Sukta 92

92.1

6 kashyapo marichah, pavamanah somah, trishtup

परि॑ सुवा॒नो हरि॑रं॒शुः प॒वित्रे॒ रथो॒ न स॑र्जि स॒नये॑ हिया॒नः ।
आप॒च्छ्लोक॑मिन्द्रि॒यं पू॒यमा॑न॒ः प्रति॑ दे॒वाँ अ॑जुषत॒ प्रयो॑भिः ॥१॥

Pari suvano hariranshuh pavitre ratho na sarji sanaye hiyanah
Apachchhlokamindriyam puyamanah prati devam ajushata prayobhih

अच्छा॑ नृ॒चक्षा॑ असरत्प॒वित्रे॒ नाम॒ दधा॑नः क॒विर॑स्य॒ योनौ॑ ।
सीद॒न्होते॑व॒ सद॑ने च॒मूषूपे॑मग्म॒न्नृष॑यः स॒प्त विप्रा॑ः ॥२॥

Achchha nrichaksha asaratpavitre nama dadhanah kavirasya yonau
Sidanhoteva sadane chamushupemagmannrishayah sapta viprah

प्र सु॑मे॒धा गा॑तु॒विद्वि॒श्वदे॑व॒ः सोम॑ः पुना॒नः सद॑ एति॒ नित्य॑म् ।
भुव॒द्विश्वे॑षु॒ काव्ये॑षु॒ रन्ताऽनु॒ जना॑न्यतते॒ पञ्च॒ धीर॑ः ॥३॥

Pra sumedha gatuvidvishvadevah somah punanah sada eti nityam
Bhuvadvishveshu kavyeshu rantanu jananyatate pancha dhirah

तव॒ त्ये सो॑म पवमान नि॒ण्ये विश्वे॑ दे॒वास्त्रय॑ एकाद॒शास॑ः ।
दश॑ स्व॒धाभि॒रधि॒ सानो॒ अव्ये॑ मृ॒जन्ति॑ त्वा न॒द्य॑ः स॒प्त य॒ह्वीः ॥४॥

Tava tye soma pavamana ninye vishve devastraya ekadashasah
Dasha svadhabhiradhi sano avye mrijanti tva nadyah sapta yahvih

तन्नु स॒त्यं पव॑मानस्यास्तु॒ यत्र॒ विश्वे॑ का॒रव॑ः सं॒नस॑न्त ।
ज्योति॒र्यदह्ने॒ अकृ॑णोदु लो॒कं प्राव॒न्मनुं॒ दस्य॑वे कर॒भीक॑म् ॥५॥

Tannu satyam pavamanasyastu yatra vishve karavah sannasanta
Jyotiryadahne akrinodu lokam pravanmanum dasyave karabhikam

परि॒ सद्मे॑व पशु॒मान्ति॒ होता॒ राजा॒ न स॒त्यः समि॑तीरिया॒नः ।
सोम॑ः पुना॒नः क॒लशाँ॑ अयासी॒त्सीद॑न्मृ॒गो न म॑हि॒षो वने॑षु ॥६॥

Pari sadmeva pashumanti hota raja na satyah samitiriyanah
Somah punanah kalasham ayasitsidanmrigo na mahisho vaneshu