Sukta 89

89.1

7 ushana kavyah, pavamanah somah, trishtup

प्रो स्य वह्नि॑ः प॒थ्या॑भिरस्यान्दि॒वो न वृ॒ष्टिः पव॑मानो अक्षाः ।
स॒हस्र॑धारो असद॒न्न्य१स्मे मा॒तुरु॒पस्थे॒ वन॒ आ च॒ सोम॑ः ॥१॥

Pro sya vahnih pathyabhirasyandivo na vrishtih pavamano akshah
Sahasradharo asadannya1sme maturupasthe vana a cha somah

राजा॒ सिन्धू॑नामवसिष्ट॒ वास॑ ऋ॒तस्य॒ नाव॒मारु॑ह॒द्रजि॑ष्ठाम् ।
अ॒प्सु द्र॒प्सो वा॑वृधे श्ये॒नजू॑तो दु॒ह ईं॑ पि॒ता दु॒ह ईं॑ पि॒तुर्जाम् ॥२॥

Raja sindhunamavasishta vasa ritasya navamaruhadrajishtham
Apsu drapso vavridhe shyenajuto duha im pita duha im piturjam

सिं॒हं न॑सन्त॒ मध्वो॑ अ॒यासं॒ हरि॑मरु॒षं दि॒वो अ॒स्य पति॑म् ।
शूरो॑ यु॒त्सु प्र॑थ॒मः पृ॑च्छते॒ गा अस्य॒ चक्ष॑सा॒ परि॑ पात्यु॒क्षा ॥३॥

Sinham nasanta madhvo ayasam harimarusham divo asya patim
Shuro yutsu prathamah prichchhate ga asya chakshasa pari patyuksha

मधु॑पृष्ठं घो॒रम॒यास॒मश्वं॒ रथे॑ युञ्जन्त्युरुच॒क्र ऋ॒ष्वम् ।
स्वसा॑र ईं जा॒मयो॑ मर्जयन्ति॒ सना॑भयो वा॒जिन॑मूर्जयन्ति ॥४॥

Madhuprishtham ghoramayasamashvam rathe yunjantyuruchakra rishvam
Svasara im jamayo marjayanti sanabhayo vajinamurjayanti

चत॑स्र ईं घृत॒दुह॑ः सचन्ते समा॒ने अ॒न्तर्ध॒रुणे॒ निष॑त्ताः ।
ता ई॑मर्षन्ति॒ नम॑सा पुना॒नास्ता ईं॑ वि॒श्वत॒ः परि॑ षन्ति पू॒र्वीः ॥५॥

Chatasra im ghritaduhah sachante samane antardharune nishattah
Ta imarshanti namasa punanasta im vishvatah pari shanti purvih

वि॒ष्ट॒म्भो दि॒वो ध॒रुण॑ः पृथि॒व्या विश्वा॑ उ॒त क्षि॒तयो॒ हस्ते॑ अस्य ।
अस॑त्त॒ उत्सो॑ गृण॒ते नि॒युत्वा॒न्मध्वो॑ अं॒शुः प॑वत इन्द्रि॒याय॑ ॥६॥

Vishtambho divo dharunah prithivya vishva uta kshitayo haste asya
Asatta utso grinate niyutvanmadhvo anshuh pavata indriyaya

व॒न्वन्नवा॑तो अ॒भि दे॒ववी॑ति॒मिन्द्रा॑य सोम वृत्र॒हा प॑वस्व ।
श॒ग्धि म॒हः पु॑रुश्च॒न्द्रस्य॑ रा॒यः सु॒वीर्य॑स्य॒ पत॑यः स्याम ॥७॥

Vanvannavato abhi devavitimindraya soma vritraha pavasva
Shagdhi mahah purushchandrasya rayah suviryasya patayah syama