Sukta 88

88.1

8 ushana kavyah, pavamanah somah, trishtup

अ॒यं सोम॑ इन्द्र॒ तुभ्यं॑ सुन्वे॒ तुभ्यं॑ पवते॒ त्वम॑स्य पाहि ।
त्वं ह॒ यं च॑कृ॒षे त्वं व॑वृ॒ष इन्दुं॒ मदा॑य॒ युज्या॑य॒ सोम॑म् ॥१॥

Ayam soma indra tubhyam sunve tubhyam pavate tvamasya pahi
Tvam ha yam chakrishe tvam vavrisha indum madaya yujyaya somam

स ईं॒ रथो॒ न भु॑रि॒षाळ॑योजि म॒हः पु॒रूणि॑ सा॒तये॒ वसू॑नि ।
आदीं॒ विश्वा॑ नहु॒ष्या॑णि जा॒ता स्व॑र्षाता॒ वन॑ ऊ॒र्ध्वा न॑वन्त ॥२॥

Sa im ratho na bhurishalayoji mahah puruni sataye vasuni
Adim vishva nahushyani jata svarshata vana urdhva navanta

वा॒युर्न यो नि॒युत्वाँ॑ इ॒ष्टया॑मा॒ नास॑त्येव॒ हव॒ आ शम्भ॑विष्ठः ।
वि॒श्ववा॑रो द्रविणो॒दा इ॑व॒ त्मन्पू॒षेव॑ धी॒जव॑नोऽसि सोम ॥३॥

Vayurna yo niyutvam ishtayama nasatyeva hava a shambhavishthah
Vishvavaro dravinoda iva tmanpusheva dhijavanosi soma

इन्द्रो॒ न यो म॒हा कर्मा॑णि॒ चक्रि॑र्ह॒न्ता वृ॒त्राणा॑मसि सोम पू॒र्भित् ।
पै॒द्वो न हि त्वमहि॑नाम्नां ह॒न्ता विश्व॑स्यासि सोम॒ दस्यो॑ः ॥४॥

Indro na yo maha karmani chakrirhanta vritranamasi soma purbhit
Paidvo na hi tvamahinamnam hanta vishvasyasi soma dasyoh

अ॒ग्निर्न यो वन॒ आ सृ॒ज्यमा॑नो॒ वृथा॒ पाजां॑सि कृणुते न॒दीषु॑ ।
जनो॒ न युध्वा॑ मह॒त उ॑प॒ब्दिरिय॑र्ति॒ सोम॒ः पव॑मान ऊ॒र्मिम् ॥५॥

Agnirna yo vana a srijyamano vritha pajansi krinute nadishu
Jano na yudhva mahata upabdiriyarti somah pavamana urmim

ए॒ते सोमा॒ अति॒ वारा॒ण्यव्या॑ दि॒व्या न कोशा॑सो अ॒भ्रव॑र्षाः ।
वृथा॑ समु॒द्रं सिन्ध॑वो॒ न नीची॑ः सु॒तासो॑ अ॒भि क॒लशाँ॑ असृग्रन् ॥६॥

Ete soma ati varanyavya divya na koshaso abhravarshah
Vritha samudram sindhavo na nichih sutaso abhi kalasham asrigran

शु॒ष्मी शर्धो॒ न मारु॑तं पव॒स्वान॑भिशस्ता दि॒व्या यथा॒ विट् ।
आपो॒ न म॒क्षू सु॑म॒तिर्भ॑वा नः स॒हस्रा॑प्साः पृतना॒षाण्न य॒ज्ञः ॥७॥

Shushmi shardho na marutam pavasvanabhishasta divya yatha vit
Apo na makshu sumatirbhava nah sahasrapsah pritanashanna yagyah

राज्ञो॒ नु ते॒ वरु॑णस्य व्र॒तानि॑ बृ॒हद्ग॑भी॒रं तव॑ सोम॒ धाम॑ ।
शुचि॒ष्ट्वम॑सि प्रि॒यो न मि॒त्रो द॒क्षाय्यो॑ अर्य॒मेवा॑सि सोम ॥८॥

Ragyo nu te varunasya vratani brihadgabhiram tava soma dhama
Shuchishtvamasi priyo na mitro dakshayyo aryamevasi soma