সূক্ত 92

92.1

৬ কশ্যপো মারীচঃ । পবমানঃ সোমঃ । ত্রিষ্টুপ্ ।

পরি সুবানো হরিরংশুঃ পবিত্রে রথো ন সর্জি সনয়ে হিয়ানঃ ।
আপচ্ছ্লোকমিন্দ্রিয়ং পূয়মানঃ প্রতি দেবাঁ অজুষত প্রয়োভিঃ ॥১॥

92.2

অচ্ছা নৃচক্ষা অসরত্পবিত্রে নাম দধানঃ কবিরস্য যোনৌ ।
সীদন্হোতেব সদনে চমূষূপেমগ্মন্নৃষয়ঃ সপ্ত বিপ্রাঃ ॥২॥

92.3

প্র সুমেধা গাতুবিদ্বিশ্বদেবঃ সোমঃ পুনানঃ সদ এতি নিত্যম্ ।
ভুবদ্বিশ্বেষু কাব্যেষু রন্তাঽনু জনান্যততে পঞ্চ ধীরঃ ॥৩॥

92.4

তব ত্যে সোম পবমান নিণ্যে বিশ্বে দেবাস্ত্রয় একাদশাসঃ ।
দশ স্বধাভিরধি সানো অব্যে মৃজন্তি ত্বা নদ্যঃ সপ্ত যহ্বীঃ ॥৪॥

92.5

তন্নু সত্যং পবমানস্যাস্তু যত্র বিশ্বে কারবঃ সংনসন্ত ।
জ্যোতির্যদহ্নে অকৃণোদু লোকং প্রাবন্মনুং দস্যবে করভীকম্ ॥৫॥

92.6

পরি সদ্মেব পশুমান্তি হোতা রাজা ন সত্যঃ সমিতীরিয়ানঃ ।
সোমঃ পুনানঃ কলশাঁ অয়াসীত্সীদন্মৃগো ন মহিষো বনেষু ॥৬॥