সূক্ত 89

89.1

৭ উশনা কাব্যঃ । পবমানঃ সোমঃ । ত্রিষ্টুপ্ ।

প্রো স্য বহ্নিঃ পথ্যাভিরস্যান্দিবো ন বৃষ্টিঃ পবমানো অক্ষাঃ ।
সহস্রধারো অসদন্ন্য১স্মে মাতুরুপস্থে বন আ চ সোমঃ ॥১॥

89.2

রাজা সিন্ধূনামবসিষ্ট বাস ঋতস্য নাবমারুহদ্রজিষ্ঠাম্ ।
অপ্সু দ্রপ্সো বাবৃধে শ্যেনজূতো দুহ ঈং পিতা দুহ ঈং পিতুর্জাম্ ॥২॥

89.3

সিংহং নসন্ত মধ্বো অয়াসং হরিমরুষং দিবো অস্য পতিম্ ।
শূরো যুত্সু প্রথমঃ পৃচ্ছতে গা অস্য চক্ষসা পরি পাত্যুক্ষা ॥৩॥

89.4

মধুপৃষ্ঠং ঘোরময়াসমশ্বং রথে যুঞ্জন্ত্যুরুচক্র ঋষ্বম্ ।
স্বসার ঈং জাময়ো মর্জয়ন্তি সনাভয়ো বাজিনমূর্জয়ন্তি ॥৪॥

89.5

চতস্র ঈং ঘৃতদুহঃ সচন্তে সমানে অন্তর্ধরুণে নিষত্তাঃ ।
তা ঈমর্ষন্তি নমসা পুনানাস্তা ঈং বিশ্বতঃ পরি ষন্তি পূর্বীঃ ॥৫॥

89.6

বিষ্টম্ভো দিবো ধরুণঃ পৃথিব্যা বিশ্বা উত ক্ষিতয়ো হস্তে অস্য ।
অসত্ত উত্সো গৃণতে নিয়ুত্বান্মধ্বো অংশুঃ পবত ইন্দ্রিয়ায় ॥৬॥

89.7

বন্বন্নবাতো অভি দেববীতিমিন্দ্রায় সোম বৃত্রহা পবস্ব ।
শগ্ধি মহঃ পুরুশ্চন্দ্রস্য রায়ঃ সুবীর্যস্য পতয়ঃ স্যাম ॥৭॥