Sukta 93

93.1

5 nodha gautamah, pavamanah somah, trishtup

सा॒क॒मुक्षो॑ मर्जयन्त॒ स्वसा॑रो॒ दश॒ धीर॑स्य धी॒तयो॒ धनु॑त्रीः ।
हरि॒ः पर्य॑द्रव॒ज्जाः सूर्य॑स्य॒ द्रोणं॑ ननक्षे॒ अत्यो॒ न वा॒जी ॥१॥

Sakamuksho marjayanta svasaro dasha dhirasya dhitayo dhanutrih
Harih paryadravajjah suryasya dronam nanakshe atyo na vaji

सं मा॒तृभि॒र्न शिशु॑र्वावशा॒नो वृषा॑ दधन्वे पुरु॒वारो॑ अ॒द्भिः ।
मर्यो॒ न योषा॑म॒भि नि॑ष्कृ॒तं यन्त्सं ग॑च्छते क॒लश॑ उ॒स्रिया॑भिः ॥२॥

Sam matribhirna shishurvavashano vrisha dadhanve puruvaro adbhih
Maryo na yoshamabhi nishkritam yantsam gachchhate kalasha usriyabhih

उ॒त प्र पि॑प्य॒ ऊध॒रघ्न्या॑या॒ इन्दु॒र्धारा॑भिः सचते सुमे॒धाः ।
मू॒र्धानं॒ गाव॒ः पय॑सा च॒मूष्व॒भि श्री॑णन्ति॒ वसु॑भि॒र्न नि॒क्तैः ॥३॥

Uta pra pipya udharaghnyaya indurdharabhih sachate sumedhah
Murdhanam gavah payasa chamushvabhi shrinanti vasubhirna niktaih

स नो॑ दे॒वेभि॑ः पवमान र॒देन्दो॑ र॒यिम॒श्विनं॑ वावशा॒नः ।
र॒थि॒रा॒यता॑मुश॒ती पुरं॑धिरस्म॒द्र्य१गा दा॒वने॒ वसू॑नाम् ॥४॥

Sa no devebhih pavamana radendo rayimashvinam vavashanah
Rathirayatamushati purandhirasmadrya1ga davane vasunam

नू नो॑ र॒यिमुप॑ मास्व नृ॒वन्तं॑ पुना॒नो वा॒ताप्यं॑ वि॒श्वश्च॑न्द्रम् ।
प्र व॑न्दि॒तुरि॑न्दो ता॒र्यायु॑ः प्रा॒तर्म॒क्षू धि॒याव॑सुर्जगम्यात् ॥५॥

Nu no rayimupa masva nrivantam punano vatapyam vishvashchandram
Pra vanditurindo taryayuh pratarmakshu dhiyavasurjagamyat