Sukta 91

91.1

6 kashyapo marichah, pavamanah somah, trishtup

अस॑र्जि॒ वक्वा॒ रथ्ये॒ यथा॒जौ धि॒या म॒नोता॑ प्रथ॒मो म॑नी॒षी ।
दश॒ स्वसा॑रो॒ अधि॒ सानो॒ अव्येऽज॑न्ति॒ वह्निं॒ सद॑ना॒न्यच्छ॑ ॥१॥

Asarji vakva rathye yathajau dhiya manota prathamo manishi
Dasha svasaro adhi sano avyejanti vahnim sadananyachchha

वी॒ती जन॑स्य दि॒व्यस्य॑ क॒व्यैरधि॑ सुवा॒नो न॑हु॒ष्ये॑भि॒रिन्दु॑ः ।
प्र यो नृभि॑र॒मृतो॒ मर्त्ये॑भिर्मर्मृजा॒नोऽवि॑भि॒र्गोभि॑र॒द्भिः ॥२॥

Viti janasya divyasya kavyairadhi suvano nahushyebhirinduh
Pra yo nribhiramrito martyebhirmarmrijanovibhirgobhiradbhih

वृषा॒ वृष्णे॒ रोरु॑वदं॒शुर॑स्मै॒ पव॑मानो॒ रुश॑दीर्ते॒ पयो॒ गोः ।
स॒हस्र॒मृक्वा॑ प॒थिभि॑र्वचो॒विद॑ध्व॒स्मभि॒ः सूरो॒ अण्वं॒ वि या॑ति ॥३॥

Vrisha vrishne roruvadanshurasmai pavamano rushadirte payo goh
Sahasramrikva pathibhirvachovidadhvasmabhih suro anvam vi yati

रु॒जा दृ॒ळ्हा चि॑द्र॒क्षस॒ः सदां॑सि पुना॒न इ॑न्द ऊर्णुहि॒ वि वाजा॑न् ।
वृ॒श्चोपरि॑ष्टात्तुज॒ता व॒धेन॒ ये अन्ति॑ दू॒रादु॑पना॒यमे॑षाम् ॥४॥

Ruja drilha chidrakshasah sadansi punana inda urnuhi vi vajan
Vrishchoparishtattujata vadhena ye anti duradupanayamesham

स प्र॑त्न॒वन्नव्य॑से विश्ववार सू॒क्ताय॑ प॒थः कृ॑णुहि॒ प्राच॑ः ।
ये दु॒ःषहा॑सो व॒नुषा॑ बृ॒हन्त॒स्ताँस्ते॑ अश्याम पुरुकृत्पुरुक्षो ॥५॥

Sa pratnavannavyase vishvavara suktaya pathah krinuhi prachah
Ye duhshahaso vanusha brihantastanste ashyama purukritpuruksho

ए॒वा पु॑ना॒नो अ॒पः स्व१र्गा अ॒स्मभ्यं॑ तो॒का तन॑यानि॒ भूरि॑ ।
शं न॒ः क्षेत्र॑मु॒रु ज्योतीं॑षि सोम॒ ज्योङ्न॒ः सूर्यं॑ दृ॒शये॑ रिरीहि ॥६॥

Eva punano apah sva1rga asmabhyam toka tanayani bhuri
Sham nah kshetramuru jyotinshi soma jyonnah suryam drishaye ririhi