সূক্ত 88

88.1

৮ উশনা কাব্যঃ । পবমানঃ সোমঃ । ত্রিষ্টুপ্ ।

অয়ং সোম ইন্দ্র তুভ্যং সুন্বে তুভ্যং পবতে ত্বমস্য পাহি ।
ত্বং হ যং চকৃষে ত্বং ববৃষ ইন্দুং মদায় যুজ্যায় সোমম্ ॥১॥

88.2

স ঈং রথো ন ভুরিষালয়োজি মহঃ পুরূণি সাতয়ে বসূনি ।
আদীং বিশ্বা নহুষ্যাণি জাতা স্বর্ষাতা বন ঊর্ধ্বা নবন্ত ॥২॥

88.3

বায়ুর্ন যো নিয়ুত্বাঁ ইষ্টয়ামা নাসত্যেব হব আ শম্ভবিষ্ঠঃ ।
বিশ্ববারো দ্রবিণোদা ইব ত্মন্পূষেব ধীজবনোঽসি সোম ॥৩॥

88.4

ইন্দ্রো ন যো মহা কর্মাণি চক্রির্হন্তা বৃত্রাণামসি সোম পূর্ভিৎ ।
পৈদ্বো ন হি ত্বমহিনাম্নাং হন্তা বিশ্বস্যাসি সোম দস্যোঃ ॥৪॥

88.5

অগ্নির্ন যো বন আ সৃজ্যমানো বৃথা পাজাংসি কৃণুতে নদীষু ।
জনো ন যুধ্বা মহত উপব্দিরিয়র্তি সোমঃ পবমান ঊর্মিম্ ॥৫॥

88.6

এতে সোমা অতি বারাণ্যব্যা দিব্যা ন কোশাসো অভ্রবর্ষাঃ ।
বৃথা সমুদ্রং সিন্ধবো ন নীচীঃ সুতাসো অভি কলশাঁ অসৃগ্রন্ ॥৬॥

88.7

শুষ্মী শর্ধো ন মারুতং পবস্বানভিশস্তা দিব্যা যথা বিট্ ।
আপো ন মক্ষূ সুমতির্ভবা নঃ সহস্রাপ্সাঃ পৃতনাষাণ্ন যজ্ঞঃ ॥৭॥

88.8

রাজ্ঞো নু তে বরুণস্য ব্রতানি বৃহদ্গভীরং তব সোম ধাম ।
শুচিষ্ট্বমসি প্রিয়ো ন মিত্রো দক্ষায্যো অর্যমেবাসি সোম ॥৮॥