑नि वृ॒क्षं न प॒क्वं धू॑नव॒द्रणा॑य ॥५३॥

Uta na ena pavaya pavasvadhi shrute shravayyasya tirthe
Shashtim sahasra naiguto vasuni vriksham na pakvam dhunavadranaya

97.54

मही॒मे अ॑स्य॒ वृष॒नाम॑ शू॒षे माँश्च॑त्वे वा॒ पृश॑ने वा॒ वध॑त्रे ।
अस्वा॑पयन्नि॒गुत॑ः स्ने॒हय॒च्चाऽपा॒मित्राँ॒ अपा॒चितो॑ अचे॒तः ॥५४॥

Mahime asya vrishanama shushe manshchatve va prishane va vadhatre
Asvapayannigutah snehayachchapamitram apachito achetah

97.55

सं त्री प॒वित्रा॒ वित॑तान्ये॒ष्यन्वेकं॑ धावसि पू॒यमा॑नः ।
असि॒ भगो॒ असि॑ दा॒त्रस्य॑ दा॒ताऽसि॑ म॒घवा॑ म॒घव॑द्भ्य इन्दो ॥५५॥

Sam tri pavitra vitatanyeshyanvekam dhavasi puyamanah
Asi bhago asi datrasya datasi maghava maghavadbhya indo

97.56

ए॒ष वि॑श्व॒वित्प॑वते मनी॒षी सोमो॒ विश्व॑स्य॒ भुव॑नस्य॒ राजा॑ ।
द्र॒प्साँ ई॒रय॑न्वि॒दथे॒ष्विन्दु॒र्वि वार॒मव्यं॑ स॒मयाति॑ याति ॥५६॥

Esha vishvavitpavate manishi somo vishvasya bhuvanasya raja
Drapsam irayanvidatheshvindurvi varamavyam samayati yati

97.57

इन्दुं॑ रिहन्ति महि॒षा अद॑ब्धाः प॒दे रे॑भन्ति क॒वयो॒ न गृध्रा॑ः ।
हि॒न्वन्ति॒ धीरा॑ द॒शभि॒ः क्षिपा॑भि॒ः सम॑ञ्जते रू॒पम॒पां रसे॑न ॥५७॥

Indum rihanti mahisha adabdhah pade rebhanti kavayo na gridhrah
Hinvanti dhira dashabhih kshipabhih samanjate rupamapam rasena

97.58

त्वया॑ व॒यं पव॑मानेन सोम॒ भरे॑ कृ॒तं वि चि॑नुयाम॒ शश्व॑त् ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥५८॥

Tvaya vayam pavamanena soma bhare kritam vi chinuyama shashvat
Tanno mitro varuno mamahantamaditih sindhuh prithivi uta dyauh